Daˍyeˍlaˆ li‸ 4
4
Neˍbuˍhkaˍneˍzaˍ zuh‸ maˆ teˇ pawˆ kʼaw‸ mawˬ ve
1Jawˇmawˇ Neˍbuˍhkaˍneˍzaˍ lehˬ, miˬguiˬ chaw ceuˬ hkʼa peu-eˬ ve hta‸ li‸ chi hkʼe bvuh‸ feu ve yoˬ.
Nawˬ hui hkʼa peu-eˬ geh ha lehˬ dawˇ sha tuˬ cawˬ piˇ-oˆ. 2Uiˍ jaˇ mvuh jaˇ ve Gʼuiˬsha ngaˬ hta‸ hpeu‸ maˍ laˇ ve anˇ tuˬ uiˍ ve awˬ ceuˬ teˇ hpaˍ hta‸ na taˍ sheˍ.
3Gʼuiˬsha ngaˬ hui hta‸ hpeu‸ maˍ laˇ ve anˇ tuˬ teˇ hpaˍ hkʼaˬ ma uiˍ jaˇ ve le.
Yawˇ te taˍ ve anˇ tuˬ teˇ hpaˍ hkʼaˬ ma kanˇ paˆ uiˍ ve le.
Gʼuiˬsha lehˬ jawˇmawˇ hpeh‸ leh, co co taiˍ taiˍ uˉ peunˍ chehˇ tuˬ ve yoˬ.
4Ngaˬ lehˬ ha lehˬ dawˇ sha ve hkʼaw hawˉ yehˬ hkʼaw gʼa chehˇ taˍ ve yoˬ. 5Ya‸ hkʼaˇ, ngaˬ zuh‸ chehˇ ve teˇ yanˇ, kawˆ law‸ law‸ ve zuh‸ maˆ teˇ maˬ hta‸ gʼa mawˬ ve yoˬ. 6Hkʼe te leh, Baˍbuˍlonˍ mvuhˇmiˬ hkʼaw hkʼa chehˇ ve cuˇ yiˍ cawˬ paˍ leh mawˉ paˍ hkʼa peu-eˬ ve hta‸ ngaˬ kuˬ yuˬ leh, zuh‸ maˆ oˇ ve tcuhˉ kuiˬ yuˬ tawˆ tcuh ve yoˬ. 7Yawˇ hui gaˬ la htaˇ, zuh‸ maˆ oˇ ve ngaˬ yawˇ hui hta‸ kʼoˆ maˍ piˇ ve yoˬ. Ya‸ hkʼaˇ, yawˇ hui teˇ gʼaˇ ka‸ tcuhˉ kuiˬ yuˬ tawˆ laˇ maˇ gʼa. 8Oˇ htaˇ, Daˍyeˍlaˆ gaˬ la ve yoˬ. Da‸ kehˬ jaˇ ve Gʼuiˬsha ve Awˬ ha hpu yawˇ geh chehˇ taˍ ve yoˬ. Hkʼe te leh, zuh‸ maˆ oˇ ve ngaˬ yawˇ hta‸ hto maˍ piˇ ve yoˬ. 9Mawˉ paˍ lonˉ Beˍlaˍtaˍshaˍzaˬ-oˬ, da‸ kehˬ jaˇ ve Gʼuiˬsha ve Awˬ ha hpu nawˬ geh chehˇ taˍ ve pa taw, tcuhˉ kuiˬ naˉ ve awˬ ceuˬ teˇ hpaˍ hta‸ nawˬ hto maˍ laˇ gʼa ve hta‸ ngaˬ shiˍ ve yoˬ. Ngaˬ chi hkʼe zuh‸ maˆ mawˬ ve yoˬ. Ngaˬ hta‸ tcuhˉ kuiˬ a ciˉ hto maˍ laˇ-oˆ.
