Suhˉ jehˬ ve li‸ 3
3
Cawˬ taˍ sheˍ ve chaw teˇ hpaˍ
1Gʼuiˬsha lehˬ, Hkaˍnanˍ mvuhˇmiˬ hkʼaw ma‸ teˇ pawˆ ka‸ maˇ bawˆ jaw sheˍ ve Iˉsaˍreˍlaˆ chaw teˇ hpaˍ hta‸ lawˇ nyi tuˬ, awˬ nu ve chaw ceuˬ teˇ hpaˍ hta‸ mvuhˇmiˬ oˇ ve awˬ hkʼaw lo teh taˍ sheˍ ve yoˬ. 2Yawˇ oˇ hkʼe te ve lehˬ, ma‸ teˇ pawˆ ka‸ maˇ bawˆ jaw sheˍ ve Iˉsaˍreˍlaˆ chaw awˬ suhˉ chi ve te moˍ hta‸, ma‸ hkʼaˬ hkʼe te bawˆ tuˬ ve awˬ hkʼaˇ maˍ piˇ gaˇ ve pa taw yoˬ. 3Mvuhˇmiˬ hkʼaw cawˬ taˍ sheˍ ve chaw oˇ ve teˇ hpaˍ lehˬ, Hpiˇliˇtiˆ chaw hui ve venˇ ngaˇ venˇ, Hkaˍnaˍniˆ chaw hkʼa peu-eˬ, Siˉdonˍ chaw leh Leˍbaˍnonˍ hkʼaw, Baˍlaˆheˍmonˍ hkʼaw hta‸ te leh Haˍmaˆ kʼaˍ le‸ lo hkʼa gaˬ, hkʼaw hkʼoˆ lawˬ hkʼoˆ lo chehˇ ve Hiˇviˆ chaw teˇ hpaˍ hpeh‸ ve yoˬ. 4Chaw oˇ ve teˇ hpaˍ lehˬ, Gʼuiˬsha Moˉseˍ hta‸ cuˇ leh yawˇ hui ve awˬ puˍ awˬ pi hui hta‸ piˇ taˍ ve awˬliˇtawˇhkawˇ teˇ hpaˍ hta‸ na yuˬ, maˇ na yuˬ ve hta‸ lawˇ nyi tuˬ awˬ pon teh taˍ ve yoˬ. 5Hkʼe te leh, Iˉsaˍreˍlaˆ chaw teˇ hpaˍ lehˬ Haˍnaˍniˆ chaw, Hiˇtiˆ chaw, Aˍmawˇriˆ chaw, Hpeˍraˍziˆ chaw, Hiˇviˆ chaw leh Yeˍbuˇsiˆ chaw hui geh teˇ geh chehˇ taˍ ve yoˬ. 6Yawˇ hui lehˬ chaw oˇ ve teˇ hpaˍ hta‸ heuˆ leh, yawˇ hui ve gʼuiˬsha teˇ hpaˍ hta‸ oˉ kʼoˍ pui ve yoˬ.
Awˇtanˍyeˍlaˆ
7Iˉsaˍreˍlaˆ chaw hui lehˬ, yawˇ hui ve Jawˇmawˇ Gʼuiˬsha hta‸ leunˇ kʼai ve yoˬ. Yawˇ hui Gʼuiˬsha hta‸ te ya‸ leh Baˍlaˆ gʼuiˬsha leh Aˍshaˆtaˍrehˆ gʼuiˬsha teˇ hpaˍ hta‸ oˉ kʼoˍ pui ve yoˬ. 8Chi hta‸ pa taw Gʼuiˬsha Iˉsaˍreˍlaˆ chaw hui hta‸ nyi ma zuhˆ jaˇ leh, Meˍsoˇpoˇtaˍmiˆ mvuhˇmiˬ ve jawˇmawˇ Hkuˇshaˍriˆshaˍtenˍ yawˇ hui hta‸ ca bawˆ la tcuh ve yoˬ. Yawˇ hui lehˬ hinˉ hkʼaw‸ hkʼa gaˬ jawˇmawˇ oˇ ve awˬ ceˬ gʼa te ve yoˬ. 9Oˇ htaˇ Iˉsaˍreˍlaˆ chaw hui Gʼuiˬsha hta‸ kuˬ leh, Gʼuiˬsha lehˬ yawˇ hui hta‸ ponˬ piˇ tuˬ chaw teˇ gʼaˇ peu laˇ ve yoˬ. Chaw oˇ ve lehˬ Kaˍlehˆ awˬ nyi paˍ Keˍnaˆ ve yaˇ Awˇtanˍyeˍlaˆ hpeh‸ ve yoˬ. 10Gʼuiˬsha ve Awˬ ha hpu yawˇ awˬ hkʼaw lo chehˇ leh, yawˇ lehˬ Iˉsaˍreˍlaˆ chaw hui ve awˬ hoˉ hpeh‸ la ve yoˬ. Hkʼe te leh, Gʼuiˬsha lehˬ Meˍsoˇpoˇtaˍmiˆ jawˇmawˇ hta‸ yawˇ ve la‸ sheh hkʼaw lo chiˇ a‸ piˇ ve yoˬ. 11Oˇ ve hkʼaw‸ nawˉ, mvuhˇmiˬ hkʼaw lo 40 hkʼaw‸ hkʼa gaˬ gawˬ lehˍ cawˬ ve yoˬ. Oˇ htaˇ, Keˍnaˆ yaˇ paˍ Awˇtanˍyeˍlaˆ suh-e ve yoˬ.
