Sirac 24
24
Pag-omaw sa Kadonongan
1Paghinanyog kamo sa Kadonongan! Inaawit niya an sadiri niyang kaomawan sa tahaw kan mga Israelita, an sadiri niyang banwaan, 2sa katiriponan kan Kahorohalangkawe, sa atubang kan saiyang kapangyarihan.#24:2 kapangyarihan; o mga anghel.
3“Ako an tataramon na nagluwas sa ngoso kan Kahorohalangkawe,
asin tinahoban ko an daga arog sa pagtahob kan ambon.
4An pinakahalangkaw na kalangitan an sakong harong,
asin yaon sa sarong hariging panganoron an sakong trono.
5Solo-solo ako na naglakaw sa palibot kan kalangitan
asin linakaw ko man an katubigan sa irarom kan daga.
6Pinamayohan ko#24:6 Pinamayohan; sa nagkapirang kasuratan Nasadirihan. an bilog na daga asin an mga alon sa kadagatan,
an lambang banwaan asin nasyon.
7Sa gabos na ini naghanap ako nin lugar na mapapahingaloan;
naghanap ako kun saen na lugar ako pwedeng makakua nin maeerokan.
8Dangan an sakong Kaglalang, an naglalang kan kinaban,
nagsabi sako kun saen ako maerok.
Nagsabi siya, ‘An Israel an gibohon mong harong.
An mga kapagarakian ni Jacob iyo an saimong magigin banwaan.’
9Linalang niya ako sa daing kataposan, bago magpoon an panahon,
asin padagos akong mabubuhay sagkod sa panahon na daing kataposan.
10Naglingkod ako saiya sa banal na Tabernakulo
dangan ginibo kong harong an Bukid nin Sion.
11Pinaerok niya ako sa Namotan na Syudad
asin tinawan niya ako nin awtoridad na mamayo sa Jerusalem.
12Kaya nagkagamot ako sa ginagalangan na banwaan
na pinili nin Kagurangnan bilang sadiri niya.
13Naghalangkaw ako arog sa mga sedro nin Lebanon,
arog sa mga sipres sa Bukid nin Hermon,
14arog sa kahoy na palma nin Engedi,
arog sa mga tanom na rosas nin Jerico,
arog sa magayon na mga kahoy na oliba sa kaomahan,
arog sa mga aguho na nagtatalubo harani sa tubig.
15Siring sa casia an sakong hinangos,
siring sa piling mira nagwawarak ako nin mahamot na parong,
arog sa estakte, onyka, saka galbano,
asin arog sa hamot kan insenso sa laog kan Tabernakulo.
16Siring sa hamurawon pinapalakop ko an sakong mga sanga,
na magayon saka marambong.
17Arog sa balagon nin ubas minapaluwas ako nin magayon na mga burak;
an sakong mga burak nagigin mayaman saka managom na mga bunga.#24:17 Sa nagkapirang kasuratan idinagdag an bersikulo 18: Ako an ina nin magayon na pagkamoot, nin pagkatakot, pakaaram, asin banal na paglaom. Huli ta ako mayong kapinonan asin mayong kataposan, kaya itinatao ako sa gabos kong kaakian, na nginaranan niya.
19Madya kamo sako, kamo gabos na nagmamawot sako,
asin magpakabasog kamo sa sakong mga bunga.
20Magigiromdoman nindo ako na orog na mahamis ki sa dugos,
mas marahay ki sa dugos na hale sa mga anira.
21Kakana nindo ako, asin madugang pa an saindong kagutoman sa sako;
inoma nindo ako, asin madugang pa an saindong pagkapaha sa sako.
22Kuyoga nindo ako, asin dai nanggad kamo mapapasopog;
sunoda nindo an sinasabi ko, asin magigin ligtas kamo sa kasalan.”
