Mwanduso 31
31
Yakobu kotsuma kulawa kwa Labani
1Yakobu tsakahulika iwana wa Labani wang'ali wolonga, “Yakobu kasola pfinu pfose pfa aba wetu, na kawa na mali ketseketse kulawa mna mali tsa aba wetu.” 2Pfipfila Yakobu tsakamanya ka ng'amnoghele Labani ka pfamnoghele ghumwande.
3Kuya IMNDEWA kalomngela Yakobu, “Uye kune isi ye iwabala wako na ndughu tsako, na nene nitsokuwa naghwe.”
4Apfo Yakobu kawatuma iwanu wakawalongele Raheli na Lea watingane naye kunyika kwawali iwanyama wake. 5Yakobu kawalongela, “Nakona simnoghela keli baye aba wenu ka mwanduso, lekeni Imulungu wa aba wangu kahamwe na nene. 6Namwe mwomanya ka nimsang'anila aba wenu kwa ngupfu tsangu tsose. 7Kuya aba wenu tsakangutsukila kwa kughalusa maliho ghangu mala kumi. Lekeni Imulungu ng'amlekelele baye yanendele chinu chihile. 8Chila hayalongile, ‘Iwanyama iwali ne madowadowa nitsokuliha ghweghwe,’ kuya iwanyama weleka iwanyama wane madowadowa. Na hayalongile, ‘Iwanyama iwali ne misitali nitsokuliha ghweghwe,’ kuya iwanyama wose weleka iwanyama wane misitali. 9Apfo Imulungu kawasola iwanyama wa aba wenu, kuya kangaya nene.
10“Ghamatsuwa gha iwanyama kutitsa, tsanilota mvulati wowabebesa mbughuma wane misitari, wane madowadowa na wane ghamabaka. 11Malaika we Imulungu kanongela mndoto, ‘Yakobu!’ Nimwidika, ‘Oo.’ 12Naye kanongela, ‘Winule tsinenge wone mvulati wowabebesa mbughuma wane misitali, wana madowadowa na wana ghamabaka, kwaapfila nighona aghala ghayakutendele Labani. 13Nene na Imulungu iyanikulawile akula Beteli, akula kwaughidile ghamapfuta mna ingutso na ukwilaha kuna nene. Lelo ulawe isi aino, uye ukaye yako kwawoneke.’ ”
14Kuya Raheli na Lea wamwidika, “Twetwe twahela ipfinu pfa ukuhala mkaye mwa aba wetu. 15Katutenda twetwe ka wahenza. Katuutsa, kuya katsija sendi tsetu tsose. 16Mali tsose Imulungu tsayasolile tsa aba wetu, tsakwetu ghendo na tsa wenetu. Apfo utende chochose chayakulongele Imulungu.”
17Kuya Yakobu kawabapitsa iwanaghe na wehe tsake mna wangamiya.
18Yakobu kasola iwanyama wake wose na mali tsake tsayapatile ako Padani Aramu, kandusa ghumwanza gho ukuya mna isi ya Kanaani kwa aba wake, Isaka. 19Ng'ana woke Yakobu na wehe tsake, Labani hayaghendile kuwaghana mighala iwang'olo wake, Raheli kamwibila aba wake pfinyagho pfa imilungu yake. 20Pfipfila Yakobu tsakambugha Labani, munu wa Aramu, ng'amlongele baye ka kakuka. 21Apfo katsuma ne pfinu pfake, kaloka ghumto Efurati, kaghenda isi ya pfidunda ya Gileadi.
Labani komuwinza Yakobu
22Mne litsuwa lya kadatu Labani kahulika Yakobu katsuma koka. 23Labani kawasola ndughu tsake, wamkoleletsa Yakobu kwa ghamatsuwa saba, kuya wampfika mna isi ya pfidunda ya Gileadi. 24Lekeni chilo chila Imulungu kamtsila Labani, munu wa Aramu, mndoto, kamlongela, “Wilolese uleke kumlongela Yakobu imbuli yoyose imtenda yone maya.” 25Yakobu katsenga chibumbulika chake mna isi ya pfidunda ya Gileadi, na Labani na ndughu tsake watsenga chibumbulika chao baho.
26Kuya Labani kamlongela Yakobu, “Utendile choni? Mbona kunibugha, kuwasola neghe tsangu ka wanu iwasolighwe mng'ondo? 27Ebali ukile chinyelenyele na kunibugha? Ung'anilongele, ning'akuwaghile kwa kudeng'elela, kukwimbila na kukutowela ngoma na pfimbeta. 28Ule ng'undekelele niwaaghe kwa kuwanonela watsukulu wangu na iwanangu? Achi chutendile chinu ng'achinoghile baye. 29Nene nodaha kukulagha, lekeni chilo chino Imulungu wa aba wako kanongela, ‘Wilolese uleke kumlongela Yakobu imbuli yoyose, imtenda yone maya.’ 30Lelo ghweghwe tsakutsuma, kwaapfila tsakusulukila sideke kuya ukaye kwa aba wako. Lekeni ebali unyibile pfinyagho pfangu?”
