Yawˇlaˆ li‸ 3
3
Mvuhˇmiˬ teˇ hpaˍ hta‸ suhˉ jehˬ tuˬ
1Gʼuiˬsha kʼoˆ ve,
Awˬ yanˇ oˇ ve awˬ hkʼaw lo,
ngaˬ lehˬ Yuˇda‸ leh Yeˍruˆsaˍlehnˍ venˇ hta‸ kʼaw‸ gu te piˇ tuˬ yoˬ.
2Ngaˬ lehˬ, awˬ nu ve chaw ceuˬ hkʼa peu-eˬ ve hta‸ suhˉ jehˬ ve lawˬ hkʼo‸ hkʼaw shiˍ kʼai piˇ leh,
yawˇ hui ngaˬ ve Iˉsaˍreˍlaˆ chaw hui hta‸ te piˇ taˍ peuˬ ve kanˉ hkʼa peu-eˬ awˬ pon,
yawˇ hui hta‸ suhˉ jehˬ piˇ tuˬ yoˬ.
Yawˇ hui lehˬ ngaˬ ve chaw teˇ hpaˍ hta‸ hpaˆ da‸ guiˇ da‸ kʼai piˇ lawˬ leh,
ngaˬ ve mvuhˇmiˬ hta‸ yawˇ hui pehˬ yuˬ taˍ peuˬ ve yoˬ.
3Yawˇ hui lehˬ ngaˬ ve chaw teˇ hpaˍ hta‸
hawˇ baˬ leh,
yaˇ paˍ yaˇ miˇ teˇ hpaˍ hta‸ yuˬ leh
meh maˬ lanˉ leh a pehˉ meuˇ gʼuiˬ pa yuˬ ve yoˬ.
4Tuˇruˆ venˇ, Siˉdonˍ venˇ leh, Hpiˇliˇtiˆ venˇ teˇ hpaˍ-oˬ, nawˬ hui ngaˬ hta‸ aˬ hto‸ ma te laˇ ve le. Nawˬ hui ngaˬ hta‸ teˇ ceuˬ ceuˬ kʼaw‸ te hkʼaw‸ laˇ gaˇ ve laˇ. Oˇ hkʼe yoˬ kʼo, ngaˬ nawˬ hui hta‸ haˆ haˆ kʼaw‸ te hkʼaw‸ laˇ tuˬ yoˬ. 5Nawˬ hui lehˬ ngaˬ ve hpu shi leh, awˬ hpfuhˇ hkʼaˆ ve mawˇ teˇ hpaˍ hta‸ yuˬ leh, nawˬ hui ve bon yehˬ hkʼaw keu taˍ ve yoˬ. 6Nawˬ hui lehˬ, Yuˇda‸ chaw leh Yeˍruˆsaˍlehnˍ venˇ yaˇ teˇ hpaˍ hta‸ yuˬ leh, yawˇ hui ve mvuhˇmiˬ hta‸ vuiˇ da‸ jaˇ ve Heˍlaˍsaˆ chaw hui hta‸ hawˇ piˇ ve yoˬ. 7Ya‸ hkʼaˇ, ngaˬ lehˬ nawˬ hui hawˇ piˇ taˍ ve chaw oˇ ve teˇ hpaˍ hta‸ yawˇ hui chehˇ taˍ kuiˬ lo kʼaw‸ shiˍ tawˆ la piˇ tuˬ yoˬ. 8Nawˬ hui ve yaˇ paˍ yaˇ miˇ teˇ hpaˍ hta‸, ngaˬ Yuˇda‸ chaw hui hta‸ hawˇ piˇ tuˬ yoˬ. Yawˇ hui ve yaˇ oˇ ve teˇ hpaˍ hta‸ vuiˇ jaˇ ve mvuhˇmiˬ lo chehˇ ve Sheˍbaˆ chaw hui hta‸ teˇ caˉ kʼaw‸ hawˇ piˇ tuˬ yoˬ. Ngaˬ, Gʼuiˬsha chi hkʼe kʼoˆ taˍ ve yoˬ.
9Awˬ lawn chi chaw ceuˬ teˇ hpaˍ hta‸ hto piˇ-oˆ.
Ma‸ bawˆ tuˬ hkʼa deh‸ gu taˍ leh,
nawˬ hui ve ma‸ yaˇ teˇ hpaˍ hta‸ tawˆ kʼai tcuh-o.
10Nawˬ hui ve laˇ hpuiˇ teˇ hpaˍ hta‸ aˉhtaw kʼaw‸ dawˆ leh,
nawˬ hui ve law‸ kʼawˉ teˇ hpaˍ hta‸ gehˇ kʼaw‸ te taˍ-o‸.
Gʼaˇ nuˇ jaˇ ve chaw htawˇ ma‸ gʼa bawˆ ve yoˬ.
11Awˬ paˇ awˬ kui lo chehˇ ve chaw teˇ hpaˍ-oˬ,
lawˬ hkʼo‸ lo haˆ haˆ laˬ leh hpawnˬ chehˇ taˍ-o‸, teh‸ Gʼuiˬsha kʼoˆ ve yoˬ.
Gʼuiˬsha-oˬ, yawˇ hui hta‸ ca bawˆ tuˬ nawˬ ve ma‸ yaˇ teˇ hpaˍ hta‸ peu laˇ-oˆ.