Eˇhuˆ
12Iˉsaˍreˍlaˆ chaw hui Gʼuiˬsha hta‸ teˇ pawˆ kʼaw‸ te ya‸ ve yoˬ. Yawˇ hui chi hkʼe te ve pa taw, Gʼuiˬsha lehˬ Mawˇbaˆ jawˇmawˇ Eˇgaˍlonˍ hta‸ yawˇ hui a‸ kehˉ awˬ gʼaˇ uiˍ la piˇ ve yoˬ. 13Jawˇmawˇ Eˇgaˍlonˍ lehˬ, Aˍmawˇniˆ chaw, Aˍmaˍlehˆ chaw hui hta‸ pawnˇ da‸ leh, tcuhˉ pui cehˬ hkʼa biˇ cawˬ ve Iˉsaˍreˍlaˆ chaw hui ve Yeˍriˆhkoˇ venˇ hta‸ ca bawˆ yuˬ ve yoˬ. 14Iˉsaˍreˍlaˆ chaw hui lehˬ teˇ chi hinˉ hkʼaw‸ hkʼa gaˬ, jawˇmawˇ Eˇgaˍlonˍ ve awˬ ceˬ gʼa te ve yoˬ.
15Oˇ htaˇ Iˉsaˍreˍlaˆchaw hui Gʼuiˬsha hta‸ kuˬ leh, Gʼuiˬsha lehˬ yawˇ hui hta‸ ponˬ piˇ tuˬ ve chaw teˇ gʼaˇ peu laˇ piˇ ve yoˬ. Chaw oˇ ve lehˬ, Beˍyaˍmenˍ awˬ ceuˬ awˬ hkʼaˇ, Beˍraˆ ve yaˇ paˍ Eˇhuˆ hpeh‸ ve yoˬ. Yawˇ lehˬ la‸ mehˍ paˉ awˬ gʼaˇ uiˍ ve chaw hpeh‸ ve yoˬ. Iˉsaˍreˍlaˆ chaw hui lehˬ, Mawˇbaˆ jawˇmawˇ Eˇgaˍlonˍ geh lo la‸ shawnˍ ca yuˬ kʼoˬ piˇ tcuh ve yoˬ. 16Eˇhuˆ lehˬ awˬ viˇ nyiˇ hpawˇ cawˬ leh teˇ shaw‸ zuhˬ ve aˉ hte‸ teˇ maˬ te taˍve yoˬ. Yawˇ lehˬ aˉ hte‸ oˇ ve hta‸ yawˇ ve la‸ sha paˉ aˉ po‸ hawˉ faˉ taˍ ve yoˬ. 17Oˇ ve hkʼaw‸ nawˉ, yawˇ lehˬ la‸ shawnˍ yuˬ veu leh jawˇmawˇ Eˇgaˍlonˍ geh kʼai ve yoˬ. Jawˇmawˇ oˇ ve lehˬ chu jaˇ ve chaw hpeh‸ ve yoˬ. 18Eˇhuˆ lehˬ jawˇmawˇ hta‸ la‸ shawnˍ piˇ peuˬ hkʼaw‸ nawˉ, kʼaw‸ hpfuhˆ kʼaw‸ la ve yoˬ. 19Ya‸ hkʼaˇ, yawˇ lehˬ Giˇlaˍgaˍ venˇ awˬ paˇ, haˉ pui htawˆ kuiˬ lo gaˬ htaˇ jawˇmawˇ Eˇgaˍlonˍ geh kʼaw‸ kʼo‸-e leh, Jawˇmawˇ-oˬ ngaˬ nawˬ hta‸ hto laˇ tuˬ awˬ lawn cawˬ ve yoˬ, teh‸ kʼoˆ piˇ ve yoˬ.
Hkʼe te leh jawˇmawˇ lehˬ, yawˇ ve awˬ ceˬ hkʼa peu-eˬ hta‸ tawˆ-e tcuh leh, yawˇ hui hkʼa peu-eˬ tawˆ-e ve yoˬ.