31Yakobu kamwidika Labani, “Tsanipfuka, kwaapfila tsanitsagha ung'anibokile neghe tsako. 32Lekeni ung'amwona imunu yane pfinyagho pfako, katsokomighwa. Ulole chinu chochose ichili chako hambele ha ndughu tsetu, kuya uchisole.” Yakobu ng'amanyile baye ka Raheli tsakeba pfinyagho pfa Labani.
33Apfo Labani kengila mna chibumbulika cha Yakobu, cha Lea, na cha iwatumwa mapinga wala weli, lekeni ng'apfonile baye. Kalawa mna chibumbulika cha Lea, kengila mna chibumbulika cha Raheli. 34Raheli tsakapfisola pfinyagho apfo, kapfipfisa mghati mwe ipfilagho pfa ngamiya, kapfikalila. Labani tsakabama mna chibumbulika chose lekeni ng'apfone baye. 35Raheli kamlongela aba wake, “Aba wangu, uleke kumbonela maya, sidaha baye kwima hambele hako, nakumto.” Labani kapfibama pfinyagho pfake lekeni ng'apfonile baye.
36Yakobu tsakona maya, kesonga na Labani, kamghutsa, “Chinu chachi chihile chanikutendele? Nitotsile choni mbaka unikoleletse pfino? 37Kubama mna pfinu pfangu pfose lelo upatile choni? Uchike hambele ha ndughu tsako na ndughu tsangu, ili watulamle nene ne ghweghwe. 38Tsanikala naghwe kwa miyaka ishilini. Ghamatsuwa agho ghose wang'olo wako wala wamene wako ng'awalekile baye kweleka, wala sijile baye ng'unzu kulawa mna iwanyama wako. 39Nene sikughalile baye hata mala lumwe imnyama wako yakomighwe ne iwanyama wa kumuhulo, ila nene tsanikuliha. Ghweghwe tsakubama nikulihe kwa chochose ichibighwe nemisi au nechilo. 40Nemisi litsuwa tsalinyalikila, na nechilo chipfeghetsi tsachinipfegha. Tsasipatile baye tsinongo. 41Miyaka ishirini tsanikala mkaye mwako. Tsanikusang'anila miyaka kumi na mine niwakwele neghe tsako, na miyaka sita niwadima iwanyama wako, naghwe tsakughalusa maliho ghangu mala kumi. 42Ka Imulungu wa aba wangu, yuyo Imulungu wa Abrahamu, Imulungu wa Isaka, ng'akalile na nene baye, ung'aniwingile ghendo mbuke ghamoko gheliheka. Lekeni Imulungu kaghona maghayo ghangu, na sang'ano ya ghamoko ghangu, na chilo chilutile kakumanila.”
Yakobu na Labani wakwika laghano
43Labani kamwidika Yakobu, “Awano hano neghe tsangu, awano nawo watsukulu wangu, na awano iwanyama wangu, na ghose ghaukona ghangu. Angu nidahatse kuwatendela chihile neghe tsangu ne iwana yawaweleke? 44Leka twilaghane nene na ghweghwe, laghano alyo liwe ukalangama kuna nene na ghweghwe.”
45Apfo Yakobu kasola libwe, kalimisa ka ngutso. 46Kawalongela ndughu tsake, “Mkunge ghamabwe.” Apfo wasola ghamabwe waghalundika, kuya waja ichijo habehi na ghamabwe agho. 47Labani kaghakema ghamabwe ghala Yegasahaduta, lekeni Yakobu kaghakema Galedi. 48Labani kamlongela Yakobu, “Ghamabwe ghano gha ukalangama kuna nene na ghweghwe leloli.” Apfo tsaghakemighwa Galedi. 49Pfipfila Labani kalonga, “IMNDEWA yatulolese hata ka tung'awa kutali nene na ghweghwe.” Apfo hanu hala pfipfila tsahakemighwa Mispa. 50Labani kaghendelela kulonga, “Ung'awadununza neghe tsangu au ung'akwela iwapinga wangi, uleke kusemwa Imulungu ka mkalangama wetu.” 51Labani kamlongela Yakobu, “Aghano hano ghamabwe na haino hano ngutso yatwikile haghati hetu. 52Ghamabwe ghano gha ukalangama, sitsoghaloka ghamabwe ghano kutsa kuna ghweghwe kukulagha. Naghwe ng'utsoghaloka baye ghamabwe ghano na ngutso ino haukutsa kunilagha. 53Imulungu wa Abrahamu, Imulungu wa Nahori, na Imulungu wa aba tsetu, yatuhighe twetwe.”
Yakobu tsakelaha kwa Imulungu wa Isaka, aba wake kwika laghano lyino. 54Yakobu kamsubutula imnyama, kalapfa nambiko hana ichidunda, kawakema ndughu tsake watse waje ichijo. Hawamalitse ukuja, wakala ako chilo chose. 55Nemitondotondo litsuwa liwinzile Labani kalamka, kawanonela iwatsukulu wake na neghe tsake, kawabaliki. Kuya koka, koya ukaye yawo.
Currently Selected:
Mwanduso 31: LBV
Highlight
Share
Compare
Copy
Want to have your highlights saved across all your devices? Sign up or sign in
