Daˍyeˍlaˆ li‸ 3
3
Shaˉ ho‸ hta‸ oˉ kʼoˍ pui tuˬ jawˇmawˇ tawˇ piˇ ve
1Jawˇmawˇ Neˍbuˍhkaˍneˍzaˍ lehˬ, mvuhˇ hpawˇ hkaw‸ chi shaw‸, kehˬ hpawˇ hkaw‸ shaw‸ cawˬ ve shi shaˉ ho‸ lonˉ teˇ maˬ te leh, Baˍbuˍloˍ mvuhˇmiˬ hkʼaw cawˬ ve Duˇraˆ miˬ tawˬ kuiˬ lo teh taˍ ve yoˬ. 2Oˇ hkʼe te peuˬ hkʼaw‸ nawˉ, jawˇmawˇ lehˬ yawˇ ve a ma‸ lonˉ, jawˇmawˇ yaˇ, mvuhˇmiˬ awˬ hoˉ awˬ naˬ, ma‸ poˍ lonˉ, mawˇ jeˬ ha‸ shaˉ paˍ, suhˉ jehˬ paˍ, leh awˬ kaˍ awˬ nu ve awˬ hoˉ awˬ naˬ hkʼa peu-eˬ ve hta‸ oˇ kaˬ lo kuˬ hpawnˬ leh shaˉ ho‸ lonˉ oˇ ve hta‸ chiˇ a‸ ve pawehˇ te ve yoˬ. 3Awˬ hoˉ awˬ naˬ oˇ ve hkʼa peu-eˬ oˇ kaˬ lo hpawnˬ gaˬ la htaˇ, 4jawˇmawˇ ve tawˇ yaw paˍ teˇ gʼaˇ awˬ hkawˇ bvuhˬ chaweh kuˬ leh chi hkʼe kʼoˆ ve yoˬ. Miˬguiˬ chaw yaˇ teˇ hpaˍ-oˬ, na sheˍ. Jawˇmawˇ chi hkʼe kʼoˆ ve yoˬ. 5Nawˬ hui behˬ heh ma meuˆ ve awˬ hkawˇ leh, tinˍ hteˆ, lehˉ lu meuˆ ve awˬ hkawˇ hta‸ gʼa kaˇ ve teˇ yanˇ, nawˬ hui lehˬ jawˇmawˇ lonˉ te taˍ ve shaˉ ho‸ lonˉ chi hta‸ oˉ kʼoˍ gʼa pui ve yoˬ. 6Shaˉ ho‸ lonˉ chi hta‸ oˉ kʼoˍ maˇ pui ve chaw lehˬ, aˬ miˍ buiˬ hpfuh hkʼaw baˬ keu ve hta‸ gʼa hkanˍ tuˬ yoˬ, teh‸ kʼoˆ ve yoˬ. 7Hkʼe te leh, behˬ heh ma hkawˇ bvuhˬ tawˆ la ve teˇ yanˇ, oˇ kaˬ lo hkʼa chehˇ taˍ ve chaw hkʼa peu-eˬ, jawˇmawˇ lonˉ ve shaˉ ho‸ lonˉ oˇ ve hta‸ oˉ kʼoˍ pui ve yoˬ.
Daˍyeˍlaˆ ve awˬ chawˇ teˇ hpaˍ maˇ na yuˬ ve
8Baˍbuˍlonˍ chaw teˇ hpaˍ lehˬ, Yuˇda‸ chaw hui hta‸ te luˬ piˇ tuˬ, awˬ yanˇ chi hta‸ law chehˇ ve yoˬ. 9Oˇ htaˇ, yawˇ hui jawˇmawˇ lonˉ geh kʼai leh, Jawˇmawˇ-oˬ, nawˬ co zuhˬ ha zuhˬ cawˬ piˇ-oˆ. 10Behˬ heh ma meuˆ hkawˇ kaˇ htaˇ, chaw teˇ gʼaˇ le le shaˉ ho‸ lonˉ chi hta‸ oˉ kʼoˍ gʼa pui ve yoˬ. 11Oˇ hkʼe maˇ te ve chaw hta‸ aˬ miˍ buiˬ hpfuh hkʼaw baˬ keu piˇ tuˬ, nawˬ kʼoˆ taˍ peuˬ ve yoˬ. 12Ya‸ hkʼaˇ, Baˍbuˍlonˍ mvuhˇmiˬ hkʼoˆ lo nawˬ awˬ hoˉ awˬ naˬ te tcuh taˍ ve Yuˇda‸ chaw Shaˆdraˆ, Meˍshehˆ leh Aˍbeˍdaˍneˍgoˍ hui lehˬ, nawˬ kʼoˆ ve hkʼe maˇ te. Yawˇ hui lehˬ, nawˬ te taˍ ve shaˉ ho‸ lonˉ oˇ ve hta‸ oˉ kʼoˍ maˇ pui, teh‸ jawˇmawˇ hta‸ kʼoˆ piˇ ve yoˬ.
