Yohane 18

Yesu koghoghighwa

(Mat 26:47-56; Malk 14:43-50; Luk 22:47-53)

1Yesu hayamalitse ukulomba, yeye na iwanafunzi wake waloka kumwambu mwa ilwanda lwa Kidironi; na hanu aho tsahana bostani, wengila amwo yeye na iwanafunzi wake. 2Naye Yuda, iyabamile ujkumhunduka Yesu, tsakahamanya hanu ahala, kwaapfila Yesu tsakaghendagha baho na iwanafunzi wake. 3Apfo Yuda kaghenda kuna ibostani ayo, hamwe na chikosi cha asikali, na watumishi iwatumighwe na iwatambika wakulu na Mafarisayo. Watsa na pfitasa, pfiwenge na silaha. 4Yesu aku kamanya ghose ighatsomlawila, kawaghendela kawaghutsa, “Mumbama nani?”

5Wamwidika, “Yesu wa Nazareti,”

Yesu kawalongela, “Yuyo nene.” Naye Yuda iyamhunduke tsakakala kema baho hamwe nawo. 6Yesu hayawalongele, “Yuyo nene,” woya kuchughu waghwa hasi. 7Baho Yesu kawaghutsa keli, “Mumbama nani?”

Wamwidika, “Yesu wa Nazareti.”

8Yesu kawalongela, “Ambe niwalongela yuyo nene! Lelo kama mwonibama nene, walekeni awano woke.” 9Kalonga apfo ili tsaaghala ghayalongile ghatimile, “Baba iwanu awala waungayile simwaghitse hata yumwe baye.”

10Baho Simoni Petiri, tsakakala na panga, kalisomola, kamsepula lighutwi lya kujilo imtumwa wa Imtambika mkulu. Imtumwa ayo tsakakemighwa Malikus. 11Baho Yesu kamlaghitsa Petiri, “Wuyitsa lipanga mna iyala yake, pfihi ichikombe cha ghamaghayo chayangayile Baba nileke kuchinwela?”

Yesu koghalighwa kwa Anasi

12Baho awala wamaasikali, na mkulu wawo, na iwatumishi wa Wayahudi wamghogha Yesu, wamwoha, 13tanu wamghala kwa Anasi, mana Anasi tsakakala baba mkwe yake Kayafa, iyakalile mtambika mkulu ghumwaka aghula. 14Naye Kayafa yuyo ayula iyawalongele iwakulu wa Wayahudi kuwa ng'apfu munu yumwe yafe kwaajili ya ukuhona kwa iwanu.

Petiri kombela Yesu

(Mat 26:69-70; Malk 14:66-68; Luk 22:55-57)

15Simoni Petiri na mwanafunzi yungi wamuwinza Yesu. Na imwanafunzi ayula tsakamanyika na Imtambika mkulu, apfo kengila hamwe na Yesu kuna ichikuta cha Imtambika mkulu, 16lekeni Petiri kema kunze mwa lilango. Baho imwanafunzi ayula yungi iyamanyike na Imtambika mkulu kalawa, kalonga na imbetetsi wa lilango, kamwingitsa Petiri mng'anda. 17Ipinga iyobetetsa lilango kamghutsa Petiri, “Apfi naghwe ng'uli yumwe baye wa iwanafunzi wake imunu ayuno?” Naye kalonga, “Aka! Baye ghendo.”

18Kwaapfila tsakukala na chipfeghetsi, iwatumwa na iwabetetsi wabwina ghumoto, wang'ali wakota. Naye Petiri kema hamwe nawo, kakota ghumoto.

Imtambika mkulu komghutsa Yesu

(Mat 26:59-66; Malk 14:55-64; Luk 22:66-71)

19Imtambika mkulu kamghutsa Yesu tsimbuli tsa iwanafunzi wake na tsimbuli tsa ghamalangulitso ghake. 20Yesu kamwidika, “Nilonga mwatsimwatsi na iwanu wose; ghamatsuwa ghose nilangulitsa mna ghamasinagogi na mna lihekalu, hawetinganila hamwe Wayahudi wose. Silongile chinu chochose kwa chipfiso baye. 21Heule unighutsa nene? Waghutse awala iwahulike chaniwalongele, wawo womanya chanilongile choni.”

