Sirac 37
37
Bakong totoong mga Katood
1An siisay man pwedeng magsabing katood mo siya, alagad an nagkapira mga katood sa ngaran sana. 2An kamondoan na bunga kan pagkaraot nin marahay na pagkakatood orog pang makuri ki sa kagadanan. 3O maraot na imahinasyon, tano ta hinaman ka tanganing tahoban nin kadayaan an daga? 4An nagkapirang tawo magigin katood mo sagkod na marahay an dalagan kan gabos na bagay, alagad magigin kalaban mo sinda sa panahon nin kasakitan. 5An totoong#37:5 Sa Hebreyo totoong; sa Griyego mayo kan mga tataramon na ini. katood matabang saimo laban sa saimong mga kaiwal#37:5 Sa Hebreyo laban sa saimong mga kaiwal; sa Griyego naglalaom na makakakan. asin magigin kalasag mo siya sa atubang nin ralaban. 6Dai mo nanggad paglingawan an siring na katood sa saimong puso; hirasan mo siya kan bunga nin saimong kapangganahan.
Pag-iingat sa Pag-ako nin Hatol
7An siisay man pwedeng magtao nin hatol, alagad an nagkapira naggigibo kaiyan sa sadiri nindang karahayan. 8Magin maingat ka kun igwang magtao saimo nin hatol. Aramon mo ngona kun ano an saiyang makukua sa bagay na iyan, huli ta masisiguro mo na an sadiri niyang karahayan an nasa isip niya sana. Tibaad gamiton niya an saiyang kapangyarihan laban saimo. 9Tataraman ka niyang marahay an saimong gibo, dangan maharayo siya tanganing hilingon kun ano an mangyayari saimo.
10Dai ka magpahatol sa kiisay man na mayo nin pagsarig saimo, asin dai mo paghatolan an siisay man na nag-iimon saimo.
11Dai mo paghagadan nin hatol an sarong babae dapit sa saiyang karibal,
an sarong matalaw dapit sa gera,
an sarong negosyante dapit sa tarawadan,
an sarong parapabakal dapit sa pagpabakal,
an sarong maimot dapit sa pagpasalamat,
an sarong makuring tawo dapit sa pagkaherak,
an sarong hugakon dapit sa trabaho,
an sarong aldawan na trabahador dapit sa paghaman kan saiyang trabaho,
an sarong hugakon na oripon dapit sa masakit na trabaho.
Dai mo pagpahalagahan an ano man na hatol na pwede nindang itao.
12Alagad magsarig ka sa tawong relihiyoso saka midbid sa pag-otob kan mga kabotan nin Kagurangnan, an tawong may pagmakulog saimo, na namomondo kun ika naparaot. 13Magsarig ka man sa saimong paghukom; mayo na nin makakaorog pa sa sadiring hatol. 14Huli ta an kalag nin sarong tawo nugad iyo an nagtatao saiya nin mas marahay na impormasyon ki sa pitong bantay sa itaas nin halangkaw na tore. 15Alagad, orog sa gabos, mamibi ka sa Kahorohalangkawe tanganing ipahiling saimo an tama mong gibohon.
An Kadonongan asin an Pagsarig
16An pagpaplano saka pag-iisip nasa likod kan gabos na gibo. 17-18May apat na bagay na tinatawan nin panahon kan isip: marahay asin maraot, an buhay asin an kagadanan. An apat na ini nagpopoon sa isip,#37:17-18 Sa Hebreyo May apat na…sa isip; sa Griyego Igwa nin apat na bagay na nagpapahiling kan pagbabago kan puso: an marahay asin an maraot, an buhay asin an kagadanan. alagad danay sindang nasa kapangyarihan kan dila.
19An sarong tawo pwedeng igwa kan abilidad sa pagtukdo, alagad mayo ini nin halaga sa saiya man sana. 20Pwedeng tuso siya sa pagtaram, alagad gutom an saiyang aabotan huli ta kaoongisan siya kan mga tawo. 21Pwedeng mangyari an siring huli ta kulang siya nin kadonongan asin dai siya tinawan nin Kagurangnan kan pakamidbid kan tamang sasabihon sa tamang panahon. 22Pwedeng sabihon nin sarong tawo na madonong siya asin sabihon saimo na tinutubod niya an naaaraman niya. 23An siisay man na totoong madonong iyo an magigin paratukdo kan saiyang banwaan, asin pwede nindang sarigan an itinutukdo niya bilang katotoohan. 24Oomawon nin gabos an siring na tawo asin aapodon siyang mapalad. 25An buhay nin sarong tawo nabibilang huli sa mga aldaw, alagad an buhay nin Israel dai nanggad mabibilang huli sa mga aldaw. 26Makukua kan madonong na tawo an pagsarig kan saiyang banwaan, asin magigiromdoman ninda siya sagkod lamang.
An Pagpugol kan Gana sa Pagkakan
27Aki ko, mantang nabubuhay ka, pugolon mo an saimong gana sa pagkakan, asin dai mo pagkakanon an anoman na makakaraot saimo. 28Huli ta an gabos na pagkakan bakong marahay para sa gabos, asin an gabos na tawo dai nagugusto sa parehong klase nin pagkakan. 29Dai ka mag-isip na kaipuhan manamitan mo an gabos na klase nin pagkakan, asin dai ka magpakapaslo sa anoman na pagkakan. 30Huli ta an sobrang pagkakan nagdadara nin kahelangan; kun gibohon mo iyan sa gabos na panahon, danay kang magkakaigwa nin problema sa tulak. 31Dakul nang tawo an nagadan huli sa kapasloan. Likayan mo iyan asin mabubuhay ka nin halawig.
Currently Selected:
Sirac 37: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.