2 Makabe 7
7
Deerɗiraaɓe njoweeɗiɗo e daada mum'en mbaraama daliila nuɗɗinki mum'en
1Woodi wakkati feere deerɗiraaɓe njoweeɗiɗo e daada mum'en naŋngaama. Laamiiɗo yiɗno doolgo ɓe, ɓe nyaama kusel gaduuru ngel Tawreeta Allah haɗi. Ngam maajum o umri ɓe ɓocca ɓe bee ngabbuwol nagge. 2Gooto caka maɓɓe wolwi dow innde luttuɓe, o wi'i laamiiɗo: “Ɗume ngiɗɗa ƴamgo malla heɓgo haa amin bee waɗgo min bana nii? Faam, ndikkana min maaygo dow luutgo umrooje kaakiraaɓe amin.”
3Laamiiɗo ɓerni ɓernuki caatuki, o umri ɓe njo'ina goŋgoŋji haa yiite. 4Nde ɗi nguli, o umri ɓe ta'a ɗemŋgal bolwuɗo bee innde luttuɓe go. O umri boo ɓe ɓola laral hoore maako, ɓe ta'a mo kosɗe e juuɗe yeeso deerɗiraaɓe maako e daada maako. 5Nde ɓe ngudditi mo, laamiiɗo umri ɓe ɓaditina mo yiite, ɓe cakkina mo o geeto nder maage. Nde kacceeŋga kusel maako saŋkiti haa taarde jamɗe gonɗe dow yiite, deerɗiiko'en luttuɓe e daada maako caatini ɓerɗe muuɗum'en bee maaygo nder cuusal. Ɓe ɗon mbi'a: 6“Jawmiraawo, Allah amin ɗon yi'a min, o ɗon yurmina min. Ngam Muusa wi'i nder yimre nde o aybini jama'aare maako: Jawmiraawo enɗan jagganiiɓe mo.”
7Nde arano deerɗiraaɓe go maayi bana nii, ɓe ngaddi ɗiɗaɓo haa ɓe torra ɗum kanyum boo. Ɓaawo ɓe ɗoofi ngaasa maako bee laral gumbal hoore fuu, ɓe ƴami mo: “Noy kadi, a nyaaman kusel gaduuru ndu na malla min campite pete-pete?” 8O jaabi bee wolde kaakiraaɓe maako: “Aa'a, mi nyaamataa”. Ngam maajum ɓe njarni mo bone bana arano go. 9Saa'i o ɓadi maayugo, o wi'i laamiiɗo: “Mbaroowo ko'e! A ɗon itta ngeendam amin jontaajam. Ammaa Laamiiɗo duniyaaru yeeɗitinan min ngam ngeendam kesam, nduumiiɗam, ngam min ɗon maaya daliila min ɗowtani umrooje maako.”
10Ɓaawo maako, ɓe njarni tataɓo bone bana ɓeya. Nde ɓe umri mo o wurtina ɗemŋgal maako, o wurtini ngal law, nden o forti juuɗe maako, o diwnaay sam. 11O wi'i bee semmbe: “Ɗum Allah mo asama hokki yam terɗe ɗe'e. Nde mi ɗon ɗowtano umrooje maako, mi yerdi ɗe ta'e, ngam mi mari tammunde mawnde, o hokkitittam ɗe”. 12Laamiiɗo bee hoore muuɗum e taariiɓe ɗum kayɗini daliila cuusal derkeejo oo mo faalaay boneeji ɗi o ɗonno yara.
13Nde o maayi, ɓe njarni nayaɓo bone bana ɓeya boo. 14Nde o ɓadake maaygo, o wi'i laamiiɗo: “Ɗum booɗɗum margo tammunde to ɗum yimɓe mbari ma! Allah tammi ummitingo min ɓaawo maayde! Ammaa an, walaa ummitineeki, walaa ngeendam kesam ngam ma.”
