Josue 10
10
Dinaog an mga Amoreo
1Nabaretaan ni Adonizedek, an hade kan Jerusalem,#10:1 JERUSALEM: Kan panahon na idto saro ining syudad kan mga Jebuseo. na sinakop asin rinaot nang padagos ni Josue an Ai saka ginadan an hade duman, siring kan ginibo niya sa Jerico asin sa hade duman. Nabaretaan man ni Adonizedek na nakipagtipan sa mga Israelita an mga taga Gibeon asin nag-eerok na sinda sa kaibahan kan mga Israelita. 2Natakot an mga taga Jerusalem huli ta an Gibeon arog kadakula kan arin man na syudad na igwa nin hade; mas dakula pa ini ki sa Ai asin marahay sa pakilaban an mga lalaki kaini. 3Kaya nagpadara kan mensaheng ini si Adonizedek ki Hadeng Hoham kan Hebron, ki Hadeng Piram kan Jarmut, ki Hadeng Jafia kan Lakis asin ki Hadeng Debir kan Eglon: 4“Magdigdi kamo asin tabangan nindo akong salakayon an Gibeon huli ta an mga tawo duman nakipagtipan ki Josue asin sa mga Israelita.” 5Nagsararo an limang hadeng Amoreo na iyo an mga hade sa Jerusalem, Hebron, Jarmut, Lakis, asin Eglon. Pinalibotan ninda an Gibeon asin saindang sinalakay.
6An mga taga Gibeon nagpadara nin mensahe ki Josue duman sa kampo sa Gilgal: “Dai mo kami pagpabayaan! Magdigdi ka tolos asin tabangan mo kami! Iligtas mo kami huli ta nagkasararo an mga hadeng Amoreo na nag-eerok sa kabubuldan asin sinalakay kami!”
7Kaya hale sa Gilgal, nagduman si Josue kaiba an bilog niyang hukbo, asin an pinakamarahay niyang mga soldados. 8Nagtaram an Kagurangnan ki Josue, “Dai ka matakot sainda. Itinao ko na saindo an kapangganahan. Maski siisay sainda dai nin magiginibo laban saimo.” 9Magdamlag na naglakaw si Josue asin an saiyang mga soldados hale sa Gilgal pasiring sa Gibeon, asin bigla nindang sinalakay an mga Amoreo. 10Ginibo nin Kagurangnan na magkatarakot an mga Amoreo pagkahiling sa hukbo nin Israel. Ginaradan sinda kan mga Israelita duman sa Gibeon asin linamag sinda sa dalan na paibaba kan Bet-horon sagkod sa Azeka asin Makkeda. 11Mantang nagdudurulag an mga Amoreo sa hukbo kan Israel duman sa dalan na paibaba kan Bet-horon, pinauranan sinda nin Kagurangnan nin yelo na garo mga gapo sagkod sa Azeka; mas dakul sainda an nagadan sa yelo ki sa nagadan kan mga Israelita.
12Kan aldaw na itinao nin Kagurangnan sa mga Israelita an kapangganahan sa mga Amoreo, nakipag-olay si Josue sa Kagurangnan. Sa atubang kan mga Israelita nagsabi si Josue,
“Aldaw, mag-ontok ka sa tangod kan Gibeon;
Bulan, mag-ontok ka sa tangod kan Kapantayan nin Aijalon.”
13Nag-ontok an aldaw asin dai naghiro an bulan sagkod na nadaog kan Israel an saindang mga kaiwal. Nasusurat ini sa Libro ni Jasar. Nag-ontok an aldaw sa tahaw kan langit asin dai nagsolnop sa bilog na maghapon. 14Dai pa lamang nangyari asin dai na liwat mangyayari an siring na aldaw na an Kagurangnan nagkuyog sa sarong tawo. Nakilaban an Kagurangnan para sa Israel.
15Pakatapos kaini, nagbalik si Josue asin an saiyang bilog na hukbo sa kampo duman sa Gilgal.
Nadakop ni Josue an Limang Hadeng Amoreo
16Alagad nakadulag an limang hadeng Amoreo asin nagtago sa sarong lungib sa Makkeda. 17May nakaaram kan pinagtatagoan ninda asin ibinareta ini ki Josue. 18Nagsabi si Josue, “Sulaton nindo nin nagkapirang darakulang gapo an laogan kan lungib. Dangan pabantayan nindo 19alagad dai kamo mag-ontok duman. Lamagon nindo an mga kaiwal, asin salakayon nindo sinda hale sa likodan; dai nindo pagtugotan na makalaog sinda sa saindang mga syudad! Itinao na saindo nin Kagurangnan na saindong Dios an kapangganahan laban sainda.” 20Ginadan sinda ni Josue asin kan saiyang mga soldados alagad igwa nin nagkapirang nakadulag asin nakalaog sa saindang syudad kaya nakaligtas. 21Dangan ligtas na nagbalik sa kampo sa Makkeda an gabos na soldados ni Josue.
