Heˍbrehˇ li‸ 12

Yeˍsuˆ hta‸ hkʼa deh‸ nyi taˍ-o‸

1Hkʼe te leh, shaˉ hkiˆ hkanˍ shehˍ hpaˇ chi taw taw maˇ leh, moˬ hkʼa shuˍ shuˍ ngaˬ hui hta‸ caw zuhˇ chehˇ taˍ ve pa taw, tawˍ taˍ ve awˬ ceuˬ hkʼa peu-eˬ hta‸ yuˬ baˬ sheˬ leh, hawˆ taˍ ve venˇ baˆ hkʼa peu-eˬ hta‸ kʼehˆ baˬ taˉ leh, a shu yawˇ awˬ pon gu taˍ laˇ ve awˬ hkʼaˇ hta‸ nyi ma yeˬ ve awˬ hkʼaw lo gʼuiˇ kʼai-a veuˬ. 2Gʼuiˇ kʼai chehˇ ve teˇ yanˇ, Yeˍsuˆ hta‸ hkʼa deh‸ nyi taˍ-o‸. Yawˇ lehˬ, ngaˬ hui ve yonˍ ve teˇ ceuˬ hta‸ awˬ hkuiˉ puiˍ tanˬ te leh biˇ la piˇ shehˍ hpaˇ hpeh‸ ve yoˬ. Yawˇ awˬ gʼuˇ suhˍ teh taˍ ve ha lehˬ tuˬ ve teˇ ceuˬ hta‸ pa taw, ya‸ taw ve teˇ ceuˬ hta‸ maˇ dawˇ leh, la‸ ka hkʼoˆ lo hkanˍ suh peuˬ ve yoˬ. Yawˇ lehˬ chi beu‸ Gʼuiˬsha ve kʼaw jaw la‸ sha paˉ lo mui chehˇ taˍ peuˬ.

3Nawˬ hui awˬ gʼaˇ maˇ gʼa nuˇ leh, nyi ma maˇ gʼa luˬ tuˬ, venˇbaˆ yaˇ hui ve la‸ sheh awˬ hkʼaw lo chi taw taw hkʼa mvuhˇ hkʼa na te leh tawˍ taˍ ve hta‸ gʼa hkanˍ ve teˇ gʼaˇ hta‸ dawˇ nyi-o. 4Nawˬ hui lehˬ, venˇbaˆ hta‸ gʼa tawˍ da‸ bawˆ da‸ ve awˬ hkʼaw lo, nawˬ hui ve awˬ suhˍ sheˆ htaˇ hkʼa gaˬ maˇ gʼa hkanˍ jaw sheˍ. 5Yaˇ paˍ teˇ hpaˍ hta‸ awˬ pa maˍ piˇ ve hkʼe, yawˇ nawˬ hui hta‸ kʼoˆ maˍ laˇ ve tawˇ hkawˇ hta‸ nawˬ hui leunˇ peuˬ laˇ. Yawˇ kʼoˆ ve,

Ngaˬ yaˇ paˍ-oˬ, Jawˇmawˇ Gʼuiˬsha maˍ laˇ ve hta‸ hkʼe leˇ taˇ dawˇ.

Yawˇ nawˬ hta‸ deˇ maˍ laˇ ve teˇ yanˇ, nyi ma taˇ luˬ.

6Awˬ lawn kʼo, Jawˇmawˇ Gʼuiˬsha lehˬ

yawˇ ha‸ ve chaw hta‸ maˍ piˇ leh,

yawˇ ha‸ yuˬ ve yaˇ paˍ teˇ gʼaˇ le le hta‸ jaw‸ maˍ piˇ ve yoˬ, teh‸ yawˇ kʼoˆ taˍ ve yoˬ.#Tna 3:11-12

