Baruk 3
3
1“Jawmiraawo honooɓe asama, Allah Isra'iila, ɓernde amin ta'i, min tampi ammaa min ɗon mbookana ma. 2Jawmiraawo nan min, yurmin min, ngam min mbaɗi aybe yeeso ma. 3An a ɗon laami haa abada, minin kam min ɗon maata min halkuɓe haa foroy. 4Jawmiraawo honooɓe asama, Allah Isra'iila, nan tornde amin, minin min ɓuraay maayɓe Isra'iila, minin min ɓiɓɓe waɗooɓe aybe yeeso maaɗa, ɓe nanaay sawtu Jawmiraawo, Allah maɓɓe. Nden bone takkani min. 5Taa siftor aybe kaakiraaɓe amin, ammaa hannde siftor baawɗe ma e innde ma. 6An Jawmiraawo, Allah amin, min ngiman maŋgtooje maaɗa, yaa Jawmiraawo 7ngam maajum a hebbini ɓerɗe amin bee kulol ma haa min tore. Nder daheeki amin, min ngiman maŋgtooje ma ngam min ndaayni ɓerɗe amin diga halleende kaakiraaɓe amin aybuɓe yeeso ma. 8Ndaa hannde min dahaaɓe haa a saŋkiti min ngam ɓe kuɗa min, ɓe naala min. A hiiti min ngam aybe kaakiraaɓe amin, fiistuɓe alkawal maaɗa Jawmiraawo, Allah amin.”
Hikma
Ɓe ngejjiti Hikma
9Nane, onon Isra'iila'en, umrooje ngeendam,
acce ɗe nasta nder noppi mon
haa on ekkito laataago hakkilɓe.
10Ɗume waɗi on, onon Isra'iila'en,
on ɗon njooɗi nder lesdi konne'en,
on ɗon naywa nder lesdi njananndi?
11On ɗon coɓa bee maayɓe
on limaaɓe caka maayɓe?
12Ngam on ngudini seeɓoore hikma.
13To on tokkino laawol Allah
on njooɗotono jam.
14Ekkite toy neɗɗo heɓata hikma, semmbe, hakkiilo
haa anndon boo haa juutal balɗe
e haa yeeso seyiiŋgo e jam ngoni.
Hikma jokkataake
15Moy heɓti haa Hikma woni?
Moy nasti nder ndesaaje maaka?
16Toy laamiiɓe ummaatooje?
Toy eltooɓe dabbaaji ladde?
17Toy fijirooɓe colli?
Toy sigooɓe cardi e kaŋŋeeri ɓe risku maɓɓe jinnataa,
ɓe ɓiɓɓe Aadama kooli?
18Toy tappuɓe ceede bee tiinaare e suklanooɓe ɗe
ammaa diidi kuuɗe maɓɓe ngalaa?
19Ɓe majji, ɓe maayi,
ɓe ndilli joonde maayɓe,
yimɓe feere ummi pellel maɓɓe.
20Yimɓe ɓurɓe ɓe nderkaaku ndanyaama,
ɓe njooɗi nder duniyaaru
ammaa ɓe anndaa laawol jahranŋgol haa Hikma,
21ɓe paamaay laabi maaka,
ɓe kakkilanaay Hikma sam.
Ɓikkoy maɓɓe tokkaaki laawol
ngol baabiraaɓe maɓɓe tokkino.
22Ɓe meeɗaay nango Hikma haa Kanaana,
ɓe meeɗaay laargo ka haa Teman.
23Koo danygol Hagara
tefŋgol ka nder duniyaaru,
filooɓe Mediyan e Teman,
taalooɓe e hikma'en
anndaa laawol Hikma,
ɓe ciftoraay laabi maaka.
24Yaa Isra'iila!
Fakat duniyaaru e asama, suudu Allah mawndu,
maral maako
25maŋngal, ngal walaa keerol, towŋgal
haa ɓe mbaawataa foondugo ngal.
26Haa ton maapinndi'en ndanyaama,
yimɓe tedduɓe ɓooyma,
marɓe darnde e honooɓe suusɓe.
27Ammaa naa kamɓe Allah suɓi,
o tinndinaay ɓe laawol Hikma.
28Ɓe maayi daliila sooynde hakkiilo,
ɓe majji nder ginnaaku maɓɓe.
29Moy eeŋgi haa asamanji ngam hoocugo Hikma
e jippingo ka diga duule?
30Moy eeri mbeela ngam ɗaɓɓitoygo ka
e soodi ka bee coggu kaŋŋeeri?
31Walaa goɗɗo anndi laawol maaka,
walaa goɗɗo hakkilani laawol maaka.
Hikma, caahu Allah ngam Isra'iila
32Ammaa annduɗo kuuje fuu anndi Hikma.
Daliila hakkiilo maako, o tawi ka.
o taaskitini duniyaaru diga foroy
o jo'ini dabbaaji nder maaru.
33O neldi annoora, ka dilli,
o ewni ka fahin, ka ɗowtani mo bee kulol.
34Koode njalbiti haa pelle maaje bee seyo.
35Allah ewni ɗe, ɗe njaabi: “Min ɗon”
Horre fuu ɗon jalbita bee seyo
ngam Tagɗo nde.
36Tagoowo oo, ɗum Allah meeɗen,
walaa potanɗo bee maako.
37O heɓti laawol jahranŋgol haa Hikma fuu,
o holli ngol ummaatoore Yaakubu, jaggiiɗo maako,
ummaatoore Isra'iila, giɗaaɗo maako.
38Diga yaake maajum, ɓe ɗon ndaara ka,
ka ɗon jooɗo boo caka ɓiɓɓe Aadama.
Currently Selected:
Baruk 3: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.