An Kadonongan asin an Katogonan
23An Kadonongan iyo an Katogonan, an Katogonan na ipinagboot sato ni Moises na satuyang otobon, an tipan nin Dios na Kahorohalangkawe, an pamana para sa mga katiriponan nin Israel.#24:23 Sa nagkapirang kasuratan idinagdag an bersikulo 24: Danay kamong magin makosog sa Kagurangnan; dai kamo magsuhay saiya tanganing pakosogon niya kamo. Mayong ibang Dios kundi an Kagurangnan na Makakamhan, asin mayong ibang paraligtas kundi siya sana. 25An Katogonan nagsusupay nin Kadonongan arog kan Salog nin Pison, arog kan Salog nin Tigris sa panahon nin pagguno kan enot na bunga. 26An Katogonan nagsusupay nin pakasabot arog sa Salog nin Eufrates, arog sa Salog nin Jordan kun tig-ani. 27Nagkikinang iyan sa mga katukdoan arog sa Salog nin Nilo,#24:27 Sa sarong daan na traduksyon Nagkikinang…Nilo; sa Griyego An mga katukdoan pinapaliwanag kaiyan siring sa ilaw. arog sa Salog nin Gihon sa panahon kan pagguno nin ubas.
28An kaenot-enoteng tawong linalang dai nanggad nakaaram kan kapanoan nin Kadonongan, asin an pinakahuring tawo sa daga, magigin siring man sa naenot. 29An mga posibilidad kan Kadonongan mas mahiwas ki sa kadagatan; an saiyang pinaghahalean mas hararom ki sa pinakahararom na katubigan sa irarom kan daga.
30Para sa sako, pinaghona kong nakakaagid ako sa sadit na kali na pinag-aagihan nin tubig hale sa sarong salog pasiring sa sarong tatamnan. 31Boot ko lang na baribihon an sakong daga na natatanoman nin mga kahoy na nagbubunga saka nin mga tinanom na nagbuburak. Alagad dai nahaloy, an sadit na kali nagin sarong salog, asin an salog nagin sarong dagat. 32Kaya itinatao ko saindo an sakong naaaraman; iniitaas ko iyan, tanganing mahiling an liwanag kaiyan saen man na lugar, arog sa nagsisirang na aldaw. 33Arog sa inspiradong propeta, iuula ko an sakong mga katukdoan, tanganing an maabot na mga henerasyon magkinabang kaiyan. 34Tandaan nindo na dai ako nagpagal para sa sako sana, kundi para sa gabos na boot magin madonong.
Currently Selected:
Sirac 24: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
Sirac 24
24
Pag-omaw sa Kadonongan
1Paghinanyog kamo sa Kadonongan! Inaawit niya an sadiri niyang kaomawan sa tahaw kan mga Israelita, an sadiri niyang banwaan, 2sa katiriponan kan Kahorohalangkawe, sa atubang kan saiyang kapangyarihan.#24:2 kapangyarihan; o mga anghel.
3“Ako an tataramon na nagluwas sa ngoso kan Kahorohalangkawe,
asin tinahoban ko an daga arog sa pagtahob kan ambon.
4An pinakahalangkaw na kalangitan an sakong harong,
asin yaon sa sarong hariging panganoron an sakong trono.
5Solo-solo ako na naglakaw sa palibot kan kalangitan
asin linakaw ko man an katubigan sa irarom kan daga.
6Pinamayohan ko#24:6 Pinamayohan; sa nagkapirang kasuratan Nasadirihan. an bilog na daga asin an mga alon sa kadagatan,
an lambang banwaan asin nasyon.
7Sa gabos na ini naghanap ako nin lugar na mapapahingaloan;
naghanap ako kun saen na lugar ako pwedeng makakua nin maeerokan.
8Dangan an sakong Kaglalang, an naglalang kan kinaban,
nagsabi sako kun saen ako maerok.
Nagsabi siya, ‘An Israel an gibohon mong harong.
An mga kapagarakian ni Jacob iyo an saimong magigin banwaan.’
9Linalang niya ako sa daing kataposan, bago magpoon an panahon,
asin padagos akong mabubuhay sagkod sa panahon na daing kataposan.
10Naglingkod ako saiya sa banal na Tabernakulo
dangan ginibo kong harong an Bukid nin Sion.
11Pinaerok niya ako sa Namotan na Syudad
asin tinawan niya ako nin awtoridad na mamayo sa Jerusalem.
12Kaya nagkagamot ako sa ginagalangan na banwaan
na pinili nin Kagurangnan bilang sadiri niya.
