Sirac 41
41
An Kagadanan
1Kagadanan! An paghorop-horop kaini mapait para sa tawong mayaman, na matoninong na namumuhay sa tahaw kan saiyang mga rogaring, ligtas sa mga kahandalan, asin maganang magkakan.
2Kagadanan! An saimong pag-abot sarong kaogmahan para sa sarong namumuhay sa kadukhaan, naghehelang, gurang na, nagagabatan nin mga kahandalan, buta, asin mayo nin paglaom.#41:2 Sa Hebreyo buta, asin mayo nin paglaom; sa Griyego rebelde asin mayong pakatios.
3Dai kamo matakot sa dekreto nin kagadanan. Giromdoma na nag-abot iyan sa mga naenot saindo asin maabot iyan sa mga tawong mamumundag pakatapos nindo. 4An Kagurangnan an nagboot kaiyan para sa lambang buhay na linalang. Siisay ka na maolang sa kamawotan kan Kahorohalangkawe? Sa kinaban kan mga gadan mayo nin magmamakulog kun nabuhay ka sa laog nin sampolo, sanggatos, o sangribong taon.
An Palad kan mga Maraot
5An kaakian kan mga parakasala, na pinadakula sa bakong diosnon na kapalibotan, nagigin makaoongis na mga tawo. 6Mawawara sa sainda an anoman na manahon ninda, asin mamumuhay na mayong onra an saindang kapagarakian. 7Babasolon kan kaakian an saindang bakong diosnon na magurang huli ta mayo sinda nin onra.
8Herak man saindo, kamong mga bakong diosnon na tawo, na nagtalikod sa Katogonan kan Kahorohalangkaweng Dios. 9Kun kamo mangaki, magkakagaradan sinda asin mayo nin mawawalat saindo kundi kamondoan. Magkakaigwa nin dakulang kaogmahan sa panahon na kamo masingkog,#41:9 Sa Hebreyo Kun kamo mangaki…masingkog; sa Griyego Ipinangaki kamo sa irarom nin sarong maldisyon. asin maski gadan na kamo, mamaldisyonon pa kamo. 10An ano man na hale sa alpog mabalik sa alpog; kaya an bakong diosnon na tawo naglalakaw sa maldisyon pasiring sa kapahamakan.
11Mayong halaga an hawak nin sarong tawo,#41:11 Sa Hebreyo Mayong…tawo; sa Griyego Ipinagmomondo an kagadanan kan hawak nin sarong tawo. alagad an marahay na dangog nagdadanay sagkod lamang. 12Ingati nindo an saindong dangog, huli ta magdadanay iyan ki sa sangribong dakulang sarayan nin bulawan. 13An sarong marahay na buhay igwang kasagkoran, alagad an marahay na dangog nagdadanay sagkod lamang.
An Dapat Ikasopog
14Mga aki ko, sunoda nindo an itinutukdo ko saindo asin mamuhay kamo sa katoninongan. An kadonongan na dai nahahayag nakakaagid sa kayamanan na itinago—an duwang ini mayo nin pakinabang. 15An sarong tawo na nagtatahob kan saiyang kalolongan mas marahay pa ki sa tawong nagtatago kan saiyang kadonongan.
16Mga aki ko, pagdangog kamo asin tutukdoan ko kamo kan mga sitwasyon na dapat masopog kamo.#41:16 Sa Hebreyo Mga aki ko…masopog kamo; sa Griyego Pahilingan an saindong paggalang sa itinataram ko. Huli ta bakong tama na masopog kamo sa gabos na panahon.
17Sa atubang kan saindong mga magurang masopog kamo kan gibong karigsokan.
Sa atubang nin sarong pamayo o sarong dakulang tawo
masopog kamo sa pagputik.
18Sa atubang nin sarong hukom masopog kamo sa paggibo nin krimen.
Sa atubang nin sarong katiriponan o banwaan
masopog kamo sa paglapas kan katogonan.
Sa atubang nin sarong katood
o kasosyo masopog kamo sa pandadaya.
19Sa atubang nin saindong mga kanatad
masopog kamo sa panghahabon.
Masopog kamo sa paglapas nin sarong panuga,#41:19 Sa Hebreyo sa paglapas nin sarong panuga; sa Griyego sa saindo man sana sa atubang kan katotoohan nin Dios.
sa pagbugtak kan saindong siko sa lamesa kun nagkakakan,
sa pagigin maimot kun hinahagadan nin anoman,
20sa dai pagsimbag kun kinokomusta, sa paghiling sa sarong maraot na babae,
21sa pagsayuma sa pakiolay nin sarong kadugo, sa pag-olang kan deretso nin sarong tawo, sa paghiling sa agom nin ibang lalaki,
22sa pagkakaigwa nin relasyon sa saiyang oripon na babae (likayan nindo an saiyang higdaan!) sa pag-insulto kan saindong mga katood, sa pagtuyaw pakatapos na magtao kamo nin mga regalo,
23asin sa pagpahayag nin mga sekreto.
Iyo ini an mga sitwasyon na dapat masopog kamo, asin gagalangan pa kamo kan mga tawo huli kaiyan.
Currently Selected:
Sirac 41: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.