Heh puiˉ hkʼaw ve li‸ 7
7
Awˬ hoˉ awˬ naˬ hui tanˇ piˇ taˍ ve mawˇ teˇ hpaˍ
1Moˉseˍ aˉ po kʼo bon yehˬ hta‸ te peuˬ ve teˇ nyi htaˇ, yawˇ lehˬ bon yehˬ oˇ ve leh awˬ hkʼaw lo cawˬ ve mawˇ hkʼa peu-eˬ Gʼuiˬsha hta‸ chiˇ a‸ piˇ ve yoˬ. 2Oˇ htaˇ, Iˉsaˍreˍlaˆ chaw awˬ hoˉ awˬ naˬ teˇ hpaˍ Gʼuiˬsha geh tanˇ tuˬ chi teˇ hpaˍ yuˬ laˬ ve yoˬ. 3Nuˇ lawˬ hkaw‸ maˬ, nuˇ paˍ teˇ chi nyi hkeh, awˬ hoˉ awˬ naˬ nyiˇ gʼaˇ awˬ pon nuˇ lawˬ teˇ maˬ, leh awˬ hoˉ awˬ naˬ teˇ gʼaˇ awˬ pon nuˇ paˍ lonˉ teˇ hkeh yuˬ laˬ ve yoˬ. 4Oˇ htaˇ, Gʼuiˬsha Moˉseˍ hta‸ chi hkʼe kʼoˆ piˇ ve yoˬ. 5Mawˇ oˇ ve teˇ hpaˍ hta‸ bon yehˬ awˬ pon loˍ ve hkʼe yehˇ tuˬ ha‸ yuˬleh, Leˍ viˆ chaw hui hta‸ chiˇ a‸ piˇ taˍ-o‸, teh‸ kʼoˆ ve yoˬ. 6Hkʼe te leh, Moˉseˍ lehˬ nuˇ lawˬ leh nuˇ oˇ ve teˇ hpaˍ Leˍviˆ chaw hui hta‸ chiˇ a‸ piˇ ve yoˬ. 7Yawˇ lehˬ Geˍraˍsonˍ awˬ ceuˬ awˬ hkʼaˇ teˇ hpaˍ hta‸ nuˇ lawˬ nyiˇ maˬ leh nuˇ awˇ hkeh piˇ leh, 8Meˍraˍriˆ awˬ ceuˬ awˬ hkʼaˇ teˇ hpaˍ hta‸ nuˇ lawˬ awˇ maˬ leh nuˇ hinˉ hkeh piˇ ve yoˬ. Yawˇ hui lehˬ, Aˍronˍ ve yaˇ Iˉtaˍmaˍ hawˉ chehˇ leh kanˉ te chehˇ ve yoˬ. 9Ya‸ hkʼaˇ, Moˉseˍ lehˬ Kawˇhaˆ awˬ ceuˬ awˬ hkʼaˇ teˇ hpaˍ hta‸ nuˇ lawˬ leh nuˇ maˇ piˇ. Awˬ lawn kʼo, yawˇ hui gʼa taˆ cawˇ ve bon yehˬ ve mawˇ teˇ hpaˍ lehˬ, da‸ kehˬ ve mawˇ hpeh‸ leh, chaw gʼa taˆ tuˬ ve mawˇ hpeh‸ ve pa taw yoˬ.
10Awˬ hoˉ awˬ naˬ oˇ ve teˇ hpaˍ lehˬ, tuˉ tanˇ kuiˬ Gʼuiˬsha hta‸ chiˇ a‸ piˇ tuˬ awˬ pon, tanˇ tuˬ teˇ hpaˍ hta‸ htawˇ yuˬ laˬ ve yoˬ. Yawˇ hui tanˇ tuˬ oˇ ve teˇ hpaˍ Gʼuiˬsha hta‸ tanˇ piˇ tuˬ, tuˉ tanˇ kuiˬ paˇ lo chehˇ taˍ ve teˇ yanˇ, 11Gʼuiˬsha Moˉseˍ hta‸ chi hkʼe kʼoˆ piˇ ve yoˬ. Tuˉ tanˇ kuiˬ chiˇ a‸ piˇ tuˬ awˬ pon, awˬ yanˇ teˇ chi nyiˇ nyi teh piˇ leh, yawˇ hui hta‸ teˇ nyi teˇ gʼaˇ ceh tanˇ tuˬ yuˬ veu laˇ tcuh-o, teh‸ kʼoˆ piˇ ve yoˬ.
