Mga Bilang 35
35
An mga Syudad na Itinao sa mga Levita
1Sa kapatagan nin Moab sa ibong kan Jordan hale sa Jerico, nagtaram an Kagurangnan ki Moises, 2“Sabihan mo an mga Israelita na tawan an mga Levita nin mga syudad na maeerokan saka dagang pasabsaban sa palibot kan mga syudad hale sa dagang minana ninda. 3An mga syudad magigin pagsadiri kan mga Levita asin maerok sinda duman; an dagang pasabsaban para sa saindang mga baka saka iba pang mga hayop. 4An sukol kan dagang pasabsaban mapoon sa luwas kan nakapalibot na kudal kan syudad iyo ini: kwatro syentos singkwenta metros an pasirangan, kwatro syentos singkwenta metros an pahabagat, kwatro syentos singkwenta metros an pasolnopan, asin kwatro syentos singkwenta metros an paamihan. 5Kaya kwadrado iyan na nuebe syentos metros kwadrados an kabilogan na sukol; an syudad nasa tahaw. 6Tatawan nindo nin anom na syudad na pailihan an mga Levita na pwedeng dumanan nin sarong tawong dai tuyong nakagadan kan saiyang kapwa. Laen pa kaiyan, tatawan pa nindo sinda nin kwarenta y dos na syudad. 7Kaya kwarenta y otso gabos an syudad na itatao nindo sa mga Levita kaiba an mga dagang pasabsaban. 8An bilang kan syudad kan mga Levita sa lambang tribu aaramon sosog sa sukol kan teritoryo kan tribu.”
Mga Syudad na Pailihan
(Deut. 19:1-13; Jos. 20:1-9)
9Tinaraman nin Kagurangnan si Moises 10na sabihan an banwaan nin Israel: “Pagbalyo nindo sa Salog nin Jordan asin paglaog nindo sa daga nin Canaan, 11mapili kamo nin mga syudad na pailihan tanganing an sarong tawo na dai tuyong makagadan nin kapwa pwedeng magdulag pasiring duman. 12Duman magigin ligtas siya sa boot magbalos na kadugo kan nagadan; an sarong tawo na nakagadan dai pwedeng gadanon sagkod na dai siya nahuhukoman sa atubangan kan banwaan. 13Pumili kamo nin anom na syudad, 14tolo sa sirangan kan Jordan asin tolo sa daga nin Canaan. 15Iyan an magigin mga syudad na pailihan para sa mga Israelita, asin sa mga dayuhan na nag-eerok sa kaibahan nindo o nakikihimanwa saindo. An siisay man na dai tuyong makagadan nin kapwa, pwedeng dumulag pasiring sa arin man kan mga syudad na iyan.
16-18“Alagad kun an sarong tawo maggamit nin armas na lansang o gapo o kahoy tanganing gadanon an kapwa, nagkasala siya nin paggadan asin dapat gadanon. 19An pinakaharaning kadugo kan biktima iyo an magadan kan kriminal. Gagadanon niya ini kun saiyang mahiling.
20“Alagad kun sa kaongisan, hipaan nin sarong tawo an saiyang kapwa dangan ginadan niya sa paagi nin pagbuno o paggapo nin ano man saiya 21o pagsuntok, nagkasala siya nin paggadan asin dapat na gadanon. An pinakaharaning kadugo kan biktima iyo an magadan kan kriminal. Gagadanon niya ini kun saiyang mahiling.
22“Alagad kun dai tuyong magadan nin sarong tawo an dai man niya ikinakaongis, huli ta nabuno niya o nagapo nin ano man; 23kun makagapo siya nin kapwa na dai man niya nahiling saka bako man niya kaiwal dangan magadan, 24sa siring na mga kaso, papaboran kan komunidad an tawong nakagadan asin bako an boot magbalos na kadugo kan biktima. 25An nakagadan ililigtas kan komunidad sa kadugo kan nagadan. Ibabalik ninda an nakagadan sa syudad na pinagpailihan niya. Kaipuhan duman siya mag-erok sagkod na buhay pa an Halangkaw na Padi sa panahon na iyan. 26Alagad kun an nakagadan luminuwas sa syudad na saiyang pinagpailihan, 27dangan nahiling siya asin ginadan kan kadugo kan biktima, an gaweng iyan nin pagbalos bakong panggadan. 28An lalaking nagkasala nin paggadan kaipuhan mag-erok sa syudad nin pailihan sagkod na buhay pa an Halangkaw na Padi; kun gadan na ini pwede na siyang magpuli sa sadiri niyang harong. 29An mga pagsusundon na ini kukuyogon nindo asin kan saindong kapagarakian saen man kamo mag-erok.
30“An sarong tawo na idinimanda nin paggadan pwede sanang mapatotoohan na nagkasala asin pwedeng magadan huli sa patotoo nin mga saksi. Mayo nin gagadanon huli sa patotoo nin saro sanang saksi. 31Kaipuhan gadanon an sarong kriminal. Dai siya pwedeng tuboson nin kwarta. 32Kun magdulag an sarong tawo pasiring sa sarong syudad na pailihan, dai nindo siya pagtugotan na magbayad tangani sanang makapuli sa sadiri niyang harong bago magadan an Halangkaw na Padi. 33Kun gibohon nindo iyan, didigtaan nindo an dagang pinag-eerokan nindo; huli ta an paggadan nakakadigta sa daga. Kaya pwera kan paggadan sa kriminal mayo na nin ibang paagi tanganing matubos an daga na nabulosan nin dugo kan biktima. 34Dai nindo pagdigtaan an dagang pinag-eerokan nindo, huli ta ako an Kagurangnan asin nag-eerok ako sa kaibahan kan banwaan nin Israel.”
Currently Selected:
Mga Bilang 35: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