13Tawˇ oˇ ve hta‸ jawˇmawˇ gʼa kaˇ htaˇ, yawˇ nyi ma zuhˆ jaˇ leh yawˇ hui hta‸ yawˇ geh lo shiˍ veu laˇ tuˬ tawˇ piˇ ve yoˬ. 14Yawˇ hui yawˇ mehˆ gʼuˇ suhˍ lo gaˬ la htaˇ, Shaˆdraˆ, Meˍshehˆ, Aˍbeˍdaˍneˍ goˍ nawˬ hui shehˆ gʼaˇ ngaˬ te taˍ ve shaˉ ho‸ lonˉ oˇ ve hta‸ oˉ kʼoˍ maˇ pui kʼoˆ ve yoˬ laˇ. 15Behˬ heh ma meuˆ hkawˇ kaˇ kʼo, nawˬ hui shaˉ ho‸ lonˉ oˇ ve hta‸ oˉ kʼoˍ gʼa pui ve yoˬ. Oˇ hkʼe maˇ te ve chaw hta‸, aˬ miˍ buiˬ hpfuh hkʼaw baˬ keu tuˬ yoˬ, teh‸ ngaˬ kʼoˆ taˍ peuˬ ve yoˬ. Nawˬ hui dawˇ leh awˬ kaˍ awˬ nu gʼuiˬsha teˇ gʼaˇ gʼaˇ nawˬ hui hta‸ ponˬ laˇ gʼa tuˬ yoˬ teh‸ dawˇ taˍ ve laˇ, teh‸ yawˇ hui hta‸ kʼoˆ piˇ ve yoˬ.
16Oˇ htaˇ, Shaˆdraˆ, Meˍshehˆ leh Aˍbeˍdaˍneˍgoˍ kʼaw‸ yaw hkʼaw‸ leh kʼoˆ ve, Jawˇmawˇ-oˬ, ngaˬ hui lehˬ a shu yawˇ awˬ to gʼa ponˬ tuˬ tawˇ yaw chehˇ ve maˇ heˆ. 17Ngaˬ hui oˉ kʼoˍ pui chehˇ ve Gʼuiˬsha lehˬ, ngaˬ hui hta‸ aˬ miˍ buiˬ hpfuh hkʼaw ponˬ laˇ tuˬ kanˇ paˆ cawˬ ve kʼo, yawˇ ponˬ laˇ tuˬ yoˬ. 18Ya‸ hkʼaˇ, yawˇ oˇ hkʼe te laˇ maˇ gʼa ve ka‸, ngaˬ hui lehˬ nawˬ te taˍ ve shaˉ ho‸ hta‸ oˉ kʼoˍ pui tuˬ ve maˇ heˆ, teh‸ jawˇmawˇ hta‸ kʼoˆ piˇ ve yoˬ.
Yawˇ hui hta‸ aˬ miˍ buiˬ hpfuh hkʼaw baˬ keu ve
19Oˇ htaˇ jawˇmawˇ Neˍbuˍhkaˍneˍzaˍ lehˬ, Shaˆdraˆ, Meˍshehˆ leh Aˍbeˍdaˍneˍ goˍ hui hta‸ nyi ma zuhˆ jaˇ leh mehˆ hpfuhˇ nyiˉ-ehˍ kʼai ve yoˬ. Hkʼe te leh, yawˇ lehˬ ponˬ laˬ htaˇ te jaw ve aˬ miˍ buiˬ hpfuh a‸ kehˉ suhˍ pun chiˆ jaˇ ve aˬ miˍ buiˬ hpfuh lonˉ teˇ maˬ te tcuh ve yoˬ 20Oˇ hkʼe te peuˬ hkʼaw‸ nawˉ, awˬ gʼaˇ uiˍ jaˇ ve yawˇ ve ma‸ yaˇ teˇ hpaˍ hta‸ kuˬ yuˬ leh, yawˇ hui shehˆ gʼaˇ hta‸ hpeh tsuh‸ peuˬ hkʼaw‸ nawˉ, aˬ miˍ bui hpfuh hkʼaw baˬ keu tcuh ve yoˬ. 21Hkʼe te leh, jawˇmawˇ lonˉ kʼoˆ ve hkʼe ma‸ yaˇ teˇ hpaˍ yawˇ hui hta‸ aˬ miˍ buiˬ hpfuh hkʼaw baˬ keu ve yoˬ. 22Jawˇmawˇ lehˬ, aˬ miˍ buiˬ hpfuh oˇ ve hta‸ chiˆ jaˇ tuˬ te tcuh taˍ ve pa taw, yawˇ hui hta‸ aˬ miˍ hkʼaw ca baˬ keu tcuh ve ma‸ yaˇ oˇ ve teˇ hpaˍ aˬ miˍ chiˆ pehˍ ve yoˬ. 23Shaˆdraˆ, Meˍshehˆ leh Aˍbeˍdaˍneˍgoˍ lehˬ, shu hpeh‸ tsuh‸ ve hta‸ gʼa hkanˍ leh, aˬ miˍ buiˬ hpfuh hkʼaw ce lo‸-e ve yoˬ.
