Yawˇlaˆ li‸ 2
2
Paˉ ce‸ lehˬ Gʼuiˬsha suhˉ jehˬ ve awˬ heˆ hpeh‸ ve
1Behˬ heh ma meuˆ leh, Gʼuiˬsha ve da‸ kehˬ ve Ziˉonˍ hkʼaw hkʼoˆ lo duiˆ-ehˍ shaˇ-ehˍ te chehˇ-oˆ.
Yuˇda‸ chaw teˇ hpaˍ-oˬ,
kawˆ cheˇ chehˇ-oˆ. Awˬ lawn kʼo,
Gʼuiˬsha ve awˬ nyi gaˬ la chehˇ ve yoˬ.
2Awˬ nyi oˇ ve lehˬ, naˆ ho‸ jaˇ ve awˬ nyi hpeh‸ ve yoˬ.
Hkʼaw hkʼoˆ lo naˆ ho‸ la chehˇ ve hkʼe,
paˉ ce‸ moˍ lonˉ tawˆ la tuˬ yoˬ.
Chi hkʼe ve awˬ ceuˬ teˇ pawˆ ka‸ maˇ hpeh‸ la jaw leh,
laˬ tuˬ ve awˬ yanˇ awˬ hkʼaw lo htawˇ,
teˇ pawˆ ka‸ kʼaw‸ hpeh‸ la tuˬ ve maˇ heˆ.
3Aˬ miˍ hkʼa shuˍ, yawˇ hui lehˬ awˬ cehˬ teˇ hpaˍ hta‸ caˇ baˬve yoˬ.
Yawˇ hui mehˆ gʼuˇ suhˍ lo, mvuhˇmiˬ lehˬ Eˍdenˍ hko hkʼa shuˍ hpeh‸ ve yoˬ.
Ya‸ hkʼaˇ, yawˇ hui hkʼaw‸ nawˉ paˉ lo lehˬ, gawˬ cu gawˬ pehˆ ve mvuhˇmiˬ hpeh‸ ve yoˬ.
Yawˇ hui la‸ hkʼaw lo teˇ ceuˬ ka‸ ponˬ maˇ hpeh‸.
4Yawˇ hui lehˬ, iˉ mvuhˇ hta‸ shuˍ leh,
ma‸ bawˆ kuiˬ lo kʼai chehˇ ve iˉ mvuhˇ hkʼa shuˍ gʼuiˇ toˇ chehˇ ve yoˬ.
5Yawˇ hui hkʼaw hkʼoˆ lo pawˆ taˆ-e chehˇ ve teˇ yanˇ,
iˉ mvuhˇ lawˬ hkʼa shuˍ awˬ hkawˇ bvuhˬ leh,
zuhˇ de hta‸ aˬ miˍ to‸ chehˇ ve hkʼa shuˍ awˬ hkawˇ bvuhˬ jaˇ ve yoˬ.
Yawˇ hui lehˬ, ma‸ bawˆ tuˬ hkʼa deh‸ gu taˍ ve ma‸ moˍ lonˉ hta‸ shuˍ ve yoˬ.
6Yawˇ hui laˬ chehˇ ve teˇ yanˇ, chaw teˇ gʼaˇ le le kawˆ jaˇ leh,
chaw suh hkʼe hpeh‸ la ve yoˬ.
7Yawˇ hui lehˬ, ha‸ hanˉ jaˇ ve ma‸ yaˇ hkʼa shuˍ ma‸ gʼaˇ hte‸ bawˆ ve yoˬ.
Ma‸ yaˇ teˇ hpaˍ hkʼa shuˍ, gʼo‸ pa hkʼoˆ lo gaˆ taˆ-e ve yoˬ.
Yawˇ hui lehˬ, gʼuˇ suhˍ lo gʼaˇ hte‸ bawˆ laˬ chehˇ leh,
la‸ mehˍ la‸ sha maˇ jaw kʼai.
8Yawˇ hui lehˬ, a shu yawˇ ve awˬ hkʼaˇ hta‸ ceh kʼai leh, shu ve awˬ hkʼaˇ hta‸ maˇ kʼai.
Yawˇ hui lehˬ ko taˍ tsuhˇ taˍ ve teˇ hpaˍ hta‸ hpanˍ kʼai leh,
yawˇ hui hta‸ te‸ chiˉ tawˍ taˍ maˇ gʼa.
