Yohane 19

1Baho Pilato kamsola Yesu kamfapula kwa mijeledi. 2Maasikali wabota taji lya miba walika mwitwi mwake. Kuya wampfatsa gwanda lya chifalume lya nzambalau. 3Wang'ali womghendela na kulonga, “Mbukwa, ghwe mfalume wa Wayahudi!” Akuno womtsaba makofi.

4Pilato kalawa keli kunze kawalongela, “Mlole, nomlapfa kunze, na mmanye nene sonile totso lyolyose lya kumhigha baye.” 5Baho Yesu kalawa kunze aku kapfala litaji lya imiba na ligwanda lya chifalume lya nzambalau. Pilato kawalongela, “Mlole! Ayuno ahano.”

6Iwakulu wa iwatambika na iwatumishi wawo hawamwonile, wakemelela, walonga “Mkondeke! Mkondeke!”

Pilato kawalongela, “Msoleni, mkamkondeke mwemwe, mana nene sonile totso baye kuna yeye.”

7Wapfilongotsi wa Wayahudi wamwidika, “Twetwe tuna Sharia, na kwa isharia ayo kobamighwa yafe, kwaapfila ketenda imwenyegho Mwana wa Imlungu.”

8Pilato hayahulike apfo, kongetsa ukupfuka. 9Baho kengila keli mng'anda ya uliwali kamghutsa Yesu, “Angu ghweghwe ulawila kwani?”

Lekeni Yesu ng'amwidike baye. 10Pilato kamlongela, “Kolema ukulonga na nene? Ng'umanya baye kama nina uwetso wa kukulekelela au wa kukukondeka mna ghumsalaba?”

11Yesu kamwidika, “Ghweghwe ng'ubamile uwe na uwetso wa kunihigha kama ng'wing'ighwe kulawa kuchanya baye uwetso awo. Apfo, ayula iyanighelile mna ghamoko ghako kana nzambi ili ng'ulu ng'ani.”

12Pilato hayahulike apfi, kabama nzila ya ukumlekelela Yesu. Lekeni Wayahudi wadamilila walonga, “Ung'amlekelela ayuno, ghweghwe ng'uli mbwigha wake Kaisari baye! Chila munu iyetenda imwenyegho mfalume komtendela tsengwe Kaisari!”

13Pilato hayahulike apfo, kamlapfa Yesu kunze, kakala mna ichighoda cha ukulamlila ghamaghomba, hanu ihokemighwa “Sakafu ya Ghamabwe”, au kwa Chieburaniya “Gabatha.” 14Nayo ikala saa sita nemisi, litsuwa lya ukuitanda Ipasaka, naye kawalongela Wayahudi, “Ayuno ahano mfalume wenu!”

15Lekeni Wayahudi wadamilila,walonga, “Mkome! Mkome! Mkondeke kumsalaba!”

Pilato kawaghutsa, “Pfihi nimkondeke kumsalaba imfalume wenu?”

Iwakulu wa iwatambika wamwidika, “Twetwe twahela mfaslume yungi ila Kaisari yaliyeka!”

16Baho kamwika mmoko mwawo ili yakondekighwe.

Yesu kokondekighwa mna ghumsalaba

(Mat 27:32-44; Malk 15:21-32; Luk 23:26-43)

Nawo wambokela Yesu. 17Naye Yesu kalawa aku koduta ghumsalaba ghwake mbaka hanu hakemighwe 'Bombwe lya Litwi', na kwa Chiheburaniya hokemighwa 'Goligota'. 18Baho wamkondeka mna ghumsalaba; hamwe na yeye pfipfila wakondekighwa wanu weli, yumwe ubali auno, na wakeli ubali ungi, Yesu haghatighati. 19Naye Pilato kandika bango kalibandika mna ghumsalaba, ilyandikighwe, “Yesu Mnazareti, Mfalume wa Wayahudi.” 20Libango alyo Wayahudi wengi walisoma, kwaapfila hanu hayakondekighwe Yesu tsahakala habehi na ghumji, na libango alyo lyandikighwa kwa Chiheburaniya, kwa Chilatini na kwa Chigiriki. 21Iwakulu wa iwatambika na Wayahudi wamlongela Pilato, “Leka kwandika ‘Mfalume wa Wayahudi,’ ila wandike 'Imunu ayula iyelongile yeye mfalume wa Wayahudi'.”

22Pilato kawedika kalonga, “Chanyandike, nyandika.”

