2 Saˍmo-eˍlaˆ li‸ 23
23
Daˍviˆ awˬ leh meuˇ yaw taˉ ve tawˇ
1Chi lehˬ, Daˍviˆ awˬ leh meuˇ yaw taˉ ve tawˇ teˇ hpaˍ hpeh‸ ve yoˬ. Yeˍsehˇ ve yaˇ paˍ Daˍviˆ lehˬ, Yaˍkoˆ ve Gʼuiˬsha leuˆ yuˬ taˍ ve jawˇmawˇ hpeh‸ leh, Gʼuiˬsha yuˬ uiˍ yuˬ mvuh piˇ taˍ ve chaw teˇ gʼaˇ hpeh‸ ve yoˬ. Yawˇ lehˬ Iˉsaˍreˍlaˆ chaw awˬ pon kʼa muiˬ hkawˇ teˇ hpaˍ hta‸ htawˇ yuˬ tawˆ piˇ taˉ ve yoˬ.
2Daˍviˆ kʼoˆ ve,
Gʼuiˬsha ve Awˬ ha hpu ngaˬ awˬ hkʼaw lo chehˇ leh tawˇ yaw chehˇ ve yoˬ.
Yawˇ ve tawˇ hkawˇ ngaˬ ve meuˇ guiˬ hkʼoˆ cawˬ taˍ ve yoˬ.
3Iˉsaˍreˍlaˆ ve Gʼuiˬsha tawˇ yaw taˍ peuˬ.
Iˉsaˍreˍlaˆ hta‸ ha‸ shaˉ shehˍ hpaˇ ngaˬ hta‸ chi hkʼe kʼoˆ laˇ ve,
Gʼuiˬsha hta‸ kawˆ ve awˬ hkʼaw lo mvuhˇmiˬ hta‸
hteˇ lehˍ uˉ peunˍ ve jawˇmawˇ lehˬ,
4moˬ maˇ hoˆ ve awˬ yanˇ hkʼaw ba da‸ jaˇ ve mvuhˇ nyi hkʼa shuˍ hpeh‸ leh,
mvuhˇ yeˬ laˬ peuˬ hkʼaw‸ nawˉ, mvuh‸ teˇ hpaˍ hta‸ awˬ gʼeuˆ ba piˇ ve mvuhˇ nyi hkʼa shuˍ hpeh‸ ve yoˬ, teh‸ kʼoˆ ve yoˬ.
5Oˇ ve hkʼa shuˍ Gʼuiˬsha lehˬ ngaˬ ve awˬ ceuˬ awˬ hkʼaˇ teˇ hpaˍ hta‸ awˬ bon na‸ piˇ tuˬ ve yoˬ.
Awˬ lawn kʼo, yawˇ lehˬ co co taiˍ taiˍ yeˬ ve ka ti‸ ngaˬ hta‸ te laˇ taˍ peuˬ.
Chi lehˬ, ngaˬ nyi hkʼaˇ suh jaˇ ve awˬ ceuˬ hpeh‸ leh,
Gʼuiˬsha lehˬ awˬ ceuˬ chi teˇ hpaˍ ngaˬ awˬ hkʼoˆ awˬ tehˬ awˬ na gaˬ la piˇ tuˬ ve yoˬ.
6Ya‸ hkʼaˇ, Gʼuiˬsha maˇ cawˬ teh‸ kʼoˆ ve chaw teˇ hpaˍ lehˬ,
shu yuˬ baˬ ve aˉ chuˇ buiˇ hkʼa shuˍ hpeh‸ ve yoˬ. Chaw teˇ gʼaˇ ka‸ yawˇ hui hta‸ htawˇ maˇ hpeh‸.
7Yawˇ hui hta‸ htawˇ gaˇ kʼo, sho nuˆ maˇ heˆ kʼo, gaˆ tuˬ hta‸ gʼa yehˇ ve yoˬ.
Yawˇ hui lehˬ, tuˉ baˬ ve hta‸ gʼa hkanˍ tuˬ yoˬ.
Awˬ meh bvuhˬ ve Daˍviˆ ve ma‸ yaˇ teˇ hpaˍ
8Chaw chi teˇ hpaˍ lehˬ, awˬ meh bvuhˬ ve Daˍviˆ ve ma‸ yaˇ teˇ hpaˍ hpeh‸ ve yoˬ. Taˍhkeˍmonˍ venˇ yaˇ Yaˍshawˇbanˍ lehˬ, cheuˬ jaˇ ve ma‸ yaˇ shehˆ gʼaˇ awˬ hkʼaw lo ve awˬ hoˉ hpeh‸ ve yoˬ. Ma‸ bawˆ kuiˬ teˇ kaˬ hkʼaw, yawˇ lehˬ gehˇ teˇ maˬ yuˬ taˍ leh canˇ paˍ 800 gʼaˇ hta‸ tiˇ pehˍ piˇ ve yoˬ.
