2 Makabe 15
15
Nikanor sali ɗowtanaago nyannde siwtorde
1Nikanor nani Yahuuda e yimɓe mum ɗonno haa lesdi Samariya. O taaski hippaago ɓe nyalaade siwtorde bee tammaago o hisan fitineego. 2Yahuudu'en ɓe o dooli ɓe tokko sooje'en maako, mbi'i mo: “Taa war ɓe bee halleende! Neɗɗin nyalaade siwtorde nde Allah hormini e nde o seni caka nyalaaɗe! Taa yejjitit boo, Allah ɗon yi'a koo ɗume fuu!” 3Ammaa mbaroowo ko'e oo ƴami: “Woodi haa asama laamiiɗo umruɗo ɓe ngaɗa siwtorde na?” 4Yahuudu'en njaabi mo: “Ooho, Jawmu asama ɗum Jawmiraawo geeto, kaŋko umri bee hoore mum, yimɓe neɗɗina nyalaade joweeɗiɗaɓre.” 5Nikanor jaabi: “Min boo, mi laamiiɗo haa lesdi, mi umri on kooca balmi, on kuuwa kuugal bana laamiiɗo yiɗi.” Ammaa o waawaay humtugo anniya maako kalluka.
Yahuuda suusɗini yimɓe mum
6Nikanor, keewɗo mawnitaare, ɗonno fantina manti bee wi'go, o darnan lawru jaalorgal bee balmi Yahuuda e yimɓe mum. 7Ammaa Yahuuda Makabe ɗon bee hoolaare mawnde. O anndi fakat, Jawmiraawo waddanan mo walliinde. 8Kanjum waɗi o suusɗini yimɓe maako taa ɓe kultora kippol heefeerɓe. Sey ɓe ciftora haa ko saali, no Allah hisniri ɓe, ɓe tabitina tammunde maɓɓe, jonta boo Allah Baawɗo hokkan ɓe jaalorgal. 9Yahuuda semmbiɗini ɓe bee jaŋngugo nder deftere Tawreeta e annabi'en, o siftinori ɓe konuuji caaliiɗi ɗi ɓe ngaɗi e ɗi ɓe njaali, nii non o semmbiɗini cuusal maɓɓe. 10Nde o suusɗini ɓe, o timmitini bee waŋgingo sooynde amaana heefeerɓe ɓe'e ɓe kiɓɓintaa iinaaji maɓɓe. 11Bana nii Yahuuda jogni koo moy fuu balmol naa ngol sulke hokkata, ammaa ngol wolde gooŋgaare hokkata. Nden o limtani ɓe koyɗol gooŋgaawol, bee maagol o seynirta ɓe fuu. 12Ndaa ko Yahuuda yi'i e maagol: O yi'no Oniyas limanjo mawɗo, goɗɗo mo kuuɗe booɗɗe, giɗaaɗo yimɓe, jaŋkinaaɗo, marɗo boliiɗe keewɗe hikma, ekkitiiɗo diga nderkaaku mum gooŋga e adilaaku. Oniyas ɓaŋgti juuɗe mum, torani jama'aare Yahuudu'en fuu. 13Ɓaawoɗon, Yahuuda yi'i nder koyɗol ngo'ol fahin, goɗɗo tedduɗo marɗo gaasa ndaneeha, mayganaajo marɗo sumsum. 14Oniyas wi'i: “Ndaa Yeremiya, annabiijo Allah, giɗɗo en, enen deerɗiiko'en, o ɗon toro ɗuuɗɗum ngam jama'aare men non boo ngam Urusaliima wuro seniiŋgo.” 15Nden bee juŋngo maako nyaamo, Yeremiya lii'ani Yahuuda kaafahi kaŋŋeeri. O wi'i mo yaake o hokki mo ki: 16“Kaafahi ceniiki ki'i, ɗum caahu ngu Allah waɗani ma, hoocu ki, bee maaki a sampitan konne'en ma fuu.”