10Ngaˬ zuh‸ muiˉ kʼa chehˇ ve teˇ yanˇ, miˬguiˬ awˬ kʼaw ji teˇ hkʼaˇ lo suhˆ cehˬ lonˉ teˇ cehˬ hta‸ ngaˬ gʼa mawˬ ve yoˬ. 11Suhˆ cehˬ oˇ ve shaˬ te shaˬ mvuh la leh, mvuhˇ naw ma hta‸ daw‸ sheˬve yoˬ. Miˬguiˬ chaw yaˇ hkʼa peu-eˬ suhˆ cehˬ lonˉ oˇ ve hta‸ nyi mawˬ hpeh‸ ve yoˬ. 12Suhˆ cehˬ lonˉ oˇ ve awˬ hpa‸ teˇ hpaˍ nyi sha jaˇ leh, miˬguiˬ chaw yaˇ hkʼa peu-eˬ caˇ law‸ ve awˬ shiˍ teˇ hpaˍ hkʼa biˇ naw‸ chehˇ taˍ ve yoˬ. Haiˬ ve to nuˇ to shaˆ teˇ hpaˍ suhˆ cehˬ lonˉ oˇ ve awˬ hawˉ lo gʼaˇ jehˇ chehˇ taˍ leh, ngaˆ ehˉ teˇ hpaˍ suhˆ cehˬ oˇ ve awˬ hkʼoˆ lo awˬ hpui te chehˇ taˍ ve yoˬ. To nuˇ to shaˆ laiˉ ceuˬ iˉ shiˍ oˇ ve hta‸ caˇ chehˇ ve yoˬ.
13Suhˆ cehˬ lonˉ oˇ ve hta‸ ngaˬ nyi chehˇ ve teˇ yanˇ, mvuhˇ naw ma tcuh yaˇ teˇ gʼaˇ ya‸ la chehˇ ve hta‸ ngaˬ gʼa mawˬ ve yoˬ. 14Yawˇ awˬ hkawˇ bvuhˬ chaweh tawˇ yaw leh kʼoˆ ve, Suhˆ cehˬ lonˉ chi hta‸ htu baˬ leh, awˬ kʼaˉ teˇ hpaˍ hta‸ tawˆ baˬ-oˆ. Awˬ hpa‸ leh awˬ shiˍ teˇ hpaˍ hta‸ htawˇ jaw‸ ce piˇ-oˆ. Oˇ kaˬ lo chehˇ taˍ ve to nuˇ to shaˆ leh ngaˆ teˇ hpaˍ hta‸ htawˇ, gʼa‸ kʼoˬ piˇ-oˆ. 15Ya‸ hkʼaˇ, suhˆ muiˉ daw hta‸ sho caˆ leh kuiˇ caˆ yuˬ hpeh taˍ-o‸.
Chaw chi hpaˇ hkʼoˆ lo ciˍ gʼuiˬ ce la piˇ leh, yawˇ hta‸ to nuˇ to shaˆ hui geh chehˇ tcuh piˇ lawˬ-o‸. 16Suhˍ hkʼaw‸ hkʼa ga, yawˇ lehˬ chaw yaˇ ve nyi ma cawˬ tuˬ ve maˇ heˆ. To nuˇ to shaˆ ve nyi ma cawˬ tuˬ yoˬ. 17Chi hkʼe te piˇ tuˬ, mvuhˇ naw tcuh yaˇ teˇ hpaˍ dawˇ cheˆ taˍ peuˬ ve yoˬ. Chi hta‸ pa taw, kanˇ paˆ uiˍ ve Gʼuiˬsha lehˬ, mvuhˇmiˬ hkʼa peu-eˬ ve hta‸ uˉ peunˍ tuˬ kanˇ paˆ cawˬ ve hta‸ miˬguiˬ chaw yaˇ hkʼa peu-eˬ shiˍ-o‸. Yawˇ lehˬ mvuhˇmiˬ chi teˇ hpaˍ hta‸ yawˇ piˇ gaˇ ve chaw hta‸ piˇ ve yoˬ. I jaˇ ve chaw hta‸ ka‸ yawˇ piˇ ve yoˬ, teh‸ kʼoˆ ve yoˬ.
18Chi ve lehˬ ngaˬ gʼa mawˬ ve zuh‸ maˆ hpeh‸ ve yoˬ. Beˍlaˍtaˍshaˍzaˍ-oˬ, tcuhˉ kuiˬ a ciˉ hto maˍ laˇ-oˆ. Ngaˬ ve cuˇ yiˍ cawˬ paˍ teˇ gʼaˇ ka‸ ngaˬ hta‸ tcuhˉ kuiˬ yuˬ tawˆ laˇmaˇ gʼa. Ya‸ hkʼaˇ, da‸ ve kehˬ ve Gʼuiˬsha ve Awˬ ha hpu nawˬ geh chehˇ taˍ ve pa taw, nawˬ ngaˬ hta‸ tcuhˉ kuiˬ hto laˇ gʼa tuˬ yoˬ, teh‸ Daˍyeˍ laˆ hta‸ kʼoˆ piˇ ve yoˬ.