15Ɓaawoɗon ɓe ngaddi njowaɓo haa ɓe torra mo kanyum boo. 16O suti laamiiɗo, o wi'i: “A mari baawɗe waɗgo ko ngiɗɗa fuu dow yimɓe, koo to an boo a maayoowo bana maɓɓe. Ammaa taa num Allah wudini jama'aare amin! 17A tammi laargo baawɗe maako mawɗe, o torran on an e ruutu ma.”
18Nden njoweegoojo boo yotti. Hiddeko o maaya, o wi'i laamiiɗo: “A ɗon sakla hoore ma meere! To min ɗon njara bone bana nii, ɗum minin toonyi, ngam jama'aare amin waɗi hakke dow Allah. Kanjum waɗi sarruuji mawɗi ɗi ukkani min. 19Ammaa taa num a jooɗoto bilaa kiita, an tuurtanɗo Allah bee hoore mum!”
20Daada maɓɓe o darjiɗinaaɗo masin, haani ciftoren mo. Nder nyalaade woore, o laari no ɓe mbardi ɓikkoy maako njoweeɗiɗo. Bee man fuu, o ɗon munyi, o ŋati nyii'e maako ngam o hooli Allah. 21Bee semmbe, o suusɗini ɓikkoy maako fuu bee wolde kaakiraaɓe maɓɓe. Bolle ɗe o wolwani ɓe ɗon kolla enɗam debbo e cuusal gorko. O wi'i ɓe: 22“Mi anndaa noy ngeendam mon fuɗɗiri nder reedu am. Naa min waatani on poofɗe ngeendam, naa min njo'ini terɗe ɓanndu mon. 23Tagɗo duniyaaru woni fuɗɗam koo ɗume fuu, kaŋko tagi ɓiɓɓe Aadama nder reedu daada maɓɓe. Fakat, o yurminan on, o hokkitan on yoŋki mon, ngam on njaɓi maaygo jonta, daliila ngam on ɗowtani umrooje maako.”
24Laamiiɗo Antiyokus tammino o ɗon janca mo, boliiɗe ɗe debbo oo wolwi laati bana kuudi. Ngam maajum laamiiɗo tefi haa waylita hakkiilo gaajiijo debbo go, bee boliiɗe e kunayeeje: O huni riskingo mo, hokkugo mo hayru ngam o laato “soobaajo laamiiɗo”, o halfinan mo ardaaŋgal haa yolnde, to o acci al'aadaaji kaakiraaɓe maako. 25Ammaa derkeejo oo faalaay ko laamiiɗo wi'i. Nden laamiiɗo ɓaditini daada maako ngam o sarwa ɓiyiiko ngam taa saa'a kisndam daɗa mo. 26O tokki wolwango daada derkeejo go haa duuri, nden o jaɓi wolwango ɓiyiiko. 27Daada ɓaditi ɓiyum, faamtini mo bee wolde kaakiraaɓe mum no laamiiɗo halliri, o wi'i mo: “Ɓiŋngel am, yurminam, siftor mi roondi ma nder reedu am lebbi joweenay, a musini kosam am duuɓi tati. Mi hakkilani ma, mi nyaamni ma, mi mawnini ma haa wargo hannde. 28Mi tori ma ɓiŋngel am, laar asama e lesdi, laar ko woni haa maajum. Annditit Allah waɗi ɗum diga ɗum walaa, non o tagri ɓiɓɓe Aadama. 29Taa hul mbaroowo oo, ammaa yerda maaygo bee cuusal bana deerɗa'en. Mi heɓtete bee deerɗa'en fuu saa'i to Allah waɗi mbooɗeeŋga mum.”