9Yawˇ hui venˇ hkʼaw gʼuiˇ lo‸-e leh,
lanˇ venˇ hkʼoˆ lo gʼuiˇ toˇ chehˇ ve yoˬ.
Yawˇ hui yehˬ teˇ hpaˍ hkʼoˆ pawˆ taˆ-e leh,
chaw hkʼawˇ hkʼa shuˍ yehˬ miˉ ehˉ teˇ hpaˍ hkʼaw taˆ lo‸-e ve yoˬ.
10Yawˇ hui gʼuˇ suhˍ lo miˬ hiˆ la leh,
mvuhˇ naw ma htawˇ hiˆ hiˆ naˇ naˇ hpeh‸ la ve yoˬ.
Mvuhˇ nyi ha pa htawˇ naˆ ho‸ kʼai leh,
meu‸ keu shiˍ teˇ hpaˍ ka‸ awˬ gʼeuˆ maˇ kʼaw‸ ba ve yoˬ.
11Gʼuiˬsha lehˬ yawˇ ve ma‸ moˍ lonˉ hta‸ tawˇ yaw piˇ chehˇ ve yoˬ.
Yawˇ ve ma‸ moˍ maˇ jaˇ leh,
awˬ gʼaˇ uiˍ jaˇ ve yoˬ.
Gʼuiˬsha ve awˬ nyi lehˬ hkʼaˬ ma kawˆ tuˬ uiˍ jaˇ ve le.
A shu teˇ gʼaˇ hkanˍ gʼa tuˬ le.
Venˇbaˆ dawˇ hpfuhˆ tuˬ kuˬ hkawˇ
12Ya‸ hkʼaˇ Gʼuiˬsha kʼoˆ ve,
Nawˬ hui ve nyi ma awˬ tawˬ hkʼa gaˬ ngaˬ geh kʼaw‸ hpfuhˆ kʼaw‸ la-o.
Caˇ tuˬ ce leh, dawˇ haˍ gaˇ haˍ ve hkʼaw hawˬ chehˇ-oˆ, teh‸ kʼoˆ chehˇ ve yoˬ.
13Nawˬ hui ve veu‸ kʼaˇ hta‸ tzuh‸ suhˍ ve a‸ kehˉ
nawˬ hui ve nyi ma hta‸ hkoˇ kʼai piˇ leh,
nawˬ hui ve Jawˇmawˇ Gʼuiˬsha geh kʼaw‸ hpfuhˆ kʼaw‸ la-o.
Awˬ lawn kʼo, yawˇ lehˬ ha kʼaˉ puiˉ leh,
nyi ma dawˇ zuhˬ gaˇ zuhˬ cawˬ ve yoˬ.
Yawˇ lehˬ ha‸ pehnˇ uiˍ jaˇ leh, venˇbaˆ hpehˇ piˇ puiˉ ve yoˬ.
14Nawˬ hui chi hkʼe te ve kʼo, Gʼuiˬsha nyi ma kʼaw‸ pa leh,
nawˬ hui hta‸ awˬ bon kʼaw‸ na‸ laˇ tuˬ yoˬ.
Oˇ htaˇ nawˬ hui yawˇ hta‸ kʼaw‸ tuˉ tanˇ piˇ hpeh‸ ve yoˬ.
15Ziˉonˍ hkʼaw hkʼoˆ lo behˬ heh ma meuˆ loˬ.
Caˇ tuˬ ce leh bon lawˬ tuˬ awˬ yanˇ tiˍ piˇ-oˆ.
16Chaw yaˇ teˇ hpaˍ hta‸ kuˬ hpawnˬ leh,
yawˇ hui hta‸ da‸ piˇ kehˬ piˇ lawˬ-o‸.
Chaw mawˇ, yaˇ nehˬ, leh
yaˇ ehˉ teˇ hpaˍ hta‸ htawˇ kuˬ hpawnˬ-o‸.
Heuˆ da‸ gehˇ ve chaw teˇ hpaˍ htawˇ gʼa gaˬ la piˇ ve yoˬ.
17Gʼuiˬsha hta‸ tuˉ tanˇ piˇ chehˇ ve paw hkuˇ teˇ hpaˍ kuˬ hawˬ leh bon chi hkʼe gʼa lawˬ ve yoˬ.
Gʼuiˬsha-oˬ, nawˬ ve chaw teˇ hpaˍ hta‸ a ciˉ ha kʼaˉ piˇ-oˆ.
Nawˬ ve chaw teˇ hpaˍ hta‸ ya‸ taw kuiˬ lo taˇ gaˬ piˇ-oˆ.
