Oˉ kʼoˍ pui ve li‸ 13
13
Awˬ guiˬ kʼuˉ hkʼoˆ a naˍ hpeh‸ ve awˬ lawn
1Gʼuiˬsha lehˬ, Moˉseˍ leh Aˍronˍ hta‸ awˬ liˇ awˬ hkʼaˇ chi teˇ hpaˍ kʼoˆ maˍ piˇ ve yoˬ. 2Chaw teˇ gʼaˇ yawˇ ve awˬ to awˬ hkʼoˆ lo kawˆ law‸ law‸ ve shaˉ chuˇ, maˇ heˆ kʼo a naˍ teˇ ceuˬ ceuˬ behˬ tawˆ la ve kʼo, yawˇ hta‸ Aˍronˍ awˬ ceuˬ awˬ hkʼaˇ paw hkuˇ geh gʼa shiˍ kʼai piˇ ve yoˬ. 3Paw hkuˇ lehˬ a naˍ oˇ ve hta‸ gʼa chaˬ nyi ve yoˬ. A naˍ hkʼoˆ lo cawˬ ve awˬ mvuh lehˬ hpuˉ-ehˍ hpeh‸ leh, awˬ guiˬ kʼuˉ hawˉ lo a naˍ hpeh‸ chehˇ ve kʼo, a naˍ oˇ ve lehˬ hkiˬ tu‸ a naˍ hpeh‸ ve yoˬ. Paw hkuˇ lehˬ yawˇ hta‸ maˇ da‸ maˇ kehˬ ve chaw teh‸ gʼa shawˍ taˍ ve yoˬ. 4Ya‸ hkʼaˇ, a naˍ oˇ ve hpuˉ-ehˍ cawˬ ve htawˇ, awˬ mvuh teˇ hpaˍ maˇ hpu ve kʼo, paw hkuˇ lehˬ yawˇ hta‸ suhˍ nyi hkʼa gaˬ gʼa yuˬ haw taˍ ve yoˬ. 5Suhˍ nyi teˇ nyi htaˇ, paw hkuˇ yawˇ hta‸ teˇ pawˆ gʼa kʼaw‸ chaˬ nyi ve yoˬ. A naˍ oˇ ve maˇ kʼaw‸ uiˍ kʼai leh ponˬ laˬ htaˇ hkʼe ceh tiˉ hpeh‸ chehˇ ve kʼo, paw hkuˇ lehˬ yawˇ hta‸ awˬ hkʼaw‸ nawˉ suhˍ nyi hkʼa gaˬ gʼa kʼaw‸ yuˬ haw taˍ ve yoˬ. 6Suhˍ nyi gaˬ htaˇ, paw hkuˇ yawˇ hta‸ teˇ pawˆ gʼa kʼaw‸ chaˬ nyi ve yoˬ. A naˍ oˇ ve te‸ chiˉ maˇ kʼaw‸ hpeh‸ leh dehˬ kʼai chehˇ ve kʼo, paw hkuˇ lehˬ yawˇ hta‸ da‸ kehˬ la peuˬ, teh‸ gʼa shawˍ taˍ piˇ ve yoˬ. Yawˇ kʼaw‸ da‸ kehˬ la tuˬ, veu‸ deh taˍve veu‸ kʼaˇ hta‸ gʼa tsuhˇ ve yoˬ. 7Paw hkuˇ yawˇ hta‸ da‸ kehˬ la peuˬ teh‸ kʼoˆ piˇ peuˬ hkʼaw‸ nawˉ, a naˍ oˇ ve kʼaw‸ caˉ hpeh‸ tawˆ la ve kʼo, yawˇ paw hkuˇ geh teˇ pawˆ gʼa kʼaw‸ kʼai ve yoˬ. 8Paw hkuˇ teˇ pawˆ gʼa kʼaw‸ chaˬ nyi ve yoˬ. A naˍ oˇ ve kʼaw‸ jaˇ la chehˇ ve kʼo, paw hkuˇ lehˬ chaw oˇ ve hta‸ maˇ da‸ maˇ kehˬ ve chaw, teh‸ gʼa shawˍ taˍ ve yoˬ. A naˍ oˇ ve lehˬ hkiˬ tu‸ a naˍ hpeh‸ ve yoˬ.
