Mga Bilang 34
34
An mga Pagdolonan kan Daga
1Itinao nin Kagurangnan ki Moises 2an minasunod na mga katukdoan para sa banwaan nin Israel: “Paglaog nindo sa Canaan, an dagang itinatao ko saindo, iyo ini an magigin pagdolonan nindo. 3An pagdolonan sa habagat mapoon sa kalangtadan nin Zin, dangan minasosog kan pagdolonan nin Edom. Mapoon iyan sa sirangan, sa habagat na poro kan Gadan na Dagat. 4Dangan mapahabagat iyan pasiring sa Dalan nin Akrabbim, maagi sa Zin asin masagkod sa habagat kan Kades-barnea. Dangan madagos iyan sa Hazar-addar asin sa Azmon, 5saen maliko iyan pasiring sa kapantayan na nasa pagdolonan nin Egipto saka matapos sa Mediteraneo.
6“An pagdolonan sa solnopan iyo an Dagat nin Mediteraneo.
7“An pagdolonan sa amihan masosog sa sarong linya na minapoon sa Dagat nin Mediteraneo sagkod sa Bukid nin Hor; 8hale duman mapasiring sa Dalan nin Hamat. Mapadagos iyan sa Zedad 9asin sa Zifron, dangan matapos sa Hazar-enan.
10“An pagdolonan sa sirangan masosog sa sarong linya na minapoon sa Hazar-enan sagkod sa Sefam. 11Dangan mapahabagat pasiring sa Harbel, sa sirangan nin Ain, asin mapadagos sa kabubuldan sa parteng sirangan na baybayon kan Danaw nin Galilea, 12dangan mapahabagat na sinususog an Salog nin Jordan sagkod sa Gadan na Dagat.
“An mga ini iyo an apat na pagdolonan kan saindong daga.”
13Kaya sinabihan ni Moises an mga Israelita, “Iyo ini an daga na mamanahon nindo sa paagi nin ripa, an dagang itinao nin Kagurangnan sa siyam may kabangang tribu. 14An mga tribu ni Ruben, ni Gad, asin kan kabangang tribu ni Manases nag-ako na kan saindang kahirasan sosog sa saindang mga pamilya, 15duman sa sirangan na kabtang kan Jordan, kahampang kan Jerico.”
An mga Lider na namahala sa Pagbanga kan Daga
16Nagtaram an Kagurangnan ki Moises, 17“An pading si Eleazar asin si Josue na aking lalaki ni Nun iyo an mabanga kan daga para sa mga tawo. 18Kumua ka nin sarong lider hale sa lambang tribu tanganing tabangan sinda sa pagbanga kaiyan.”
19-28Iyo ini an mga lalaking pinili nin Kagurangnan:
| Tribu | Lider |
|---|---|
| Juda | si Caleb na aking lalaki ni Jefunne |
| Simeon | si Selumiel na aking lalaki ni Ammihud |
| Benjamin | si Elidad na aking lalaki ni Kislon |
| Dan | si Bukki na aking lalaki ni Jogli |
| Manases | si Hanniel na aking lalaki ni Efod |
| Efraim | si Kemuel na aking lalaki ni Siftan |
| Zabulon | si Elizafan na aking lalaki ni Parnac |
| Issakar | si Paltiel na aking lalaki ni Azzan |
| Aser | si Ahihud na aking lalaki ni Selomi |
| Neftali | si Pedahel na aking lalaki ni Ammihud. |
29Iyo ini an mga lalaking pinili nin Kagurangnan na magbanga kan pagsadiri para sa banwaan nin Israel sa daga nin Canaan.
Currently Selected:
Mga Bilang 34: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