Nawˬ hui ve Gʼuiˬsha hkʼaˬ lo le, teh‸
awˬ nu ve chaw ceuˬ teˇ hpaˍ hta‸ taˇ kʼoˆ tcuh piˇ-oˆ, teh‸
kʼoˆ leh bon gʼa lawˬ ve yoˬ.
Yawˇ hui ve bon lawˬ hkawˇ hta‸ Gʼuiˬsha na yuˬ ve
18Oˇ htaˇ Gʼuiˬsha lehˬ, mvuhˇmiˬ hta‸ ha‸ ve nyi ma kʼaw‸ cawˬ la leh,
yawˇ ve chaw teˇ hpaˍ hta‸ kʼaw‸ ha kʼaˉ piˇ ve yoˬ.
19Gʼuiˬsha yawˇ hui ve bon lawˬ hkawˇ hta‸ na yuˬ leh kʼoˆ ve,
Nawˬ hui caˇ law‸ dawˬ law‸ htaˇ hkʼa gaˬ,
chi beu‸ ngaˬ nawˬ hui hta‸ caˬ shiˍ,
a pehˉ meuˇ gʼuiˬ leh shaˍ lonˍ chu kʼaw‸ piˇ laˇ tuˬ yoˬ.
Awˬ nu ve chaw ceuˬ teˇ hpaˍ nawˬ hui hta‸ maˇ shawˍ maˇ caˆ kʼaw‸ kʼoˆ laˇ tuˬ ve maˇ heˆ.
20Awˬ na hpawˇ lo laˬ taˍ ve paˉ ce‸ moˍ lonˉ hta‸,
ngaˬ shehˇ de lo gʼa‸ kʼoˬ piˇ tuˬ yoˬ.
Yawˇ hui teˇ hpaˍ hpaˍ hta‸ Suh ve laˇ tsuhˇ gʼuiˬ hkʼaw gʼa‸ keu piˇ leh,
teˇ hpaˍ hpaˍ hta‸ awˬ kʼaw ji ve laˇ tsuhˇ gʼuiˬ hkʼaw gʼa‸ keu piˇ tuˬ yoˬ.
Yawˇ hui kuiˇ kʼai tuˬ yoˬ. Yawˇ hui nawˬ hui hta‸ te laˇ taˍ peuˬ ve kanˉ awˬ pon,
ngaˬ yawˇ hui hta‸ te luˬ te sheˆ piˇ tuˬ yoˬ.
21Miˬguiˬ-oˬ, taˇ kawˆ.
Ha lehˬ chehˇ-oˆ.
Awˬ lawn kʼo, Gʼuiˬsha lehˬ uiˍ jaˇ ve kanˉ hta‸ te taˍ peuˬ.
22To nuˇ to shaˆ teˇ hpaˍ-oˬ, taˇ kawˆ.
Awˬ lawn kʼo, miˬguiˬ hkʼoˆ lo mvuh‸ nawˉ lehˍ kʼaw‸ hpeh‸ la peuˬ.
Iˉ shiˍ cehˬ teˇ hpaˍ iˉ shiˍ kʼaw‸ naw‸ la peuˬ.
A pehˉ meuˇ cehˬ leh maˉ nawˆ cehˬ teˇ hpaˍ htawˇ, awˬ shiˍ hkʼa biˇ kʼaw‸ naw‸ la chehˇ taˍ peuˬ.
23Ziˉonˍ venˇ yaˇ teˇ hpaˍ-oˬ, ha lehˬ chehˇ-oˆ.
Nawˬ hui ve Jawˇmawˇ Gʼuiˬsha te taˍ peuˬ ve
kanˉ awˬ hkʼaw lo ha lehˬ chehˇ-oˆ.
Awˬ lawn kʼo, yawˇ lehˬ ponˬ laˬ htaˇ hkʼa shuˍ
mvuhˇ yeˬ kʼaw‸ laˬ piˇ chehˇ ve yoˬ.
24Caˬ jaw‸ kuiˬ lo caˬ shiˍ hkʼa biˇ cawˬ la leh,
a pehˉ meuˇ gʼuiˬ nyiˉ kuiˬ lo a pehˉ meuˇ gʼuiˬ leh shaˍ lonˍ chu hkʼa biˇ cawˬ la tuˬ yoˬ.
