Parahulit 12
12
1Kaya giromdoma nindo an saindong Kaglalang mantang hoben pa kamo, bago umabot an mga maraot na aldaw saka mga taon na masabi kamo, “Dai na ako naoogma sa buhay.” 2Sa panahon na iyan, an liwanag kan aldaw, kan bulan, saka kan mga bitoon magigin kadikloman para saindo, asin an mga maitom na panganoron dai mapapara. 3Dangan tatakigan an saindong mga takyag, na iyo an nag-ingat saindo; an saimong mga bitis na dating makokosog, magigin maluya. Magdidikit an saindong mga ngipon na pansapa nindo nin kakanon, asin an mga mata nindo madiklom saka dai makakamaan nin marahay. 4An saindong mga talinga magigin bongog sa ribok sa tinampo. Dai nindo madadangog nin marahay an tanog kan gilingan o an tono nin sarong awit; alagad magigimata kamo sa saindong pagkatorog maski huli kan awit nin sarong gamgam. 5Matatakot kamo sa halangkaw na mga lugar, asin magigin makatatakot saindo an paglakaw. Magigin puti an saindong buhok asin magigin dipisil saindo maski an paghiro-hiro; dangan mawawara an gabos nindong pagmawot.
Kita gabos maduman sa huring lugar na pahingaloan, dangan malibot sa mga tinampo an mga paramondo. 6Mapapatod an platang kadena, asin mahuhulog saka mapapasa an bulawan na ilawan; an pitsel nin tubig mapapasa asin an pisi sa bubon mapapatod. 7An satong hawak mabalik sa alpog kan daga, asin an hinangos nin buhay mabalik sa Dios, na iyo an nagtao kaiyan sato.
8Mayo nin halaga, an sabi kan Parahulit. An gabos mayo nin halaga.
Kabilogan na Paliwanag
9Nin huli ta madonong an Parahulit, padagos niyang tinukdoan an mga tawo kan naaaraman niya. Nag-adal siya nin mga talinhaga asin binalo niya nin marahay an katotoohan kan mga iyan. 10An Parahulit naghingowang makakua nin nakakarangang mga tataramon asin an sinurat niya gabos katotoohan. 11An mga kasabihan nin mga madonong kabaing sa mga mapanas na sugkod na ginagamit kan mga pastor sa pag-alaw kan karnero, asin an mga tiniripon na talinhaga magdadanay arog sa mga pako na nakatadom nin marahay. Ini gabos itinao nin Dios, an iyo-iyong Pastor nyato gabos.
12Aki ko, igwa ka pang dapat na masabotan. Mayo nin kataposan an pagsurat nin mga libro, asin an sobrang pag-aadal nagdadara nin kapagalan sa hawak.
13Pakatapos kaini, saro na sana an dapat itaram: Matakot ka sa Dios, asin otobon mo an saiyang mga togon, huli ta iyo iyan an katongdan nin tawo. 14Huhukoman nin Dios an gabos nyatong gibo, marahay man o maraot, maski an mga bagay na ginibo sa hilom.
Currently Selected:
Parahulit 12: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
