Salmo 7
7
Sarong Pamibi para sa Hustisya#AN TITULO KAINI SA HEBREYO: Sarong salmo na inawit ni David sa Kagurangnan huli ki Cus na Benjaminita.
1 Kagurangnan, sakuyang Dios, suroga ako;
tabangi ako sa mga naglalamag sako asin ligtasan ako,
2tibaad siring sa sarong leon ronoton ninda ako,
guyodon sa harayong lugar na mayong maligtas sako.
3 Kagurangnan, sakuyang Dios, kun ini ginibo ko,
kun an mga kamot ko sakong dinigtaan;
4kun an sakong katood binalsan ko nin karatan,
kun kinulgan ko an kaiwal na mayo man nin dahelan;
5tugoteng lamagon logod ako asin dakopon kan sakong mga kaiwal,
timaktimakan an sakong hawak,
asin hutadon sa alpog an sakong kalag!
6Sa kaanggotan, bumangon ka, Kagurangnan!
Atubangon mo an kaanggotan kan sakong mga kalaban;
pagmata, Dios ko, mawot mo an katanosan.
7Tipona sa atubang mo an gabos na banwaan,
asin hale sa kaitaasan saimong paghadean.
8Hinuhukoman nin Kagurangnan an mga banwaan;
hukoman mo ako, Kagurangnan, sosog sa sakong katanosan;
aram mo na ako mayo nin kasalan.
9O Dios na matanos,
ika na naghuhukom kan samong kaisipan asin kamawotan.
Paontoka an karatan kan mga tampalasan;
alagad bendisyonan mo an mga banal.
10An kalasag ko iyo an Dios,
na nagliligtas sa mga matanos.
11An Dios sarong hukom na matanos,
danay na anggot sa mga maraot.
12Kun an sarong tawo dai magbakle,
tataison nin Dios an saiyang espada;
inandam na niya an saiyang pana;
13mga panggadan na armas inandam niya,
mga nagkakalayong pana saiyang ihinimunta.
14Uya, an maraot na tawo nag-iisip nin karatan;
pano siya nin karibokan asin kaputikan.
15Alagad sa mga kalot na inaandam niya para sa iba,
an nahuhulog siya man sana.
16Kaya siya an nagdudusa sa ginibo niyang karatan;
nakukulgan kan gibo niyang kadahasan.
17Magpapasalamat ako sa Kagurangnan huli kan saiyang katanosan;
mag-aawit ako nin kaomawan sa ngaran nin Kahorohalangkaweng Kagurangnan.
Currently Selected:
Salmo 7: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