25Ngaˬ nawˬ hui geh peu laˇ ve
paˉ ce‸ moˍ lonˉ te luˬ te sheˆ ve awˬ shiˍ awˬ nu teˇ hpaˍ awˬ tan,
ngaˬ nawˬ hui hta‸ kʼaw‸ shaiˍ laˇ tuˬ yoˬ.
26Nawˬ hui lehˬ gʼa caˇ bvuhˆ dawˬ bvuhˆ leh,
nawˬ hui awˬ pon anˇ tuˬ laiˉ ceuˬ te laˇ shehˍ hpaˇ Jawˇmawˇ Gʼuiˬsha hta‸ chiˇ mvuh tuˬ yoˬ.
Ngaˬ ve chaw teˇ hpaˍ lehˬ,
shu maˇ shawˍ maˇ caˆ kʼoˆ ve hta‸ gʼa kʼaw‸ hkanˍ tuˬ ve maˇ heˆ.
27Ngaˬ lehˬ nawˬ hui ve Jawˇmawˇ Gʼuiˬsha hpeh‸ leh,
ngaˬ hta‸ shuˍ da‸ ve awˬ kaˍ awˬ nu gʼuiˬsha teˇ gʼaˇ ka‸ maˇ cawˬ ve hta‸ maˇ kʼoˆ,
ngaˬ lehˬ Iˉsaˍreˍlaˆ chaw hui geh chehˇ taˍ ve hta‸ maˇ kʼoˆ, nawˬ hui shiˍ la tuˬ yoˬ.
Ngaˬ ve chaw teˇ hpaˍ lehˬ shu maˇ shawˍ maˇ caˆ kʼoˆ ve hta‸ gʼa kʼaw‸ hkanˍ tuˬ ve maˇ heˆ.
Gʼuiˬsha ve awˬ nyi
28Oˇ ve hkʼaw‸ nawˉ, ngaˬ lehˬ chaw hkʼa peu-eˬ awˬ hkʼoˆ lo ngaˬ ve Awˬ ha hpu ngeuˍ pfuhˍ leh,
nawˬ hui ve yaˇ paˍ yaˇ miˇ teˇ hpaˍ lehˬ, tcuh kaˍ paˍ hkʼa shuˍ tawˇ yaw tuˬ yoˬ.
Nawˬ hui ve chaw mawˇ teˇ hpaˍ zuh‸ maˆ mawˬ leh, nawˬ hui ve chaw haˉ paˍ teˇ hpaˍ lehˬ,
awˬ ha hkʼaw lo hpeu‸ maˍ piˇ ve hta‸ gʼa mawˬ tuˬ yoˬ.
29Awˬ yanˇ oˇ ve awˬ hkʼaw lo ngaˬ lehˬ awˬ ceˬ paˍ awˬ ceˬ ma teˇ hpaˍ awˬ hkʼoˆ lo htawˇ,
ngaˬ ve Awˬ ha hpu ngeuˍ pfuhˍ piˇ tuˬ yoˬ.
30Miˬguiˬ leh mvuhˇ naw ma hkʼoˆ lo, awˬ suhˍ,
aˬ miˍ, leh aˬ miˍ mvuhˇ hkʼawˇ awˬ heˆ chi teˇ hpaˍ hta‸
ngaˬ maˍ laˇ tuˬ yoˬ.
31Mvuhˇ nyi naˆ ho‸ kʼai leh, ha pa lehˬ awˬ suhˍ hkʼe hpeh‸ la tuˬ yoˬ.
Kawˆ tuˬ uiˍ jaˇ ve Gʼuiˬsha ve awˬ nyi maˇ gaˬ la sheˍ htaˇ,
chi hkʼe hpeh‸ la tuˬ yoˬ.
32Ya‸ hkʼaˇ, Jawˇmawˇ Gʼuiˬsha hta‸ hkʼa kuˬ ve chaw teˇ gʼaˇ le le htaiˍ hkʼaw‸ ve hta‸ gʼa tuˬ yoˬ.
Awˬ lawn kʼo, Gʼuiˬsha kʼoˆ taˍ ve hkʼe, Yeˍruˆsaˍlehnˍ venˇ hkʼaw chehˇ ve chaw teˇ hpaˍ hpaˍ gʼa ponˬ leh,
ngaˬ leuˆ yuˬ taˍ ve chaw teˇ hpaˍ gʼa ponˬ tuˬ yoˬ, teh‸
Gʼuiˬsha kʼoˆ ve yoˬ.
Currently Selected:
Yawˇlaˆ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.