Aˍmoˆ li‸ 2
2
Mawˇbaˆ mvuhˇmiˬ
1Gʼuiˬsha kʼoˆ ve, Mawˇbaˆ chaw teˇ hpaˍ teˇ hkui teˇ hkui venˇbaˆ te chehˇ ve yoˬ. Chi hta‸ pa taw, ngaˬ yawˇ hui hta‸ awˬ tehˬ awˬ na ciˍ yanˍ piˇ tuˬ yoˬ. Yawˇ hui lehˬ, Eˇdonˍ jawˇmawˇ ve awˬ mu‸ ku teˇ hpaˍ hta‸ maˇ shawˍ maˇ caˆ te leh aˬ miˍ tuˉ baˬ ve yoˬ. 2Chi hta‸ pa taw, Mawˇbaˆ mvuhˇmiˬ hkʼoˆ lo ngaˬ aˬ miˍ ce la piˇ leh, Keˍroˆ venˇ hkʼaw cawˬ ve ta‸ yehˬ teˇ hpaˍ hta‸ to‸ baˬ piˇ lawˬ tuˬ yoˬ. Ma‸ yaˇ teˇ hpaˍ behˬ heh ma meuˆ leh gʼaˇ hte‸ kuˬ chehˇ ve teˇ yanˇ, Mawˇbaˆ chaw hui lehˬ ma‸ bawˆ kuiˬ lo gʼa suh-e tuˬ yoˬ. 3Mawˇbaˆ jawˇmawˇ leh awˬ hoˉ awˬ naˬ hkʼa peu-eˬ ve hta‸ ngaˬ tiˇ pehˍ piˇ tuˬ yoˬ, teh‸ Gʼuiˬsha kʼoˆ ve yoˬ.
Yuˇda‸ chaw
4Gʼuiˬsha kʼoˆ ve, Yuˇda‸ chaw teˇ hpaˍ teˇ hkui teˇ hkui venˇbaˆ te chehˇ ve yoˬ. Chi hta‸ pa taw, ngaˬ yawˇ hui hta‸ awˬ tehˬ awˬ na ciˍ yanˍ piˇ tuˬ yoˬ. Yawˇ hui lehˬ, ngaˬ piˇ taˍ ve tawˇ hkawˇ teˇ hpaˍ hta‸ maˇ na yuˬ leh, ngaˬ ve awˬliˇtawˇhkawˇ teˇ hpaˍ hta‸ baˬ taˉ peuˬ. Yawˇ hui ve awˬ puˍ awˬ pi teˇ hpaˍ hkʼa shuˍ, yawˇ hui htawˇ maˇ heˆ heˆ ve gʼuiˬsha teˇ hpaˍ hta‸ oˉ kʼoˍ pui leh ya‸ kʼaw ya‸ kʼai peuˬ. 5Chi hta‸ pa taw, Yuˇda‸ mvuhˇmiˬ hkʼoˆ lo ngaˬ aˬ miˍ ce la piˇ leh, Yeˍruˆsaˍlehnˍ venˇ hkʼaw cawˬ ve ta‸ yehˬ teˇ hpaˍ hta‸ to‸ baˬ piˇ lawˬ tuˬ yoˬ, teh‸ Gʼuiˬsha kʼoˆ ve yoˬ.
Iˉsaˍreˍlaˆ hta‸ Gʼuiˬsha suhˉ jehˬ tuˬ
6Gʼuiˬsha kʼoˆ ve, Iˉsaˍreˍlaˆ chaw teˇ hpaˍ teˇ hkui teˇ hkui venˇbaˆ te chehˇ ve yoˬ. Chi hta‸ pa taw, ngaˬ yawˇ hui hta‸ awˬ tehˬ awˬ na ciˍ yanˍ piˇ tuˬ yoˬ. Yawˇ hui lehˬ, jeˬ kʼaw‸ shaiˍ laˇ maˇ gʼa ve hteˇ ve cawˇ ve chaw hui leh, hkuiˉ nuˆ teˇ ceh awˬ pon ceh ka‸ awˬ hpfuhˇ kʼaw‸ shaiˍ laˇ maˇ gʼa ve haˍ ve gʼawˇ ve chaw hui hta‸ hawˇ baˬ ve yoˬ. 7Yawˇ hui lehˬ, gʼaˇ nuˇ shaˉ nuˇ ve chaw hui leh dawˇ tui‸ gaˇ tui‸ ve chaw hui hta‸ naˆ tinˍ taˍ leh, haˍ ve gʼawˇ ve chaw hui hta‸ ya‸ kʼaw hkʼoˆ lo ca‸ baˬ ve yoˬ. Awˬ pa leh awˬ yaˇ paˍ nyiˇ gʼaˇ gʼaˇ ka‸, awˬ ceˬ ma teˇ gʼaˇ tiˉ hta‸ haˉ chawˇ te ve hkʼaw, ngaˬ ve da‸ kehˬ ve awˬ meh hta‸ cha‸ chiˆ tuˬ te ve yoˬ. 8Bon lawˬ kuiˬ teˇ kaˬ le le hkʼaw, chaw teˇ hpaˍ lehˬ haˍ yaˇ gʼawˇ yaˇ hui geh jeˬ shawˍ yuˬ taˍ ve veu‸ kʼaˇ teˇ hpaˍ hkʼawˇ zuh‸ chehˇ taˍ ve yoˬ. Gʼuiˬsha ve bon yehˬ hkʼaw yawˇ hui lehˬ haˍ ve gʼawˇ ve chaw hui geh nyiˉ yuˬ veu laˇ ve a pehˉ meuˇ gʼuiˬ dawˬ chehˇ ve yoˬ.