Daˍyeˍlaˆ tcuhˉ kuiˬ hpeu‸ maˍ piˇ ve
19Oˇ htaˇ, awˬ meh awˬ suhˉ Beˍlaˍtaˍshaˍzaˍ teh‸ kʼoˆ ve Daˍyeˍlaˆ lehˬ tawˇ oˇ ve hta‸ gʼa kaˇ ve teˇ yanˇ, dawˇ haˍ jaˇ leh tawˇ teˇ peu-eˬ ka‸ kʼaw‸ yaw maˇ gʼa ve yoˬ. Hkʼe te leh, jawˇmawˇ lehˬ, Beˍlaˍtaˍshaˍzaˍ-oˬ, zuh‸ maˇ oˇ ve nawˬ hta‸ taˇ dawˇ haˍ piˇ lawˬ, teh‸ yawˇ hta‸ kʼoˆ piˇ ve yoˬ.
Oˇ htaˇ, Beˍlaˍtaˍshaˍzaˍ kʼaw‸ yaw hkʼaw‸ leh kʼoˆ ve, Jawˇmawˇ-oˬ, zuh‸ maˆ oˇ ve nawˬ hta‸ maˇ caˉ da‸ leh, nawˬ ve canˇ paˍ teˇ hpaˍ hta‸ ceh caˉ da‸ tuˬ ve hta‸ ngaˬ dawˇ law ve yoˬ. 20Suhˆ cehˬ lonˉ oˇ ve lehˬ mvuhˇ naw ma hta‸ daw‸ taˍ leh, miˬguiˬ chaw yaˇ hkʼa peu-eˬ mawˬ hpeh‸ ve yoˬ. 21Yawˇ ve awˬ hpa‸ teˇ hpaˍ nyi sha jaˇ leh, miˬguiˬ chaw yaˇ hkʼa peu-eˬ ve hta‸ caˍ piˇ gʼa law‸ law‸ ve awˬ shiˍ naw‸ chehˇ taˍ ve yoˬ. Haiˬve to nuˇ to shaˆ teˇ hpaˍ, suhˆ cehˬ lonˉ oˇ ve awˬ hawˉ lo gʼaˇ jehˇ chehˇ leh, ngaˆ teˇ hpaˍ htawˇ suhˆ cehˬ oˇ ve awˬ hkʼoˆ lo awˬ hpui te chehˇ ve yoˬ.
22Jawˇmawˇ-oˬ, nawˬ lehˬ suhˆ cehˬ lonˉ oˇ ve hpeh‸ ve yoˬ. Mvuh jaˇ leh, awˬ gʼaˇ awˬ shaˉ uiˍ ve yoˬ. Nawˬ lehˬ mvuhˇ naw ma hta‸ daw‸ taˍ leh, nawˬ ve awˬ me‸ awˬ hponˇ mvuhˇmiˬ hkʼa peu-eˬ hkʼoˆ lo gaˬ taˍ ve yoˬ. 23Nawˬ nyi chehˇ ve teˇ yanˇ, mvuhˇ naw tcuh yaˇ teˇ gʼaˇ ya‸ la leh, Suhˆ cehˬ lonˉ chi hta‸ htu baˬ-o‸. Suhˆ muiˉ daw hta‸ sho caˆ leh kuiˇ caˆ yuˬ hpeh leh baˬ taˉ-oˆ. Chaw chi hpaˇ hkʼoˆ lo ciˍ gʼuiˬ ce la piˇ leh, suhˍ hkʼaw‸ hkʼa biˇ yawˇ hta‸ haiˬ ve to nuˇ to shaˆ teˇ hpaˍ geh chehˇ taˍ piˇ lawˬ-o‸, teh‸ kʼoˆ ve yoˬ.