9Chaw teˇ gʼaˇ hkiˬ tu‸ a naˍ keuˆ ve kʼo, yawˇ hta‸ paw hkuˇ geh gʼa shiˍ kʼai ve yoˬ. 10Paw hkuˇ lehˬ yawˇ ve a naˍ hta‸ gʼa chaˬ nyi ve yoˬ. A naˍ oˇ ve hpuˉ-ehˍ hpeh‸ leh, awˬ mvuh teˇ hpaˍ htawˇ hpu kʼai peuˬ ve awˬ hkʼoˆ, behˬ gʼuiˬ htawˇ cawˬ ve kʼo, 11a naˍ oˇ ve lehˬ hkiˬ tu‸ a naˍ hpeh‸ ve yoˬ. Paw hkuˇ lehˬ, yawˇ hta‸ maˇ da‸ maˇ kehˬ ve chaw, teh‸ gʼa shawˍ taˍ ve yoˬ. Yawˇ hta‸ yuˬ haw chehˇ tuˬ maˇ loˍ. Yawˇ lehˬ maˇ da‸ maˇ kehˬ ve chaw hpeh‸ ve yoˬ. 12A naˍ oˇ ve lehˬ, oˉ kʼoˍ hta‸ te leh hkui sheh lo hkʼa gaˬ cawˬ ve kʼo, 13paw hkuˇ lehˬ yawˇ hta‸ teˇ pawˆ gʼa kʼaw‸ chaˬ nyi ve yoˬ. Yawˇ teˇ to hkʼa peu-eˬ a naˍ oˇ ve biˇ kʼai leh hpuˉ-ehˍ hpeh‸ ve kʼo, paw hkuˇ lehˬ yawˇ hta‸ da‸ kehˬ la peuˬ, teh‸ gʼa shawˍ taˍ piˇ ve yoˬ. Yawˇ ve hkiˬ tu‸ a naˍ mehˉ kʼai peuˬ. 14Ya‸ hkʼaˇ, a naˍ oˇ ve teˇ pawˆ kʼaw‸ hpeh‸ tawˆ la ve kʼo, yawˇ lehˬ maˇ da‸ maˇ kehˬ. 15Paw hkuˇ yawˇ hta‸ teˇ pawˆ gʼa kʼaw‸ chaˬ nyi ve yoˬ. A naˍ kʼaw‸ hpeh‸ tawˆ la chehˇ ve hta‸ yawˇ gʼa mawˬ ve kʼo, yawˇ hta‸ maˇ da‸ maˇ kehˬ ve chaw, teh‸ gʼa kʼaw‸ shawˍ taˍ ve yoˬ. A naˍ oˇ ve lehˬ hkiˬ tu‸ a naˍ hpeh‸ leh, yawˇ lehˬ maˇ da‸ maˇ kehˬ ve chaw hpeh‸ ve yoˬ. 16Ya‸ hkʼaˇ, a naˍ oˇ ve kʼaw‸ na-e la leh hpuˉ-ehˍ hpeh‸ la ve kʼo, yawˇ lehˬ paw hkuˇ hta‸ teˇ pawˆ gʼa ca kʼaw‸ maˍ piˇ ve yoˬ. 17Paw hkuˇ lehˬ yawˇ hta‸ teˇ pawˆ gʼa kʼaw‸ chaˬ nyi ve yoˬ. A naˍ oˇ ve hpuˉ-ehˍ hpeh‸ la peuˬ ve kʼo, yawˇ lehˬ kʼaw‸ da‸ kehˬ la peuˬ.
