Awit nin mga Awit 1
1
1Iyo ini an pinakamagayon sa mga awit ni Solomon.#1:1 ni Solomon; o ipinanongod ki Solomon, o dapit ki Solomon.
An Enot na Awit
An Babae
2Kinakarigos mo ako kan saimong mga hadok;
orog pa sa arak an saimong pagkamoot.
3Igwa ka nin hamot na nalalaen nanggad;
an saimong ngaran nagpapagiromdom kaiyan.
Kaya namomotan ka kan mga babae.
4Ibahan ako, asin madulag kita;
ika an sakong magigin hade asin daraha ako sa saimong kwarto.
Magigin maogma kitang duwa,
mainom nin dakul, asin mag-oogma sa satong pagkamoot.
Kaya bakong makangangalas na namomotan ka kan gabos na babae!
5Mga babae nin Jerusalem, maitom ako alagad magayon,
maitom siring sa mga tolda sa desyerto nin Kedar,
alagad magayon arog sa mga kurtina sa palasyo ni Solomon.
6Dai nindo ako pagmenoson huli ta ako maitom,
huli ta pinaitom ako kan saldang nin aldaw.
Naanggot sako an sakong mga tugang na lalaki
asin pinatrabaho ako sa ubasan.
Mayo na ako nin panahon para sa sadiri ko.
7Sabihi ako, sakong namomotan,
saen na pasabsaban mo dadarahon an saimong mga hayop?
Saen mo sinda papahingaloon sa kainitan nin aldaw?
Tadaw ta kaipuhan hanapon taka
sa kaibahan kan ibang pastor sa tahaw kan mga hayop?#1:7 Probableng teksto Tadaw…hayop; sa Hebreyo, bako ining malinaw.
An Lalaki
8Kun dai mo aram an lugar, pinakamagayon sa mga babae,
lakaw asin sunoda an gira kan mga hayop;
maghanap ka nin masasabsaban para sa saimong mga kanding
harani sa mga tolda kan mga pastor.
9Nadadagka mo an mga lalaki siring na nadadagka
kan babaeng kabayo an mga lalaking kabayo kan mga karwahe ni Faraon.
10Magayon an saimong buhok sa ibabaw kan saimong pisngi,
asin minalaylay sa saimong liog arog sa mga samno.
11Alagad gigibohan mi ika nin kulintas na bulawan,
na natatampokan nin plata.
An Babae
12Mantang naghihigda an sakong hade sa saiyang higdaan,
napano kan sakong pahamot an palibot.
13Parong nin mira an sakong namomotan,
mantang naghihigda siya sa sakong daghan.
14Siring sa mga burak sa kaomahan an sakong namomotan, na namumurak sa mga ubasan sa Engedi.
An Lalaki
15Magayon ka nin marahay, sakong namomotan;
sa pagkamoot, an saimong mga mata nagkikinang!
An Babae
16Gwapo ka nin marahay, sakong namomotan;
ika an sakong kaogmahan!
An berdeng mga doot iyo an satong magigin higdaan;
17an mga sedro iyo an magigin kahabaan kan satong harong,
asin an mga sipres an magigin kisame kaiyan.
Currently Selected:
Awit nin mga Awit 1: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
