2 Saˍmo-eˍlaˆ li‸ 24
24
Daˍviˆ yawˇ ve chaw hta‸ gʼaw nyi ve
1Awˬ hkʼaw‸ nawˉ teˇ pawˆ, Gʼuiˬsha Iˉsaˍreˍlaˆ chaw hui hta‸ nyi ma kʼaw‸ zuhˆ ve yoˬ. Hkʼe te leh, Gʼuiˬsha Daˍviˆ hta‸ cuˇ leh Iˉsaˍreˍlaˆ chaw awˬ hkʼoˆ kawˆ tuˬ dawˇ haˍ tuˬ ga la piˇ lawˬ ve yoˬ. Oˇ htaˇ Gʼuiˬsha lehˬ, Iˉsaˍreˍlaˆ leh Yuˇda‸ chaw hui ve chaw shenˍ ca gʼawˆ nyi-o, teh‸ Daˍviˆ hta‸ kʼoˆ piˇ ve yoˬ. 2Hkʼe te leh Daˍviˆ lehˬ, Nawˬ ve ma‸ poˍ teˇ hpaˍ hta‸ shiˍ veu leh, Iˉsaˍreˍlaˆ mvuhˇmiˬ hkʼaˬ ti chi ti lo kʼai-o. Iˉsaˍreˍlaˆ chaw hkʼaˬ nyiˇ gʼaˇ cawˬ leh naˍ, chaw shenˍ ca yuˬ nyi-o. Ngaˬ shiˍ gaˇ ve yoˬ, teh‸ yawˇ ve ma‸ poˍ lonˉ Yaˍbaˆ hta‸ kʼoˆ piˇ ve yoˬ.
3Ya‸ hkʼaˇ, Yaˍbaˆ kʼaw‸ yaw hkʼaw‸ leh kʼoˆ ve, Jawˇmawˇ-oˬ, nawˬ ve Jawˇmawˇ Gʼuiˬsha lehˬ, chi beu‸ cawˬ taˍ ve Iˉsaˍreˍlaˆ chaw hui hta‸ teˇ ha pun kʼaw‸ maˇ la piˇ-oˆ. Chi hkʼe hpeh‸ la ve hta‸ nawˬ gʼa mawˬ taˉ piˇ-oˆ. A hto‸ ma pa taw, nawˬ lehˬ Iˉsaˍreˍlaˆ chaw hui hta‸ kʼaw‸ gʼaw nyi gaˇ ve le, teh‸ Daˍviˆ hta‸ kʼoˆ piˇ ve yoˬ. 4Ya‸ hkʼaˇ, Daˍviˆ lehˬ yawˇ kʼoˆ ve hkʼe na yuˬ leh te tuˬ, Yaˍbaˆ leh yawˇ ve ma‸ poˍ lonˉ teˇ hpaˍ hta‸ hto piˇ ve yoˬ. Hkʼe te leh, yawˇ hui Iˉsaˍreˍlaˆ chaw teˇ hpaˍ hta‸ chaw shenˍ ca gʼawˆ tuˬ tawˆ kʼai ve yoˬ.
