Aˍmoˆ li‸ 1
1
Awˬ hkuiˉ puiˍ ve tawˇ
1Tawˇ chi teˇ hpaˍ lehˬ, Teˍkawˇ venˇ hkʼaw chehˇ ve yawˬ hawˉ shehˍ hpaˇ Aˍmoˆ ve tawˇ teˇ hpaˍ hpeh‸ ve yoˬ. Yuˇda‸ mvuhˇmiˬ hkʼaw Uˇziˆ jawˇmawˇ te leh Yawˇshaˆ ve yaˇ Yeˍyawˇbaoˍ Iˉsaˍreˍlaˆ mvuhˇmiˬ hkʼaw jawˇmawˇ te chehˇ ve yoˬ. Miˬ maˇ hiˆ sheˍ gʼuˇ suhˍ nyiˇ hkʼaw‸ hkʼe htaˇ, Iˉsaˍreˍlaˆ chaw hui hta‸ caˉ da‸ ve awˬ lawn chi teˇ hpaˍ Gʼuiˬsha Aˍmoˆ hta‸ hpeu‸ maˍ piˇ taˍ ve yoˬ.
2Aˍmoˆ kʼoˆ ve, Gʼuiˬsha lehˬ Ziˉonˍ hkʼaw hkʼoˆ chehˇ taˍ leh kuˬ chehˇ ve yoˬ.
Yawˇ ve awˬ hkawˇ Yeˍruˆsaˍlehnˍ venˇ hkʼaw bvuhˬ tawˆ la chehˇ ve yoˬ.
Kʼaˆ caˇ kuiˬ teˇ hpaˍ goˇ kʼai leh,
Kaˍmeˍlaˆ hkʼaw hkʼoˆ lo cawˬ ve
mvuh‸ teˇ hpaˍ shiˉ-ehˍ hpeh‸ la peuˬ, teh‸ Aˍmoˆ kʼoˆ ve yoˬ.
Mvuhˇmiˬ teˇ hpaˍ hta‸ Gʼuiˬsha suhˉ jehˬ ve Suˇriˆ mvuhˇmiˬ
3Gʼuiˬsha kʼoˆ ve, Daˍmaˍsehˆ venˇ yaˇ teˇ hpaˍ teˇ hkui teˇ hkui venˇbaˆ te chehˇ ve yoˬ. Chi hta‸ pa taw, ngaˬ yawˇ hui hta‸ awˬ tehˬ awˬ na ciˍ yanˍ piˇ tuˬ yoˬ. Yawˇ hui lehˬ Giˇlaˆ chaw hui hta‸ hehnˇ chaweh te piˇ peuˬ ve yoˬ. 4Chi hta‸ pa taw, jawˇmawˇ Heˍzeˍlaˆ te taˍ ve hawˉ yehˬ hkʼoˆ lo, ngaˬ aˬ miˍ ce la piˇ leh jawˇmawˇ Beˍhaˍdaˆ ve ta‸ yehˬ teˇ hpaˍ hta‸ to‸ baˬ piˇ lawˬ tuˬ yoˬ. 5Daˍmaˍsehˆ venˇ taˍ meu‸ hpe‸ teˇ hpaˍ hta‸ ngaˬ te luˬ piˇ leh, Aˍvenˍ miˬ tawˬ kuiˬ lo chehˇ ve chaw leh Beˍteˍdenˍ venˇ hta‸ uˉ peunˬ chehˇ ve chaw hui hta‸ ngaˬ yuˬ baˬ tuˬ yoˬ. Suˇriˆ mvuhˇmiˬ hkʼaw chehˇ ve chaw hui lehˬ, Kiˇraˆ venˇ lo shu hpeh kʼai ve hta‸ gʼa hkanˍ tuˬ yoˬ, teh‸ Gʼuiˬsha kʼoˆ ve yoˬ.
Hpiˇliˇtiˆ mvuhˇmiˬ
6Gʼuiˬsha kʼoˆ ve, Gaˍsaˍ venˇ yaˇ teˇ hpaˍ teˇ hkui teˇ hkui venˇbaˆ te chehˇ ve yoˬ. Chi hta‸ pa taw, ngaˬ yawˇ hui hta‸ awˬ tehˬ awˬ na ciˍ yanˍ piˇ tuˬ yoˬ. Yawˇ hui lehˬ, chaw ceuˬ teˇ ceuˬ hkʼa peu-eˬ ve hta‸ awˬ ceˬ hkʼa shuˍ Eˇdonˍ chaw hui hta‸ hawˇ piˇ peuˬ ve yoˬ. 7Chi hta‸ pa taw, Gaˍsaˍ lanˇ venˇ hkʼoˆ lo ngaˬ aˬ miˍ ce la piˇ leh, ta‸ yehˬ teˇ hpaˍ hta‸ to‸ baˬ piˇ lawˬ tuˬ yoˬ. 8Aˍcoˆ venˇ leh Aˍshaˆkeˍlonˍ venˇ hta‸ uˉ peunˍ chehˇ ve chaw hui hta‸ ngaˬ yuˬ baˬ tuˬ yoˬ. Eˇkaˍronˍ venˇ hta‸ htawˇ ngaˬ ciˍ yanˍ piˇ tuˬ yoˬ. Cawˬ taˍ sheˍ ve Hpiˇliˇtiˆ chaw hkʼa peu-eˬ suh-e tuˬ yoˬ, teh‸ Gʼuiˬsha kʼoˆ ve yoˬ.