18Chaw teˇ gʼaˇ shaˉ chuˇ tawˆ leh na-e la peuˬ hkʼaw‸ nawˉ, 19shaˉ chuˇ tawˆ kuiˬ teˇ hkʼaˇ lo hpuˉ-ehˍ ve, maˇ heˆ kʼo nyi hpu ve a naˍ kʼaw‸ hpeh‸ tawˆ la ve kʼo yawˇ paw hkuˇ geh gʼa kʼai ve yoˬ. 20Paw hkuˇ lehˬ yawˇ hta‸ gʼa chaˬ nyi ve yoˬ. Awˬ guiˬ kʼuˉ hawˉ lo a naˍ hpeh‸ leh, awˬ mvuh teˇ hpaˍ htawˇ hpuˉ-ehˍ hpeh‸ la ve kʼo, yawˇ hta‸ maˇ da‸ maˇ kehˬ ve chaw, teh‸ gʼa shawˍ taˍ ve yoˬ. Shaˉ chuˇ tawˆ kuiˬ lo hkiˬ tu‸ a naˍ kʼaw‸ hpeh‸ tawˆ la taˍ peuˬ ve yoˬ. 21Ya‸ hkʼaˇ, paw hkuˇ chaˬ nyi leh awˬ mvuh teˇ hpaˍ maˇ hpu ve awˬ hkʼoˆ, awˬ guiˬ kʼuˉ te‸ chiˉ maˇ hpeh‸ ve kʼo, yawˇ hta‸ suhˍ nyi hkʼa gaˬ gʼa yuˬ haw taˍ ve yoˬ. 22A naˍ oˇ ve kʼaw‸ pehˉ kʼai ve kʼo, paw hkuˇ lehˬ yawˇ hta‸ maˇ da‸ maˇ kehˬ ve chaw, teh‸ gʼa shawˍ taˍ ve yoˬ. A naˍ oˇ ve lehˬ hkiˬ tu‸ a naˍ hpeh‸ ve yoˬ. 23Ya‸ hkʼaˇ, a naˍ oˇ ve te‸ chiˉ maˇ kʼaw‸ hpeh‸ kʼai ve kʼo, a naˍ oˇ ve lehˬ shaˉ chuˇ hta‸ pa taw hpeh‸ tawˆ la ve a naˍ ceh hpeh‸ leh, paw hkuˇ lehˬ yawˇ hta‸ da‸ kehˬ la peuˬ, teh‸ gʼa shawˍ taˍ ve yoˬ.
24Chaw teˇ gʼaˇ aˬ miˍ chiˆ leh awˬ guiˬ kʼuˉ hpuˉ-ehˍ, maˇ heˆ kʼo nyiˉ-ehˍ hpeh‸ la ve kʼo, 25paw hkuˇ yawˇ hta‸ gʼa chaˬ nyi ve yoˬ. Awˬ mvuh teˇ hpaˍ hpuˉ-ehˍ hpeh‸ la leh awˬ gʼuiˬ kʼuˉ hawˉ lo a naˍ hpeh‸ chehˇ ve kʼo, a naˍ oˇ ve lehˬ aˬ miˍ chiˆ ve pa taw, kʼaw‸ caˉ hpeh‸ tawˆ la chehˇ ve hkiˬ tu‸ a naˍ hpeh‸ ve yoˬ. Paw hkuˇ lehˬ yawˇ hta‸ maˇ da‸ maˇ kehˬ ve chaw, teh‸ gʼa shawˍ taˍ ve yoˬ. 26Ya‸ hkʼaˇ, awˬ mvuh hpuˉ-ehˍ maˇ cawˬ leh awˬ guiˬ kʼuˉ hawˉ lo a naˍ maˇ cawˬ ve kʼo, paw hkuˇ lehˬ chaw oˇ ve hta‸ suhˍ nyi hkʼa gaˬ gʼa yuˬ haw taˍ ve yoˬ. 27Suhˍ nyi gaˬ htaˇ paw hkuˇ yawˇ hta‸ gʼa kʼaw‸ chaˬ nyi ve yoˬ. A naˍ oˇ ve kʼaw‸ pehˉ kʼai chehˇ ve kʼo, oˇ ve lehˬ hkiˬ tu‸ a naˍ hpeh‸ ve yoˬ. Paw hkuˇ lehˬ yawˇ hta‸ maˇ da‸ maˇ kehˬ ve chaw, teh‸ gʼa shawˍ taˍ ve yoˬ. 28A naˍ oˇ ve maˇ kʼaw‸ pehˉ kʼai ve kʼo, oˇ ve lehˬ hkiˬ tu‸ a naˍ maˇ heˆ. Aˬ miˍ chiˆ ve pa taw naˬ chehˇ ve a naˍ ceh hpeh‸ leh, paw hkuˇ yawˇ hta‸ da‸ kehˬ la peuˬ ve chaw, teh‸ gʼa shawˍ taˍ ve yoˬ.
