Matta 16

Farisa'en e Saduki'en ƴami alaama

(Markus 8:11-13; Luka 12:54-56)

1Farisa'en e Saduki'en ngari haa Yeesu ngam jarribaago mo. Ɓe ƴami mo o waŋginana ɓe alaama iwka diga asama#Mat 12:38; Lk 11:16.. 2Yeesu jaabi ɓe: “To naaŋge muti, asama boo wooji, on ɗon mbi'a: Jaŋngo laaɓan. 3Fajiri boo, to asama nyiɓɓi, duule mbooji, on ɗon mbi'a: Naargewol ummoto hannde! On mbaawi fassitirgo ko waŋgi haa asama, ammaa alaamaaji laatiiɗi jonta kam, on mbaawataa fassitirgo ɗi. 4Yimɓe zamanuuru ndu'u, ɓe halluɓe, zammbotooɓe Allah! Ɓe ngeli alaama, ammaa ɓe keɓataa, sonaa alaama annabi Yonas.” Nden o acci ɓe, o dilli#Mat 12:39; Lk 11:29..

Ufnirɗum Farisa'en e Saduki'en

(Markus 8:14-21)

5Pukara'en eeri weendu. Ɓe ngejjiti hoo'ugo tamseeje. 6Yeesu wi'i ɓe: “Kakkile, ayne ko'e mooɗon e ufnirɗum Farisa'en e Saduki'en#Lk 12:1..” 7Pukara'en carwootiri, ɓe mbi'i: “O wolwi bana non ngam en koo'aay tamseeje.” 8Yeesu anndi ko ɓe numata. O ƴami ɓe: “Koni mbi'oton on ngalaa tamseeje, onon famɗa-nuɗɗinki'en? 9On paamaay tawon na? On ciftortaa haala tamseeje jowi ɗe mi senndani yimɓe ujine njowo e limgal cilaaje ɗe on adi#Mat 14:17-21. 10e haala tamseeje joweeɗiɗi ɗe mi senndani yimɓe ujine nayo e limgal cilaaje ɗe on adi na#Mat 15:34-38.? 11Koni on paamataa? Mi wolwanaay on haala tamseeje! Kakkilane ufnirɗum Farisa'en e Saduki'en.”

12Nden pukara'en paami o wi'aay ɓe ayna ko'e maɓɓe e ufnirɗum tamseeje ammaa ekkitinol Farisa'en e Saduki'en.

Piyer seedi Yeesu woni Almasiihu

(Markus 8:27-30; Luka 9:18-21)

13Yeesu yehi lesdi Kaysariya-Filippi. Ton o ƴami pukara'en maako: “Yimɓe ɗon mbi'a, min, Ɓii-neɗɗo, mi moy?” 14Ɓe njaabi mo: “Woɗɓe ɗon mbi'a an woni Yuhanna baɗoowo baptisma, woɗɓe boo ɗon mbi'a an woni Eliya. Woɗɓe boo ɗon mbi'a an woni Yeremiya malla gooto annabi'en#Mat 14:1-2; Mk 6:14-15; Lk 9:7-8..” 15Yeesu ƴami ɓe: “Onon boo, on ɗon mbi'a mi moy?” 16Simon Piyer jaabi mo: “An woni Almasiihu, Ɓiɗɗo Allah geeto#Yuh 6:68-69..” 17Yeesu wi'i mo: “A barkiɗinaaɗo, Simon ɓii Yonas, naa neɗɗo waŋginani ma gooŋga ka, ammaa ɗum Baabiraawo am mo asama. 18Mi ɗon wi'e: An woni Piyer waato tapaare. Dow tapaare man mi mahan jama'aare nuɗɗinɓe yam. Koo maayde jaalataako nde sam. 19Mi hokkete maɓɓitirɗum laamu asamanji. Ko a haɓɓi haa duniyaaru, ɗum haɓɓaama haa asama boo, ko a fiisti haa duniyaaru, ɗum fiistaama haa asama boo#Mat 18:18; Yuh 20:23..”

20Nden Yeesu umri pukara'en muuɗum taa ɓe ngecca koo moy kanyum woni Almasiihu.

Yeesu waŋgini haala maayde muuɗum e ummitineeki muuɗum

(Markus 8:31—9:1; Luka 9:22-27)

21Diga saa'i man Yeesu fuɗɗi faamtingo pukara'en muuɗum, o wi'i: “Doole mi yaha Urusaliima, mi yara bone ɗuuɗɗum diga ndotti'en e mawɓe liman'en e moodiɓɓe tawreeta, ɓe mbarammi, ammaa mi ummito diga maayde nyalaade tataɓre.” 22Piyer wicciti mo sera, fuɗɗi felugo mo, wi'i: “Kayya, yaa Jawmiraawo, Allah haɗ ɗum! Irin man warantaa ma sam!” 23Ammaa Yeesu yeesiti, wi'i Piyer: “Daayam, an Sayɗaanu! A laatani yam daliila fergere, ngam numooji maaɗa iwaay haa Allah, ammaa haa yimɓe.”

24Nden Yeesu wi'i pukara'en muuɗum: “To goɗɗo yiɗi tokkaago yam, sey o acca muuyo maako, o roondo gaafaaŋgal maako, o tokko yam#Mat 10:38; Lk 14:27.. 25Ngam koo moy yiɗi hisnugo yoŋki muuɗum, majjinan ki. Ammaa mo majjini yoŋki mum ngam am, heɓtan ki#Mat 10:39; Lk 17:33; Yuh 12:25.. 26To neɗɗo heɓi duniyaaru fuu, ammaa o halki yoŋki maako, ɗume ɗum nafata mo? Malla woodi ko goɗɗo waawata hokkugo ngam soottugo yoŋki muuɗum na? Walaa sam! 27Ngam Ɓii-neɗɗo waran nder tedduŋgal Baabiraawo mum bee malaa'ika'en mum, saa'i man o warjoto koo moy deydey kuuɗe muuɗum#Jab 62:13; Mat 25:31; Rm 2:6.. 28Gooŋga mbi'anmi on, fakat woɗɓe caka mooɗon maayataa, sey to ɓe ngi'i garki Ɓii-neɗɗo bee laamu muuɗum.”

Currently Selected:

Matta 16: FB

Highlight

Compare

Copy