Heˍbrehˇ li‸ 13

Hkri‸ yaˇ hui te keunˍ ve kanˉ teˇ hpaˍ

1Awˬ viˉ awˬ nyi ha‸ da‸ ve teˇ ceuˬ nawˬ hui hkʼaˬ htaˆ ka‸ cawˬ piˇ-oˆ. 2Hkehˉ chaw teˇ hpaˍ hta‸ ha‸ yuˬ tuˬ taˇ leunˇ. Awˬ lawn kʼo, chaw teˇ hpaˍ hpaˍ hkehˉ chaw hta‸ ha‸ yuˬ ve teˇ yanˇ, yawˇ hui maˇ shiˍ ve awˬ hkʼaw lo mvuhˇ naw ma tcuh yaˇ teˇ hpaˍ hta‸ ha‸ yuˬ jaw ve yoˬ. 3Nawˬ hui lehˬ, htawnˍ hkʼaw chehˇ ve chaw hui geh teˇ geh chehˇ ve hkʼa shuˍ shuˍ shawˍ taˍ leh, yawˇ hui hta‸ dawˇ nawˇ-oˆ. Nawˬ hui htawˇ awˬ suhˍ awˬ shaˍ pfuhˇ taˍ ve hta‸ pa taw, fawˉ mehˍ ve hta‸ gʼa hkanˍ ve chaw teˇ hpaˍ hta‸ dawˇ nawˇ-oˆ.

4Awˬ hpawˇ awˬ miˇ heuˆ da‸ ve teˇ ceuˬ hta‸ chaw hkʼa peu-eˬ taˍ uiˍ taˍ mvuh piˇ-oˆ. Awˬ hpawˇ awˬ miˇ teˇ hpaˍ maˇ hteˇ maˇ cawˇ ve awˬ hkʼaˇ suh taˇ kʼai. Awˬ lawn kʼo, guiˇ ya‸ ve chaw leh haˉ chawˇ haˉ paˆ te ve chaw teˇ hpaˍ hta‸ Gʼuiˬsha ciˍ yanˍ piˇ tuˬ yoˬ.

5Hpu hta‸ sheˉ lai ve teˇ ceuˬ nawˬ hui awˬ hkʼaw lo taˇ cawˬ piˇ. Nawˬ hui hkʼa cawˬ taˍ ve teˇ hpaˍ hta‸ nyi hkʼaˇ suh chehˇ-oˆ. Awˬ lawn kʼo, Ngaˬ nawˬ hta‸ hkʼaˬ htaˆ ka‸ maˇ hpaˆ, hkʼaˬ htaˆ ka‸ maˇ baˬ teh‸ Gʼuiˬsha kʼoˆ taˍ ve yoˬ.#Ysu 1:5 6Chi hta‸ pa taw,

Jawˇmawˇ Gʼuiˬsha lehˬ, ngaˬ hta‸ ga laˇ shehˍ hpaˇ hpeh‸ leh,

ngaˬ te‸ chiˉ kawˆ tuˬ maˇ cawˬ.

Chaw yaˇ ngaˬ hta‸ aˬ hto‸ ma te laˇ hpeh‸ tuˬ le, teh‸ nyi ma ha‸ hanˉ ve awˬ hkʼaw lo ngaˬ hui kʼoˆ hpeh‸ ve yoˬ.#Chi 118:6

7Nawˬ hui ve awˬ hoˉ teˇ hpa hta‸ dawˇ nawˇ-oˆ. Yawˇ hui lehˬ, nawˬ hui hta‸ Gʼuiˬsha ve tawˇ hkawˇ maˍ laˇ ve yoˬ. Yawˇ hui suh htaˇ hkʼa gaˬ te ve awˬ liˇ awˬ hkʼaˇ teˇ hpaˍ hta‸ nawˬ hui dawˇ nyi leh, yawˇ hui yonˍ ve teˇ ceuˬ hta‸ henˇ yuˬ leh te-o. 8Yeˍsuˆ Hkri‸ lehˬ, aˉ nyi, ya‸ nyi leh co co taiˍ taiˍ hkʼa shuˍ shuˍ hpeh‸ chehˇ ve yoˬ. 9Maˇ heˆ heˆ ve awˬ ceuˬ teˇ hpaˍ shu laiˉ ceuˬ ca maˍ la ve awˬ hkʼaˇ suh nawˬ hui taˇ kʼai. Gʼuiˬsha ve awˬ bon hta‸ pa taw nyi ma yeˬ ve kʼo, da‸ jaˇ ve yoˬ. Caˇ tuˬ ce kan ve hta‸ pa taw nyi ma yeˬ tuˬ ve maˇ heˆ. Caˇ tuˬ ce kan ve awˬ liˇ hta‸ yehˇ ve chaw teˇ hpaˍ lehˬ, oˇ ve awˬ hkʼaw lo awˬ bon maˇ gʼa.