Jaaleeki e maayde Nikanor
17Boliiɗe Yahuuda belɗe ke'i semmbiɗingo sooje'en maako, ke'i suusɗingo ɓe e ke'i boo wartirgo derke'en worɗuɓe bana mawɓe. Urusaliima, diina e haykaliiru ɗonno yeeso joote. Ngam daliila man Yahuudu'en fuu ndawri, taa ɓe ngaɗa saŋngeere ammaa ɓe kippoya konne'en tan e ɓe nasta haɓre bee semmbe maɓɓe fuu. 18Ko ɓillata ɓe seɗɗa ɗum haala rewɓe maɓɓe e ɓikkoy maɓɓe, deerɗiraaɓe maɓɓe e saaro'en maɓɓe. Ɓurna fuu ɗum haala haykaliiru seniindu. 19Luttuɓe haa Urusaliima kultori jamum e ɓe ndiwni to ɓe numi dow konu tammiiŋgu waɗgo haa ladde. 20Ɓe fuu ɓe ɗon ndeena wakkati ɓadiiɗum tukus. Konne'en ndari, taaski ndeena haɓre. Nyiibi njahraama haa babe konu ɓoociiɗe, pucci boo ndarino haa bakeeje ɗiɗi fuu. 21Yahuuda Makabe laari mooɓre konne'en bee balmi feere-feere e nyiibi kulnooji. Nden o ɓaŋgti juuɗe haa asama, o tori Jawmiraawo baawanɗo waɗgo kaayeefiiji. Yahuuda anndi fakat, jaalaago kam laaranaay semmbe balmi, ammaa ko Allah hoddiri, ngam kaŋko hokkata jaalorgal haa ɓen ngal haanani. 22Yahuuda tori bana nii: “Yaa Jawmiraawo, yaake Ezekiyas ɗonno laamani Yahudiya, an neli malaa'ikaajo ma, o mbari sooje'en ujine teemerre e cappanɗe njoweetato e njowo caka sooje'en Sennakerib. 23Jonta boo, Jawmu asama, neldan min malaa'ikaajo booɗɗo, o ardo min, o hulna jabbi konne'en amin. 24Huuwtinir baawɗe ma, faɗɗu huɗooɓe ma e warɓe toonyaago jama'aare ma seniinde.” Bee boliiɗe ɗe'e, Yahuuda timmini do'a mum.
25Mooɓe Nikanor ɗonno ngara bee bawɗi e algaytaaji, bee gimi ɗi konu. 26Gal wakeere maɓɓe, Yahuuda e yimɓe mum tiiti konne'en bee toraago Allah ngam o walla ɓe. 27Ɓe ɗon kaɓa bee juuɗe maɓɓe e ɓe ɗon toro Allah bee ɓerɗe maɓɓe. Ɓe mbari sooje'en ko waɗata ujine cappanɗe tato e njowo. Baŋguki baawɗe Allah seyni ɓe masin.
28Nde konu timmi, Yahuudu'en ceyi masin. Nde ɓe ɗon ngurto pellel konu go, ɓe tawi Nikanor maayi, balmi maako fuu ɗon kommbi maako. 29Ɗum waɗi hooloore e ciikaali! Ɓe fuu, ɓe ngetti Allah, koo moy fuu bee wolde kaakiraaɓe mum. 30Yahuuda aartuɗo hokkugo ɓanndu e yoŋki mum ngam yimɓe wuro mum diga nderkaaku mum, accaay yiɗgo jama'aare mum. O umri ɓe ta'a hoore Nikanor e juŋngo maako nyaamo, ɓe njahra ɗum haa Urusaliima. 31kaŋko bee hoore maako o yehi ton, o mooɓti yimɓe fuu haa haykaliiru, o jo'ini liman'en yeeso hirsirde. Nden o neli ɓe tefa sooje'en wonɓe nder suudu semmbiɗndu. 32O holli ɓe hoore Nikanor kalluɗo e juŋngo ngo o forti bee mawnitaare nde o huɗi Allah e haykaliiru mum seniindu. 33O umri fahin, ɓe ta'a ɗemŋgal kalluɗo oo, ɓe campita ngal pete pete haa colli. O ɓili juŋngo Nikanor yeeso haykaliiru ngam hollugo haa toy nginnaaku yahrata. 34Nden wonɓe ton fuu, tijji asama, ɓe ngetti Jawmiraawo tedduɗo bee wi'go: “Yettoore woodani kisnuɗo haykaliiru mum bee laɓɓingo ndu.” 35Yahuuda ɓili hoore Nikanor haa mahol suudu semmbiɗndu go ngam hollugo hujja laaɓka dow walliinde nde Jawmiraawo walliri jama'aare mum.
36Kawtal dawri, suɓi hawtaade nyalaade nde'e taa nde yejjite haa foroy. Ɓe ciftora nde hitaande fuu, nyalaade dala-berniwol nde Mardokay, waato nyalde sappo e tataɓre lewru wi'eteendu Adar bee aramiyaare.
Maandorɗe ragareeje ɗe binnduɗo deftere nde'e
37Ndaa ko waɗi Nikanor haa timmoode balɗe mum. Diga nden, wuro Urusaliima ɗon haa juuɗe Yahuudu'en, ngam maajum mi ɗon darna taariha am haa ɗo. 38To ka winndaama booɗɗum e ka weli, nden mi yottake haa marmi haaje e to ka welaa e ka walaa batte boo, mi waɗi deydey ko mbaawmi. 39Ammaa, bana en anndi, ɗum wooɗaay yargo inaboojam nyaaɗɗam malla boo yargo ndiyam tan. Ammaa jillindirgo inaboojam bee ndiyam laatan njaram mbelɗam. Bana non boo, waawgo winndugo taariha, ɗon welana nanooɓe e jaŋngooɓe ka. Bee bolle ɗe'e mi timmini.
Currently Selected:
2 Makabe 15: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.