Malaki 3
3
1IMNDEWA iyana tsingupfu tsose kolonga, “Mlole, nomtuma msenga wangu yalongole hambele hangu yanyikile ghoya inzila. Naye Imndewa iyamumbama katsolitsila lihekalu lyake kwa kwidukitsa, imsenga ayula wa lilaghano yambama ukumwona, lola kakutsa.” 2Lekeni nani iyatsodudumila mna litsuwa lyayatsakutsa? Au nani iyatsakwima hayatsakoneka yeye? Kwaapfila yeye keghala na ghumoto ghwa litanulu, na keghala na isabuni ya imunu iyotsapfa tsinguwo. 3Yeye katsokala ka imunu iyolakatsa ifetsa yaideghetetse, katsowadeghetetsa iwana wa Lawi na kuwatenda wele ka nzahabu na fetsa, nawo watsomlapfila IMNDEWA nambiko tsa haki. 4Baho tsinambiko tsa Yuda na wa Yerusalemu tsitsomnoghela IMNDEWA ka mna ghamatsuwa gha ghumwande, na ka mna imiyaka ya ghumwande.
5IMNDEWA iyana tsingupfu kolonga apfino, “Nene nitsowatsila habehi nimuhigheni. Nitsosumka kulapfa ukalangama kwa iwahawi, kwa iwotenda ughoni, na kwa iwelaha ughutsu, na iwowabunza tsisendi wapfibaluwa wawo, na iwowaoneha wapfitsuka na iwachuwa, iwowema iwagheni haki tsawo, wala ng'awonipfuka nene baye.”
Mleke ukumwibila Imulungu
6Kwaapfila nene yuyo IMNDEWA, na sighaluka baye. Achino chicho chitendile mbaka mwemwe iwanu wa Yakobo mleke ukuhupa. 7Kulawa mna ghamatsuwa gha iwahenga wenu, mghaleka ghamalaghitso ghangu, na ng'amghakinda baye. Lekeni nene IMNDEWA iyana tsingupfu tsose nolonga apfino, “Mbuyileni nene, na nene nitsowoyilani mwemwe.” Namwe mwolonga, “Angu tutsokuyilatse?” 8Angu imunu kodaha kumwibila Imulungu? Lekeni mwemwe mwonyibila nene, kuya mwoghutsa, “Angu tukwibiletsa?” Mnyibila izaka na tsinambiko. 9Mwemwe na isi yose mlighitighwa kwaapfila mwonyibila nene. 10Nene IMNDEWA iyana tsingupfu tsose nolonga apfino, “Mghale tsizaka itsenele mkano ili mng'anda mwangu muwe na chijo chingi, mnighetse kwa ukutenda apfo, mlole ka sitsowapfughulila baye ghamadilisha gha kulanga na kuwamwaghilani pfinu pfingi pfinoghile mbaka mleke kuwa na hanu ha ukupfika. 11Nitsowakembela iwang'onyo iwohinya ipfijo, nawo ng'awatsopfihinya baye ipfijo mna imighunda yenu, wala iminzabibu yenu ng'aitsopaghatisa ghamatunda ghake ng'ana ghakomale baye. Nene IMNDEWA iyana tsingupfu iyanilonga apfo. 12Baho iwanu wa tsiisi tsose watsolonga mwemwe mbweda, kwaapfila isi yenu itsakuwa ya ukudeng'elela. Nene IMNDEWA iyana tsingupfu iyanilonga apfo.”
Imulungu kolonga pfayatsowonela libatsi
13IMNDEWA kolonga, “Ghamalonga ghamlongile nene ghaniluma,” Lekeni mwemwe mwolonga “Angu tukulongile choni?” 14Mwemwe mlonga, “Ukumtumikila Imulungu ng'akuliha chinu baye. Na tupatile choni kwa kukinda malaghitso ghake na kwa ukughenda tudomboketsa hambele ha IMNDEWA iyana tsingupfu? 15Na sambi twolonga iwanu wana ichidandali wawo iwobweda, na iwotenda ighehile wawo iwoghelighwa tsingupfu, na awala iwomghetsa Imulungu wawo iwohona.” 16Baho iwanu iwompfuka IMNDEWA hawelongele wawo kwa wao, naye IMNDEWA kawahulikitsa, na kawahulika chawang'ali wolonga. Na hambele hake chikighwa ichitabu cha ukukumbukighwa awala iwompfuka, na awala iwolifikitsa litaghwa lyake. 17Nawo watsakuwa wanu wangu, mna litsuwa alila lya ukuhigha lyanikwika, ona watsakuwa hatsina yangu, na nene nitsowalekelela ka apfila imunu pfayomlekelela imwanaghe iyomtumkila. Nene IMNDEWA iyana tsingupfu iyanilonga apfo. 18Baho hamtsomanya na ukutanga iwanu wana ihaki na iwanu iwehile, na ayula iyomtumikila Imulungu na ayula ing'ayomtumikila.
Pioneer Bible Translators and The Word For The World
Learn More About Laghano Lya Sambi Kwe Iwanu Wose