9Ya‸ hkʼaˇ ngaˬ ve chaw teˇ hpaˍ-oˬ, nawˬ hui ve awˬ meh hta‸ pa taw, htawˇ cehˬ hkʼa shuˍ mvuh jaˇ leh maˉ kuˇ cehˬ hkʼa shuˍ heh jaˇve Aˍmawˇriˆ chaw hui hta‸ ngaˬ te luˬ te sheˆ piˇ taˍ peuˬ ve yoˬ. 10Ngaˬ nawˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ la leh, awˇ chi hkʼaw‸ hkʼa biˇ nawˬ hui hta‸ heh puiˉ hkʼaw lo shiˍ kʼai laˇ taˍ ve yoˬ. Aˍmawˇriˆ chaw hui ve mvuhˇmiˬ htawˇ, ngaˬ nawˬ hui hta‸ piˇ laˇ taˍ peuˬ. 11Nawˬ hui ve yaˇ teˇ hpaˍ hpaˍ hta‸ ngaˬ tcuh kaˍ paˍ hpeh‸ la piˇ leh, teˇ hpaˍ hpaˍ hta‸ ngaˬ Naˍzaˍriˆ chaw hpeh‸ la piˇ taˍ ve yoˬ. Iˉsaˍreˍlaˆ chaw teˇ hpaˍ-oˬ, ngaˬ kʼoˆ ve tawˇ chi teˇ hpaˍ cawˇ ve maˇ heˆ laˇ. Ngaˬ, Gʼuiˬsha tawˇ chi teˇ hpaˍ hta‸ kʼoˆ taˍ peuˬ ve yoˬ. 12Ya‸ hkʼaˇ, nawˬ hui lehˬ Naˍzaˍriˆ chaw hui hta‸ a pehˉ meuˇ gʼuiˬ taw piˇ leh, tcuh kaˍ paˍ teˇ hpaˍ ngaˬ kʼoˆ tcuh ve tawˇ hta‸ maˇ gʼa kʼoˆ tuˬ, nawˬ hui tawˍ taˍ ve yoˬ. 13Chi hta‸ pa taw, ngaˬ chi beu‸ nawˬ hui hta‸ miˬ chaˇ hkʼoˆ lo naˆ tinˍ leh nawˬ hui lehˬ caˬ shiˍ hkʼa biˇ taˆ taˍ ve nuˇ hkʼa shuˍ gʼa hkʼanˇ chehˇ tuˬ yoˬ. 14Gʼuiˇ gehˬ jaˇ ve chaw hui htawˇ gʼa ponˬ tuˬ ve maˇ heˆ. Awˬ gʼaˇ uiˍ ve chaw hui awˬ gʼaˇ nuˇ kʼai tuˬ yoˬ. Ma‸ yaˇ teˇ hpaˍ htawˇ, a shu yawˇ ve a sha‸ hta‸ ponˬ piˇ gʼa tuˬ ve maˇ heˆ. 15Hkaˆ bawˆ paˍ teˇ hpaˍ htawˇ, huˉ chehˇ hpeh‸ tuˬ ve maˇ heˆ. Gʼuiˇ gehˬ jaˇ ve chaw hui htawˇ gʼuiˇ hpaw-e gaˬ tuˬ ve maˇ heˆ. Iˉ mvuhˇ ciˇ shehˍ hpaˇ teˇ hpaˍ htawˇ, gʼuiˇ hpaw-e leh ponˬ tuˬ ve maˇ heˆ. 16Oˇ ve teˇ nyi gaˬ kʼo, ha‸ hanˉ ve ma‸ yaˇ teˇ hpaˍ htawˇ, a shu yawˇ ve la‸ caˉ hta‸ baˬ taˉ leh gʼuiˇ hpaw-e tuˬ yoˬ, teh‸ Gʼuiˬsha kʼoˆ ve yoˬ.
Currently Selected:
Aˍmoˆ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.