30Nde o timmini wolwugo, derkeejo go wi'i bee semmbe: “Ko ndeenoton fahin, onon boo? Mi ɗowtantaako umroore laamiiɗo, ammaa mi ɗowtanto umrooje Tawreeta ka Allah hokki kaakiraaɓe amin bee juuɗe Muusa. 31An laamiiɗo Antiyokus, jarnuɗo jama'aare amin bone, a daɗataa kiita Allah! 32Minin kam, min ngaɗi hakke, kanjum waɗi min ɗon njara bone jonta. 33Jawmiraawo amin, Allah geeto, tikkani min seɗɗa, ngam o elta min e o jaŋngina min ko haani. Ɓaawoɗon, o narritan bee amin, jagganiiɓe mo. 34Ammaa an, konneejo Jawmiraawo, ɓurduɗo nyiddugo haa tagle fuu, taa mawnita. An ɓaŋgtuɗo juŋngo ma dow ɓiɓɓe Allah, taa tamma a heɓan de'eende! 35Ngam Allah baawɗo ɗon laara koo ɗume fuu, a daɗataa kiita maako. 36Deerɗam'en, ɓaawo ɓe ngiidi bee bone wakkati seɗɗa, ɓe mbaraama ngam ɗowtaare maɓɓe heedi alkawal Allah, ngeendam nduumiiɗam ɗon reeni ɓe. Ammaa an, Allah hiitete e o torrete deydey mawnitaare ma. 37Bana deerɗam'en, min boo mi ɗon taaski hokkugo ɓanndu e yoŋki am daliila umrooje kaakiraaɓe am. Mi ɗon toro Allah o yurmina jama'aare amin. An boo o yarne bone, o jarribe ngam haa keɓta kaŋko tan woni Allah. 38Min laato min bee deerɗam'en, ragare'en yargo bone ngam tikkere Allah Baawɗo ukki dow jama'aare amin fodde adilaaku mum.”
39Haala ka'a mettini laamiiɗo jamum. O tuurti, o torri derkeejo oo ko ɓuri dow no o torruno ɓeya. 40Derkeejo oo tabiti nder adilaaku mum, o hooli Jawmiraawo haa yotti maayde. 41Haa ragare boo, ɓe mbari daada ɓaawo ɓiyum'en.
42Ndaa ko mbolwumi ko ɗuuɗɗi dow nyaamduuji karminaaɗi e dow torraaji ɗi tammaaki waɗeego.
Currently Selected:
2 Makabe 7: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.
2 Makabe 7
7
Deerɗiraaɓe njoweeɗiɗo e daada mum'en mbaraama daliila nuɗɗinki mum'en
1Woodi wakkati feere deerɗiraaɓe njoweeɗiɗo e daada mum'en naŋngaama. Laamiiɗo yiɗno doolgo ɓe, ɓe nyaama kusel gaduuru ngel Tawreeta Allah haɗi. Ngam maajum o umri ɓe ɓocca ɓe bee ngabbuwol nagge. 2Gooto caka maɓɓe wolwi dow innde luttuɓe, o wi'i laamiiɗo: “Ɗume ngiɗɗa ƴamgo malla heɓgo haa amin bee waɗgo min bana nii? Faam, ndikkana min maaygo dow luutgo umrooje kaakiraaɓe amin.”
3Laamiiɗo ɓerni ɓernuki caatuki, o umri ɓe njo'ina goŋgoŋji haa yiite. 4Nde ɗi nguli, o umri ɓe ta'a ɗemŋgal bolwuɗo bee innde luttuɓe go. O umri boo ɓe ɓola laral hoore maako, ɓe ta'a mo kosɗe e juuɗe yeeso deerɗiraaɓe maako e daada maako. 5Nde ɓe ngudditi mo, laamiiɗo umri ɓe ɓaditina mo yiite, ɓe cakkina mo o geeto nder maage. Nde kacceeŋga kusel maako saŋkiti haa taarde jamɗe gonɗe dow yiite, deerɗiiko'en luttuɓe e daada maako caatini ɓerɗe muuɗum'en bee maaygo nder cuusal. Ɓe ɗon mbi'a: 6“Jawmiraawo, Allah amin ɗon yi'a min, o ɗon yurmina min. Ngam Muusa wi'i nder yimre nde o aybini jama'aare maako: Jawmiraawo enɗan jagganiiɓe mo.”
