Suhˉ jehˬ ve li‸ 2
2
Bawˇhkenˍ venˇ lo mvuhˇ naw ma tcuh yaˇ laˬ ve
1Gʼuiˬsha ve mvuhˇ naw ma tcuh yaˇ lehˬ, Giˇlaˍgaˍ lo te leh Bawˇhkenˍ venˇ lo laˬ leh, Iˉsaˍreˍlaˆ chaw hui hta‸ kʼoˆ piˇ ve, Ngaˬ lehˬ nawˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ la leh, nawˬ hui ve awˬ puˍ awˬ pi hui hta‸ piˇ tuˬ ka ti‸ te taˍ ve mvuhˇmiˬ hkʼaw lo, nawˬ hui hta‸ shiˍ laˬ piˇ taˍ ve yoˬ. Ngaˬ nawˬ hui hta‸ te piˇ taˍ ve ka ti‸ hta‸ ngaˬ teˇ pawˆ ka‸ te luˬ tuˬ ve maˇ heˆ. 2Mvuhˇmiˬ chi hkʼaw chehˇ ve chaw hui hta‸ nawˬ hui shaˉ caˆ maˇ gʼa caˇ. Yawˇ hui ve tuˉ tanˇ kuiˬ teˇ hpaˍ hta‸ nawˬ hui gʼa te luˬ piˇ ve yoˬ, teh‸ ngaˬ nawˬ hui hta‸ kʼoˆ piˇ taˍ peuˬ ve yoˬ. Ya‸ hkʼaˇ, nawˬ hui lehˬ ngaˬ kʼoˆ piˇ taˍ ve hkʼe maˇ te. 3Chi hta‸ pa taw, chaw chi teˇ hpaˍ hta‸ ngaˬ gʼa‸ kʼoˬ piˇ tuˬ ve maˇ heˆ, teh‸ chi beu‸ ngaˬ nawˬ hui hta‸ kʼoˆ laˇ ve yoˬ. Yawˇ hui lehˬ, nawˬ hui ve canˇ paˍ hpeh‸ la tuˬ yoˬ. Yawˇ hui ve gʼuiˬsha teˇ hpaˍ htawˇ, nawˬ hui awˬ pon hkui htiˇ poˬ kuiˬ hpeh‸ la tuˬ yoˬ, teh‸ Iˉsaˍreˍlaˆ chaw hui hta‸ kʼoˆ piˇ ve yoˬ. 4Mvuhˇ naw ma tcuh yaˇ oˇ hkʼe kʼoˆ ve teˇ yanˇ, Iˉsaˍreˍlaˆ chaw hkʼa peu-eˬ hpoˆ hawˬ ve yoˬ. 5Hkʼe te leh chehˇ kuiˬ oˇ ve hta‸ Bawˇhkawˍ#2:5 Chi ve lehˬ hawˬ ve chaw teˇ hpaˍ teh‸ kʼoˆ gaˇ ve yoˬ. teh‸ meh piˇ ve yoˬ. Oˇ kaˬ lo yawˇ hui Gʼuiˬsha hta‸ tuˉ tanˇ piˇ ve yoˬ.
