Hoseya 11
11
Imulungu kowakunda iwanu wake iwambiduke
1IMNDEWA kolonga,
“Isiraeli hayakalile mwana tsanimkunda,
tsanimkema imwanangu kulawa Misiri.
2Lekeni apfila pfanighendelele ukuwakema,
pfipfo pfawaghendelele ukughenda kutali na nene,
waghendelela kulapfa tsinambiko kwa milungu Baali,
na kupfidusulila upfumba ipfinyagho.
3Nene yuyo yanimlangulitse Efuremu ukughenda!
Nene nimwenyegho tsaniwasola mna ghamoko ghangu,
lekeni ng'awamanyile baye ka nene yaniwahonetse.
4Tsaniwakwegha kuna nene kwa ukuwonela libatsi na ukuwakunda,
kuna wawo tsanikala ka awala iwolapfa inila msingo,
kuya ninama niweng'a ichijo.
5“Angu ng'awatsakuya keli kuna isi ya Misiri baye, nayo isi ya Ashuru ng'aitsowatawala baye, kwaapfila walema ukutsileka tsinzambi tsawo? 6Ng'ondo itsolawila mna imiji yawo, na maaduwi watsobena ghamachuma gha ukuhindila ghamalango gha imiji, nawo watsowakoma iwanu wangu kwa ukutenda aghala ghawakona iwenyegho ghanogha. 7Iwanu wangu walamla ghendo kunileka nene, wawo wolonga nene namkulu na nina ngupfu ng'ani, lekeni ng'awonitegheletsa baye hata chidogho.
8“Nitsodahatse kukuleka Efuremu?
Nidahatse kukwasa Isiraeli?
Nidahatse kukutenda ka ghumji ghwa Adima?
Nitsodahatse kukutenda ka ghumji ghwa Seboemu!
Ghumoyo ghwangu ghonighoma ukutenda apfo,
nagho ghumema libatsi.
9Nene sitsoghendelela keli ukwona maya baye,
wala sitsoihinya keli Efuremu baye,
kwaapfila nene na Imulungu, wala si munu baye.
Nene na Iyelile mghati mwenu, apfo sitsakutsa kwa ukughudubuka baye.
10“Watsomuwinza IMNDEWA, naye katsoduma ka simba, na hayatsoduma, wawo watsakutsa kulawa magharibi aku woghudema. 11Watsakutsa woghudema ka chideghe kulawa Misiri, na ka njiwa kulawa Ashuru, na nene nitsowatenda wakale mna tsing'anda tsawo. Apfo pfipfo pfayolonga IMNDEWA.”
Isi ya Isiraeli na Yuda tsohighighwa
12Iwanu wa Efuremu wanitsingilila kwa ughutsu, na ing'anda ya Isiraeli initsingila kwa ukubugha, mbaka sambi Yuda kombiduka Imulungu wake Iyelile na iyotogholeka.
Pioneer Bible Translators and The Word For The World
Learn More About Laghano Lya Sambi Kwe Iwanu Wose