Mayo nin siisay man sa daga na nangahas na magtaram laban sa mga Israelita.
22Dangan nagsabi si Josue, “Bukasan nindo an laogan kan lungib asin darahon nindo sako an limang hadeng iyan.” 23Kaya binukasan ninda an lungib asin ilinuwas an mga hade kan Jerusalem, Hebron, Jarmut, Lakis saka Eglon 24dangan dinara ninda ki Josue. Inapod ni Josue an saiyang mga soldados asin sinugo an mga opisyal na nag-iba saiya na tungtongan an liog kan mga hade. Nagsunod an mga opisyal. 25Nagsabi si Josue sa mga opisyal, “Dai kamo matakot o manluya. Magmakosog kamo asin magmaisog huli ta arog kaiyan an gigibohon nin Kagurangnan sa gabos nindong kaiwal.” 26Ginadan ni Josue an limang hade asin binitay an saindang mga bangkay sa limang kahoy sa bilog na maghapon. 27Pagsolnop kan aldaw nagboot si Josue, asin an saindang mga bangkay ibinaba sa nabibitayan dangan itinapok sa lungib na pinagtagoan ninda. Binurugtakan nin darakulang gapo an laogan kan lungib asin sagkod ngunyan yaon pa an mga gapo.
Dakul pang Teritoryo kan mga Amoreo an Sinakop ni Josue
28Kan aldaw na idto, sinalakay asin sinakop ni Josue an Makkeda asin an hade duman. Ginadan niya an gabos na nasa syudad; mayo siyang itinadang buhay. Ginibo niya sa hade kan Makkeda an ginibo niya sa hade kan Jerico.
29Paghale sa Makkeda sinalakay ni Josue asin kan saiyang hukbo an Libna. 30Itinao man nin Kagurangnan sa mga Israelita an kapangganahan laban sa syudad asin sa hade duman. Ginadan ninda an gabos na yaon duman asin mayo sindang itinadang buhay. Ginibo ninda sa hade kan Libna an ginibo ninda sa hade kan Jerico.
31Paghale sa Libna, nagpasiring sa Lakis si Josue asin an saiyang hukbo. Pinalibotan ninda an Lakis asin sinalakay. 32Itinao nin Kagurangnan sa mga Israelita an kapangganahan laban sa Lakis sa ikaduwang aldaw kan ralaban. Ginaradan man kan mga Israelita an mga tawo duman siring kan ginibo ninda sa Libna. 33Uminabot si Hadeng Horam kan Gezer sa pagtabang sa Lakis, alagad siya asin an saiyang hukbo dinaog ni Josue; mayo sainda nin itinadang buhay.
34Hale sa Lakis, nagpasiring sa Eglon si Josue asin an saiyang mga soldados. Pinalibotan ninda an syudad asin sinalakay. 35Kan aldaw na idto, sinakop ninda an syudad asin ginadan an gabos na yaon duman, siring kan ginibo ninda sa Lakis.
36Pakahale sa Eglon, nagtukad sa kabubuldan si Josue asin an saiyang hukbo pasiring sa Hebron. Sinalakay ninda an syudad 37asin sinakop. Ginadan ninda an hade asin an gabos na tawo sa syudad siring man an mga nag-eerok sa kataraed na mga banwa. Sinulo ni Josue an syudad, siring kan ginibo niya sa Eglon. Mayo siyang itinadang buhay.
38Dangan binalikan ni Josue asin kan saiyang hukbo an Debir asin sinalakay. 39Sinakop niya an syudad, an hade asin an gabos na kataraed na banwa. Ginadan ninda an lambang saro. Ginibo ni Josue sa Debir asin sa hade duman an ginibo niya sa Hebron, sa Libna, asin sa saindang mga hade.
40Sinakop ni Josue an bilog na daga. Nadaog niya an mga hade sa kabubuldan, sa mga tukadon sa parteng sirangan, sa mga kababan sa solnopan, asin sa habagat na parte kan Canaan. Mayo siyang ilinigtas; ginadan niya an gabos. Iyo ini an ipinagboot nin Kagurangnan na Dios nin Israel. 41An pakikilaban ni Josue nagpoon sa Kades-barnea sa habagat sagkod sa Gaza harani sa baybayon, kaiba an bilog na daga kan Gosen sagkod sa Gibeon sa amihan. 42Dinaog ni Josue an mga hade duman asin sinakop an saindang mga teritoryo sa laog nin saro sanang pagsalakay, huli ta nakipaglaban para sa mga Israelita an Kagurangnan na Dios nin Israel. 43Pakatapos kaini, nagbalik si Josue asin an saiyang hukbo sa kampo duman sa Gilgal.
Currently Selected:
Josue 10: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
