Heh puiˉ hkʼaw ve li‸ 8
8
Kawˆ faiˇ tuˉ teh ve
1Gʼuiˬsha Moˉseˍ hta‸chi hkʼe kʼoˆ piˇ ve yoˬ. 2Aˍronˍ kawˆ faiˇ tuˉ teh ve teˇ yanˇ, awˬ gʼeuˆ hkʼa deh‸ ba lehˍ cawˬ tuˬ, kawˆ faiˇ taˍ kuiˬ hkʼoˆ lo tuˉ teh tcuh-o, teh‸ yawˇ hta‸ kʼoˆ piˇ ve yoˬ. 3Aˍronˍ lehˬ, Gʼuiˬsha ve tawˇ hta‸ na yuˬ leh kawˆ faiˇ taˍ kuiˬ hkʼoˆ lo tuˉ teh taˍ ve yoˬ. 4Aˬ miˍ tuˉ teh kuiˬ oˇ ve hta‸ Gʼuiˬsha kʼoˆ piˇ taˍ ve hkʼe, shi ceh tiˉ yuˬ te taˍ ve yoˬ.
Leˍviˆ chaw hui hta‸ da‸ kehˬ piˇ leh chiˇ a‸ piˇ ve
5Gʼuiˬsha Moˉseˍ hta‸ chi hkʼe kʼoˆ piˇ ve yoˬ. 6Leˍviˆ chaw hui hta‸ awˬ nu ve Iˉsaˍreˍlaˆ chaw hui geh leuˆ tawˆ leh, yawˇ hui hta‸ da‸ kehˬ tuˬ te piˇ-oˆ. 7Yawˇ hui hta‸ da‸ kehˬ ve iˉ kaˆ hpeh‸ pfuhˍ piˇ leh, yawˇ hui ve awˬ to hkʼoˆ lo cawˬ taˍ ve awˬ mvuh hkʼa peu-eˬ hta‸ chiˇ baˬ peuˬ hkʼaw‸ nawˉ, a shu yawˇ ve veu‸ kʼaˇ hta‸ kʼehˆ tsuhˇ tuˬ kʼoˆ piˇ-oˆ. Oˇ hkʼe te ve kʼo, yawˇ hui da‸ kehˬ la tuˬ yoˬ. 8Oˇ ve hkʼaw‸ nawˉ, yawˇ hui lehˬ nuˇ paˍ haˉ teˇ hkeh leh shaˍlonˍ chu hkaw‸ taˍ ve caˬ hkʼa meu-e hta‸ gʼa yuˬ ve yoˬ. Nawˬ awˬ to lehˬ, venˇbaˆ hpehˇ ve tanˇ tuˬ awˬ pon awˬ nu ve nuˇ paˍ teˇ hkeh hta‸ gʼa yuˬ ve yoˬ. 9Oˇ hkʼe te peuˬ hkʼaw‸ nawˉ, Iˉsaˍreˍlaˆ chaw hkʼa peu-eˬ hta‸ kuˬ hpawnˬ leh, Leˍviˆ chaw hui hta‸ ngaˬ ve aˉ po kʼo bon yehˬ yehˬmiˉhpe‸ lo huˉ tcuh taˍ-o‸. 10Iˉsaˍreˍlaˆ chaw teˇ hpaˍ lehˬ, Leˍviˆ chaw hui ve oˉ kʼoˍ hkʼoˆ lo yawˇ hui ve la‸ sheh taˍ leh, 11yawˇ hui ngaˬ ve kanˉ hta‸ te tuˬ awˬ pon Aˍronˍ lehˬ yawˇ hui hta‸ ngaˬ ve la‸ sheh hkʼaw gʼa chiˇ a‸ laˇ ve yoˬ. 12Leˍviˆ chaw teˇ hpaˍ lehˬ, nuˇ paˍ oˇ ve nyiˇ hkeh awˬ hkʼoˆ lo yawˇ hui ve la‸ sheh taˍ leh, teˇ hkeh hta‸ venˇbaˆ ponˬ tuˬ gʼa tanˇ laˇ ve yoˬ. Awˬ nu ve teˇ hkeh hta‸ aˬ miˍ gʼa tuˉ tanˇ laˇ ve yoˬ. Chi ve lehˬ, Leˍviˆ chaw hui hta‸ da‸ kehˬ tuˬ te piˇ ve awˬ liˇ awˬ hkʼaˇ hpeh‸ ve yoˬ.