13Naghalangkaw ako arog sa mga sedro nin Lebanon,
arog sa mga sipres sa Bukid nin Hermon,
14arog sa kahoy na palma nin Engedi,
arog sa mga tanom na rosas nin Jerico,
arog sa magayon na mga kahoy na oliba sa kaomahan,
arog sa mga aguho na nagtatalubo harani sa tubig.
15Siring sa casia an sakong hinangos,
siring sa piling mira nagwawarak ako nin mahamot na parong,
arog sa estakte, onyka, saka galbano,
asin arog sa hamot kan insenso sa laog kan Tabernakulo.
16Siring sa hamurawon pinapalakop ko an sakong mga sanga,
na magayon saka marambong.
17Arog sa balagon nin ubas minapaluwas ako nin magayon na mga burak;
an sakong mga burak nagigin mayaman saka managom na mga bunga.#24:17 Sa nagkapirang kasuratan idinagdag an bersikulo 18: Ako an ina nin magayon na pagkamoot, nin pagkatakot, pakaaram, asin banal na paglaom. Huli ta ako mayong kapinonan asin mayong kataposan, kaya itinatao ako sa gabos kong kaakian, na nginaranan niya.
19Madya kamo sako, kamo gabos na nagmamawot sako,
asin magpakabasog kamo sa sakong mga bunga.
20Magigiromdoman nindo ako na orog na mahamis ki sa dugos,
mas marahay ki sa dugos na hale sa mga anira.
21Kakana nindo ako, asin madugang pa an saindong kagutoman sa sako;
inoma nindo ako, asin madugang pa an saindong pagkapaha sa sako.
22Kuyoga nindo ako, asin dai nanggad kamo mapapasopog;
sunoda nindo an sinasabi ko, asin magigin ligtas kamo sa kasalan.”
An Kadonongan asin an Katogonan
23An Kadonongan iyo an Katogonan, an Katogonan na ipinagboot sato ni Moises na satuyang otobon, an tipan nin Dios na Kahorohalangkawe, an pamana para sa mga katiriponan nin Israel.#24:23 Sa nagkapirang kasuratan idinagdag an bersikulo 24: Danay kamong magin makosog sa Kagurangnan; dai kamo magsuhay saiya tanganing pakosogon niya kamo. Mayong ibang Dios kundi an Kagurangnan na Makakamhan, asin mayong ibang paraligtas kundi siya sana. 25An Katogonan nagsusupay nin Kadonongan arog kan Salog nin Pison, arog kan Salog nin Tigris sa panahon nin pagguno kan enot na bunga. 26An Katogonan nagsusupay nin pakasabot arog sa Salog nin Eufrates, arog sa Salog nin Jordan kun tig-ani. 27Nagkikinang iyan sa mga katukdoan arog sa Salog nin Nilo,#24:27 Sa sarong daan na traduksyon Nagkikinang…Nilo; sa Griyego An mga katukdoan pinapaliwanag kaiyan siring sa ilaw. arog sa Salog nin Gihon sa panahon kan pagguno nin ubas.
28An kaenot-enoteng tawong linalang dai nanggad nakaaram kan kapanoan nin Kadonongan, asin an pinakahuring tawo sa daga, magigin siring man sa naenot. 29An mga posibilidad kan Kadonongan mas mahiwas ki sa kadagatan; an saiyang pinaghahalean mas hararom ki sa pinakahararom na katubigan sa irarom kan daga.
30Para sa sako, pinaghona kong nakakaagid ako sa sadit na kali na pinag-aagihan nin tubig hale sa sarong salog pasiring sa sarong tatamnan. 31Boot ko lang na baribihon an sakong daga na natatanoman nin mga kahoy na nagbubunga saka nin mga tinanom na nagbuburak. Alagad dai nahaloy, an sadit na kali nagin sarong salog, asin an salog nagin sarong dagat. 32Kaya itinatao ko saindo an sakong naaaraman; iniitaas ko iyan, tanganing mahiling an liwanag kaiyan saen man na lugar, arog sa nagsisirang na aldaw. 33Arog sa inspiradong propeta, iuula ko an sakong mga katukdoan, tanganing an maabot na mga henerasyon magkinabang kaiyan. 34Tandaan nindo na dai ako nagpagal para sa sako sana, kundi para sa gabos na boot magin madonong.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.