10Ngaˬ hui tanˇ kuiˬ teˇ maˬ cawˬ ve yoˬ. Aˉ po kʼo bon yehˬ awˬ hkʼaw lo kanˉ te ve chaw teˇ hpaˍ lehˬ, tanˇ kuiˬ chi teˇ maˬ lo gʼa caˇ tuˬ a hkaw-anˬ maˇ cawˬ. 11Awˬ lawn kʼo, paw hkuˇ lonˉ lehˬ venˇ baˆ hpehˇ tuˬ ve tanˇ tuˬ awˬ pon to nuˇ to shaˆ ve awˬ suh hta‸ yuˬ leh, da‸ kehˬ ve chehˇ kuiˬ awˬ hkʼaw lo lo‸-e peuˬ hkʼaw‸ nawˉ, awˬ to oˇ ve teˇ hpaˍ hta‸ yawˇ hui ve chehˇ kuiˬ awˬ baˬ lo aˬ miˍ tuˉ baˬ ve yoˬ. 12Oˇ ve hkʼa shuˍ shuˍ Yeˍsuˆ htawˇ, yawˇ ve awˬ suhˍ hta‸ pa taw chaw yaˇ hta‸ da‸ piˇ kehˬ piˇ tuˬ, lanˇ venˇ yehˬ miˉ awˬ baˬ lo yawˇ hkanˍ suh ve yoˬ. 13Hkʼe te leh ngaˬ hui htawˇ, shu maˇ shawˍ maˇ caˆ te ve hta‸ yawˇ hkanˍ ve hkʼa shuˍ shuˍ, ngaˬ hui hkanˍ ve awˬ hkʼaw lo, deh kuiˬ awˬ baˬ lo yawˇ geh tawˆ kʼai-a veuˬ. 14Awˬ lawn kʼo, ngaˬ hui chi miˬguiˬ hkʼoˆ lo yeˬ ve venˇ maˇ cawˬ. Ya‸ hkʼaˇ, awˬ hkʼaw‸ nawˉ cawˬ la tuˬ ve venˇ hta‸ ngaˬ hui dawˇ law leh ca chehˇ ve yoˬ. 15Hkʼe te leh, Yeˍsuˆ hta‸ pa taw, ngaˬ hui Gʼuiˬsha hta‸ hkʼaˬ htaˆ ka‸ chiˇ mvuh ve tanˇ tuˬ teˇ ceuˬ tanˇ piˇ-a veuˬ. Chi hkʼe kʼoˆ ve lehˬ, ngaˬ hui ve maw‸ kʼaw awˬ hkʼaw lo tawˆ la ve tawˇ hkawˇ teˇ hpaˍ yawˇ ve awˬ meh hta‸ chiˇ mvuh ve teˇ ceuˬ hta‸ kʼoˆ ve yoˬ. 16Da‸ ve hta‸ te ve teˇ ceuˬ leh shu hta‸ mawˇ jeˬ pehˬ piˇ ve teˇ ceuˬ hta‸ taˇ leunˇ. Awˬ lawn kʼo, chi hkʼe ve tanˇ tuˬ teˇ hpaˍ hta‸ Gʼuiˬsha nyi ma cawˇ ve yoˬ.

17Nawˬ hui ve awˬ hoˉ teˇ hpaˍ ve hkawˇ hta‸ na yuˬ leh, yawˇ hui awˬ hawˉ lo hkʼa deh‸ chehˇ-oˆ. Awˬ lawn kʼo, yawˇ hui te ve kanˉ awˬ lawn Gʼuiˬsha hta‸ gʼa kʼaoˍ maˍ piˇ tuˬ ve chaw hpeh‸ ve pa taw, nawˬ hui ve co ha hta‸ yawˇ hui hkʼa deh‸ nyi ha‸ shaˉ chehˇ ve yoˬ. Yawˇ hui chi hkʼe nyi ha‸ shaˉ chehˇ ve teˇ yanˇ, dawˇ haˍ tuˬ maˇ cawˬ leh ha lehˬ ha kʼa te hpeh‸ tuˬ, yawˇ hui ve hkawˇ hta‸ hkʼa deh‸ na-o. Hkʼe maˇ heˆ kʼo, nawˬ hui awˬ pon awˬ bon te‸ chiˉ maˇ cawˬ.

