Habakuki 1
1
Nabii Habakuki kololoma
1Auno uwo usenga nabii Habakuki wayaghubulighwe na Imulungu.
2Ghwe IMNDEWA nitsokulila ghweghwe unyapfile mbaka tsuwachi, naghwe uleke kunitegheletsa na kunyapfila? Nokulilila kwaapfila twodununzika, naghwe ng'ukombola baye. 3Heule undeka mbone ighehile na maghayo? Hambele hangu nakona ukuhinyika kwa ipfinu na ukwisonga, kwolawila ughomvi na ukwitowa. 4Apfo ghamalaghitso ghahela ngupfu, nayo ihaki ng'aitendeka baye, iwehile wowahuma wana ihaki, ihaki ng'aihighighwa ghoya baye.
Imulungu kowedika iwanu wake
5Imulungu kolonga, Waloleni iwanu wa isi tsingi, loleni na mkangawale ghendo, kwaapfila nitsotenda chinu mna ghamatsuwa ghenu ghamkala wagima, namwe hata mng'alongelighwa ng'amtsotoghola baye. 6Kwaapfila nitsowenula Wababeli, iwanu awala iwakali, na iwali na usongo, awala iwofosa mna isi yose na kuboka tsiisi tsa wanu wangi. 7Wawo wa wanu wa ukupfukighwa na wanu iwoghuma wogha, wawo wohigha ka pfawobama iwenyegho, na ukulu weing'a iwenyegho. 8Falasi wawo wotsuma himahima kubita iduma, iwanu awo wakali kubita yumbwa wa kumuhulo yana inzala haipfika nemihe. Wadina falasi wawo wolawa kutali, woghuluka ka magengele pfayoghulukila imnyama. 9Wose wakutsa kutenda pfulughu, aku ipfihanga pfawo pfika ndita, woluta hambele ka libeho ililawa Mashaliki, woweka hamwe iwanu iwaghoghighwe wengi ka msanga. 10Wowaseka iwafalume na iwatawala wowona si chinu baye. Chila ngome wawo woibetsa na woilundikila ifumvu na woiboka. 11Kuya wofosa ka beho, na wotenda matotso kwaapfila tsingupfu tsawo yuyo imulungu wawo!
Habakuki kololoma keli
12Angu ghweghwe ng'uli IMNDEWA baye kulawa ghumwande? Ghweghwe yuyo Imulungu wangu, kwela, naghwe ng'atutsakufa baye. Ghwe IMNDEWA Imulungu, kuwasaghula Wababeli watuhighe, ghweghwe, yauli bambalawe kuwagangamitsa ili watutowe! 13Tsinenge tsako tsela ghendo, natso ngatsidaha kulola ghehile baye, ghweghwe ng'udaha ghendo ukududumila ghehile. Heule lelo kowona iwotenda ighehile kuya kwenyamala tulu? Hebali winyamala tulu hauwona iwanu iwehile wowamalitsa iwanu awala wana ihaki kubita wawo? 14Kuwatenda iwanu wakale ka isomba mna ibahali, ka pfiumbe ipfitambala ipfilihela chilongotsi! 15Wababeli wowapfula iwanu kwa indoano, na wowakwegha kunze, wose woweka hamwe mna ilwapfu lwawo, kuya wodeng'elela na kusekelela. 16Apfo wotsitambikila tsinyapfu tsawo na kutsidusulila upfumba kwaapfila tsinyapfu tsawo tsiwalapfila chijo ichinoghile. 17Pfihi katsoghendelela kuwalapfa iwanu mna ilwapfu lwake, na kuwakoma kwa lipanga iwanu wa tsiisi bila kuwonela libatsi?
Currently Selected:
Habakuki 1: LBV
Highlight
Share
Copy
Want to have your highlights saved across all your devices? Sign up or sign in