12Chaw ceuˬ teˇ hpaˍ gu taˍ leh,
suhˉ jehˬ ve lawˬ hkʼo‸ lo gʼa ya‸ la ve yoˬ.
13Oˇ kaˬ lo ngaˬ mui taˍ leh chaw ceuˬ hkʼa peu-eˬ ve hta‸ suhˉ jehˬ tuˬ yoˬ.
Yawˇ hui lehˬ cha‸ chiˆ jaˇ ve yoˬ.
Caˬ gʼeu‸ ve hkʼe, yawˇ hui hta‸ gʼeu‸ yuˬ-o‸.
A pehˉ meuˇ gʼuiˬ nyiˉ ve hkʼe,
yawˇ hui hta‸ nyiˉ ceh‸ piˇ-oˆ, teh‸ Gʼuiˬsha kʼoˆ ve yoˬ.
14Gʼuiˬsha suhˉ jehˬ tuˬ ve awˬ yanˇ gaˬ la paˇ neˇ ve pa taw,
lawˬ hkʼo‸ oˇ ve hkʼaw chaw awˬ hinˉ awˬ meunˍ gʼaˇ chehˇ taˍ ve yoˬ.
15Mvuhˇ nyi ha pa naˆ ho‸ kʼai leh,
meu‸ keu shiˍ teˇ hpaˍ htawˇ awˬ gʼeuˆ maˇ kʼaw‸ ba-o.
Gʼuiˬsha yawˇ ve chaw hta‸ bon na‸ piˇ tuˬ
16Gʼuiˬsha lehˬ Ziˉonˍ hkʼaw hkʼoˆ lo chehˇ taˍ leh kuˬ chehˇ ve yoˬ.
Yawˇ ve tawˇ Yeˍruˆsaˍlehnˍ venˇ hkʼaw bvuhˬ tawˆ la chehˇ ve yoˬ.
Miˬguiˬ leh mvuhˇ naw ma htawˇ hiˆ hiˆ naˇ naˇ hpeh‸ la ve yoˬ.
Ya‸ hkʼaˇ, Gʼuiˬsha lehˬ yawˇ ve chaw teˇ hpaˍ hta‸ ha‸ shaˉ piˇ tuˬ yoˬ.
17Oˇ htaˇ ngaˬ lehˬ, nawˬ hui ve Gʼuiˬsha hpeh‸ leh,
ngaˬ ve da‸ kehˬ ve Ziˉonˍ hkʼaw hkʼoˆ lo chehˇ taˍ ve hta‸ nawˬ hui gʼa shiˍ tuˬ yoˬ.
Yeˍruˆsaˍlehnˍ lehˬ da‸ kehˬ ve venˇ hpeh‸ leh,
awˬ nu ve chaw teˇ hpaˍ venˇ oˇ ve hta‸ kʼaw‸ bawˆ yuˬ gʼa tuˬ ve maˇ heˆ.
18Awˬ yanˇ oˇ ve gaˬ la htaˇ, hkʼaw pui teˇ hpaˍ awˬ hkʼoˆ lo a pehˉ meuˇ hko hkʼa biˇ cawˬ tuˬ yoˬ.
Hkʼaw pui ehˉ teˇ hpaˍ awˬ hkʼoˆ lo htawˇ, ceˇ caˬ hkʼa biˇ cawˬ tuˬ yoˬ.
Yuˇda‸ mvuhˇmiˬ hkʼaw lo iˉ kaˆ hkʼa biˇ cawˬ tuˬ yoˬ.
Gʼuiˬsha ve bon yehˬ hkʼaw lo iˉ kaˆ gʼuiˬ tuˇ teˇ maˬ tawˆ la leh,
Aˍhkeˇshaˍ miˬ tawˬ kuiˬ hta‸ iˉ kaˆ nehˆ la piˇ tuˬ yoˬ.
19Ya‸ hkʼaˇ, Eˇjiˇtu‸ mvuhˇmiˬ lehˬ, goˇ choˆ jaˇ ve mvuhˇmiˬ hpeh‸ la leh,
Eˇdonˍ mvuhˇmiˬ lehˬ gawˬ cu gawˬ pehˆ ve mvuhˇmiˬ hpeh‸ la tuˬ yoˬ.
Awˬ lawn kʼo, yawˇ hui Yuˇda‸ chaw hui hta‸ ca bawˆ la leh,
te‸ chiˉ venˇbaˆ maˇ cawˬ ve chaw hui hta‸ tiˇ pehˍ piˇ ve pa taw yoˬ.
20Ya‸ hkʼaˇ, Yuˇda‸ leh Yeˍruˆsaˍlehnˍ venˇ lehˬ co co taiˍ taiˍ yeˬ chehˇ tuˬ yoˬ.
21Ngaˬ lehˬ tiˇ pehˍ ve hta‸ gʼa hkanˍ ve chaw hui hta‸ kʼaw‸ te hkʼaw‸ piˇ leh,
venˇbaˆ cawˬ ve chaw hta‸ hkʼe leˇ ponˬ piˇ tuˬ ve maˇ heˆ.
Ngaˬ, Gʼuiˬsha lehˬ Ziˉonˍ hkʼaw hkʼoˆ lo chehˇ taˍ tuˬ yoˬ, teh‸ Gʼuiˬsha kʼoˆ ve yoˬ.
Currently Selected:
Yawˇlaˆ li‸ 3: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.