29Chaw teˇ gʼaˇ oˉ kʼoˍ hta‸ maˇ kʼoˆ, paˇ kaˇ hta‸ maˇ kʼoˆ, a naˍ hpeh‸ tawˆ la ve kʼo, 30paw hkuˇ lehˬ yawˇ hta‸ gʼa chaˬ nyi ve yoˬ. Awˬ guiˬ kʼuˉ hawˉ lo a naˍ hpeh‸ chehˇ leh, awˬ mvuh teˇ hpaˍ shiˉ-ehˍ hpeh‸ la ve kʼo, a naˍ oˇ ve lehˬ hkiˬ tu‸ a naˍ hpeh‸ ve yoˬ. Paw hkuˇ lehˬ yawˇ hta‸ maˇ da‸ maˇ kehˬ ve chaw, teh‸ gʼa shawˍ taˍ ve yoˬ. 31Ya‸ hkʼaˇ, awˬ guiˬ kʼuˉ hawˉ lo te‸ chiˉ a naˍ maˇ cawˬ leh, awˬ mvuh teˇ hpaˍ ceh tiˉ shiˉ-ehˍ hpeh‸ chehˇ ve kʼo, paw hkuˇ lehˬ chaw oˇ ve hta‸ suhˍ nyi hkʼa gaˬ gʼa yuˬ haw taˍ ve yoˬ. 32Suhˍ nyi gaˬ htaˇ, paw hkuˇ yawˇ hta‸ teˇ pawˆ gʼa kʼaw‸ chaˬ nyi ve yoˬ. A naˍ oˇ ve maˇ kʼaw‸ pehˉ kʼai leh, awˬ mvuh teˇ hpaˍ maˇ kʼaw‸ shi ve kʼo, 33chaw oˇ ve lehˬ a naˍ awˬ jaˇ awˬ ji lo cawˬ ve awˬ mvuh teˇ hpaˍ hta‸ gʼa chiˇ baˬ ve yoˬ. Paw hkuˇ lehˬ yawˇ hta‸ awˬ hkʼaw‸ nawˉ suhˍ nyi hkʼa gaˬ gʼa kʼaw‸ yuˬ haw taˍ ve yoˬ. 34Suhˍ nyi teˇ nyi htaˇ, paw hkuˇ yawˇ hta‸ teˇ pawˆ gʼa kʼaw‸ chaˬ nyi ve yoˬ. A naˍ oˇ ve maˇ kʼaw‸ pehˉ kʼai leh, awˬ guiˬ kʼuˉ hawˉ lo a naˍ maˇ cawˬ ve kʼo, paw hkuˇ lehˬ yawˇ hta‸ da‸ kehˬ la peuˬ, teh‸ gʼa shawˍ taˍ ve yoˬ. Yawˇ lehˬ, veu‸ deh taˍ ve veu‸ kʼaˇ hta‸ gʼa tsuhˇ ve yoˬ. Oˇ ve hkʼaw‸ nawˉ yawˇ kʼaw‸ da‸ kehˬ la ve yoˬ. 35Ya‸ hkʼaˇ, awˬ hkʼaw‸ nawˉ yawˇ ve a naˍ teˇ pawˆ kʼaw‸ hpeh‸ tawˆ la ve kʼo, 36paw hkuˇ yawˇ hta‸ gʼa kʼaw‸ chaˬ nyi ve yoˬ. A naˍ oˇ ve kʼaw‸ pehˉ kʼai ve kʼo, yawˇ ve awˬ mvuh hkʼaˬ hkʼe hpeh‸ kʼai chehˇ ve hta‸ nyi chehˇ tuˬ maˇ loˍ. Yawˇ lehˬ maˇ da‸ maˇ kehˬ ve chaw hpeh‸ ve yoˬ. 37Ya‸ hkʼaˇ, a naˍ oˇ ve maˇ kʼaw‸ pehˉ kʼai leh, awˬ mvuh te‸ chiˉ maˇ hpeh‸ ve kʼo, a naˍ oˇ ve na-e la peuˬ ve yoˬ. Paw hkuˇ lehˬ yawˇ hta‸ da‸ kehˬ la peuˬ ve chaw, teh‸ gʼa shawˍ taˍ piˇ ve yoˬ.