18Ngaˬ awˬ pon bon lawˬ laˇ-oˆ. Awˬ lawn kʼo, ngaˬ ve shiˍ puiˉ ve nyi ma lehˬ, ya‸ kuiˬ maˇ cawˬ teh‸ ngaˬ shiˍ taˍ ve yoˬ. Teˇ ceuˬ le le awˬ hkʼaw lo ngaˬ da‸ ve hta‸ tiˉ te gaˇ ve yoˬ. 19Ngaˬ nawˬ hui geh haˆ haˆ gʼa kʼaw‸ la hpeh‸ tuˬ ve, bon lawˬ laˇ tuˬ leuˉ leh ngaˬ nawˬ hui hta‸ lawˬ hkawˉ ve yoˬ.

Bon na‸ piˇ ve leh awˬ leh meuˇ ve tawˇ teˇ hkawˇ

20Ngaˬ hui ve Jawˇmawˇ Yeˍsuˆ lehˬ, yawˬ hawˉ shehˍ hpaˇ uiˍ jaˇ ve teˇ gʼaˇ hpeh‸ ve yoˬ. Co co taiˍ taiˍ ka ti‸ shaˉ caˆ te tuˬ yawˇ ve awˬ suhˍ sheˆ leh, Gʼuiˬsha yawˇ hta‸ kʼaw‸ te‸ tu la piˇ ve yoˬ. 21Dawˇ sha gaˇ sha tuˬ te shehˍ hpaˇ Gʼuiˬsha ve a loˍ hta‸ nawˬ hui te gʼa tuˬ, da‸ ve teˇ ceuˬ le le nawˬ hui awˬ hkʼaw lo biˇ la tuˬ ngaˬ Gʼuiˬsha hta‸ lawˬ ve yoˬ. Gʼuiˬsha lehˬ, Yeˍsuˆ Hkri‸ hta‸ cuˇ leh yawˇ mehˆ gʼuˇ suhˍ nyi ma cawˇ ve teˇ ceuˬ hta‸ ngaˬ hui awˬ hkʼaw lo te chehˇ ve yoˬ. Yeˍsuˆ Hkri‸ hta‸ co co taiˍ taiˍ chiˇ uiˍ chiˇ mvuh piˇ-oˆ. A menˬ.

22Awˬ viˉ awˬ nyi teˇ hpaˍ-oˬ, ngaˬ nawˬ hui hta‸ ngeh ve li‸ teˇ kʼoˆ bvuh‸ feu laˇ ve yoˬ. Ngaˬ awˬ gʼaˇ pe‸ laˇ ve tawˇ hkawˇ hta‸ yeunˇ hkanˍ leh na yuˬ tuˬ ngaˬ nawˬ hui hta‸ lawˬ hkawˉ ve yoˬ. 23Ngaˬ hui ve awˬ viˉ awˬ nyi Tiˆmoˉseˍ hta‸ shu hpehˇ hkʼa peuˬ ve teh‸ shiˍ-o‸. Yawˇ haˆ haˆ gaˬ la ve kʼo, ngaˬ htawˇ yawˇ geh teˇ geh laˬ leh nawˬ hui hta‸ gʼa mawˬ da‸ tuˬ yoˬ.

24Nawˬ hui ve awˬ hoˉ hkʼa peu-eˬ leh Hkri‸ yaˇ hkʼa peu-eˬ hta‸ ngaˬ dawˇ nawˇ chehˇ ve yoˬ teh‸ hto piˇ-oˆ. Choˬ kaˬ lo chehˇ taˍ ve Iˉtaˍliˍ chaw teˇ hpaˍ nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ.

25Nawˬ hui hkʼa peu-eˬ geh awˬ bon awˬ shinˉ cawˬ piˇ-oˆ. A menˬ.

Currently Selected:

Heˍbrehˇ li‸ 13: LHBE

Highlight

Copy

Compare