Tuˇruˆ venˇ
9Gʼuiˬsha kʼoˆ ve, Tuˇruˆ venˇ yaˇ teˇ hpaˍ teˇ hkui teˇ hkui venˇbaˆ te chehˇ ve yoˬ. Chi hta‸ pa taw, ngaˬ yawˇ hui hta‸ awˬ tehˬ awˬ na ciˍ yanˍ piˇ tuˬ yoˬ. Yawˇ hui lehˬ, chaw ceuˬ teˇ ceuˬ hkʼa peu-eˬ ve hta‸, Eˇdonˍ mvuhˇmiˬ hkʼaw shiˍ kʼoˬ piˇ ve yoˬ. Yawˇ hui lehˬ, awˬ chawˇ te da‸ tuˬ kʼoˆ da‸ taˍ ve ka ti‸ hta‸ te luˬ peuˬ. 10Chi hta‸ pa taw, Tuˇruˆ lanˇ venˇ hkʼoˆ lo ngaˬ aˬ miˍ ce la piˇ leh, ta‸ yehˬ teˇ hpaˍ hta‸ to‸ baˬ piˇ lawˬ tuˬ yoˬ, teh‸ Gʼuiˬsha kʼoˆ ve yoˬ.
Eˇdonˍ venˇ
11Gʼuiˬsha kʼoˆ ve, Eˇdonˍ venˇ yaˇ teˇ hpaˍ teˇ hkui teˇ hkui venˇbaˆ te chehˇ ve yoˬ. Chi hta‸ pa taw, ngaˬ yawˇ hui hta‸ awˬ tehˬ awˬ na ciˍ yanˍ piˇ tuˬ yoˬ. Yawˇ hui lehˬ, a shu yawˇ ve awˬ viˉ awˬ nyi hpeh‸ ve Iˉsaˍreˍlaˆ chaw hui hta‸ gʼa‸ ca leh, yawˇ hui hta‸ ha kʼaˉ piˇ ve nyi ma maˇ cawˬ. Yawˇ hui nyi ma zuhˆ puiˉ jaˇ leh, yawˇ hui nyi ma zuhˆ ve teˇ ceuˬ maˇ mehˉ kʼai puiˉ. 12Chi hta‸ pa taw, Teˍmanˍ venˇ hkʼoˆ lo ngaˬ aˬ miˍ ce la piˇ leh, Bawˇzaˍraˆ venˇ hkʼaw cawˬ ve ta‸ yehˬ teˇ hpaˍ hta‸ to‸ baˬ piˇ lawˬ tuˬ yoˬ, teh‸ kʼoˆ ve yoˬ.
Aˍmonˍ venˇ
13Gʼuiˬsha kʼoˆ ve, Aˍmonˍ venˇ yaˇ teˇ hpaˍ teˇ hkui teˇ hkui venˇbaˆ te chehˇ ve yoˬ. Chi hta‸ pa taw, ngaˬ yawˇ hui hta‸ awˬ tehˬ awˬ na ciˍ yanˍ piˇ tuˬ yoˬ. Yawˇ hui mvuhˇmiˬ awˬ suhˉ ca bawˆ yuˬ ve teˇ yanˇ, Giˇlaˆ mvuhˇmiˬ hkʼaw chehˇ ve yaˇ hu ma teˇ hpaˍ ve gʼoˇ peˬ hta‸ shawˆ hkoˇ piˇ ve yoˬ. 14Chi hta‸ pa taw, Raˍbaˆ lanˇ venˇ hkʼoˆ lo ngaˬ aˬ miˍ ce la piˇ leh, ta‸ yehˬ teˇ hpaˍ hta‸ to‸ baˬ piˇ lawˬ tuˬ yoˬ. Oˇ htaˇ, mvuhˇ haw mvuhˇ yeˬ lonˉ hkʼa shuˍ ma‸ bawˆ hehnˇ jaˇ la leh, chaw yaˇ teˇ hpaˍ duiˆ-ehˍ shaˇ-ehˍ hpeh‸ la tuˬ yoˬ. 15Yawˇ hui ve jawˇmawˇ leh awˬ hoˉ awˬ naˬ teˇ hpaˍ lehˬ, shu mvuhˇmiˬ lo hpeh kʼai ve hta‸ gʼa hkanˍ tuˬ yoˬ, teh‸ Gʼuiˬsha kʼoˆ ve yoˬ.
Currently Selected:
Aˍmoˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.