12-83Hkʼe te leh, yawˇ hui awˬ hawˉ lo kʼoˆ taˍ ve hkʼe, a shu yawˇ ve awˬ yanˇ gaˬ htaˇ ca tanˇ piˇ ve yoˬ.
| Awˬ nyi | Chaw ceuˬ Awˬ hoˉ | |
|---|---|---|
| 1 | Yuˇda‸ | Aˍmiˆnaˍdaˆ yaˇ Naˍsonˍ |
| 2 | Iˉsaˍhkaˍ | Zuˇaˍ ve yaˇ Naˍtaˍneˍlaˆ |
| 3 | Zeˍbuˆlonˍ | Heˍlonˍ ve yaˇ Eˇlaˍbaˆ |
| 4 | Ruˇbenˍ | Sheˍduˇraˆ yaˇ Eˇliˆzuˇraˆ |
| 5 | Siˉmonˍ | Zuˇriˆshaˍdehˆ yaˇ Sheˍluˆmeˍlehˆ |
| 6 | Gaˆ | Deˍlaˆ ve yaˇ Eˇlaˍsaˆ |
| 7 | Eˇhpaˍrenˍ | Aˍmiˇhuˆ yaˇ Eˇliˆshaˍmaˍ |
| 8 | Maˍnaˍseˍ | Peˍdaˍruˇzaˆ yaˇ Gaˍmaˍleˍlaˆ |
| 9 | Beˍyaˍmenˍ | Giˉdonˍniˆ yaˇ Aˍbiˆdanˍ |
| 10 | Danˍ | Aˍmiˆshaˍdehˆ yaˇ Aˍheˍzaˍ |
| 11 | Aˍshaˍ | Awˇkaˍranˍ yaˇ Paˍgeˍlaˆ |
| 12 | Naˍtaˍliˆ | Eˇnanˍ yaˇ Aˍhiˇraˆ |
Yawˇ hui yuˬ laˬ ve mawˇ teˇ hpaˍ lehˬ, teˇ cawehˬ ngaˇ hkanˉ cawˬ ve hpu kawˆ teˇ maˬ, suhˍ hkanˉ cawˬ ve hpu hkehˇ pe le teˇ maˬ, (hkehˇ chi nyiˇ maˬ hkʼaw awˬ shiˍ awˬ nu tuˉ tanˇ tuˬ awˬ pon, shaˍlonˍ chu hkaw‸ taˍ ve caˬ hkʼa meu-e hkʼa biˇ keu taˍ ve yoˬ). Teˇ hkanˉ cawˬ ve shi kawˆ teˇ maˬ, (kawˆ chi ve hkʼaw sha hawnˉ hkʼa biˇ keu taˍ ve yoˬ). Aˬ miˍ tuˉ tanˇ tuˬ awˬ pon nuˇ paˍ haˉ teˇ hkeh, yawˬ paˍ lonˉ teˇ hkeh, teˇ hkʼaw‸ biˇ peuˬ ve yawˬ ehˉ teˇ hkeh, venˇbaˆ hpehˇ ve tanˇ tuˬ awˬ pon aˉ che‸ teˇ hkeh, awˬ chawˇ te da‸ ve tanˇ tuˬ awˬ pon nuˇ paˍ lonˉ nyiˇ hkeh, yawˬ ehˉ ngaˇ hkeh, aˉche‸ ngaˇ hkeh leh a sha‸ teˇ hkʼaw‸ biˇ peuˬ ve yawˬ ehˉ ngaˇ hkeh yuˬ veu laˇ ve yoˬ.
84-88Tuˉ tanˇ kuiˬ chi hta‸ chiˇ a‸ piˇ htaˇ, yawˇ hui yuˬ veu laˇ ve mawˇ teˇ hpaˍ lehˬ,
- Hpu kawˆ teˇ chi nyiˇ maˬ, hpu hkehˇ pe le teˇ chi nyiˇ maˬ, Hkʼa peu-eˬ nyiˇ chi awˇ cawehˬ cawˬ ve yoˬ.
- Shi kawˆ teˇ chi nyiˇ maˬ, hkʼa peu-eˬ teˇ cawehˬ nyiˇ hkanˉ cawˬ ve yoˬ.
- Aˬ miˍ tuˉ tanˇ tuˬ awˬ pon nuˇ paˍ lonˉ teˇ chi nyiˇ hkeh, yawˬ ehˉ teˇ chi nyiˇ hkeh, a sha‸ teˇ hkʼaw‸ biˇ peuˬ ve yawˬ ehˉ teˇ chi nyiˇ hkeh, leh awˬ shiˍ awˬ nu tuˉ tanˇ tuˬ teˇ hpaˍ,
- Venˇbaˆ hpehˇ ve tuˉ tanˇ tuˬ awˬ pon aˉ che‸ teˇ chi nyiˇ hkeh,
- Awˬ chawˇ te da‸ ve tuˉ tanˇ tuˬ awˬ pon nuˇ paˍ lonˉ nyiˇ chi awˇ hkeh, yawˬ ehˉ hkaw‸ hkeh, aˉ che‸ hkaw‸ hkeh, a sha‸ teˇ hkʼaw‸ gaˬ peuˬ ve yawˇ ehˉ hkaw‸ hkeh hpeh‸ ve yoˬ.
89Moˉseˍ aˉ po kʼo bon yehˬ hkʼaw lo‸-e leh Gʼuiˬsha hta‸ tawˇ ca yaw da‸ ve teˇ yanˇ, Gʼuiˬsha lehˬ hkeˍruˆbenˍ nyiˇ maˬ awˬ kaˍ lo cawˬ ve ka ti‸ shaˉ caˆ ta kʼoˍ awˬ hkʼoˆ lo chehˇ taˍ leh, tawˇ yaw laˇ chehˇ ve awˬ hkawˇ hta‸ yawˇ gʼa kaˇ ve yoˬ.
Currently Selected:
Heh puiˉ hkʼaw ve li‸ 7: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