13Leˍviˆ chaw teˇ hpaˍ lehˬ, ngaˬ ve kanˉ hta‸ te tuˬ ngaˬ hta‸ gʼa chiˇ a‸ laˇ ve yoˬ. Yawˇ hui lehˬ, Aˍronˍ leh yawˇ ve yaˇ teˇ hpaˍ awˬ hawˉ lo chehˇ leh kanˉ gʼa te ve yoˬ. 14Yawˇ hui ngaˬ ve chaw hpeh‸ la tuˬ, yawˇ hui hta‸ awˬ nu ve Iˉsaˍreˍlaˆ chaw hui geh leuˆ tawˆ taˍ-o‸. 15Nawˬ yawˇ hui hta‸ chi hkʼe da‸ kehˬ tuˬ te piˇ leh, ngaˬ hta‸ chiˇ a‸ laˇ peuˬ ve kʼo, yawˇ hui lehˬ bon yehˬ hkʼaw kanˉ te hpeh‸ ve yoˬ. 16Iˉsaˍreˍlaˆ chaw hui ve yaˇ paˍ uiˍ hkʼa peu-eˬ awˬ tan ngaˬ yawˇ hui hta‸ kʼaw‸ leuˆ yuˬ taˍ peuˬ ve yoˬ. Yawˇ hui lehˬ ngaˬ ve chaw hpeh‸ la peuˬ. 17Eˇjiˇtu‸ mvuhˇmiˬ hkʼaw chehˇ ve yaˇ paˍ uiˍ hkʼa peu-eˬ ve hta‸ ngaˬ tiˇ pehˍ piˇ peuˬ ve teˇ yanˇ, Iˉsaˍreˍlaˆ chaw hui ve yaˇ paˍ uiˍ teˇ hpaˍ leh, yawˇ hui ve ceˇ teˇ hpaˍ awˬ hkʼaw lo, awˉ lawˉ peuˇ paw la ve ceˇ hkʼa peu-eˬ hta‸ ngaˬ ve mawˇ teh‸ gʼa shawˍ taˍ ve yoˬ. 18Ya‸ hkʼaˇ, chi beu‸ Iˉsaˍreˍlaˆ chaw hui ve yaˇ paˍ uiˍ hkʼa peu-eˬ awˬ tan ngaˬ lehˬ Leˍviˆ chaw hui hta‸ kʼaw‸ leuˆ yuˬ taˍ leh, 19Aˍronˍ leh yawˇ ve yaˇ teˇ hpaˍ hta‸ chiˇ a‸ piˇ taˍ ve yoˬ. Yawˇ hui lehˬ, aˉ po kʼo bon yehˬ hkʼaw kanˉ gʼa te leh, Iˉsaˍreˍlaˆ chaw hui da‸ kehˬ ve chehˇ kuiˬ lo maˇ gʼa laˬ tuˬ, yawˇ hui gʼa nyi ha‸ shaˉ piˇ ve yoˬ, teh‸ Gʼuiˬsha Moˉseˍ hta‸ kʼoˆ piˇ ve yoˬ.
20Hkʼe te leh Moˉseˍ, Aˍronˍ leh Iˉsaˍreˍlaˆ chaw hkʼa peu-eˬ, Gʼuiˬsha kʼoˆ ve hkʼe Leˍviˆ chaw hui Gʼuiˬsha hta‸ chiˇ a‸ piˇ ve yoˬ. 21Leˍviˆ chaw teˇ hpaˍ lehˬ, a shu yawˇ awˬ to hta‸ da‸ kehˬ tuˬ te leh, veu‸ kʼaˇ kʼehˆ tsuhˇ ve yoˬ. Hkʼe te leh, Aˍronˍ yawˇ hui hta‸ Gʼuiˬsha hta‸ chiˇ a‸ piˇ leh, da‸ kehˬ tuˬ te piˇ ve yoˬ. 22Leˍviˆ chaw hui hta‸ caˉ da‸ leh, Gʼuiˬsha Moˉseˍ hta‸ hkʼa kʼoˆ piˇ taˍ ve tawˇ hkʼa peu-eˬ ve hta‸ Iˉsaˍreˍlaˆ chaw teˇ hpaˍ na yuˬ leh te ve yoˬ. Hkʼe te leh, Leˍviˆ chaw teˇ hpaˍ lehˬ, Aˍronˍ leh yawˇ ve yaˇ teˇ hpaˍ awˬ hawˉ lo chehˇ leh bon yehˬ hkʼaw kanˉ te paˍ hpeh‸ la ve yoˬ.
23Gʼuiˬsha Moˉseˍ hta‸ chi hkʼe kʼaw‸ kʼoˆ piˇ ve yoˬ. 24A sha‸ 25 hkʼaw‸ gaˬ peuˬ ve Leˍviˆ chaw hkʼa peu-eˬ ngaˬ ve bon yehˬ hkʼaw kanˉ gʼa te ve yoˬ. 25A sha‸ 50 hkʼaw‸ gaˬ ve kʼo, yawˇ hui gʼa jehˇ taˍ ve yoˬ. 26Yawˇ hui lehˬ bon yehˬ hkʼaw ve awˬ nu ve kanˉ ehˉ teˇ hpaˍ hta‸ gʼa ga te hpeh‸ ve yoˬ. Ya‸ hkʼaˇ, awˬ yanˇ hkʼa biˇ kanˉ maˇ gʼa te. Chi ve hta‸ dawˇ nawˇ taˍ-o‸, teh‸ Gʼuiˬsha Moˉseˍ hta‸ kʼoˆ piˇ ve yoˬ.
Currently Selected:
Heh puiˉ hkʼaw ve li‸ 8: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
