Josue 1
1
Sinugo nin Dios si Josue na Sakopon an Canaan
1Pagkagadan ni Moises na sorogoon nin Kagurangnan, tinaraman nin Kagurangnan si Josue, na aki ni Nun asin katabang ni Moises. 2“An sorogoon kong si Moises gadan na. Kaya mag-andam na kamo, ika asin an gabos na Israelita, dangan balyohon nindo an Salog nin Jordan pasiring sa daga na itinatao ko sa banwaan nin Israel. 3Siring sa itinaram ko ki Moises, itinatao ko saindo an gabos na daga na saindong lalakawan. 4Magpoon sa kalangtadan sa habagat, an saindong pagdolonan makakaabot sagkod sa kabukidan nin Lebanon sa amihan; magpoon sa Salog nin Eufrates sa sirangan pasiring sa daga kan mga Heteo, sagkod sa Dagat nin Mediteraneo sa solnopan. 5Josue, dai nin siisay man na makakadaog saimo sa bilog mong pagkabuhay. Iibahan taka siring na inibahan ko si Moises. Danay na iibahan taka; dai taka nanggad papabayaan. 6Magmaisog ka asin pakosoga an saimong boot, huli ta ika an mangengenot kaining mga tawo sa pagsakop ninda sa dagang ipinanuga ko sa saindang mga ginikanan. 7Magmaisog ka sana asin pakosoga an saimong boot; kuyogon mo nanggad an gabos na togon na itinao saimo kan sakong sorogoon na si Moises. Dai ka magsuhay kan arin man kaiyan asin magigin marahay an saimong buhay maski saen ka magduman. 8Dai mo paglingawan na basahon an libro kan katogonan sa saimong pagsamba. Horophoropon mo iyan aldaw-banggi, saka kuyogon mo nanggad an mga nakasurat diyan. Dangan magigin mauswag ka asin paladan. 9Giromdoma na pinagbotan taka na magmaisog asin magmakosog nin boot! Dai ka matakot o mawaraan nin paglaom huli ta ako, an Kagurangnan na saimong Dios, an kaibahan mo saen ka man magduman.”
Nagtao nin mga Pagboot si Josue sa mga Tawo
10Dangan pinagbotan ni Josue an mga lider na 11liboton an bilog na kampo asin sabihan an mga tawo, “Mag-andam kamo nin mga pagkakan, huli ta sa laog nin tolong aldaw mabalyo kamo sa Salog nin Jordan tanganing sakopon an dagang itinatao saindo nin Kagurangnan na saindong Dios.”
12Sinabihan ni Josue an tribu ni Ruben, ni Gad, asin an kabanga kan tribu ni Manases, 13“Giromdoma nindo an sinabi saindo kan sorogoon nin Kagurangnan na si Moises na an dagang ini sa sirangan kan Jordan itatao saindo nin Kagurangnan na saindong Dios tanganing saindong pag-erokan. 14Mawawalat digdi an saindong mga agom, mga aki sagkod mga hayop, alagad mabalyo an saindong mga soldados, dara an saindang mga armas asin papangenotan ninda saka tatabangan an kapwa ninda Israelita, 15sagkod na masakop ninda an dagang nasa solnopan kan Jordan, daga na itinatao sainda nin Kagurangnan na saindang Dios. Kun an gabos na tribu nin Israel tawan na kan Kagurangnan nin kapahingaloan, pwede na kamong magbalik digdi asin mag-erok sa daga na nasa sirangan kan Jordan, daga na itinao saindo ni Moises na sorogoon nin Kagurangnan.”
16Nagsimbag sinda ki Josue, “Gigibohon mi an gabos na ipinagboot mo samo asin maduman kami saen mo man kami sugoon. 17Kukuyogon mi ika siring na kinuyog nyamo si Moises, asin ibahan ka logod nin Kagurangnan na saimong Dios siring na inibahan niya si Moises! 18Gagadanon an siisay man na maglapas kan saimong togon asin magsuhay kan saimong pagboot. Magmaisog ka asin pakosoga an saimong boot!”
Currently Selected:
Josue 1: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