7Yawˇ maˍ laˇ ve hta‸ yeunˇ hkanˍ-o‸. Yaˇ paˍ teˇ hpaˍ hta‸ awˬ pa te piˇ ve hkʼa shuˍ shuˍ, Gʼuiˬsha nawˬ hui hta‸ te laˇ chehˇ ve yoˬ. Awˬ lawn kʼo, awˬ pa maˇ maˍ piˇ ve yaˇ paˍ a shu teˇ gʼaˇ cawˬ le. 8Yaˇ hkʼa peu-eˬ maˍ ve teˇ ceuˬ hta‸ gʼa hkanˍ ve hkʼe nawˬ hui maˇ gʼa hkanˍ ve kʼo, nawˬ hui yaˇ awˬ tehˬ ma hpeh‸ ve maˇ heˆ, haˉ chawˇ haˉ paˆ yaˇ hpeh‸ ve yoˬ. 9Chi hkʼoˆ ka‸, ngaˬ hui hta‸ maˍ laˇ tuˬ, awˬ suhˍ awˬ shaˍ hpawˇ awˬ pa teˇ hpaˍ cawˬ leh, yawˇ hui hta‸ ngaˬ hui yawˆ yan ve yoˬ. Chi a‸ kehˉ leuˉ leh, co ha hpawˇ ve Awˬ pa awˬ hawˉ lo ngaˬ hui chehˇ leh co ha gʼa te‸ ve maˇ heˆ laˇ. 10Awˬ lawn kʼo, yawˇ hui lehˬ a shu yawˇ nyi ma cawˇ ve hkʼe ngaˬ hui hta‸ teˇ tcuhˉ teˇ yanˇ awˬ hkʼaw lo ceh maˍ laˇ ve yoˬ. Ya‸ hkʼaˇ Gʼuiˬsha lehˬ, yawˇ da‸ ve kehˬ ve hkʼe ngaˬ hui htawˇ da‸ la kehˬ la tuˬ, ngaˬ hui awˬ pon da‸ ve hta‸ yawˇ dawˇ leh maˍ laˇ ve yoˬ. 11Maˍ laˇ ve teˇ ceuˬ le le hta‸ gʼa hkanˍ ve teˇ yanˇ, ha lehˬ tuˬ cawˬ ve maˇ heˆ, dawˇ haˍ tuˬ ceh tiˉ cawˬ ve yoˬ. Ya‸ hkʼaˇ, maˍ ve hta‸ gʼa hkanˍ yuˬ ve chaw teˇ hpaˍ awˬ pon, awˬ hkʼaw‸ nawˉ kʼo, hteˇ ve cawˇ ve awˬ hkʼaw lo dawˇ sha gaˇ sha ve awˬ shiˍ naw‸ la ve yoˬ.

Gʼuiˬsha ve awˬ bon hta‸ maˇ gʼa baˬ taˉ tuˬ shaˍ ti‸ piˇ ve

12Hkʼe te leh, nawˬ hui ve la‸ sheh deu lehˍ te chehˇ ve teˇ hpaˍ hta‸ chiˇ leh, awˬ gʼaˇ maˇ cawˬ ve hkui tcuhˉ kʼu teˇ hpaˍ hta‸ awˬ gʼaˇ cawˬ la piˇ-oˆ. 13Hkui sheh luˬ ve chaw teˇ hpaˍ awˬ tcuhˉ maˇ gʼa jiˆ kʼai leh na-e la tuˬ, nawˬ hui ve hkui sheh awˬ pon ya‸ kʼaw hteˇ lehˍ gu taˍ-o‸.