5Yawˇ hui Yawˇdanˍ iˉ kaˆ lawˬ hta‸ hkanˍ tawˆ-e peuˬ hkʼaw‸ nawˉ, Gaˆ mvuhˇmiˬ hkʼaw cawˬ ve Aˍyawˍ venˇ awˬ hawˉ hpawˇ lo deh chehˇ taˍ ve yoˬ. Yawˇ hui oˇ kaˬ lo kʼaw‸ tu leh awˬ na hpawˇ lo cawˬ ve Yaˍzaˍ venˇ lo kʼai ve yoˬ. 6Oˇ ve hkʼaw‸ nawˉ, yawˇ hui Hiˇtiˆ mvuhˇmiˬ hkʼaw cawˬ ve Giˇlaˆ leh Kaˍdeˍshaˆ venˇ lo kʼai ve yoˬ. Yawˇ hui oˇ kaˬ lo kʼaw‸ tu leh, Danˍ mvuhˇmiˬ lo kʼai taˉ peuˬ hkʼaw‸ nawˉ, mvuhˇ nyi kʼehˬ hpawˇ lo cawˬ ve Siˉdonˍ venˇ lo kʼai ve yoˬ. 7Oˇ ve hkʼaw‸ nawˉ, yawˇ hui awˬ hawˉ hpawˇ lo cawˬ ve Tuˇruˆ venˇ lo kʼai ve yoˬ. Oˇ kaˬ lo kʼaw‸ te leh, Hiˇviˆ chaw leh Hkaˍnaˍniˆ chaw hui ve venˇ teˇ hpaˍ hkʼaw lo kʼai taˉ peuˬ hkʼaw‸ nawˉ Yuˇda‸ mvuhˇmiˬ awˬ hawˉ teˇ tawn lo cawˬ ve Beˍraˍsheˍbaˆ venˇ lo kʼai ve yoˬ. 8Ha pa kʼawˇ maˬ leh nyiˇ chi nyi ponˬ kʼai peuˬ hkʼaw‸ nawˉ, yawˇ hui Yeˍruˆsaˍlehnˍ venˇ lo kʼaw‸ gaˬ la ve yoˬ. Yawˇ hui lehˬ Iˉsaˍreˍlaˆ mvuhˇmiˬ hkʼaˬ ti chi ti lo gaˬ taˉ peuˬ ve yoˬ. 9Yawˇ hui jawˇmawˇ geh kʼai leh, yawˇ hui ca gʼawˆ veu laˇ ve chaw shenˍ jawˇmawˇ hta‸ piˇ ve yoˬ. Iˉsaˍreˍlaˆ mvuhˇmiˬ hkʼaw ma‸ bawˆ puiˉ la peuˬ ve chaw 800,000 leh, Yuˇda‸ mvuhˇmiˬ hkʼaw 500,000 gʼaˇ cawˬ ve yoˬ.
10Daˍviˆ lehˬ chaw shenˍ chi teˇ hpaˍ hta‸ gʼawˆ yuˬ peuˬ hkʼaw‸ nawˉ, yawˇ nyi ma maˇ sha ve yoˬ. Hkʼe te leh yawˇ Gʼuiˬsha geh kʼai leh, Gʼuiˬsha-oˬ, ngaˬ chi hkʼe gʼa te taˍ peuˬ ve lehˬ, nawˬ hta‸ te ya‸ jaˇ peuˬ ve yoˬ. Ngaˬ ve venˇbaˆ hta‸ a ciˉ hpehˇ laˇ-oˆ. Ngaˬ lehˬ, hkʼa deh‸ maˇ dawˇ nyi ve hkʼaw kanˉ gʼa te peuˬ, teh‸ Gʼuiˬsha hta‸ kʼoˆ piˇ ve yoˬ.
11Oˇ htaˇ Gʼuiˬsha lehˬ, Daˍviˆ ve tcuh kaˍ paˍ Gaˆ hta‸ kʼoˆ piˇ ve, 12Ngaˬ Daˍviˆ hta‸ yaw piˇ tuˬ ve tawˇ shehˆ hkawˇ cawˬ ve yoˬ. Yawˇ heuˆ gaˇ ve tawˇ teˇ hkawˇ hta‸ ngaˬ awˬ tehˬ awˬ na te piˇ tuˬ yoˬ, teh‸ Gaˆ hta‸ kʼoˆ piˇ ve yoˬ. Shawˉ pawˍ mvuhˇ shawˉ Daˍviˆ zuh‸ tu la ve teˇ yanˇ, 13Gaˆ yawˇ geh kʼai leh, Gʼuiˬsha kʼoˆ ve tawˇ chi shehˆ hkawˇ awˬ hkʼaw lo, nawˬ hkʼaˬ ve teˇ hkawˇ hta‸ heuˆ gaˇ ve le. Nawˬ ve mvuhˇmiˬ hkʼaw shehˆ hkʼaw‸ hkʼa gaˬ meu‸ ve kaˆ ve teˇ ceuˬ laˇ. Maˇ heˆ kʼo, ha pa shehˆ maˬ hkʼa gaˬ nawˬ ve canˇ paˍ teˇ hpaˍ hta‸ gʼa hpaw toˇ ve te gaˇ laˇ. Maˇ heˆ kʼo, nawˬ ve mvuhˇmiˬ hkʼaw shehˆ nyi hkʼa gaˬ naˬ beuˬ gaˬ ve hta‸ heuˆ gaˇ laˇ. Chi beu‸ dawˇ nyi-o. Ngaˬ hkʼaˬ ve teˇ maˬ Gʼuiˬsha hta‸ gʼa kʼaw‸ hto piˇ tuˬ le, teh‸ yawˇ hta‸ kʼoˆ piˇ ve yoˬ.