23Nawo wamaaskali hawamkondeke Yesu, wasola tsinguo tsake, watsighola mabughulu mane, chila askali bughulu lyake; wasola na likanzu nalyo. Lelo likanzu lyake tsang'alishonighwe baye, ila lifumighwa kwanzila kuchanya mbaka kuhisi. 24Apfo welongeLa, “Tuleke kulidegha, leka tutowe simbi tulole yuhi yatsolipata.” Ilawila apfino ili litimile liandiko alila ililonga,

“Wegholela tsinguo tsangu

na likanzu lyangu walitowela simbi.”

Na apfino pfipfo ghendo pfawatendile wamaaskali awala.

25Hana ghumsalaba ghwa Yesu tsawema mamo wake, lumbu wa mamo wake, Mariya mwehe wa Kileopa, na Mariya Magdalena. 26Yesu hayamwonile mai wake na imwanafunzi ayula iyamkundile kema habehi naye, kamlongela mai wake, “Mamo, ayo aho yuyo imwanagho.”

27Kuya kamlongela imwanafunzi ayula, “Lola, ayo mai wako.” Kulawa isaa yiyo, imwanafunzi ayula kamsola Mariya, koka naye ukaye yake.

Yesu kakufa

(Mat 27:45-56; Malk 15:33-41; Luk 23:44-49)

28Agho haghabitie, Yesu aku kamanya kama ghose ghatimila, ili Ghamaandiko ighelile ghatimile, kalonga, “Nakwona ng'ilu.”

29Hanu ahala tsahakala na siki, apfo wapfabika dodoki mna isiki, walika mna ilubiki lwa mhisopo, wamwikila mumlomo. 30Yesu hayanzile siki ayo kalonga, “Ghatimila.” Kenamitsa litwi lyake, kafa.

Yesu kohomighwa mlubapfu

31Tsalikala Litsuwa lya ukwitanda kwa ajili ya litsuwa lya Isabato ilupfi yake. Tsing'uli gng'atsibamighwe tsisighale mna imisalaba baye mna Litsuwa lya Sabato (mana Litsuwa lya Isabato alila tsalikala tsuwa kulu), wapfilongotsi wa Wayahudi wamlomba Pilato ghamaghulu gha iwanu iwakondekighwe ghabenighwe, kuya imitufi yawo ihulumsighwe. 32Apfo asikali waghenda, waghabena ghamaghulu gha imunu wa mwanduso iyakondekighwe hamwe na Yesu, kuya waghabena ghamaghulu gha ayula yungi. 33Lekeni hawapfikile kwa Yesu wampfika mala kafa, apfo ng'awambenile baye ghamaghulu ghake. 34Lekeni askali yumwe kamuhoma Yesu mlubapfu kwa mghoha, bahala ilawa idamu na matsi. 35Imunu iyonile ichilawile katulongela ukalangama, na ukalangama wake wolongesa; kuya yeye komanya kama kolongesa, ili mwemwe namwe mdahe kutoghola. 36Ilawila apfino ili liandiko litimile, ililonga, “Haduhu mpate ghwake ighutsobenighwa.” 37Kuya keli andiko lingine lyolonga, “Watsomlola ayula iwamhomile.”

Yesu kotsikighwa kuna imango

(Mat 27:57-61; Malk 15:42-47; Luk 23:50-56)

38Hambele, Yosefu imunu iyolawila ghumji ghwa Arimataya, kamlomba Pilato yamwing'e ilukuli lwa Yesu (Yosefu tsakakala mwanafunzi wa Yesu kwa chipfiso kwa ajili ya ukuwapfuka iwakulu wa Wayahudi). Pilato kamwing'a luhusa, apfo kaghenda kalusola. 39Yosefu tsakelongotsa na Nikodemu, imunu ayula tsaiyaghendile kwa Yesu hachilochilo aho mwanduso, naye Nikodemu kaghala kilo salasini tsa upfumba unung'ila ghoya wa manemane na udi. 40Awo walusola ilukuli lwa Yesu, walupfatsa sanda ya chitani, hamwe na aula upfumba iunung'ila ghoya, kama pfachili ichihendo cha Wayahudi cha ukutsika. 41Na hanu hayakondekighwe Yesu tsahakala na bostani, na mna ibostani ayo mkala na kaburi lya kutsikila lya sambi, lyang'ana yatsikighwe munu amwo baye. 42Kwaapfila likala Litsuwa lya Wayahudi lya ukwitanda kwa ajili ya Isabato, walwika amwo ilukuli lwa Yesu, mana likaburi alyo tsa lyahabehi.

Currently Selected:

Yohane 19: LBV

Highlight

Copy

Compare