14Nawˬ hui lehˬ, da‸ la kehˬ la tuˬ maˇ kʼoˆ, chaw hkʼa peu-eˬ hta‸ cawˇ da‸ hui da‸ tuˬ maˇ kʼoˆ, gʼaˇ hte‸ te-o. Da‸ ve kehˬ ve maˇ cawˬ ve chaw a shu teˇ gʼaˇ maˇ kʼoˆ, Jawˇmawˇ Gʼuiˬsha hta‸ maˇ gʼa mawˬ. 15Nawˬ hui shaˍ ti‸ hkʼa deh‸ taˍ-o‸. Maˇ heˆ kʼo, nawˬ hui awˬ hkʼaw lo chaw teˇ gʼaˇ gʼaˇ Gʼuiˬsha ve awˬ bon hta‸ maˇ gʼa puiˉ-aˆ. Nawˬ hui hta‸ sho‸ sha‸ laˇ tuˬ, hkʼaˇ ve awˬ geu tawˆ la leh, chaw maˇ maˇ hta‸ cha‸ chiˆ tuˬ htawˇ te laˇ puiˉ-aˆ. 16Awˍ teˇ poˬ ceh tiˉ gʼa caˇ tuˬ awˬ pon, yaˇ uiˍ ve aˉ yaˇ hta‸ hawˇ baˬ ve Iˉsawˇ hkʼa shuˍ shuˍ, haˉ chawˇ haˉ paˆ te leh Gʼuiˬsha hta‸ maˇ yawˆ maˇ yan ve chaw, nawˬ hui awˬ hkʼaw lo teˇ gʼaˇ ka‸ maˇ gʼa cawˬ tuˬ, shaˍ ti‸ hkʼa deh‸ taˍ-o‸. 17Awˬ lawn kʼo, awˬ hkʼaw‸ nawˉ Iˉsawˇ lehˬ na‸ piˇ ve awˬ bon hta‸ kʼaw‸ heuˆ gaˇ ve teˇ yanˇ, baˬ taˉ ve hta‸ yawˇ gʼa hkanˍ ve teh‸ nawˬ hui shiˍ ve yoˬ. Mehˆ gʼuiˬ ya‸ la ve awˬ hkʼaw lo yawˇ gʼaˇ hte‸ ca ve htawˇ, kʼaw‸ dawˇ hpfuhˆ tuˬ awˬ yanˇ maˇ kʼaw‸ cawˬ.

18Awˬ lawn kʼo, la‸ sheh htawˇ gʼa ve, aˬ miˍ to‸ ve, naˆ tawˉ naˆ ho‸ ve leh, mvuhˇ haw lonˉ meuˆ la ve hkʼaw teˇ shiˍ lo nawˬ hui laˬ ve maˇ heˆ. 19Hkʼaw oˇ ve teˇ shiˍ lo behˬ heh ma meuˆ ve awˬ hkawˇ leh tawˇ yaw ve awˬ hkawˇ hta‸ gʼa kaˇ ve chaw hui lehˬ, yawˇ hui hta‸ tawˇ maˇ gʼa kʼaw‸ yaw laˇ tuˬ lawˬ hkawˉ ve yoˬ. 20Awˬ lawn kʼo, To nuˇ to shaˆ ka‸ hkʼaw oˇ ve hta‸ gʼa daw‸ ve kʼo, haˉ pui baˬ pehˍ-o‸ teh‸, tawˇ piˇ taˍ ve hta‸ yawˇ hui hkanˍ maˇ gʼa.#Taw 19:12-13 21Oˇ ve teˇ hpaˍ hta‸ gʼa mawˬ ve teˇ yanˇ, kawˆ tuˬ uiˍ jaˇ ve pa taw, Ngaˬ kawˆ cheˇ jaˇ ve yoˬ teh‸, Moˉseˍ kʼoˆ ve yoˬ.#Bon 9:19