Yawˇsuˆ suh-e ve
6Yawˇsuˆ lehˬ, Iˉsaˍreˍlaˆ chaw hui hta‸ a shu yawˇ gʼa taˍ ve mvuhˇmiˬ lo kʼaw‸ kʼo‸-e tcuh ve yoˬ. 7Gʼuiˬsha Iˉsaˍreˍlaˆ chaw hui hta‸ hkʼaˬ hkʼe te piˇ taˍ ve hta‸ hkʼa deh‸ shiˍ taˍ ve awˬ hoˉ awˬ naˬ teˇ hpaˍ a sha‸ te‸ chehˇ sheˍ ve teˇ co-e awˬ hkʼaw lo, Iˉsaˍreˍlaˆ chaw teˇ hpaˍ lehˬ, Gʼuiˬsha hta‸ ceh tiˉ oˉ kʼoˍ pui chehˇ ve yoˬ. 8Gʼuiˬsha ve awˬ ceˬ paˍ Nunˍ ve yaˇ Yawˇsuˆ lehˬ, a sha‸ 110 hkʼaw‸ gaˬ leh suh-e ve yoˬ. 9Yawˇ hui yawˇ hta‸ Gaˍshaˆ hkʼaw lonˉ awˬ na hpawˇ, Eˇhpaˍrenˍ mvuhˇmiˬ hkʼaw cawˬ ve yawˇ ve chehˇ kuiˬ Tiˉmaˍnaˆseˍraˆ venˇ hkʼaw tuˍ piˇ ve yoˬ. 10Oˇ ve teˇ co-e hkʼaw hkʼa te‸ chehˇ ve chaw hkʼa peu-eˬ htawˇ suh peuˬ ve yoˬ. Oˇ ve hkʼaw‸ nawˉ kʼaw‸ cawˬ la ve chaw teˇ hpaˍ lehˬ, Gʼuiˬsha hta‸ maˇ kʼoˆ, Iˉsaˍreˍlaˆ chaw hui awˬ pon Gʼuiˬsha te piˇ taˍ ve kanˉ teˇ hpaˍ hta‸ maˇ kʼoˆ, leunˇ kʼai ve yoˬ.
Iˉsaˍreˍlaˆ chaw Gʼuiˬsha hta‸ baˬ taˉ ve
11Oˇ htaˇ, Iˉsaˍreˍlaˆ chaw teˇ hpaˍ Baˍlaˆ gʼuiˬsha hta‸ oˉ kʼoˍ pui leh Gʼuiˬsha hta‸ te ya‸ ve yoˬ. 12Yawˇ hui lehˬ, Eˇjiˇtu‸ mvuhˇmiˬ hkʼaw lo yawˇ hui hta‸ shiˍ tawˆ laˇ ve Gʼuiˬsha hta‸ baˬ taˉ ve yoˬ. Yawˇ hui awˬ paˇ awˬ kui lo chehˇ taˍ ve chaw hui ve gʼuiˬsha hta‸ oˉ kʼoˍ pui leh, Gʼuiˬsha hta‸ nyi ma zuhˆ tuˬ te piˇ ve yoˬ. 13Yawˇ hui Gʼuiˬsha hta‸ baˬ taˉ leh, Baˍlaˆ gʼuiˬsha leh Aˍshaˆtaˍrehˆ gʼuiˬsha teˇ hpaˍ hta‸ oˉ kʼoˍ pui ve yoˬ. 14Chi hta‸ pa taw Gʼuiˬsha yawˇ hui hta‸ nyi ma zuhˆ jaˇ leh, canˇ paˍ teˇ hpaˍ yawˇ hui hta‸ ca bawˆ la tcuh ve yoˬ. Yawˇ lehˬ canˇ paˍ teˇ hpaˍ hta‸ awˬ gʼaˇ uiˍ la piˇ leh, Iˉsaˍreˍlaˆ chaw teˇ hpaˍ yawˇ hui hta‸ tawˍ da‸ maˇ gʼaˇ ve yoˬ. 15Teˇ pawˆ le le yawˇ hui ma‸ ca bawˆ ve teˇ yanˇ, Gʼuiˬsha lehˬ yawˇ hui hpawˇ maˇ chehˇ. Yawˇ kʼoˆ taˍ ve hkʼe, Yawˇ yawˇ hui hta‸ chiˇ baˬ taˍ ve yoˬ. Oˇ htaˇ yawˇ hui gʼa dawˇ haˍ jaˇ ve yoˬ.
