Malaki 2
2
1IMNDEWA iyana tsingupfu tsose kowalongela iwatambika, “Ghamalaghitso aghano gha kwenu mwemwe. 2Ka mwolema kughategheletsa ghanilonga, na ka ng'ambama baye kughafikitsa mna imimoyo yenu ili mlitunye litaghwa lyangu nitsowalighita, na tsibalaka tsenu tsose nitsotsilighita, hata apfo ma nitsilighita kwaapfila ng'amghakindile baye ghamalaghitso ghangu. Nene IMNDEWA iyanilonga apfo.” 3Mlole, nitsowakembela iwana wenu, na ipfihanga pfenu nitsopfibaka imipfi ya iwanyama wenu wamnilapfile tsinambiko. Namwe mtsolapfighwa mke hamwe na imipfi ayo. 4Namwe mtsomanya ka nimwing'eni laghitso alino ili laghano lyangu na likale na Lawi. Nene IMNDEWA iyana tsingupfu iyanilonga apfo. 5“Lilaghano lyangu na yeye tsalikala lya ugima, na lya ukukala tseghamba. Nene nimwing'a ili yanipfuke, naye tsakapfuka na kalipfuka litaghwa lyangu. 6Yeye yang'ali yolongesa hayolangulitsa, wala ng'alongile ughutsu wowose baye. Tsakanga ghoya na nene mna inzila igholoke, na kawatenda wanu wengi waleke tsinzambi. 7Kwaapfila mtambika kobamighwa yawe na mbuli tsa ukumanya. Na iwanu wobamighwa watse kuna yeye yawalangulitse, kwaapfila yeye ka imsenga wa IMNDEWA iyana tsingupfu. 8Lekeni mwemwe mghaluka muyileka inzila inoghile ya IMNDEWA. Ghamalangulitso ghenu ghawatenda iwanu wengi watende ghehile. Mlibena lilaghano lya Lawi. Nene IMNDEWA iyana tsingupfu iyanilonga apfo. 9Apfo nene niwatenda mmbetsighwe na iwanu wose na mghelighwe chinyala, kwaapfila ng'amtsiwinzile tsinzila tsangu baye, na hamuhigha mwolola ipfihanga pfa iwanu.”
Iwanu ing'awotogholeka kwa Imulungu
10Apfi twetwe wose si wana wa aba yumwe baye? Twetwe wose Imulungu iyatuumbile si yumwe baye? Lelo hebali twetwe kwa twetwe twetendela ghehile, na kulibena lilaghano lya iwahenga wetu? 11Iwanu wa Yuda ng'awakalile kwa ukutogholeka hambele ha IMNDEWA, watenda ghehile mna isi ya Isiraeli na mna ghumji ghwa Yerusalemu. Ing'anda ya IMNDEWA iyoikunda waitenda ihe, na wawakwela wapinga iwotambikila milungu migheni. 12IMNDEWA yawabaghule iwanu iwotenda apfo, imunu wowose iyotenda apfo yambaghule kulawa kuna ing'anda ya Yakobu, hata ka komlapfila nambiko IMNDEWA iyana tsingupfu. 13Pfipfila chinu chingi chihile chamtenda, mwoimemetsa imatsabahu ya IMNDEWA kwa ghamasotsi ghenu, mwolila na ukudomboketsa kwaapfila yeye ng'otsitoghola baye tsinambiko tsamumlapfila. 14Kuya mwoghutsa, “Hebali ng'otsitoghola?” IMNDEWA ng'otsitoghola baye tsinambiko tsenu, kwaapfila yeye tsamkalangama wa lilaghano lyawikile na imwehe wa ubwanga wako, lekeni ghweghwe kumbiduka na kulibena lilaghano alyo. 15Angu Imulungu ng'awatendile mwemwe wose wabili muwe lukuli lumwe na loho imwe? Angu hayatendile agho tsa choni chayabamile? Tsakabama tweleke iwana iwatsompfuka yeye. Apfo mwalangitse kuleke kuwa na munu iyatsobena lilaghano lyayekile na imwehe wa ubwanga wake.
16IMNDEWA Imulungu wa Israeli, kolonga, “Nene nakwihila ukwileka!” Pfipfila sinoghelwa baye ahala imunu hayomtendela pfihile mwehe wake. Apfo mwalangitse mna tsiloho tsenu mleke kuwabiduka wehe tsenu.
Litsuwa lya kuhigha lyahabehi
17Mwomtenda IMNDEWA yepfe kwa ghamalonga ghenu. Namwe mwolonga, “Tutendiletsa mbaka yepfe?” Momtenda yepfe ahala hamlonga, “IMNDEWA kowona wanogha iwanu iwotenda ghehile, naye konoghelwa nawo.” Au ahala hamghutsa, Yalikwani Imulungu yana ihaki?
Pioneer Bible Translators and The Word For The World
Learn More About Laghano Lya Sambi Kwe Iwanu Wose