22Baho hayalongile agho, mbetetsi yumwe iyemile habehi kamtsaba kofi Yesu kalonga, “Heule umwidika apfo Imtambika mkulu?”

23Yesu kamwidika, “Ana nilongile chinu chihile, uchilonge hambele ha iwanu. Lekeni kama nilonga ghoya, unitowela choni?”

24Kuya Anasi kamghala aku kohighwa kwa Kayafa, Imtambika mkulu.

Petiri kombela keli Yesu

(Mat 26:71-75; Malk 14:69-72; Luk 22:58-62)

25Simoni Petiri tsayang'ali kema kuko kakota ghumoto, iwanu wamghutsa, “Pfihi naghwe ng'uli mwanafunzi wa imunu ayuno baye?”

Naye kebemenda, kalonga, “Aka! Baye ghendo.”

26Mtumwa yumwe wa Imtambika mkulu, naye tsandughu yake ayula iyasepulighwe lighutwi na Petiri, kamghutsa, “Angu nene sikwonile baye akula kuna ibostani uli hamwe naye?”

27Petiri kabela keli; na baho ijogholo keka.

Yesu koghalighwa kwa Pilato

(Mat 27:1-2,11-14; Malk 15:1-5; Luk 23:1-5)

28Lupfiripfiri nemitondo wamsola Yesu kulawa kwa Kayafa wamghala kuna ing'anda ya igavana wa Roma, ikemighwe Praitorio. Lekeni wawo iwenyegho ng'awengile baye mng'anda, kwaapfila wapfuka ukwitenda wehe, ili wadahe kuchija ichijo cha Ipasaka. 29Pilato kalawa kunze kawaghutsa, “Apfi kunaghomba lyachi lyamumghalile imunu ayuno?”

30Wamwidika, na kumlongela, “Kama ayuno ng'atendile totso ng'atubamile kukughalila baye.”

31Pilato kawalongela, “Lelo msoleni mkamhighe kwa aila Itorati yenu.”

Wapfilongotsi wa Wayahudi wamlongela, “Twetwe ng'atuna luhusa ya kukoma munu wowose baye.” 32Ilawila apfino ili ghatimile aghala ghayalongile Yesu, kulangusa chifo chachi chayatsakufa.

33Kuya Pilato kengila keli mng'anda, kamghutsa Yesu, “Apfi ghweghwe kwa mfalume wa Wayahudi?”

34Yesu kamghutsa, “Ghwewghwe kolonga aghano kwaghumoyo ghwako ghumwenyegho, au wanu wangi wakulongela mbuli tsangu?”

35Pilato kamwidika, “Apfi kwopfikitsa nene na Myahudi? Iwanu wako na iwatambika wakulu wawo iwakughalile kuna nene. Angu utendile choni?”

36Yesu kalonga, “Ufalume wangu si wa isi aino baye; tsaufalume wangu ung'awile wa isi aino, iwatumighwa wangu wang'etowile na Wayahudi waleke kunighogha. Lekeni ufalume wangu si wa hanu ahano baye!”

37Pilato kamghutsa, “Apfi ghweghwe kwa mfaume?”

Yesu kamwidika, “Ghweghwe kwolonga nene namfalume. Nene nyelekighwa kwa ajili ya aghano, na kwa ajili ya aghano nitsa muisi, ili nitangatse mbuli tsa ukweli. Chila munu iyali wa ukweli awo konitegheletsa chanilonga.”

38Pilato kamghutsa, “Ukweli ndo choni?”

Yesu kohighighwa yakomighwe

(Mat 27:1-2,11-14; Malk 15:1-5; Luk 23:1-5)

Kuya hayalongile alyo, kalawa keli kunze kwawali Wayahudi, kawalongela, “Nene sikona totso lyolyose baye lya ukumhigha imunu ayuno. 39Lekeni mwemwe mna ichihendo chenu, cha nene kumlekelela mwohighwa yumwe chila hachipfika ichipindi cha Pasaka; lelo pfihi mwobama nimlekeleleni Imfalume wa Wayahudi?”

40Baho wakemelela ghendo, walonga, “Baye, si ayuno mbe! Twombama Baraba!" Naye Baraba tsakakala munu mbapfi.

Currently Selected:

Yohane 18: LBV

Highlight

Copy

Compare