Zakaria 2
2
Ghamaono gha kadatu: Imunu yane lutsabi lwa kulingila
1Haning'ali namndoto, tsandola kuchanya baho nimwona imunu kakinda lutsabi lwa ukulingila mna ghumoko ghwake. 2Nimghutsa, “Ughenda kwani?” Naye kanyidika “Noghenda kughulinga ghumji ghwa Yerusalemu, nobama nimanye ughatsi wake na utali wake.” 3Imlaika ayula iyang'ali yolonga na nene hayang'ali yakuka, baho malaika yungi kaghenda kwitingana naye, 4kamlongela miyaghe, “Utsume ukamlongele msongolo ayula ka ghumji ghwa Yerusalemu ghutsakuwa ghwahela ubanda kwaapfila kutsakuwa na mifugho mingi na iwanu wengi iwokala amwo. 5Nene mwenyegho nitsakuwa ubanda wa ghumoto ighukinga ghumji na nitsokala mumo nilanguse ukulu wangu.”
Iwaghalighwe kutali wokemighwa woye ukaye
6IMNEWA kolonga apfino; “Mtse, mtse, tsumeni kulawa kuna isi ya kasikazini, ako nene tsaniwapwililisa chila hanu. 7Mtsume muye Sayuni, mwemwe wose imkala Babeli.” 8Kwaapfila IMNDEWA yana tsingupfu tsose kalonga apfino; “Yeye iyali na ukulu kanituma nene nitsilongele apfino tsiisi tsila itsibokile ipfinu pfenu ka ayula iyowadolitsa mwemwe komdolitsa ichiluli cha inenge yake. 9Nitsowenulila ghendo ghumoko ghwangu mna wawo nawo watumwa wawo watsoboka ipfinu pfawo.” Baho mtsomanya ka IMNDEWA yana tsingupfu yuyo iyanitumile. 10IMNDEWA kolonga apfino; “Mwemwe wanu wa Sayuni, mwimbe na mdeng'elela kwaapfila nakutsa kukala hamwe namwe. 11Iwanu kulawa isi tsingi watsomghendela IMNDEWA, nawo watsakuwa wanu wake, nani nitsokala nawo.” Ipfinu apfo hapfitsolawila baho mtsomanya ka Imulungu yuyo iyanitumile kuna mwemwe. 12Iwanu wa Yuda watsakuwa keli na mali ya IMNDEWA mna isi yelile na katsoghusaghula ghumji ghwa Yerusalemu ghuwe ghwake keli 13Mwemwe wanu wose mwinyamale hambele ha IMNDEWA kwaapfila yeye kakutsa kulawa hanu hake helile.
Pioneer Bible Translators and The Word For The World
Learn More About Laghano Lya Sambi Kwe Iwanu Wose