9Cheuˬ jaˇ ve ma‸ yaˇ nyiˇ gʼaˇ teˇ gʼaˇ lehˬ, Aˍhawˇhiˆ ve awˬ hawehˍ, Doˉdoˍ ve yaˇ Eˇlaˍsaˍ hpeh‸ ve yoˬ. Teˇ pawˆ htaˇ, Daˍviˆ yawˇ huiˉ maˬ Hpiˇliˇtiˆ chaw hui hta‸ maˇ shawˍ maˇ caˆ kʼoˆ ve yoˬ. Iˉsaˍreˍlaˆ chaw teˇ hpaˍ hkʼaw‸ nawˉ hpawˇ lo gʼuiˇ hpaw-e chehˇ ve teˇ yanˇ, 10yawˇ lehˬ aˉhtaw hta‸ yawˇ ve la‸ sheh hkʼaw lo hpui yuˬ maˇ gʼa htaˇ hkʼa gaˬ, Hpiˇliˇtiˆ chaw hui hta‸ gʼaˇ hte‸ hkanˍ bawˆ ve yoˬ. Oˇ ve teˇ nyi Gʼuiˬsha yawˇ hui hta‸ gʼaˇ shehˍ hpaˇ hpeh‸ la piˇ ve yoˬ. Ma‸ bawˆ peuˬ hkʼaw‸ nawˉ, Iˉsaˍreˍlaˆ chaw teˇ hpaˍ, canˇ paˍ hui ve la‸ caˉ hta‸ ca gʼawˆ yuˬ tuˬ, Eˇlaˍsaˍ chehˇ taˍ kuiˬ lo hpawnˬ laˬ ve yoˬ.
11Cheuˬ jaˇ ve ma‸ yaˇ shehˆ gʼaˇ teˇ gʼaˇ lehˬ, Haˍranˍ venˇ yaˇ Aˍgiˆ ve yaˇ paˍ Shaˍmaˍ hpeh‸ ve yoˬ. Hpiˇliˇtiˆ chaw teˇ hpaˍ lehˬ, Leˍhiˍ venˇ hkʼaw chehˇ taˍ ve yoˬ. Venˇ oˇ ve awˬ paˇ lo miˬ nawˆ hko teˇ maˬ cawˬ ve yoˬ. Iˉsaˍreˍlaˆ chaw teˇ hpaˍ lehˬ, ma‸ bawˆ shonˇ leh gʼuiˇ hpaw-e ve yoˬ. 12Ya‸ hkʼaˇ, Shaˍmaˍ lehˬ miˬ nawˆ hko oˇ ve hkʼaw huˉ taˍ leh, Hpiˇliˇtiˆ chaw hui hta‸ gʼaˇ hte‸ hkanˍ bawˆ ve yoˬ. Oˇ ve teˇ nyi htawˇ, Gʼuiˬsha lehˬ Iˉsaˍreˍlaˆ chaw hui hta‸ gʼaˇ shehˍ hpaˇ hpeh‸ piˇ ve yoˬ.
