Hpeu‸maˍ ve li‸ 10

Mvuhˇ naw ma tcuh yaˇ leh li‸ ehˉ teˇ kʼoˆ awˬ lawn

1Oˇ htaˇ, awˬ gʼaˇ uiˍ jaˇ ve awˬ kaˍ awˬ nu mvuhˇ naw ma tcuh yaˇ teˇ gʼaˇ moˬ hta‸ veu‸ deh leh mvuhˇ naw ma lo ya‸ la chehˇ ve hta‸ ngaˬ gʼa mawˬ ve yoˬ. Yawˇ ve oˉ kʼoˍ hkʼoˆ lo aˉlaˇmiˬshiˉjaw cawˬ ve yoˬ. Yawˇ ve mehˆ hpfuhˇ lehˬ, mvuhˇ nyi hta‸ shuˍ leh, yawˇ ve hkui sheh lehˬ, aˬ miˍ hkuiˉ daw hta‸ shuˍ ve yoˬ. 2Yawˇ ve la‸ sheh awˬ hkʼaw lo hpaw taˍ ve li‸ ehˉ teˇ kʼoˆ cawˬ ve yoˬ. Yawˇ ve la‸ sha paˉ ve hkui sheh lehˬ, laˇ tsuhˇ gʼuiˬ hkʼoˆ lo naˆ taˍ leh, la‸ mehˍ paˉ ve hkui sheh lehˬ, miˬguiˬ hkʼoˆ lo naˆ taˍ ve yoˬ. 3Laˇ caˬ shiˉ kuˬ ve hkʼa shuˍ shuˍ, yawˇ awˬ hkawˇ bvuhˬ chaweh kuˬ ve yoˬ. Yawˇ kuˬ ve teˇ yanˇ, mvuhˇ tawˍ ve awˬ hkawˇ suhˍ maˬ bvuhˬ la ve yoˬ. 4Mvuhˇ tawˍ ve awˬ hkawˇ suhˍ maˬ bvuhˬ la ve teˇ yanˇ, ngaˬ li‸ bvuh‸-a teh‸ te ve yoˬ. Ya‸ hkʼaˇ, mvuhˇ naw ma lo awˬ hkawˇ bvuhˬ la leh kʼoˆ ve, Mvuhˇ tawˍ ve awˬ hkawˇ suhˍ maˬ bvuhˬ la ve hta‸ yinˉ tcuhˉ taˍ-o‸. Oˇ ve teˇ hpaˍ hta‸ taˇ bvuh‸ teh‸ kʼoˆ laˇ ve hta‸ ngaˬ gʼa kaˇ ve yoˬ.

5Oˇ htaˇ, laˇ tsuhˇ gʼuiˬ hkʼoˆ leh miˬguiˬ hkʼoˆ lo huˉ chehˇ ve hta‸ ngaˬ gʼa mawˬ ve mvuhˇ naw ma tcuh yaˇ teˇ gʼaˇ lehˬ, yawˇ ve la‸ sha paˉ la‸ sheh mvuhˇ hpe lo chiˇ taˆ-e leh, 6mvuhˇ naw ma leh mvuhˇ naw ma hkʼoˆ hkʼa cawˬ ve hkʼa peu-eˬ, miˬguiˬ leh miˬ guiˬ hkʼoˆ hkʼa cawˬ ve hkʼa peu-eˬ, laˇ tsuhˇ gʼuiˬ leh laˇ tsuhˇ gʼuiˬ awˬ hkʼaw lo hkʼa cawˬ ve hkʼa peu-eˬ hta‸ hpanˍ taˍ ve awˬ shehˍ hpaˇ hpeh‸ ve, co co taiˍ taiˍ te‸ chehˇ ve teˇ gʼaˇ hta‸ cuˇ leh chi hkʼe hkanˍ leh kʼoˆ ve, Awˬ yanˇ maˇ kʼaw‸ jiˆ ve yoˬ. 7Mvuhˇ naw ma tcuh yaˇ suhˍ gʼaˇ teˇ gʼaˇ behˬ heh ma awˬ hkawˇ bvuhˬ la ve awˬ yanˇ awˬ hkʼaw lo, Gʼuiˬsha ve naˉ jaˇ ve awˬ ceuˬ, yawˇ ve awˬ ceˬ hpeh‸ ve tcuh kaˍ paˍ teˇ hpaˍ hta‸ ponˬ laˬ htaˇ yawˇ ha lehˬ ve bon hkawˇ hto piˇ taˍ ve hkʼe, biˇ la tuˬ yoˬ.

8Oˇ htaˇ, mvuhˇ naw ma hkʼoˆ lo ngaˬ gʼa kaˇ peuˬ ve awˬ hkawˇ ngaˬ hta‸ teˇ pawˆ kʼaw‸ kʼoˆ laˇ ve, Laˇ tsuhˇ gʼuiˬ hkʼoˆ leh miˬguiˬ hkʼoˆ lo huˉ chehˇ ve mvuhˇ naw ma tcuh yaˇ ve la‸ sheh awˬ hkʼaw lo hpaw taˍ ve li‸ hta‸ ca yuˬ-o‸ teh‸ kʼoˆ laˇ ve yoˬ.

9Hkʼe te leh, mvuhˇ naw ma tcuh yaˇ oˇ ve geh ngaˬ kʼai leh, Li‸ ehˉ oˇ ve ngaˬ hta‸ pe‸ laˇ-oˆ teh‸ kʼoˆ piˇ ve yoˬ. Yawˇ kʼoˆ ve, Yuˬ leh caˇ-oˆ. Nawˬ ve gʼoˇ peˬ awˬ hkʼaw lo hkʼaˇ jaˇ tuˬ yoˬ. Ya‸ hkʼaˇ, nawˬ ve maw‸ kʼaw awˬ hkʼaw lo pehˇ gʼuiˬ hkʼa shuˍ shuˍ mehˬ jaˇ tuˬ yoˬ teh‸, ngaˬ hta‸ kʼoˆ laˇ ve yoˬ.

10Oˇ htaˇ, li‸ ehˉ oˇ ve hta‸ mvuhˇ naw ma tcuh yaˇ ve la‸ sheh awˬ hkʼaw lo ngaˬ yuˬ leh caˇ ve yoˬ. Ngaˬ ve maw‸ kʼaw awˬ hkʼaw lo pehˇ gʼuiˬ hkʼa shuˍ shuˍ mehˬ jaˇ ve yoˬ. Ya‸ hkʼaˇ, li‸ oˇ ve hta‸ ngaˬ caˇ peuˬ hkʼaw‸ nawˉ, ngaˬ ve gʼoˇ peˬ awˬ hkʼaw lo hkʼaˇ la ve yoˬ. 11Oˇ htaˇ yawˇ hui ngaˬ hta‸ kʼoˆ laˇ ve, Chaw ceuˬ laiˉ ceuˬ awˬ lawn maˇ kʼoˆ, mvuhˇmiˬ laiˉ peˆ awˬ lawn maˇ kʼoˆ, tawˇ hkawˇ laiˉ ceuˬ awˬ lawn maˇ kʼoˆ, hkunˉ hawˉ hkanˇ laiˉ gʼaˇ awˬ lawn maˇ kʼoˆ, Gʼuiˬsha nawˬ hta‸ kʼoˆ tcuh ve hkʼe nawˬ gʼa kʼaw‸ kʼoˆ maˍ piˇ tuˬ yoˬ teh‸ kʼoˆ ve yoˬ.

Currently Selected:

Hpeu‸maˍ ve li‸ 10: LHBE

Highlight

Copy

Compare