14Oˇ htaˇ Daˍviˆ lehˬ, Ngaˬ ca dawˇ maˇ tawˆ. Ya‸ hkʼaˇ, chaw yaˇ ngaˬ hta‸ ciˍ yanˍ laˇ ve hta‸ ngaˬ maˇ heuˆ gaˇ. Gʼuiˬsha ngaˬ hta‸ ciˍ yanˍ laˇ piˇ-oˆ. Awˬ lawn kʼo, yawˇ lehˬ ha kʼaˉ puiˉ ve Gʼuiˬsha hpeh‸ ve yoˬ, teh‸ kʼaw‸ yaw hkʼaw‸ piˇ ve yoˬ. 15Hkʼe te leh, Gʼuiˬsha lehˬ mvuhˇ shawˉ teˇ na‸ htaˇ te leh, yawˇ tinˍ taˍ ve awˬ yanˇ hkʼa gaˬ, Iˉsaˍreˍlaˆ chaw awˬ hkʼoˆ lo naˬ beuˬ gaˬ la piˇ lawˬ ve yoˬ. Iˉsaˍreˍlaˆ mvuhˇmiˬ hkʼa peu-eˬ awˬ hkʼaw lo, Iˉsaˍreˍlaˆ chaw 70,000 gʼaˇ suh-e ve yoˬ. 16Gʼuiˬsha ve mvuhˇ naw ma tcuh yaˇ lehˬ, Yeˍruˆsaˍlehnˍ venˇ hta‸ te luˬ piˇ-a teh‸ te ve teˇ yanˇ, Gʼuiˬsha nyi ma kʼaw‸ pa leh, Pehˇ-o. Taˇ kʼaw‸ ciˍ yaˍ piˇ-oˆ, teh‸ mvuhˇ naw tcuh yaˇ oˇ ve hta‸ kʼoˆ piˇ ve yoˬ. Mvuhˇ naw tcuh yaˇ oˇ ve lehˬ, Yeˍbuˇsiˆ chaw Aˍyawˇnaˆ ve caˬ jaw‸ kuiˬ paˇ lo chehˇ taˍ ve yoˬ.
17Daˍviˆ lehˬ, Iˉsaˍreˍlaˆ chaw hta‸ tiˇ pehˍ chehˇ ve mvuhˇ naw ma tcuh yaˇ oˇ ve hta‸ gʼa mawˬ ve yoˬ. Oˇ htaˇ yawˇ kʼoˆ ve, Jawˇmawˇ-oˬ, ngaˬ lehˬ te ya‸ leh venˇbaˆ cawˬ ve chaw hpeh‸ ve yoˬ. Chaw chi teˇ hpaˍ aˬ hto‸ ma te ya‸ kuiˬ cawˬ le. Nawˬ lehˬ ngaˬ leh ngaˬ ve yehˬ yaˇ kʼa yaˇ teˇ hpaˍ hta‸ ciˍ yanˍ laˇ cawˇ ve yoˬ, teh‸ Gʼuiˬsha hta‸ kʼoˆ piˇ ve yoˬ.