24Jawˇmawˇ-oˬ, tcuhˉ kuiˬ chi hkʼe cawˬ ve yoˬ. Nawˬ hkʼaˬ hkʼe hpeh‸ la tuˬ ve awˬ lawn, uiˍ jaˇ mvuh jaˇ ve Gʼuiˬsha kʼoˆ taˍ peuˬ ve yoˬ. 25Nawˬ lehˬ, chaw yaˇ hui geh gʼa tawˆ kʼai leh, haiˬ ve to nuˇ to shaˆ teˇ hpaˍ geh gʼa ca chehˇ tuˬ yoˬ. Suhˍ hkʼaw‸ hkʼa gaˬ, nawˬ lehˬ nuˇ hkʼe zuhˇ hta‸ gʼa caˇ leh, heh puiˉ hkʼaw lo gʼa zuh‸ tuˬ yoˬ. Ciˍ gʼuiˬ nawˬ awˬ hkʼoˆ lo ce la tuˬ yoˬ. Oˇ htaˇ, Gʼuiˬsha lehˬ mvuhˇmiˬ hkʼa peu-eˬ ve hta‸ uˉpeunˍ tuˬ kanˇ paˆcawˬ ve hta‸ maˇ kʼoˆ, mvuhˇmiˬ oˇ ve teˇ hpaˍ hta‸Yawˇ piˇ gaˇ ve chaw hta‸Yawˇ piˇ gʼa ve hta‸ maˇ kʼoˆ, nawˬ shiˍ la tuˬ yoˬ. 26Mvuhˇ naw ma tcuh yaˇ oˇ ve lehˬ, suhˆ muiˉ daw oˇ ve hta‸ baˬ taˉ piˇ tuˬ tawˇ piˇ ve yoˬ. Tcuhˉ kuiˬ lehˬ, miˬguiˬ hkʼa peu-eˬ ve hta‸ Gʼuiˬsha uˉ peunˍ chehˇ ve hta‸ nawˬ shiˍ la ve teˇ yanˇ, nawˬ jawˇmawˇ gʼa kʼaw‸ te tuˬ ve hta‸ kʼoˆ gaˇ ve yoˬ. 27Chi hta‸ pa taw jawˇmawˇ-oˬ, ngaˬ kʼoˆ ve hkʼe te-o. Venˇbaˆ taˇ kʼaw‸ te. Hteˇ ve cawˇ ve kanˉ hta‸ te leh, haˍ ve gʼawˇ ve chaw hta‸ ha kʼaˉ piˇ-oˆ. Oˇ hkʼe te ve kʼo, nawˬ kʼaw‸ uiˍ la da‸ la tuˬ yoˬ, teh‸ jawˇmawˇ hta‸ kʼoˆ piˇ ve yoˬ.
28Hkʼa kʼoˆ taˍ ve awˬ ceuˬ chi teˇ hpaˍ, jawˇmawˇ Neˍbuˍhkaˍneˍzaˍ awˬ hkʼoˆ lo awˬ tehˬ awˬ na gaˬ la ve yoˬ. 29Awˬ hkʼaw‸ nawˉ teˇ chi nyiˇ ha pa ponˬ kʼai leh, jawˇmawˇ lehˬ Baˍbuˍlonˍ venˇ hkʼaw cawˬ ve yawˇ ve hawˉ yehˬ hkʼaw te toˇ chehˇ htaˇ, 30Baˍbuˍlonˍ venˇ hkʼaˬ ma uiˍ jaˇ ve hta‸ nyi sheˍ. Ngaˬve awˬ me‸ awˬ hponˇ hkʼaˬ ma uiˍ jaˇ ve hta‸ hpeu‸ maˍ piˇ tuˬ, venˇ chi hta‸ ngaˬ te taˍ ve yoˬ, teh‸ kʼoˆ ve yoˬ.
31Yawˇ oˇ hkʼe kʼoˆ chehˇ ve teˇ yanˇ, mvuh naw ma hkʼoˆ lo awˬ hkawˇ bvuhˬ la leh, Jawˇmawˇ Neˍbuˍhkaˍneˍzaˍ-oˬ, ngaˬ kʼoˆ chehˇ ve tawˇ hta‸ na sheˍ. Nawˬ ve kanˇ pa hta‸ ngaˬ kʼaw‸ yuˬ hkʼaw‸ peuˬ. 32Nawˬ lehˬ chaw yaˇ hui geh gʼa tawˆ kʼai leh, to nuˇ to shaˆ te hpaˍ geh gʼa ca chehˇ tuˬ yoˬ. Suhˍ hkʼaw‸ hkʼa gaˬ, nuˇ hkʼa shuˍ mvuh‸ hta‸ tiˉ nawˬ gʼa caˇ tuˬ yoˬ. Oˇ htaˇ kanˇ paˆ uiˍ ve Gʼuiˬsha lehˬ, mvuhˇmiˬ hkʼa peu-eˬ ve hta‸ uˉ peunˍ tuˬ kanˇ paˆ cawˬ ve hta‸ maˇ kʼoˆ, mvuhˇmiˬ oˇ ve teˇ hpaˍ Yawˇ piˇ gaˇ ve chaw hta‸Yawˇ piˇ gʼa ve hta‸ maˇ kʼoˆ nawˬ shiˍ la tuˬ yoˬ, teh‸ yawˇ hta‸ kʼoˆ piˇ ve yoˬ.