24Oˇ htaˇ, jawˇmawˇ lonˉ lehˬ anˇ jaˇ ve hkʼaw pawˆ tu la leh, Ngaˬ hui chaw shehˆ gʼaˇ hta‸ ceh tiˉ hpeh tsuh‸ leh aˬ miˍ buiˬ hpfuh hkʼaw baˬ keu ve maˇ heˆ laˇ, teh‸ yawˇ ve ma‸ poˍ lonˉ teˇ hpaˍ hta‸ na nyi ve yoˬ.
Yoˬ, jawˇmawˇ-oˬ, teh‸ yawˇ hui yawˇ hta‸ kʼaw‸ yaw hkʼaw‸ piˇ ve yoˬ.
25Hkʼe te kʼo, aˬ hto‸ ma pa taw aˬ miˍ buiˬ hpfuh hkʼaw lo chaw awˇ gʼaˇ hta‸ ngaˬ gʼa mawˬ ve le. Yawˇ hui hta‸ hpeh taˍ ve aˉ caˆ hkeh ka‸ cheˆ kʼai peuˬ. Ya‸ hkʼaˇ yawˇ hui teˇ chiˉ maˇ hpeh‸ law. Awˇ gʼaˇ teˇ gʼaˇ lehˬ, Gʼuiˬsha hta‸ shuˍ ve yoˬ, teh‸ kʼoˆ ve yoˬ.
Yawˇ hui hta‸ kʼaw‸ ponˬ piˇ ve
26Hkʼe te leh, jawˇmawˇ lehˬ aˬ miˍ buiˬ hpfuh paˇ lo kʼai leh, Shaˆdraˆ, Meˍshehˆ, Aˍbeˍdaˍ neˍgoˍ, uiˍ jaˇ mvuh jaˇ ve Gʼuiˬsha ve awˬ ceˬ teˇ hpaˍ-oˬ, tawˆ la-o, teh‸ yawˇ hui hta‸ kuˬ piˇ ve yoˬ. Hkʼe te leh, yawˇ hui teˇ cawˬ haˉ tawˆ la ve yoˬ. 27Oˇ htaˇ, a ma‸ lonˉ teˇ hpaˍ, ma‸ poˍ lonˉ teˇ hpaˍ, leh oˇ kaˬ lo chehˇ taˍ ve awˬ hoˉ awˬ naˬ teˇ hpaˍ hkʼa peu-e, yawˇ hui shehˆ gʼaˇ hta‸ ca hpoˆ nyi ve yoˬ. Yawˇ hui ve uˉ hkeh mvuh maˇ hkeu‸ leh veu‸ kʼaˇ htawˇ aˬ miˍ maˇ to‸. Aˬ miˍ shaˉ ka‸ maˇ nuˬ.
28Oˇ htaˇ, jawˇmawˇ chi hkʼe kʼoˆ ve yoˬ. Shaˆdraˆ, Meˍshehˆ, Aˍbeˍdaˍneˍgoˍ ve Gʼuiˬsha hta‸ chiˇ mvuh-o. Yawˇ hta‸ gʼaˇ va chehˇ ve chaw chi teˇ hpaˍ hta‸ Gʼuiˬsha lehˬ, yawˇ ve mvuhˇ naw tcuh yaˇ hta‸ hpehˇ peu laˇ leh, ca htaiˍ hkʼaw‸ piˇ la ve yoˬ. Yawˇ hui lehˬ, awˬ kaˍ awˬ nu gʼuiˬsha teˇ hpaˍ hta‸ oˉ kʼoˍ pui ve a‸ kehˉ, a shu yawˇ awˬ to hkanˍ suh ve yoˬ.
29Chi hta‸ pa taw, ya‸ nyi hkʼaw‸ nawˉ chaw teˇ gʼaˇ gʼaˇ, Shaˆdraˆ, Meˍshehˆ, Aˍ beˍdaˍneˍgoˍ hui ve Gʼuiˬsha hta‸ hkʼa mvuhˇ hkʼa na kʼoˆ ve kʼo, yawˇ lehˬ awˬ tcuhˉ tawˆ cheˆ ve hta‸ gʼa hkanˍ leh, yawˇ ve yehˬ hta‸ htawˇ te luˬ te sheˆ piˇ tuˬ yoˬ. Chi hkʼe htaiˍ hkʼaw‸ laˇ puiˉ ve awˬ kaˍ awˬ nu gʼuiˬsha teˇ gʼaˇ ka‸ maˇ cawˬ, teh‸ kʼoˆ ve yoˬ.
30Oˇ ve hkʼaw‸ nawˉ, jawˇmawˇ lehˬ Shaˆdraˆ, Meˍshehˆ leh Aˍbeˍdaˍneˍgoˍ hui hta‸ Baˍbuˍ lonˍ mvuhˇmiˬ hkʼaw uiˍ jaˇ ve aˉ yaˇ kʼaw‸ piˇ ve yoˬ.
Currently Selected:
Daˍyeˍlaˆ li‸ 3: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
