Sirasid 33
33
(36)
1Kulɗo Jawmiraawo hisan sarru. Wakkati ɓillaare, o kisneteeɗo.
2Hikmaajo wanyataa Tawreeta, ammaa mo fewanta ka nanndi bee koommbowal nder henndu saatundu.
3Marɗo hakkiilo ɗon hoola wolde Jawmiraawo. Haa maako kam, Tawreeta he'i jaɓeego bana koŋngol limanjo.
Paataaɗo e jancoowo
4To a yiɗi yimɓe keɗite, sey taaska ko mbolwata. Siftor ko annduɗa hiddeko njaaba.
5Numooji paataaɗo ɗon ngirlo bana kosɗe puspus, hakkiilo maako ɗon bana falloore yirlannde.
6Soobaajo giɗɗo jancugo yimɓe nanndi bee puccu kijotoongu ba'anɗo ngu keso.
Allah peerɗindiroowo
7Jayŋgol naaŋge ɗon yaynana nyalɗe nder nduuɓu fuu. Koni nyalaade kazaare ɓuran nyalɗe goɗɗe saman?
8Jawmiraawo tagi ɗe feere feere, o senndiri wakkatiiji juulɗe.
9Caka maaje, o teddini nyalɗe ceniiɗe, o ɗali luttuɗe boo nder limgal nyalɗe meere.
10Non boo yimɓe fuu tagraama bee mbulwuldi bana Aadamu mo Allah tagi bee lesdi.
11Jawmiraawo nder hikma mum tagi ɓe feere feere, o waɗani ɓe koddirooje feere feere boo.
12O barkiɗini woɗɓe bee jo'ingo ɓe haa dow, o seni woɗɓe feere boo ngam ɓe ɓadito mo. Ammaa luttuɓe, o naali ɓe e o leesni ɓe, o jippini ɓe diga joonde maɓɓe.
13Bana loope nder juuɗe mahoowo payanɗe, mahoowo waɗan bee maaje ko o yiɗi, bana non yimɓe haa juuɗe tagɗo ɓe: Ɓe njo'inaaɓe yeeso hoddiroore nde Allah hoddirani ɓe.
14Yeeso halleende, mbooɗeeŋga ɗon, yeeso maayde, ngeendam ɗon. Bana non boo, yeeso adili'en woodi yedduɓe.
15Non a laardata ko Allah mo asama tagi fuu: Koo ɗume fuu ɗon bee ɗiɗaɓum mum, waato woore ɗon dartano woɗnde.
Binnduɗo deftere nde'e ɗon hiiso kuugal mum
16Min, mi sakiti wargo haa kuugal bana teɓoowo bukki ɗi teɓooɓe ngejjiti haa ngesa inabooje.
17Ammaa bee mo'ere Allah barkiɗinɗo yam, mi jokki aartuɓe yam koo nde mi sakiti, nden bana teɓoowo inabooje fuu, mi hebbini ɓiɗɗirde am.
Ndimu
18Paame booɗɗum: To mi ɓilli hoore am, naa ngam hoore am tan, ammaa ngam tefanɓe anndal fuu.
19Nane e kakkiilaneeɗam, onon ardiiɓe lesdi e ardiiɓe jama'aare.
20Nder joonde ma, taa accu ɓiɗɗo ma malla debbo ma mara baawɗe dow ma, koo deerɗa malla soobaajo ma boo. Non boo, taa halfin jawdi ma haa goɗɗo. Bana nii a marataa haaje ƴamtugo mo to a miccitake waɗgo ɗum.
21To a ɗon bee yoŋki, taa accu goɗɗo mare.
22Yeeso ɓikkoy maaɗa, ndikka laatoɗa dokkoowo dow dookoowo.
23Nder ko mbaɗata fuu, waɗ ɗum bana jaagorɗo, ngam taa usta nannanti ma.
24To ragare balɗe ma yotti, senndu ndonŋgu ma.
Noy jogugo maccuɓe?
25Geene, piyɗe, cabbi e doŋle tedduɗe ɗon ngam wamnde. Nyaamdu, ɗowtaare e kuugal ɗon ngam maccuɗo.
26To a ɗon hokka kuugal haa maccuɗo ma, a heɓan de'eende. To a acci mo o huuwa ko o yiɗi, o tefan doggugo.
27Bee kaɓɓirgal e ɓoggi, ɓe ɗon nyobba hoƴƴudu ngaari. Ngam ɗelmingo maccuɓe halluɓe, sey sawru.
28Huuwnu maccuɗo ma ngam taa o laato o meereejo:
29Joonde meere woni daada aybeeji fuu.
30Suklu mo bee kuugal ngam o ɗon ngam maajum. To o ɗowtanaaki ma, haɓɓu mo bee callallu. Ammaa, taa laatoɗa caatuɗo bee koo moy fuu, taa waɗ koo ɗume ko luuti adilaaku.
31To a woodi maccuɗo, aynu mo bana aynirta hoore ma ngam a soodi mo caɗɗum jamum. To kaŋko tan maccuɗo ma, laar mo bana deerɗa ngam bana no marɗa haaje yoŋki ma, non mardirta haaje maako boo.
32To a yarni mo bone e o doggi kam,
33noy a ɗaɓɓitirta mo?
Currently Selected:
Sirasid 33: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.