13Caˬ gʼeu‸ ve awˬ yanˇ gaˬ la htaˇ, chaw shehˆ chi gʼaˇ awˬ hkʼaw lo ve chaw oˇ ve shehˆ gʼaˇ lehˬ, Aˍduˇlanˍ haˉ kʼoˍ hkʼaw va‸ chehˇ taˍ ve Daˍviˆ geh kʼai ve yoˬ. Hpiˇliˇtiˆ chaw teˇ moˍ lehˬ, Yeˍhpenˍ lawˬ hkʼo‸ hkʼaw deh chehˇ taˍ ve yoˬ. 14Awˬ yanˇ oˇ ve hkʼaw, Daˍviˆ lehˬ ta‸ yehˬ hkʼaw chehˇ taˍ leh, Hpiˇliˇtiˆ chaw teˇ moˍ lehˬ, Behˍlehˍhehnˍ venˇ hkʼaw chehˇ taˍ ve yoˬ. 15Oˇ htaˇ, Daˍviˆ iˉ kaˆ shiˉ jaˇ leh, Behˍlehˍhehnˍ venˇ taˍ meu‸ hpe‸ lo cawˬ ve nanˬ bawˍ hkʼaw ve iˉ kaˆ a shu ngaˬ hta‸ nyiˉ taw laˇ tuˬ le, teh‸ kʼoˆ ve yoˬ. 16Cheuˬ jaˇ ve ma‸ yaˇ oˇ ve shehˆ gʼaˇ lehˬ, Hpiˇliˇtiˆ chaw hui deh chehˇ taˍ kuiˬ lo hpanˍ kʼai leh, nanˬ bawˍ oˇ ve hkʼaw cawˬ ve iˉ kaˆ nyiˉ veu laˇ leh, Daˍviˆ hta‸ taw piˇ ve yoˬ. Ya‸ hkʼaˇ, Daˍviˆ lehˬ iˉ kaˆ oˇ ve hta‸ maˇ dawˬ. Gʼuiˬsha hta‸ tanˇ piˇ ve hkʼaw, miˬ chaˇ hkʼoˆ lo ngeuˍ baˬ ve yoˬ. 17Peuˬ hkʼaw‸ nawˉ yawˇ kʼoˆ ve, Gʼuiˬsha-oˬ, iˉ kaˆ chi hta‸ ngaˬ dawˬ maˇ hpeh‸. Iˉ kaˆ chi hta‸ dawˬ ve kʼo, iˉ kaˆ chi hta‸ a sha‸ tanˇ leh ca hkʼo ve chaw chi shehˆ gʼaˇ ve awˬ suhˍ hta‸ dawˬ ve hkʼe hpeh‸ ve yoˬ, teh‸ kʼoˆ ve yoˬ. Hkʼe te leh, yawˇ lehˬ iˉ kaˆ oˇ ve hta‸ maˇ dawˬ.
Awˬ lawn chi teˇ hpaˍ lehˬ, cheuˬ jaˇ ve ma‸ yaˇ oˇ ve shehˆ gʼaˇ te taˍ peuˬ ve kanˉ hpeh‸ ve yoˬ.
18Zeˍruˆyaˍ ve yaˇ Yaˍbaˆ awˬ nyi paˍ Aˍbiˆshehˇ lehˬ, awˬ meh bvuhˬ jaˇ ve ma‸ yaˇ shehˆ gʼaˇ awˬ hkʼoˆ awˬ hoˉ hpeh‸ ve yoˬ. Yawˇ lehˬ ma‸ bawˆ kuiˬ lo yawˇ ve gehˇ hta‸ yuˬ leh canˇ paˍ 300 gʼaˇ hta‸ tiˇ pehˍ ve yoˬ. Hkʼe te leh, yawˇ lehˬ cheuˬ jaˇ ve ma‸ yaˇ shehˆ gʼaˇ awˬ hkʼaw lo, shu a‸ kehˉ awˬ meh bvuhˬ ve chaw hpehˬ leh, 19yawˇ hui ve awˬ hoˉ htawˇ hpeh‸ ve yoˬ. Ya‸ hkʼaˇ yawˇ lehˬ, cheuˬ jaˇ ve ma‸ yaˇ oˇ ve shehˆ gʼaˇ hkʼe taw awˬ meh maˇ bvuhˬ sheˍ.
20Keˍzeˍlaˆ venˇ hkʼaw chehˇ ve Yawˇyaˍdaˆ ve yaˇ Beˍnaˍyaˆ htawˇ, awˬ meh bvuhˬ jaˇ ve ma‸ yaˇ teˇ gʼaˇ hpeh‸ ve yoˬ. Yawˇ lehˬ, awˬ meh bvuhˬ ve Mawˇbaˆ chaw hui ve ma‸ poˍ lonˉ nyiˇ gʼaˇ hta‸ tiˇ pehˍ ve yoˬ. Moˬ hoˆ jaˇ ve teˇ nyi htaˇ, yawˇ lehˬ haˉ kʼoˍ hkʼaw lo‸-e leh, laˇ caˬ shiˉ teˇ hkeh hta‸ tiˇ pehˍ ve yoˬ. 21Chi hkʼoˆ ka‸, yawˇ lehˬ ngaˇ shaw‸ mvuh leh gehˇ taˆ taˍ ve Eˇjiˇtu‸ chaw lonˉ teˇ gʼaˇ hta‸ htawˇ tiˇ pehˍ piˇ ve yoˬ. Yawˇ geh suhˆ taˬ teˇ maˬ tiˉ cawˬ ve yoˬ. Ya‸ hkʼaˇ, yawˇ lehˬ Eˇjiˇtu‸ chaw oˇ ve hpaˇ ve gehˇ hta‸ lu yuˬ leh, yawˇ hta‸ kʼaw‸ juˆ pehˍ piˇ ve yoˬ. 22Chi lehˬ, Beˍnaˍyaˆ te taˍ peuˬ ve da‸ ve kanˉ hpeh‸ ve yoˬ. 23Yawˇ htawˇ ka‸ cheuˬ jaˇ ve ma‸ yaˇ shehˆ gʼaˇ awˬ hkʼaw lo awˬ meh bvuhˬ jaˇ ve ma‸ yaˇ teˇ gʼaˇ hpeh‸ ve yoˬ. Ya‸ hkʼaˇ, yawˇ lehˬ cheuˬ jaˇ ve ma‸ yaˇ oˇ ve shehˆ gʼaˇ hkʼe taw awˬ meh maˇ bvuhˬ sheˍ. Daˍviˆ lehˬ, yawˇ hta‸ yawˇ ve a sha‸ shaw paˍ teˇ hpaˍ awˬ hkʼoˆ awˬ hoˉ te tcuh taˍ ve yoˬ.
