Zefaniya 2
2
1Mwitingane hamwe, mwemwe iwanu wa isi imlihela chinyala, 2ng'ana mghulusighwe baye kutali ka mibangu, ng'ana iwatsile baye imaya ng'ulu ya IMNDEWA, ng'ana liwatsile baye litsuwa lya imaya ya IMNDEWA. 3Mbameni IMNDEWA mwemwe iwanu imwihulumsa imkala muisi, mwemwe imkinda ghamalaghitso ghake. Mtende ighomnoghela IMNDEWA na muwe wanu wahole, songaha mtsokomboka mna litsuwa IMNDEWA hayatsoghala imaya yake.
Tsiisi tsili habehi tsotowighwa
4Mna litsuwa alyo IMNDEWA hayatsoghala imaya yake.wanu watsoghuhama ghumji ghwa Gaza, na ghumji ghwa Ashikeloni ghutsokala yekayeka. Iwanu iwokala Ashidodi watsowingighwa nemisi na awala iwokala Ekironi pfipfila watsowingighwa. 5Mtsochona mwemwe imkala habehibehi na ibahali, mwemwe iwanu wa ilukolo lwa Kirete, imli Wafilisiti iwokala mna isi ya Kanani, IMNDEWA komlongani apfino, “Katsowakoma wose na kuduhu munu iyatsokala mgima!” 6Na isi ayo ili habehi na ibahali itsakuwa hanu ha ukudimila iwanyama, kutsakuwa na ipfibumbulika pfa ukukala iwadimi na kutsakuwa na imibanda ya ukukala iwang'olo. 7Isi ayo ili habehibehi na ibahali itsakuwa ya wanu wa Yuda, awala iwalekighwe wagima. Ako watsodima wanyama wawo, na chilo hachikwingila watsowasa mna tsing'anda tsa ghumji ghwa Ashikeloni. Kwaapfila IMNDEWA Imulungu wawo katsowatunza na katsowatenda webwede keli. 8IMNDEWA yana tsingupfu tsose kolonga, “Nene niwahulika iwanu wa Moabu na iwanu wa Amoni pfawawalighile na pfawawabetsile iwanu wangu na apfila pfawatambile kuiboka isi yawo. 9Nene IMNDEWA Imulungu wa Isiraeli yanikala mgima nelighita ghendo ka isi ya Moabu itsakuwa ka Sodoma, na isi ya Amoni itsakuwa ka Gomola. Isi tsawo tsitsakuwa na chibumuwaghe na ghamapondo gha munyu, natso tsitsokala yeka yeka ghendo. Iwanu wangu iwalekighwe wagima, awala iwahoneke watsoboka pfinu pfawo na watsosola isi tsawo.” 10Achino chicho chawatsopata iwanu wa Moabu na Amoni kwa ichidandali chawo, kwa ukuwaligha iwanu wa IMNDEWA yana tsingupfu tsose. 11IMNDEWA katsowatenda wapfuke ahala hayatsoihinya milungu yose ili muisi. Iwanu wose iwali mna tsiisi tsili kutali watsomwinamila, chila munu hana isi yake. 12Namwe muwanu wa Kushi, immanyika ka Waesiopia mtsokomighwa kwa lipanga lyake. 13Imulungu katsogholosa ghumoko ghwake kaskazini yaihinye isi ya Ashuru. Katsoghutenda ghumji ghwa Ninawi ghuwe yeka yeka, na ghuwe hanu hasakale ka jangwa. 14Iwanyama watsowasa haghatighati ha ghumji agho, wabondwa, yangeyange na korongo watsokala mna tsingutso tsake, wapfimulu watsolila mna ghamadilisha ghake, wabondwa watsolila mna ipfitsingiti kwaapfila tsing'anda tsake tsa miyeletsi tsitsokala tsahela chinu. 15Pfihi aghuno ghugho ghumji ghwighodile na kukala tseghamba, ghumji ghulongile, “Nene niliyeka, kuduhu yungi!” Lola pfaghukalile uchuwa na iwanyama wa mwibagho wokala amo! Chila yopfosa katsoghukowela na katsoghubetsa.
Pioneer Bible Translators and The Word For The World
Learn More About Laghano Lya Sambi Kwe Iwanu Wose