Levitico 14
14
Paglinig Pakatapos na Magkaigwa nin Helang sa Kublit
1Itinao nin Kagurangnan ki Moises 2an minasunod na pagsusundon manongod sa paglinig nin tawong narahay sa saiyang nakakatakot na helang sa kublit. Sa aldaw na ipapahayag na an sarong tawong narahay sa saiyang helang sa kublit, dadarahon siya sa padi 3na madara saiya sa luwas kan kampo tanganing hilingon siya. Kun marahay na an helang, 4pagbobotan kan padi an mga tawo na magdara nin duwang buhay saka malinig na gamgam, sarong sadit na pedaso nin kahoy na sedro, sarong pulang pisi asin sarong sanga kan isopo para sa tawong lilinigan. 5Dangan ipapagadan kan padi an saro sa duwang gamgam sa tangod kan sarong dalipay na mangko na igwa nin tubig na hale sa burabod. 6Pakatapos, kukuahon niya an ikaduwang gamgam asin ibubuntog sa dugo kan ginadan na gamgam, kaiba an pedaso nin kahoy na sedro, an pulang pisi asin an isopo. 7Dangan pitong beses niyang wiwirikan kan dugo an tawong lilinigan kan helang sa kublit, asin ipapahayag niyang malinig na ini. Pakatapos, papalayogon niya sa kaawagan an buhay na gamgam. 8Lalabahan kan tawong nalinigan an saiyang gubing, aarison an gabos niyang buhok asin makarigos siya. Dangan magigin malinig na siya. Pwede na siyang maglaog sa kampo alagad kaipuhan sa luwas pa kan saiyang tolda siya mag-erok sa laog nin pitong aldaw. 9Sa ikapitong aldaw, aarison niya giraray an saiyang buhok sa payo, an saiyang barabas, an saiyang kiray asin an gabos na buhok na yaon sa saiyang hawak. Lalabahan niya an saiyang gubing saka makarigos dangan magigin malinig na siya.
10Sa ikawalong aldaw, madara siya nin duwang lalaki saka sarong babaeng kordero na manangtaon pa sana asin mayo nin kaninan; tolong kilong arina na sinalakan nin lana nin oliba asin ikatolong parte kan sarong litro nin lana nin oliba. 11Siya saka an saiyang mga dolot dadarahon kan padi duman sa pintoan kan Tabernakulo, sa atubang nin Kagurangnan. 12Dangan kukuahon kan padi an sarong lalaking kordero asin kaiba kan ikatolong parte kan sarong litro nin lana nin oliba, iiitaas niya iyan sa Kagurangnan bilang sarong dolot na kabayadan. Idodolot niya iyan sa Kagurangnan bilang sarong espesyal na regalo para sa padi. 13Bubunoon niya an kordero duman sa pinagbubunoan kan mga hayop na idodolot bilang dolot para sa kasalan asin kan tinutong na atang. Gigibohon niya ini huli ta an dolot nin kabayadan sadiri kan padi asin orog kabanal, arog kan dolot para sa kasalan. 14Makua an padi nin kadikit na dugo kan kordero dangan lalahidan niya kaini an hikawan kan toong talinga kan linilinigan, an tanggurangan kan too niyang kamot, saka an tanggurangan kan too niyang bitis. 15Makua man an padi nin kadikit kan lana nin oliba asin iuula niya iyan sa saiyang walang palad, 16dangan idodotdot niya digdi an muro kan too niyang kamot asin pitong beses siyang mawirik kaiyan sa atubang nin Kagurangnan. 17Pakatapos, makua siya nin kadikit na lana sa saiyang palad saka kadikit na dugo kan kordero, dangan ilalahid niya an mga ini sa hikawan kan toong talinga kan linilinigan, sa tanggurangan kan too niyang kamot asin sa tanggurangan kan too niyang bitis. 18An matada kan lana na yaon sa saiyang palad, ilalahid niya sa payo kan tawong linilinigan. Sa paaging ini gigibohon kan padi an seremonya nin paglinig.
19Dangan idodolot kan padi an dolot para sa kasalan asin gigibohon niya an seremonya nin paglinig. Pakatapos, bubunoon niya an hayop para sa tinutong na atang; 20idodolot niya iyan duman sa altar kaiba an dolot na pagkakan. Sa paaging ini gigibohon kan padi an seremonya nin paglinig, asin magigin malinig na an tawong iyan.
