Sirac 40
40
An Kasakitan sa Buhay nin Tawo
1An lambang tawo tinawan nin dakul na trabaho. Gabos kita igwa nin sarong magabat na pasan, magpoon na iluwas kita sa tulak nin satong ina sagkod sa aldaw na magbalik kita sa daga, an ina nyato gabos. 2Nariribong kita asin natatakot, nahahandal sa pag-abot kan aldaw nin satong kagadanan— 3-4kita gabos, magpoon sa hade na nakatukaw sa magayon niyang trono asin nakasulot nin panghadeng gubing saka nakokoronahan, sagkod sa pinakahababang tawo na nakagubing nin sako asin nabubuhay sa kadukhaan. 5Sa bilog tang buhay, minaabot sato an kaanggotan, pag-imon, kasakitan, kapurisawan, an takot sa kagadanan, asin mga pakipag-iwal. Maski sa panahon nin pagpahingalo, nag-iisip pa kita nin mga panibagong mga kasakitan sa satong pagkakatorog. 6Kadikit sanang pahingalo an napapasato. Kun nagkakatorog na kita, garo man sanang bako kitang torog, huli ta napupurisaw kita kan satong mga hona-hona. Kun nangangatorogan kita na nagdudulag sa satong kaiwal, 7bago kita madakop,#40:7 Probableng teksto madakop; sa Griyego makaligtas. nagigimata kita asin nakakaginhawa kun naaaraman tang mayo man palan kitang dapat na katakotan.
8Uya an kaipuhan atubangon kan gabos na linalang, tawo man o hayop, (alagad makapitong beses na maraot iyan para sa mga parakasala): 9kagadanan, kadahasan, pag-iriwal, panggadan, kapahamakan, gutom, helang, peste. 10Linalang an gabos na ini huli kan mga maraot; sinda an dahelan kan pagbaha. 11An gabos na naggikan sa daga nagbabalik sa daga, siring na an gabos na tubig minabulos pabalik sa dagat.
An mga Bunga kan Karatan
12An gabos na pagsuhol asin inhustisya mapapara, alagad an bunga kan kaimbodan magdadanay sagkod lamang. 13An kayamanan na nakua sa maraot na paagi nakakaagid sa sarong salog na nagsusupay an tubig kun makosog an uran, na 14nagdadara nin mga gapo sa pagbulos kaiyan, alagad madali sanang magmara.#40:14 An bersikulo 13-14 itrinadusir hale sa Hebreyo; sa Griyego, an bersikulo 14 bakong malinaw. 15An mga aki kan bakong diosnon na mga tawo dai magwawalat nin darakulang pamilya; nakakaagid sinda sa mga tinanom na naghihinguang makagamot sa gapo, 16arog sa bariw sa pangpang nin salog, na naalang#40:16 Sa Hebreyo naalang; sa Griyego ginabot. enot sa gabos na tinanom. 17An mga gibong herak asin pagkamoot nagdadanay arog sa panahon na mayong kataposan.#40:17 Sa Hebreyo An mga gibong…kataposan; sa Griyego An pagkaherak sarong benendisyonan na tatamnan, asin an pagkamoot nagdadanay sagkod lamang.
An mga Kaogmahan sa Buhay nin Tawo
18Paladan an tawong mayaman o an tawong igwa nin trabaho, alagad mas marahay pa sa duwang ini an tawong nakakua nin kayamanan.
19An ngaran nin sarong tawo pwedeng magdanay kun igwa siya nin mga aki o kun magpatindog siya nin syudad, alagad an agom na dai nakukuahan nin sala mas marahay pa ki sa duwang naenot. 20An arak saka an tugtog nakakapaogma sa puso, alagad an pagkamoot sa kadonongan mas marahay pa ki sa duwang naenot.
21An plawta saka an arpa nakakagibo nin marahay na tugtog, alagad mas marahay an magayon na tingog ki sa duwang naenot.
22An pinong hiro saka an gayon nakakawili sa panhiling, alagad bako nanggad arog iyan kan berdeng supang kan tinanom.
23Dai ka pwedeng masala sa kaibahan nin sarong marahay na katood o kanatad, alagad mas marahay pa sa duwang naenot an sarong babae sa kaibahan nin saiyang agom.
24An mga tugang na lalaki saka mga katabang marahay na magin kaiba sa panahon nin kasakitan, alagad an paglimos orog pang nakakatabang ki sa duwang naenot.
25An bulawan saka an plata nakakapapusog sa tindog nin sarong tawo, alagad an marahay na hatol mas marahay pa ki sa duwang naenot.
26An kayamanan saka an kosog nakakapapusog nin boot, alagad an pagkatakot sa Kagurangnan makakatao saimo nin mas orog na pusog nin boot. Kun may pagkatakot ka sa Kagurangnan dai mo na kaipuhan an ano pa man; iyan an bilog na tabang na saimong kaipuhan. 27An pagkatakot sa Kagurangnan nakakaagid sa sarong tatamnan nin bendisyon; dai ka na magmamawot nin orog pang mamuraway na pailihan.
An Pagpapalimos
28Aki ko, dai ka mamuhay na arog kan sa makilimos; mas marahay pang magadan ki sa makilimos. 29Kun magsasarig ka sa ibang tawo para sa saimong pagkakan, dai mo tinatawan nin dignidad an saimong buhay. Dinidigtaan mo an saimong sadiri huli sa pag-ako nin pagkakan hale sa ibang tawo. An sarong tawong intelihente asin natukdoan nin marahay naglilikay sa siring na bagay. 30An mayong sopog na tawo pwedeng magsabi na an pakilimos marahay, alagad sa saiyang isip, siya pinagsosolo.
Currently Selected:
Sirac 40: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.