20Jawˇmawˇ lehˬ gawˬ lehˍ cawˬ ve yawˇ ve bawehˇ hkʼaw mui chehˇ ve teˇ yanˇ, Eˇhuˆ yawˇ awˬ paˇ lo jiˆ kʼai leh, Jawˇmawˇ-oˬ, nawˬ hta‸ hto laˇ tuˬ Gʼuiˬsha ve tawˇ hkawˇ hta‸ ngaˬ yuˬ laˬ ve yoˬ, teh‸ kʼoˆ piˇ ve yoˬ. Oˇ htaˇ jawˇmawˇ tu la ve yoˬ. 21Eˇhuˆ lehˬ yawˇ ve la‸ sha paˉ lo faˉ taˍ ve aˉ hte‸ hta‸ la‸ mehˍ paˉ ve la‸ sheh gʼawˬ tawˆ leh, jawˇmawˇ ve gʼoˇ peˬ hta‸ juˆ hpehˇ ve yoˬ. 22Aˉ hte‸ awˬ viˇ ka‸ awˬ tuˇ ka‸ hkʼa peu-eˬ jawˇmawˇ ve gʼoˇ peˬ hkʼaw lo‸-e ve yoˬ. Aˉ hte‸ hta‸ yawˇ maˇ kʼaw‸ gʼawˬ tawˆ piˇ. Hkʼe te leh awˬ chu teˇ hpaˍ aˉ hte‸ hta‸ hoˆ beh sheˬ ve yoˬ. 23Oˇ hkʼe te taˉ leh, Eˇhuˆ lehˬ yehˬ miˉ hta‸ hkʼa deh‸ kʼaw‸ hoˆ taˉ leh tawˆ-e ve yoˬ. 24Jawˇmawˇ ve awˬ ceˬ teˇ hpaˍ lehˬ, yehˬ miˉ hkʼa deh‸ hoˆ taˍ ve hta‸ gʼa mawˬ ve pa taw, jawˇmawˇ gʼaˇ jehˇ chehˇ ve hehˉ teh‸ dawˇ chehˇ ve yoˬ. 25Yawˇ hui awˬ baˬ hpawˇ lo shaw taˍ leh, jawˇmawˇ tawˆ la yanˇ gaˬ peuˬ ve htawˇ maˇ tawˆ la mawˬ ve pa taw yehˬ miˉ hpaw nyi ve teˇ yanˇ, jawˇmawˇ paˍ suh taˍ ve hta‸ gʼa mawˬ ve yoˬ.
26Yawˇ hui awˬ baˬ hpawˇ lo shaw chehˇ ve teˇ yanˇ, Eˇhuˆ gʼuiˇ hpaw-e ve yoˬ. Yawˇ lehˬ haˉ pui htawˆ kuiˬ hta‸ ponˬ kʼai leh, Siˇraˆ venˇ lo gaˬ la ve yoˬ. 27Oˇ ve hkʼaw‸ nawˉ yawˇ Eˇhpaˍrenˍ hkʼaw hkʼoˆ lo taˆ-e leh, Iˉsaˍreˍlaˆ chaw teˇ hpaˍ ma‸ bawˆ kuiˬ lo laˬ tuˬ behˬheh ma meuˆ piˇ ve yoˬ. Peuˬ leh yawˇ chaw moˍ lonˉ hta‸ shiˍ leh ya‸-e ve yoˬ. 28Oˇ htaˇ yawˇ kʼoˆ ve, Ngaˬ hkʼaˇ suh laˬ-o‸. Gʼuiˬsha lehˬ nawˬ hui ve canˇ paˍ Mawˇbaˆ chaw hui hta‸ nawˬ hui ve la‸ sheh hkʼaw lo chiˇ a‸ laˇ taˍ ve yoˬ, teh‸ yawˇ hui hta‸ kʼoˆ piˇ ve yoˬ. Hkʼe te leh, yawˇ hui yawˇ hkʼaˇ suh gʼa‸ kʼai leh, Yawˇdanˍ iˉ kaˆ lawˬ paˇ lo Mawˇbaˆ chaw hui hta‸ te luˬ te sheˆ piˇ ve yoˬ. Mawˇ baˆ chaw teˇ gʼaˇ hta‸ ka‸ iˉ kaˆ lawˬ coˇ paˉ lo maˇ hkanˍ tawˆ-e tcuh. 29Oˇ ve teˇ nyi awˬ hkʼaw lo yawˇ hui lehˬ, awˬ gʼaˇ uiˍ ve Mawˇbaˆ ma‸ yaˇ teˇ meunˍ gʼaˇ hta‸ tiˇ pehˍ piˇ ve yoˬ. Teˇ gʼaˇ hta‸ ka‸ maˇ teh taˉ piˇ. 30Oˇ ve teˇ nyi Iˉsaˍreˍlaˆ chaw teˇ hpaˍ lehˬ, Mawˇbaˆ chaw hui hta‸ bawˆ gʼaˇ ve yoˬ. Oˇ ve hkʼaw‸ nawˉ, 80 hkʼaw‸ hkʼa gaˬ mvuhˇmiˬ hkʼaw gawˬ lehˍ cawˬ ve yoˬ.
Shaˍgaˍ
31Awˬ nu ve awˬ hoˉ teˇ gʼaˇ lehˬ Aˍnaˆ ve yaˇ paˍ Shaˍgaˍ hpeh‸ ve yoˬ. Yawˇ lehˬ suhˆ taˬ teˇ maˬ yuˬ leh, Hpiˇliˇtiˆ chaw 600 gʼaˇ hta‸ tiˇ pehˍ piˇ ve yoˬ Yawˇ htawˇ ka‸ Iˉsaˍreˍlaˆ chaw hui hta‸ htaiˍ hkʼaw‸ piˇ ve yoˬ.
Currently Selected:
Suhˉ jehˬ ve li‸ 3: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.