38Chaw teˇ gʼaˇ awˬ guiˬ kʼuˉ hkʼoˆ lo hpuˉ-ehˍ hpeh‸ la ve kʼo, paw hkuˇ yawˇ hta‸ gʼa chaˬ nyi ve yoˬ. 39Awˬ guiˬ kʼuˉ ceh tiˉ hpu ve kʼo, oˇ ve lehˬ a naˍ maˇ heˆ. Yawˇ lehˬ da‸ kehˬve chaw hpeh‸ ve yoˬ.
40-41Chaw teˇ gʼaˇ yawˇ ve oˉ kʼoˍ awˬ gʼuˇ suhˍ hpawˇ leh awˬ hkʼaw‸ nawˉ hpawˇ ve uˉ hkeh mvuh piˬ ce ve kʼo, yawˇ lehˬ maˇ da‸ maˇ kehˬ ve chaw hpeh‸ la ve maˇ heˆ. 42Ya‸ hkʼaˇ, uˉ hkeh mvuh piˬ ce taˍ kuiˬ lo a naˍ hpeh‸ tawˆ la ve kʼo, oˇ ve lehˬ hkiˬ tu‸ a naˍ hpeh‸ ve yoˬ. 43Paw hkuˇ yawˇ hta‸ gʼa chaˬ nyi ve yoˬ. A naˍ oˇ ve lehˬ hpuˉ-ehˍ ve a naˍ awˬ diˬ hpeh‸ ve kʼo, 44paw hkuˇ lehˬ yawˇ hta‸ maˇ da‸ maˇ kehˬ ve hkiˬ tu‸ a naˍ cawˬ ve chaw, teh‸ gʼa shawˍ taˍ ve yoˬ.
45Hkiˬ tu‸ a naˍ cawˬ ve chaw lehˬ, tzuh‸ keu ve veu‸ kʼaˇ hta‸ gʼa veu‸ deh leh, oˉ kʼoˍ maˇ gʼa puiˍ taˍ. Yawˇ ve mehˆ hpfuhˇ hta‸ gʼa beh taˍ leh, Ngaˬ lehˬ maˇ da‸ maˇ kehˬ, teh‸ gʼa kuˬ tcuhˉ taˍ ve yoˬ. 46Yawˇ hkiˬ tu‸ a naˍ cawˬ chehˇ sheˍ ve ceh ceh maˇ da‸ maˇ kehˬ. Yawˇ lehˬ shu hta‸vuiˇ kuiˬ lo gʼa ca hpaw chehˇ taˍ ve yoˬ.
