Sirac 36
36
Sarong Pamibi para sa Israel
1O Kagurangnan, Dios kan kinaban, hilinga kami asin kaheraki. 2Gibohang matakot saimo an gabos na nasyon. 3Unata an saimong kamot laban sa mga dayuhan na nasyon asin pahilingan sainda an saimong kosog. 4Ginamit mo kami tanganing ipahiling sainda kun gurano ka kabanal; ngunyan gamita sinda tanganing ikapahiling samo kun gurano ka kadakula. 5Tugoteng makanood sinda, siring na nakanood kami, na mayo nin ibang Dios, O Kagurangnan, kundi ika sana. 6Magtao ka nin mga bagong tanda, maggibo ka nin mga milagro; pahilingan samo an saimong mamuraway na kosog! 7-9Hidalia na an talaan na panahon na an gabos na tawo pwedeng magtaram dapit kan mga darakulang bagay na saimong ginigibo. Pabulosa an saimong maisog, nagkakalayong kaanggotan, asin dai ka magtada maski sarong buhay sa saimong mga kaiwal. Ronota an mga tawong nang-api sa saimong banwaan. 10Ronota an gabos na pamayo kan mga kaiwal na nag-iisip na sinda sana an mga tawo sa daga na igwang halaga! 11Tipona giraray an mga tribu nin Israel, dangan tawan giraray sainda an daga na itinao mo sainda kaidtong panahon. 12O Kagurangnan, maherak ka sa Israel, an banwaan na namidbidan huli kan saimong ngaran, na inapod mong panganay na aking lalaki. 13Maherak ka sa Jerusalem, an banal mong syudad, saen pinili mong mag-erok. 14Panoa an saimong Templo#36:14 Sa Hebreyo Templo; sa Griyego banwaan. sa Bukid nin Sion kan saimong kamurawayan asin nin mga awit nin pag-omaw. 15Magsaksi ka para sa saimong banwaan, na saimong linalang sa kapinonan; otoba an mga hula kan mga propeta na saindang itinaram sa saimong ngaran. 16Balosan mo an mga tawong nagtubod saimo, asin gibohang masasarigan an saimong mga propeta. 17Danay kang nagin maugayon sa saimong banwaan; dangoga an saimong mga sorogoon mantang namimibi kami. Dangan mamimidbidan kan gabos na yaon sa daga na ika an Kagurangnan, an Dios kan mga panahon.
An Pagpili nin Agom na Babae
18An anoman na klase nin pagkakan pwedeng kakanon, alagad may mga pagkakan na mas marahay ki sa iba. 19Siring na an dila nakakanamit kan mga klase nin pagkakan, an intelihenteng isip nakakaaram kan mga kaputikan. 20An tawong may biribid na isip nagtatao nin kamondoan, alagad an tawong may eksperyensya iyo an mabalik kaiyan saiya.
21Aakoon nin sarong babae an siisay man na lalaki bilang agom, alagad kaipuhan pilion nin sarong lalaki an saiyang magigin agom. 22An kagayonan nin sarong babae nakakapaogma sa sarong lalaki; mayo na nin maorog pa kagayon sa panhiling nin tawo. 23Kun an babae maboot saka mahuyo sa saiyang pagtaram, an saiyang agom iyo na an pinakamapalad sa mga lalaki. 24Kun minaagom an sarong lalaki, napapasaiya an pinakamarahay na rogaring na pwedeng makamtan—sarong agom na makakatabang asin makakapakosog saiya.
25An rogaring na dai nakukudalan, linalaog nin mga mahabon. An lalaki na mayo nin agom, naglalagalag asin danay na minahangos nin hararom. 26Dai sinasarigan an tawong mayo nin sadiring harong asin barubanggi iba an tinotorogan, siring na dai sinasarigan an sarong mahabon na naglalagalag sa iba-ibang banwa.
Currently Selected:
Sirac 36: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.