Popular Bible Verses from Josue 10

Share

Nag-ontok an aldaw asin dai naghiro an bulan sagkod na nadaog kan Israel an saindang mga kaiwal. Nasusurat ini sa Libro ni Jasar . Nag-ontok an aldaw sa tahaw kan langit asin dai nagsolnop sa bilog na maghapon.

Kan aldaw na itinao nin KAGURANGNAN sa mga Israelita an kapangganahan sa mga Amoreo, nakipag-olay si Josue sa KAGURANGNAN. Sa atubang kan mga Israelita nagsabi si Josue, “Aldaw, mag-ontok ka sa tangod kan Gibeon; Bulan, mag-ontok ka sa tangod kan Kapantayan nin Aijalon.”

Dai pa lamang nangyari asin dai na liwat mangyayari an siring na aldaw na an KAGURANGNAN nagkuyog sa sarong tawo. Nakilaban an KAGURANGNAN para sa Israel.

Nagtaram an KAGURANGNAN ki Josue, “Dai ka matakot sainda. Itinao ko na saindo an kapangganahan. Maski siisay sainda dai nin magiginibo laban saimo.”

Nagsabi si Josue sa mga opisyal, “Dai kamo matakot o manluya. Magmakosog kamo asin magmaisog huli ta arog kaiyan an gigibohon nin KAGURANGNAN sa gabos nindong kaiwal.”