22Ya‸ hkʼaˇ, nawˬ hui laˬ ve lehˬ, Ziˉonˍ hkʼaw hkʼoˆ lo laˬ ve yoˬ. Hkʼaw oˇ ve lehˬ, te‸ chehˇ ve Gʼuiˬsha ve venˇ, mvuhˇ naw ma hkʼoˆ ve Yeˍruˆsaˍlehnˍ, ca gʼaw maˇ peuˬ ve mvuhˇ naw ma tcuh yaˇ hui ha lehˬ ha kʼa hpawnˬ da‸ kuiˬ, 23mvuhˇ naw ma ve caˇ lanˇ awˬ hkʼaw lo awˬ meh bvuh‸ taˍ ve yaˇ uiˍ teˇ hpaˍ hpawnˬ da‸ kuiˬ hpeh‸ ve yoˬ. Chaw hkʼa peu-eˬ hta‸ suhˉ jehˍ shehˍ hpaˇ Gʼuiˬsha geh lo, biˇ la peuˬ ve hteˇ ve cawˇ ve chaw hui ve co ha teˇ hpaˍ cawˬ kuiˬ lo, 24ka ti‸ shaˉ caˆ awˬ suhˉ awˬ pon awˬ kaˍ te shehˍ hpaˇ Yeˍsuˆ geh lo leh, Aˍbeˍlaˆ ve awˬ suhˍ tawˇ yaw ve a‸ kehˉ leuˉ leh da‸ ve tawˇ hta‸ yaw ve, pfuhˍ taˍ ve awˬ suhˍ geh lo nawˬ hui laˬ ve yoˬ.

25Nawˬ hui lehˬ, tawˇ yaw laˇ shehˍ hpaˇ ve awˬ hkawˇ hta‸ maˇ na ve chaw maˇ gʼa hpeh‸ tuˬ, shaˍ ti‸ taˍ-o‸. Awˬ lawn kʼo, miˬguiˬ hkʼoˆ lo shaˍ ti‸ piˇ sheh hpaˇ hkawˇ hta‸ yawˇ hui maˇ na ve pa taw maˇ gʼa ponˬ ve kʼo, mvuhˇ naw ma hkʼoˆ chehˇ ve shaˍ ti‸ piˇ shehˍ hpaˇ hkawˇ hta‸ ngaˬ hui maˇ na ve kʼo, leuˉ leh ponˬ maˇ hpeh‸. 26Oˇ htaˇ, yawˇ ve awˬ hkawˇ miˬguiˬ hta‸ hiˆ piˇ ve yoˬ. Ya‸ hkʼaˇ, chi beu‸ ka ti‸ cawˬ taˍ ve lehˬ, Miˬguiˬ hta‸ ngaˬ teˇ pawˆ kʼaw‸ hiˆ piˇ tuˬ sheˍ ve awˬ hkʼoˆ ka‸, mvuhˇ naw ma hta‸ htawˇ hiˆ piˇ tuˬ yoˬ teh‸ yawˇ kʼoˆ taˍ ve yoˬ.#Hag 2:6 27Teˇ pawˆ kʼaw‸ hiˆ piˇ tuˬ sheˍ teh‸ kʼoˆ taˍ ve lehˬ, hiˆ piˇ maˇ gʼa ve awˬ ceuˬ teˇ hpaˍ hkʼaˬ htaˆ ka‸ yeˬ chehˇ tuˬ, hiˆ piˇ gʼa ve awˬ ceuˬ teˇ hpaˍ hta‸ yuˬ baˬ tuˬ yoˬ teh‸ kʼoˆ gaˇ ve yoˬ. Hiˆ piˇ gʼa ve awˬ ceuˬ teˇ hpaˍ lehˬ, te hpanˍ taˍ ve awˬ ceuˬ teˇ hpaˍ hpeh‸ ve yoˬ.

28Hkʼe te leh, hiˆ piˇ maˇ gʼa ve mvuhˇmiˬ hta‸ ngaˬ hui gʼa taˍ ve hta‸ pa taw, Gʼuiˬsha ve awˬ bon hta‸ chiˇ mvuh-a veuˬ. Yawˆ yan puiˉ kawˆ puiˉ ve awˬ hkʼaw lo, Gʼuiˬsha nyi ma cawˇ ve hkʼe yawˇ hta‸ oˉ kʼoˍ pui-a veuˬ. 29Awˬ lawn kʼo, ngaˬ hui ve Gʼuiˬsha lehˬ, to‸ baˬ chehˇ ve aˬ miˍ hpeh‸ ve yoˬ.

Currently Selected:

Heˍbrehˇ li‸ 12: LHBE

Highlight

Copy