21Kun dukha an tawong iyan asin dai makakatao kan tamang dolot, madara sana siya nin sarong lalaking kordero para sa paglinig saiya bilang dolot nin kabayadan, na iiitaas sa Kagurangnan bilang sarong espesyal na regalo para sa padi. Madara man siya nin saro sanang kilo nin arina na sinalakan nin lana nin oliba para sa dolot na pagkakan asin ikatolong parte nin sarong litro kan lana nin oliba. 22Madara man siya nin duwang salampati o duwang agbaan, an saro para sa dolot para sa kasalan dangan an saro para sa tinutong na atang. 23Sa ikawalong aldaw kan paglinig saiya, dadarahon niya an mga iyan sa padi duman sa pintoan kan Tabernakulo. 24Kukuahon kan padi sa saiya an kordero saka an lana nin oliba dangan iiitaas an mga iyan sa Kagurangnan bilang sarong espesyal na regalo para sa padi. 25Bubunoon niya an kordero asin makua siya nin kadikit na dugo na saiyang ilalahid sa hikawan kan toong talinga kan linilinigan, sa tanggurangan kan too niyang kamot, asin sa tanggurangan kan too niyang bitis. 26Iuula kan padi an ibang lana sa saiyang walang palad 27dangan idodotdot niya digdi an muro kan too niyang kamot asin pitong beses siyang mawirik kaiyan sa atubang nin Kagurangnan. 28Pakatapos, makua siya nin kadikit na lana sa saiyang palad, dangan ilalahid niya sa mga lugar na linahidan kan dugo: sa hikawan kan toong talinga kan linilinigan, sa tanggurangan kan too niyang kamot, asin sa tanggurangan kan too niyang bitis. 29An matatada kan lana na yaon sa saiyang palad ilalahid niya sa payo kan tawong linilinigan. Sa paaging ini gigibohon kan padi an seremonya nin paglinig. 30Pakatapos, idodolot niya an saro kan mga salampati o agbaan 31bilang dolot para sa kasalan asin an ikaduwa bilang tinutong na atang kaiba an dolot na pagkakan. Sa paaging ini gigibohon kan padi an seremonya nin paglinig. 32Iyo ini an pagsusundon para sa tawong igwa nin nakakatakot na helang sa kublit na dai makakatao kan tamang dolot na kaipuhan para sa paglinig saiya.
An Alamag na Naglalakop sa Mga Harong
33Itinao nin Kagurangnan ki Moises saka ki Aaron 34an minasunod na pagsusundon manongod sa mga harong na naolakitan kan naglalakop na alamag. (An mga ini susunodon kan banwaan nin Israel pakalaog ninda sa Canaan, an daga na itatao sainda nin Kagurangnan bilang saindang pagsadiri). 35An siisay man na makakua nin alamag sa saiyang harong, kaipuhan na magduman asin magsabi sa padi. 36Magboboot an padi na haleon an gabos na yaon sa laog kan harong bago siya magduman tanganing hilingon an alamag. Kun dai, an gabos na yaon duman saiyang ipapahayag na maati. Dangan maduman siya sa harong 37asin hihilingon an alamag. Kun an mga lanob kan harong igwa nin mga berde o pulang putak-putak na sa paghiling garong kinakakan an lanob, 38babayaan kan padi an harong asin seserahan sa laog nin pitong aldaw. 39Sa ikapitong aldaw, mabalik an padi dangan hihilingon giraray an alamag. Kun naglakop iyan sa mga lanob, 40ipagboboot niya na haleon an mga gapong nakakapotan kan alamag asin itapok sa sarong maating lugar sa luwas kan syudad. 41Ipagboboot niya na karosan an gabos na lanob sa laog kan harong, asin an gabos na kinaros ipapatapok niya duman sa maating lugar sa luwas kan syudad. 42Dangan riribayan ninda nin ibang gapo an mga gapong hinarale, asin papalitadahon giraray ninda an mga lanob na kinarosan.
43Kun maglataw giraray an alamag sa laog kan harong pakatapos na haraleon an mga gapong nakapotan asin pakatapos na karosan an bilog na laog kan harong dangan mabagohan an palitada, 44maduman an padi asin hihilingon iyan. Kun naglakop sa harong an alamag, maati an harong; 45kaipuhan na gabaon iyan. An mga gapo saka an mga kahoy asin an mga palitada dapat na darahon sa sarong lugar na maati sa luwas kan syudad. 46An siisay man na maglaog sa harong mantang ini serado, magigin maati sagkod magbanggi. 47An siisay man na magkatorog o magkakan sa harong na iyan kaipuhan na maglaba kan saiyang gubing.
48Kun sa masunod na paghiling kan padi, pakatapos na palitadahon an harong, dai na nagtunga an alamag, ipapahayag kan padi na malinig na an harong huli ta nahale na an gabos na alamag. 49Tanganing malinigan an harong, kaipuhan magkua siya nin duwang sadit na gamgam, sarong sadit na pedaso nin kahoy na sedro, sarong mapulang pisi asin sarong sanga kan isopo. 50Dangan gagadanon niya an saro sa duwang gamgam sa tangod nin sarong dalipay na mangko na igwa nin tubig na hale sa burabod. 51Pakatapos, kukuahon niya an sedro, an isopo saka an mapulang pisi, patin an buhay na gamgam; ibubuntog niya an mga iyan sa dugo kan ginadan na gamgam asin sa tubig. Dangan pitong beses niyang wiwirikan kaini an harong. 52Sa paaging ini lilinigan niya an harong huli sa dugo kan gamgam, sa tubig, sa buhay na gamgam, sa kahoy na sedro, sa isopo asin sa mapulang pisi. 53Pakatapos, papalayogon niya an buhay na gamgam sa kaawagan, sa luwas kan syudad. Sa paaging ini gigibohon kan padi an seremonya nin paglinig para sa harong, asin magigin malinig na iyan.
54An mga ini iyo an pagsusundon manongod sa nakakatakot na helang sa kublit, 55-56manongod sa mga gatok, sa mga pigsa asin sa mga alamag. 57An mga ini an magtatao nin liwanag kun an sarong bagay maati o malinig.
Currently Selected:
Levitico 14: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
