Zakaria 3
3
Inabii komwona Joshua Imtambika mkulu mna indoto
1Haning'ali namndoto IMNDEWA kanilangusa Yoshua, mtambika mkulu, yeye tsakema hambele ha imalaika wa IMNDEWA na ubali wake wa kujilo tsakema shetani komlapfila ghamaghomba. 2Imalaika wa IMNDEWA kamlongela shetani, Ghwe Shetani IMNDEWA yakukembele! IMNDEWA iyaghusaghule ghumji ghwa Yerusalemu kokukembela! Angu imunu yuno si chiwenge ichilapfighwe mna ghumoto baye? 3Yoshua, imtambika mkulu tsakema hambele ha imalaika wa Imulungu, aku kapfala mabwende ghapfinale. 4Malaika wa Imulungu kawalongela awala iwemile hambele hake, “Mtsuleni ghamabwende ghake ghapfinale.” Kuya kamlongela Yoshua, “Lola, nikuleghusila nzambi yako, na nene nitsokwing'a ghamabwende ighanoghile.” 5Kuya kawalongela wampfatse chilemba chinoghile mwitwi mwake, apfo wampfatsa ichilemba na tsinguwo tsinoghile, naye malaika wa IMNDEWA tsakema habehi. 6Malaika wa IMNDEWA kamlaghitsa Joshua apfino, 7“IMNDEWA yana tsingupfu tsose kolonga apfino, ‘Ung'awinza tsinzila tsangu na ung'akinda ghamalaghitso ghangu, kutsoilongotsa ing'anda yangu na kutsakuwa mkulu wa libalatsa. Naghwe kutsodaha kunisoghelela nene ka pfawali awala iwakwima hambele hangu.’ 8Lelo tegheletsa Yoshua. imtambika mkulu, ghweghwe hamwe na weyagho imkala hambele, mwemwe imli chitango cha ghamatsuwa ghanoghile ighakutsa; Nitsomghala mtumighwa wangu iyokemighwa Nyotela. 9Kwaapfila hambele ha Yoshua tsanika libwe limwe lina ipfihanga saba. Na nene nitsakwandika kwa ukusongola mna ilibwe alyo, nitsoileghusa inzambi ya isi aino kwa litsuwa limwe. Nene IMNDEWA yana tsingupfu tsose nilonga apfo. 10Mna litsuwa alyo chila yumwe wenu katsomkema miyaghe yatse yabwihile hasi ha mitsabibu na hasi ha ghumbiki ghwa mitini.”
Pioneer Bible Translators and The Word For The World
Learn More About Laghano Lya Sambi Kwe Iwanu Wose