16Oˇ htaˇ Gʼuiˬsha lehˬ canˇ paˍ teˇ hpaˍ ve la‸ sheh hkʼaw ponˬ piˇ tuˬ, yawˇ hui hta‸ awˬ hoˉ awˬ naˬ teˇ hpaˍ piˇ ve yoˬ. 17Ya‸ hkʼaˇ, yawˇ hui lehˬ awˬ hoˉ awˬ na oˇ ve teˇ hpaˍ ve tawˇ hta‸ maˇ na yuˬ. Yawˇ hui lehˬ Gʼuiˬsha hta‸ ka ti‸ maˇ yeˬ ve chaw hpeh‸ leh, awˬ kaˍ awˬ nu ve gʼuiˬsha teˇ hpaˍ hta‸ oˉ kʼoˍ pui ve yoˬ. Yawˇ hui ve awˬ puˍ awˬ pi teˇ hpaˍ Gʼuiˬsha hkawˇ hkʼa deh‸ na yuˬ ve htawˇ, yawˇ hui Gʼuiˬsha hta‸ leunˇ kʼai ve yoˬ. 18Teˇ pawˆ le le Gʼuiˬsha yawˇ hui hta‸ awˬ hoˉ leuˆ piˇ ve teˇ yanˇ, Gʼuiˬsha lehˬ awˬ hoˉ oˇ ve geh chehˇ taˍ leh, yawˇ a sha‸ te‸ chehˇ ve teˇ co-e, yawˇ hui hta‸ canˇ paˍ teˇ hpaˍ ve la‸ sheh hkʼaw ponˬ piˇ chehˇ ve yoˬ. Fawˉ mehˍ ve hta‸ gʼa hkanˍ leh yawˇ hui hkʼanˇ ve teˇ yanˇ, Gʼuiˬsha yawˇ hui hta‸ ha kʼaˉ piˇ ve yoˬ. 19Ya‸ hkʼaˇ, awˬ hoˉ te chehˇ ve chaw oˇ ve suh-e ve teˇ yanˇ, chaw oˇ ve teˇ hpaˍ lehˬ yawˇ hui te muiˬte jaw ve hkʼe kʼaw‸ te leh, ponˬ laˬ htaˇ ve chaw teˇ hpaˍ a‸ kehˉ kʼaw‸ haiˬ jaˇ ve yoˬ. Yawˇ hui lehˬ awˬ kaˍ awˬ nu ve gʼuiˬsha teˇ hpaˍ hta‸ oˉ kʼoˍ kʼaw‸ pui leh, haiˬve kanˉ hta‸ te ve yoˬ. 20Oˇ htaˇ Gʼuiˬsha Iˉsaˍreˍlaˆ chaw hui hta‸ nyi ma zuhˆ jaˇ leh kʼoˆ ve, Chaw chi teˇ hpaˍ lehˬ, ngaˬ yawˇ hui ve awˬ puˍ awˬ pi hui hta‸ piˇ taˍ ve ka ti‸ tawˇ hkawˇ teˇ hpaˍ hta‸ te luˬ ve yoˬ. Yawˇ hui ngaˬ ve tawˇ hkawˇ hta‸ maˇ na yuˬ ve pa taw, 21Yawˇsuˆ suh-e htaˇ mvuhˇmiˬ hkʼaw cawˬ taˍ sheˍ ve awˬ nu ve chaw ceuˬ teˇ hpaˍ hta‸ ngaˬ gʼa‸ kʼoˬ piˇ tuˬ ve maˇ heˆ. 22Chi hkʼe te piˇ ve awˬ hkʼaw lo, Iˉsaˍreˍlaˆ chaw teˇ hpaˍ lehˬ yawˇ hui ve awˬ puˍ awˬ pi teˇ hpaˍ hkʼa shuˍ, ngaˬ ve tawˇ hkawˇ hta‸ na yuˬ, maˇ na yuˬve hta‸ ngaˬ lawˇ nyi tuˬ yoˬ, teh‸ kʼoˆ ve yoˬ. 23Hkʼe te leh Gʼuiˬsha lehˬ, Yawˇsuˆ la‸ sheh hkʼaw maˇ chiˇ a‸ piˇ sheˍ ve canˇ paˍ teˇ hpaˍ hta‸ teh taˍ sheˍ ve yoˬ. Yawˇ lehˬ chaw oˇ ve teˇ hpaˍ hta‸ la‸ haˉ maˇ gʼa‸ kʼoˬ piˇ.
Currently Selected:
Suhˉ jehˬ ve li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.