7Nde arano deerɗiraaɓe go maayi bana nii, ɓe ngaddi ɗiɗaɓo haa ɓe torra ɗum kanyum boo. Ɓaawo ɓe ɗoofi ngaasa maako bee laral gumbal hoore fuu, ɓe ƴami mo: “Noy kadi, a nyaaman kusel gaduuru ndu na malla min campite pete-pete?” 8O jaabi bee wolde kaakiraaɓe maako: “Aa'a, mi nyaamataa”. Ngam maajum ɓe njarni mo bone bana arano go. 9Saa'i o ɓadi maayugo, o wi'i laamiiɗo: “Mbaroowo ko'e! A ɗon itta ngeendam amin jontaajam. Ammaa Laamiiɗo duniyaaru yeeɗitinan min ngam ngeendam kesam, nduumiiɗam, ngam min ɗon maaya daliila min ɗowtani umrooje maako.”
10Ɓaawo maako, ɓe njarni tataɓo bone bana ɓeya. Nde ɓe umri mo o wurtina ɗemŋgal maako, o wurtini ngal law, nden o forti juuɗe maako, o diwnaay sam. 11O wi'i bee semmbe: “Ɗum Allah mo asama hokki yam terɗe ɗe'e. Nde mi ɗon ɗowtano umrooje maako, mi yerdi ɗe ta'e, ngam mi mari tammunde mawnde, o hokkitittam ɗe”. 12Laamiiɗo bee hoore muuɗum e taariiɓe ɗum kayɗini daliila cuusal derkeejo oo mo faalaay boneeji ɗi o ɗonno yara.
13Nde o maayi, ɓe njarni nayaɓo bone bana ɓeya boo. 14Nde o ɓadake maaygo, o wi'i laamiiɗo: “Ɗum booɗɗum margo tammunde to ɗum yimɓe mbari ma! Allah tammi ummitingo min ɓaawo maayde! Ammaa an, walaa ummitineeki, walaa ngeendam kesam ngam ma.”
15Ɓaawoɗon ɓe ngaddi njowaɓo haa ɓe torra mo kanyum boo. 16O suti laamiiɗo, o wi'i: “A mari baawɗe waɗgo ko ngiɗɗa fuu dow yimɓe, koo to an boo a maayoowo bana maɓɓe. Ammaa taa num Allah wudini jama'aare amin! 17A tammi laargo baawɗe maako mawɗe, o torran on an e ruutu ma.”
18Nden njoweegoojo boo yotti. Hiddeko o maaya, o wi'i laamiiɗo: “A ɗon sakla hoore ma meere! To min ɗon njara bone bana nii, ɗum minin toonyi, ngam jama'aare amin waɗi hakke dow Allah. Kanjum waɗi sarruuji mawɗi ɗi ukkani min. 19Ammaa taa num a jooɗoto bilaa kiita, an tuurtanɗo Allah bee hoore mum!”
20Daada maɓɓe o darjiɗinaaɗo masin, haani ciftoren mo. Nder nyalaade woore, o laari no ɓe mbardi ɓikkoy maako njoweeɗiɗo. Bee man fuu, o ɗon munyi, o ŋati nyii'e maako ngam o hooli Allah. 21Bee semmbe, o suusɗini ɓikkoy maako fuu bee wolde kaakiraaɓe maɓɓe. Bolle ɗe o wolwani ɓe ɗon kolla enɗam debbo e cuusal gorko. O wi'i ɓe: 22“Mi anndaa noy ngeendam mon fuɗɗiri nder reedu am. Naa min waatani on poofɗe ngeendam, naa min njo'ini terɗe ɓanndu mon. 23Tagɗo duniyaaru woni fuɗɗam koo ɗume fuu, kaŋko tagi ɓiɓɓe Aadama nder reedu daada maɓɓe. Fakat, o yurminan on, o hokkitan on yoŋki mon, ngam on njaɓi maaygo jonta, daliila ngam on ɗowtani umrooje maako.”