24-39Awˬ nu ve awˬ meh bvuhˬ ve ma‸ yaˇ teˇ hpaˍ lehˬ,
Yaˍbaˆ ve awˬ nyi paˍ Aˍsaˍheˍlaˆ,
Behˍlehˍhehnˍ venˇ yaˇ Doˉdoˍ ve yaˇ Eˇlaˍshaˍnanˍ,
Haˍroˆ ven yaˇ Eˇliˆkaˆ leh Shaˍmaˍ,
Paˍlehˆ venˇ yaˇ Heˍlehˆ,
Teˍkawˇ venˇ yaˇ Iˉkeˍshaˆ ve yaˇ Iˇraˆ,
Aˍnaˍtoˆ venˇ yaˇ Aˍbyaˍsaˍ,
Huˇshaˆ venˇ yaˇ Siˆbaˍkaˍ,
Aˍhawˇhiˆ venˇ yaˇ Zaˍlaˍmonˍ,
Huˇshaˆ venˇ yaˇ Maˍbaˍniˆ
Neˍtawˇhpaˆ venˇ yaˇ Baˍnaˍ ve yaˇ Maˍhaˍriˆ leh Heˍlehˆ,
Beˍyaˍmenˍ mvuhˇmiˬ Giˇbaˍ venˇ yaˇ Riˆbehˇ ve yaˇ Iˆtehˇ,
Piˇraˍtonˍ venˇ yaˇ Beˍnaˍyaˆ,
Gaˍsaˍ lawˬ hkʼo‸ hkʼaw chehˇ ve Hiˆdehˇ,
Aˍraˍbaˆ ven yaˇ Aˍbyaˍbonˍ,
Baˍhuˆrenˍ venˇ yaˇ Aˍzaˍmaˍvehˆ,
Shaˍbaˍlonˍ venˇ yaˇ Eˇlaˍbaˆ,
Guˇniˆ venˇ yaˇ Yaˍshenˍ,
Yawˇnaˆtanˍ
Haˍraˍriˆ venˇ yaˇ Shaˍmaˍ
Haˍraˍriˆ venˇ yaˇ Shaˍraˆ ve yaˇ paˍ Aˍhiˆanˍ,
Maˍhkaˍ venˇ yaˇ Aˍhaˆsaˍbehˆ ve yaˇ paˍ Eˇliˆhpaˍlehˆ,
Giˇlawˇ venˇ yaˇ Aˍhiˆtawˇhpeˍlaˆ ve yaˇ paˍ Eˇliˇanˍ,
Kaˍmeˍlaˆ venˇ yaˇ Heˍzaˍronˍ,
Aˍraˆ venˇ yaˇ Hpaˍrehˆ,
Zawˇbaˍvenˇ yaˇ Naˍtanˍ ve yaˇ paˍ Iˉgaˍlaˆ,
Gaˆ awˬ ceuˬ awˬhkʼaˇ Baˍniˆ,
Aˍmonˍ chaw Zeˍlehˆ,
Beˍroˆ venˇ yaˇ (Yeˍruˆyaˍ ve yaˇ paˍ Yaˍbaˆ ve la‸ caˉ pfuhˇ paˍ) Naˍhaˍrehˇ,
Yaˍtiˇtaˆ venˇ yaˇ Iˇraˆ leh Gaˍrehˆ,
Hiˇtiˆ chaw Uˇriˇya‸.
Hkʼa peu-eˬ chaw 37 gʼaˇ hpeh‸ ve yoˬ.
Currently Selected:
2 Saˍmo-eˍlaˆ li‸ 23: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.