33Tawˇ oˇ ve teˇ hpaˍ la‸ haˉ biˇ la ve yoˬ. Neˍbuˍhkaˍneˍzaˍ lehˬ, chaw yaˇ ve nyi ma mehˉ kʼai leh, nuˇ hkʼa shuˍ mvuh‸ caˇ ve yoˬ. Ciˍ gʼuiˬ yawˇ awˬ hkʼoˆ ce la leh, yawˇ ve uˉ hkeh mvuh lehˬ aˉ ceˬ awˬ mvuh hkʼe hpeh‸ la ve yoˬ. Yawˇ ve hkui shiˍ kʼuˉ la‸ shiˍ kʼuˉ teˇ hpaˍ htawˇ, ngaˆ teˇ hpaˍ ve hkui shiˍ kʼuˉ hkʼe hpeh‸ la ve yoˬ.
Neˍbuˍhkaˍneˍzaˍ Gʼuiˬsha hta‸ chiˇ mvuh ve
34Oˇ ve hkʼaw‸ nawˉ, Neˍbuˍhkaˍneˍzaˍ kʼoˆ ve, Suhˍ hkʼaw‸ ve awˬ yanˇ ponˬ kʼai peuˬ hkʼaw‸ nawˉ, ngaˬ mvuhˇ naw ma hta‸ chiˇ nyi leh chaw yaˇ ve nyi ma kʼaw‸ cawˬ la ve yoˬ. Uiˍ jaˇ mvuh jaˇ ve Gʼuiˬsha hta‸ ngaˬ chiˇ mvuh leh, Yawˇ hta‸ taˍ uiˍ taˍ mvuh piˇ ve yoˬ.
Yawˇ lehˬ co co taiˍ taiˍ te‸ chehˇ leh, Yawˇ ve mvuhˇmiˬ co co taiˍ taiˍ yeˬ chehˇ tuˬ yoˬ. 35Gʼuiˬsha lehˬ, chaw yaˇ teˇ hpaˍ hta‸ te‸ chiˉ tcuhˉ kuiˬ maˇ cawˬ ve chaw teh‸ shawˍ taˍ ve yoˬ.
Mvuhˇ naw ma tcuh yaˇ leh chaw yaˇ teˇ hpaˍ lehˬ,
Yawˇ uˉ peunˍ ve awˬ hawˉ lo chehˇ taˍ ve yoˬ.
Chaw teˇ gʼaˇ ka‸
Yawˇ te tuˬ ve kanˉ hta‸ tawˍ taˍ maˇ gʼa.
36Ngaˬ chaw yaˇ ve nyi ma kʼaw‸ cawˬ la ve teˇ yanˇ, ngaˬ ve awˬ me‸ awˬ hponˇ leh ngaˬ ve mvuhˇmiˬ Yawˇ ngaˬ hta‸ kʼaw‸ hkʼaw‸ piˇ laˇ ve yoˬ. Ngaˬ ve a ma‸ lonˉ teˇ hpaˍ ngaˬ hta‸ kʼaw‸ ha‸ yuˬ laˇ ve yoˬ. Hkʼe te leh, ngaˬ lehˬ ponˬ laˬ htaˇ a‸ kehˉ awˬ me‸ awˬ hponˇ kʼaw‸ uiˍ la ve yoˬ.
37Chi hta‸ pa taw, mvuhˇ naw ma ve jawˇmawˇ hta‸ ngaˬ chiˇ mvuh leh, Yawˇ hta‸ taˍ uiˍ taˍ mvuh piˇ ve yoˬ. Yawˇ hkʼa te ve kanˉ hkʼa peu-eˬ, hteˇ jaˇ cawˇ jaˇ leh caˆ muiˬ puiˉ ve chaw hui hta‸ nyiˉ ya‸ piˇ puiˉ ve yoˬ, teh‸ kʼoˆ ve yoˬ.
Currently Selected:
Daˍyeˍlaˆ li‸ 4: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
