Levitico 15
15
Mga Maaating Minaluwas sa Hawak nin Tawo
1Itinao nin Kagurangnan ki Moises saka ki Aaron an minasunod na pagsusundon 2para sa mga Israelita. Sa panahon na may magluwas sa kinabuhay nin sarong lalaki na may helang na turo, an nagluwas maati. 3Iyo ini an pagsusundon manongod kan saiyang pagkanimaati huli kan pagluwasi saiya: padagos man na nagtuturo o nasulat an saiyang kinabuhay, iyan sarong kaatian saiya. 4An arin man na higdaan na saiyang tukawan o higdaan, magigin maati. 5An siisay man na makaduta sa higdaan 6o makatukaw sa arin man na tinukawan kan lalaking may helang na turo, kaipuhan na maglaba kan saiyang gubing saka magkarigos, asin siya magigin maati sagkod magbanggi. 7An siisay man na makaduta sa lalaking may helang na turo, kaipuhan na maglaba kan saiyang gubing saka magkarigos, asin siya magigin maati sagkod magbanggi. 8An siisay man na malutaban kan lalaking may helang na turo, kaipuhan na maglaba kan saiyang gubing asin magkarigos, asin siya magigin maati sagkod magbanggi. 9An arin man na kamadero na tinukawan kan lalaking may helang na iyan, magigin maati. 10An siisay man na makaduta sa arin man na tinukawan kan lalaki, magigin maati sagkod magbanggi. An siisay man na magdara kan arin man na tinukawan kan lalaki, kaipuhan na maglaba kan saiyang gubing saka magkarigos, asin siya magigin maati sagkod magbanggi. 11An siisay man na madutaan kan lalaking may helang na iyan na dai pa naghugas kan saiyang kamot, kaipuhan na maglaba kan saiyang gubing saka magkarigos, asin siya magigin maati sagkod magbanggi. 12An arin man na dalipay na laogan na madotdot kan lalaking iyan, kaipuhan na pasaon; an arin man na laogan na gibo sa kahoy na saiyang madotdot, kaipuhan na hugasan nin marahay.
13Kun narahay na an lalaking may helang na turo, mahalat siya nin pitong aldaw bago siya maglaba kan saiyang gubing saka magkarigos sa preskong tubig nin burabod, asin magigin malinig na siya. 14Sa ikawalong aldaw, madara siya nin duwang salampati o duwang agbaan sa pintoan kan Tabernakulo dangan itatao niya an mga gamgam sa padi. 15An saro kaiyan idodolot kan padi bilang dolot para sa kasalan asin an saro bilang tinutong na atang. Sa paaging iyan gigibohon kan padi an seremonya nin paglinig para sa nasabing lalaki.
16Kun an sarong lalaki linuwasan kan sadiring banhi, kaipuhan mangarigos siya, asin magigin maati siya sagkod magbanggi. 17Kaipuhan na labahan an arin man na mabugtakan kan nagluwas na banhi, tela man o anit, asin iyan magigin maati sagkod magbanggi. 18Pakatapos na magdorog an sarong lalaki asin an sarong babae, kaipuhan na magkarigos sindang duwa, asin sinda magigin maati sagkod magbanggi.
19Kun an sarong babae abotan nin regla, magigin maati siya sa laog nin pitong aldaw, asin an siisay man na makaduta saiya magigin maati man sagkod magbanggi. 20An ano man na saiyang matukawan o mahigdaan sa panahon na iyan magigin maati man. 21-23An siisay man na makadotdot kan saiyang higdaan o kan ano man na saiyang tinukawan, kaipuhan na maglaba kan saiyang gubing saka magkarigos, asin siya magigin maati sagkod magbanggi. 24Kun dinorogan nin sarong lalaki an babaeng nareregla, naolakitan siya kan pagkanimaati kan babae, asin sa laog nin pitong aldaw, siya magigin maati; magigin maati an arin man na higdaan na gamiton kan lalaki.
25Kun sa luwas kan mga aldaw kan pagregla nin sarong babae, awasan siya nin dugo o kun suminobra sa aldaw an pag-awas saiya nin dugo, padagos siyang magigin maati sagkod na inaawasan pa siya, arog kan panahon na siya nareregla. 26An arin man na higdaan na saiyang gamiton o an ano man na saiyang tukawan sa panahon na iyan, magigin maati. 27Magigin maati an siisay man na makadotdot kan mga bagay na iyan, asin kaipuhan maglaba kan saiyang gubing asin magkarigos; siya magigin maati sagkod magbanggi. 28Kun tapos na an pag-awas kan dugo sa babae, mahalat pa siya nin pitong aldaw bago siya magigin malinig. 29Sa ikawalong aldaw, madara siya nin duwang salampati o agbaan sa pintoan kan Tabernakulo asin itatao niya an mga gamgam sa padi. 30An saro kaiyan idodolot kan padi bilang dolot para sa kasalan asin an saro bilang tinutong na atang. Sa paaging ini gigibohon kan padi an seremonya nin paglinig para sa nasabing babae.
31Tinaraman nin Kagurangnan si Moises na patanidan an mga Israelita manongod kan saindang kaatian ta tibaad magkagaradan sinda kun saindang maatian an Tabernakulo nin Kagurangnan na nasa tahaw kan kampo.
32Iyo ini an mga pagsusundon manongod sa lalaking may helang na turo asin sa lalaking linuluwasan kan sadiring banhi; 33manongod man sa babae na nasa panahon nin pagregla o sa lalaki na duminorog sa babaeng maati.
Currently Selected:
Levitico 15: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
