Mwanduso 32

Yakobu keyandaa kwitingana na Esau

1Yakobu tsakaghendelela na ghumwanza na mzila ketingana ne wamalaika we Imulungu. 2Yakobu hawonile kalonga, “Alino kingili lya iwang'ewele we Imulungu!” Apfo kahakema hanu hala Mahanaimu.

3Yakobu tsakawatuma wasenga wamlongole kughenda kwa Esau ndughu yake, ako Seiri, isi ya Edomu. 4Kawalaghitsa wakalonge apfino, “Nene mtumighwa wako Yakobu nolonga kwa mkulu wangu Esau ka nikala na Labani mbaka leloli. 5Nina ng'ombe, pfihongwe, wang'olo, wamene na watumwa. Mtwatsa wangu nokutumila usenga uno ili hanifika umbonele libatsi.”

6Wasenga hawoyile kwa Yakobu, wamlongela, “Tughenda kwa ndughu yako Esau, naye kamnzila kakutsa kwitingana naghwe. Kakutsa ne iwanu miya nne.” 7Yakobu tsakadedema na kupfuka. Kawaghola makingili meli iwanu iwakalile naye, pfipfila tsakawaghola wang'olo, wamene, wang'ombe na wangamiya. 8Tsakepfikitsa, “Esau ang'atsa na kulikoma kingili limwe, kingili lingi litsohona.”

9Kuya Yakobu kalomba, “Ghwe Imulungu wa aba wangu Abrahamu, Imulungu wa sekulu wangu Isaka, ghwe IMNDEWA yunongele, ‘Uye muisi mwako na kwa ndughu tsako nitsokutendela ghanoghile.’ 10Nene sibamighwe baye ukubokela uluso waunendele nene mtumighwa wako. Kwaapfila hanilokile ghumto ghwa Yoridani tsang'ala na ng'weku iliyeka, lekeni sambi nina makingili meli. 11Nokulomba, ung'ombole mna ghumoko ghwa Esau, nompfuka kwaapfila katsotukoma, nene, tsina mai ne iwana wawo. 12Lekeni kunongela kutsonendela pfinoghile na kutsongaya iwana ketseketse ka ghumsanga ghwa kumwani ing'aghupeteka” 13Chilo chila Yakobu tsakawasa hala. Kuya kabaghula iwanyama yalinawo kamwing'a nzawadi Esau ndughu yake, 14mbughuma miya mbili na mvulati ishirini, ng'olo wapinga miya mbili na wang'unzu ishirini, 15ngamiya selasini iwoghwaghwitsa, ng'ombe wapinga alubaini na ng'ombe iwamale kumi, na pfihongwe iwapinga ishilini na pfihongwe iwamale kumi. 16Kaweng'a iwatumwa wake wawalolese, chila yumwe na kingili lyake. Kawalongela watumwa wake, “Mnilongole, mwike nyafwasi kulawa kingili limwe na kingili lingi.” 17Kamlaghitsa imtumwa yula iyalongole, “Hautsetingana na ndughu yangu Esau na ang'akughutsa, ‘Ghweghwe mtumwa wa nani? Ughenda kwani? Iwanyama wano iwali hambele yako wa nani?’ 18Ghweghwe umwidike, ‘Iwanyama wano wa mtumwa wako Yakobu, kakughalila ghweghwe ka nzawadi mkulu wangu Esau. Na Yakobu mwenyegho kakuchisogho kakutsa.’ ” 19Pfipfila kamlaghitsa pfipfo mtumwa wa kingili lya kabili na lya kadatu na iwanu wangi wose, “Hamtingana naye mumlongele pfipfo. 20Mlonge pfino, ‘Mtumwa wako Yakobu kakuchisogho kakutsa.’ ” Kwaapfila tsakapfikitsa, “Nitsomuhotsa kwa nzawadi tsanilongotsa, songaha hanitsotingana naye kodaha kunibokela ghoya.” 21Apfo Yakobu katsilongotsa nzawadi atso, lekeni chilo chila yeye tsakawasa mna chibumbulika.

Yakobu kokemighwa Isiraeli

22Chilo chichila tsakalamka, kawasola wehe wake weli, watumwa wake mapinga weli, iwanaghe kumi na yumwe, kaloka ghumto Yaboki. 23Kawalosa wose ne pfinu pfose pfawalinapfo. 24Apfo Yakobu kalekighwa yaliyeka, kuya imunu yumwe katsa, tsaketowa naye mbaka lupfilipfili. 25Imunu yula hayonile ng'odaha baye kumhuma Yakobu, kamtowa mna lihatsa, ghumghulu ghugholojoka. 26Imunu yula kalonga, “Ndeke mbuke, kwaapfila sambi kwakwenzeluka.”

Yakobu kamwidika, “Sikulekelela baye mbaka unibaliki.”

27Imunu ayo kamghutsa, “Taghwa lyako nani?”

Kamwidika, “Yakobu.” 28Imunu yula kalonga, “Ng'utsokemighwa keli Yakobu, ila kutsokemighwa Isiraeli, kwaapfila kwitowa ne Imulungu ne iwanu, kuya kuhuma.”

29Yakobu kalonga, “Chonde chonde nongele taghwa lyako nani.”

Imunu yula kamwidika, “Ule ubama kumanya taghwa lyangu?” Kuya kambaliki Yakobu.

30Yakobu kahakema hanu hala Penueli, kwaapfila tsakalonga, “Nimwona Imulungu chihanga kwa chihanga, nani ning'ali mghima.” 31Litsua tsalilawa Yakobu hayang'ali yopfosa Penueli, Yakobu yang'ali yodeng'uka kwaajili ye lihatsa lyake. 32Apfo mbaka leloli Waisiraeli ng'awakuja baye nyughe ili mna lihatsa, kwaapfila Yakobu tsakatowighwa hanu hao.

Currently Selected:

Mwanduso 32: LBV

Highlight

Compare

Copy