18Oˇ ve teˇ nyi awˬ hkʼaw lo ceh tiˉ, tcuh kaˍ paˍ Gaˆ lehˬ Daˍviˆ geh laˬ leh, Aˍyawˇnaˆ ve caˬ jaw‸ kuiˬ lo kʼai leh, Gʼuiˬsha hta‸ tuˉ tanˇ kuiˬ teˇ maˬ ca te-o, teh‸ Daˍviˆ hta‸ kʼoˆ piˇ ve yoˬ. 19Daˍviˆ lehˬ, Gʼuiˬsha ve tawˇ hta‸ na yuˬ leh, Gaˆ yawˇ hta‸ kʼoˆ pi ve hkʼe ca te tuˬ tawˆ kʼai ve yoˬ. 20Aˍyawˇnaˆ chiˇ nyi leh, Daˍviˆ leh yawˇ ve ma‸ poˍ lonˉ teˇ hpaˍ yawˇ geh laˬ chehˇ ve hta‸ gʼa mawˬ ve yoˬ. Oˇ htaˇ yawˇ Daˍviˆ gʼuˇ suhˍ boˆ taˍ leh, 21Jawˇmawˇ-oˬ, aˬ hto‸ ma pa taw nawˬ choˬ kaˬ laˬ ve le, teh‸ yawˇ hta‸ na nyi ve yoˬ.
Naˬ beuˬ hta‸ mehˉ kʼai piˇ lawˬ tuˬ, nawˬ ve ca‸ jaw‸ kuiˬ chi hta‸ vuiˬ yuˬ leh, Gʼuiˬsha hta‸ tuˉ tanˇ kuiˬ teˇ maˬ te tuˬ awˬ pon laˬ ve yoˬ, teh‸ yawˇ hta‸ kʼaw‸ yaw hkʼaw‸ piˇ ve yoˬ.
22Oˇ htaˇ Aˍyawˇnaˆ lehˬ, Jawˇmawˇ-oˬ, yuˬ leh nawˬ Gʼuiˬsha hta‸ tuˉ tanˇ piˇ gaˇ ve hkʼe tuˉ tanˇ piˇ-oˆ. Gʼuiˬsha hta‸ tuˉ tanˇ tuˬ choˬ kaˬ lo nuˇ paˍ lonˉ teˇ hpaˍ chehˇ taˍ ve yoˬ. Choˬ kaˬ lo caˬ jaw‸ htaˇ yehˇ tuˬ ve awˬ hkʼeun teˇ hpaˍ leh, nuˇ lawˬ ka‸ cawˬ taˍ ve yoˬ. Aˬ miˍ tuˉ tuˬ awˬ pon yehˇ-oˆ, teh‸ yawˇ hta‸ kʼaw‸ yaw hkʼaw‸ piˇ ve yoˬ. 23Aˍyawˇnaˆ lehˬ, awˬ ceuˬ oˇ ve hkʼa peu-eˬ jawˇmawˇ hta‸ piˇ leh, Nawˬ ve Gʼuiˬsha lehˬ nawˬ ve tuˉ tanˇ tuˬ hta‸ ha‸ yuˬ laˇ piˇ-oˆ, teh‸ yawˇ hta‸ kʼoˆ piˇ ve yoˬ.
24Oˇ htaˇ jawˇmawˇ lehˬ, Chi hkʼe maˇ heˆ. Ngaˬ nawˬ hta‸ awˬ hpfuhˇ piˇ laˇ tuˬ yoˬ. Ngaˬ te‸ chiˉ awˬ hpfuhˇ maˇ peuˬ ve mawˇ hta‸ yuˬ leh, ngaˬ ve Gʼuiˬsha hta‸ tuˉ tanˇ tuˬ ve maˇ heˆ, teh‸ yawˇ hta‸ kʼaw‸ kʼoˆ piˇ ve yoˬ. Hkʼe te leh, yawˇ lehˬ caˬ jaw‸ kuiˬ oˇ ve leh nuˇ oˇ ve teˇ hpaˍ awˬ pon hpu 50 hteh‸ piˇ ve yoˬ. 25Yawˇ lehˬ oˇ kaˬ lo Gʼuiˬsha hta‸ tuˉ tanˇ kuiˬ teˇ maˬ te leh, Gʼuiˬsha hta‸ tuˉ tanˇ piˇ ve yoˬ. Oˇ htaˇ, Gʼuiˬsha lehˬ yawˇ ve bon lawˬ hkawˇ hta‸ na yuˬ leh, Iˉsaˍreˍlaˆ mvuhˇmiˬ hkʼaw gaˬ la chehˇ ve naˬ beuˬ oˇ ve hta‸ mehˉ kʼai piˇ lawˬ ve yoˬ.
Currently Selected:
2 Saˍmo-eˍlaˆ li‸ 24: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.