24Laamiiɗo Antiyokus tammino o ɗon janca mo, boliiɗe ɗe debbo oo wolwi laati bana kuudi. Ngam maajum laamiiɗo tefi haa waylita hakkiilo gaajiijo debbo go, bee boliiɗe e kunayeeje: O huni riskingo mo, hokkugo mo hayru ngam o laato “soobaajo laamiiɗo”, o halfinan mo ardaaŋgal haa yolnde, to o acci al'aadaaji kaakiraaɓe maako. 25Ammaa derkeejo oo faalaay ko laamiiɗo wi'i. Nden laamiiɗo ɓaditini daada maako ngam o sarwa ɓiyiiko ngam taa saa'a kisndam daɗa mo. 26O tokki wolwango daada derkeejo go haa duuri, nden o jaɓi wolwango ɓiyiiko. 27Daada ɓaditi ɓiyum, faamtini mo bee wolde kaakiraaɓe mum no laamiiɗo halliri, o wi'i mo: “Ɓiŋngel am, yurminam, siftor mi roondi ma nder reedu am lebbi joweenay, a musini kosam am duuɓi tati. Mi hakkilani ma, mi nyaamni ma, mi mawnini ma haa wargo hannde. 28Mi tori ma ɓiŋngel am, laar asama e lesdi, laar ko woni haa maajum. Annditit Allah waɗi ɗum diga ɗum walaa, non o tagri ɓiɓɓe Aadama. 29Taa hul mbaroowo oo, ammaa yerda maaygo bee cuusal bana deerɗa'en. Mi heɓtete bee deerɗa'en fuu saa'i to Allah waɗi mbooɗeeŋga mum.”
30Nde o timmini wolwugo, derkeejo go wi'i bee semmbe: “Ko ndeenoton fahin, onon boo? Mi ɗowtantaako umroore laamiiɗo, ammaa mi ɗowtanto umrooje Tawreeta ka Allah hokki kaakiraaɓe amin bee juuɗe Muusa. 31An laamiiɗo Antiyokus, jarnuɗo jama'aare amin bone, a daɗataa kiita Allah! 32Minin kam, min ngaɗi hakke, kanjum waɗi min ɗon njara bone jonta. 33Jawmiraawo amin, Allah geeto, tikkani min seɗɗa, ngam o elta min e o jaŋngina min ko haani. Ɓaawoɗon, o narritan bee amin, jagganiiɓe mo. 34Ammaa an, konneejo Jawmiraawo, ɓurduɗo nyiddugo haa tagle fuu, taa mawnita. An ɓaŋgtuɗo juŋngo ma dow ɓiɓɓe Allah, taa tamma a heɓan de'eende! 35Ngam Allah baawɗo ɗon laara koo ɗume fuu, a daɗataa kiita maako. 36Deerɗam'en, ɓaawo ɓe ngiidi bee bone wakkati seɗɗa, ɓe mbaraama ngam ɗowtaare maɓɓe heedi alkawal Allah, ngeendam nduumiiɗam ɗon reeni ɓe. Ammaa an, Allah hiitete e o torrete deydey mawnitaare ma. 37Bana deerɗam'en, min boo mi ɗon taaski hokkugo ɓanndu e yoŋki am daliila umrooje kaakiraaɓe am. Mi ɗon toro Allah o yurmina jama'aare amin. An boo o yarne bone, o jarribe ngam haa keɓta kaŋko tan woni Allah. 38Min laato min bee deerɗam'en, ragare'en yargo bone ngam tikkere Allah Baawɗo ukki dow jama'aare amin fodde adilaaku mum.”
39Haala ka'a mettini laamiiɗo jamum. O tuurti, o torri derkeejo oo ko ɓuri dow no o torruno ɓeya. 40Derkeejo oo tabiti nder adilaaku mum, o hooli Jawmiraawo haa yotti maayde. 41Haa ragare boo, ɓe mbari daada ɓaawo ɓiyum'en.
42Ndaa ko mbolwumi ko ɗuuɗɗi dow nyaamduuji karminaaɗi e dow torraaji ɗi tammaaki waɗeego.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.