Mawˇ hta‸ yawˇ taˆ ve awˬ lawn
47-49Veu‸ kʼaˇ hkʼaˬ hkʼe ve teˇ ceuˬ hta‸ maˇ kʼoˆ, hpa hkʼaˬ hkʼe ve teˇ ceuˬ hta‸ maˇ kʼoˆ, shaˍ guiˬ hkʼaˬ hkʼe ve teˇ ceuˬ hta‸ maˇ kʼoˆ, yawˇ taˆ ve awˬ hkʼaˇ nawˉ-ehˍ, maˇ heˆ kʼo nyiˉ-ehˍ cawˬ ve kʼo, oˇ ve lehˬ pehˉ kʼai puiˉ ve yawˇ hpeh‸ ve yoˬ. Yawˇ taˆ ve mawˇ oˇ ve paw hkuˇ hta‸ gʼa ca yuˬ maˍ piˇ ve yoˬ. 50Paw hkuˇ lehˬ mawˇ oˇ ve hta‸ gʼa chaˬ nyi leh, suhˍ nyi hkʼa gaˬ teˇ kaˬ lo gʼa teh taˍ ve yoˬ. 51Suhˍ nyi gaˬ htaˇ mawˇ oˇ ve hta‸ yawˇ teˇ pawˆ gʼa kʼaw‸ chaˬ nyi ve yoˬ. Mawˇ oˇ ve hta‸ yawˇ taˆ ve kʼaw‸ pehˉ kʼai ve kʼo, mawˇ oˇ ve lehˬ maˇ da‸ maˇ kehˬ. 52Paw hkuˇ lehˬ mawˇ oˇ ve hta‸ aˬ miˍ gʼa tuˉ baˬ ve yoˬ.
53Ya‸ hkʼaˇ, paw hkuˇ chaˬ nyi leh oˇ ve lehˬ pehˉ kʼai puiˉ ve yawˇ maˇ heˆ ve kʼo, 54mawˇ oˇ ve hta‸ gʼa tsuhˇ baˬ leh, suhˍ nyi hkʼa gaˬ gʼa kʼaw‸ teh taˍ ve yoˬ. 55Oˇ ve hkʼaw‸ nawˉ, yawˇ lehˬ mawˇ oˇ ve hta‸ teˇ pawˆ kʼaw‸ chaˬ nyi leh, yawˇ taˆ ve maˇ kʼaw‸ pehˉ kʼai ve htawˇ, awˬ sheuˉ teˇ ceuˬ maˇ kʼaw‸ pa ve kʼo, mawˇ oˇ ve hta‸ maˇ da‸ maˇ kehˬ ve mawˇ teh‸ gʼa shawˍ taˍ ve yoˬ. Mawˇ oˇ ve hkʼaˬ hkʼe ve mawˇ hpeh‸ ve htawˇ, aˬ miˍ gʼa tuˉ baˬ ve yoˬ. 56Ya‸ hkʼaˇ, yawˇ chaˬ nyi leh yawˇ taˆ ve awˬ hkʼaˇ mehˉ kʼai peuˬ ve hta‸ gʼa mawˬ ve kʼo, yawˇ taˆ ve awˬ ti hta‸ gʼa shawˆ baˬ ve yoˬ. 57Awˬ hkʼaw‸ nawˉ mawˇ oˇ ve hta‸ yawˇ teˇ pawˆ kʼaw‸ taˆ ve kʼo, mawˇ shehˍ hpaˇ lehˬ mawˇ oˇ ve hta‸ aˬ miˍ gʼa tuˉ baˬ ve yoˬ. 58Yawˇ lehˬ mawˇ oˇ ve hta‸ tsuhˇ nyi leh yawˇ taˆ hkʼaˇ mehˉ kʼai ve kʼo, yawˇ lehˬ mawˇ oˇ ve hta‸ teˇ pawˆ gʼa kʼaw‸ tsuhˇ nyi ve yoˬ. Oˇ hkʼe te ve kʼo, mawˇ oˇ ve kʼaw‸ da‸ kehˬ la ve yoˬ.
59Chi ve lehˬ, hpa, veu‸ kʼaˇ, leh shaˍ guiˬ hta‸ yawˆ taˆ ve kʼo, mawˇ oˇ ve hta‸ hkʼaˬ hkʼe gʼa te tuˬ ve awˬ liˇ awˬ hkʼaˇ hpeh‸ ve yoˬ.
Currently Selected:
Oˉ kʼoˍ pui ve li‸ 13: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
