Deuteronomio 34
34
An Pagkagadan ni Moises
1Hale sa kapatagan nin Moab, nagtukad si Moises sa Bukid nin Nebo, pasiring sa alitoktok kan Bukid nin Pisga, sa sirangan nin Jerico. Duman ipinahiling saiya nin Kagurangnan an bilog na daga: an teritoryo kan Gilead sagkod sa amihan sa banwa nin Dan; 2an bilog na teritoryo ni Neftali; an mga teritoryo ni Efraim asin ni Manases; an teritoryo ni Juda sagkod sa solnopan, sa Dagat nin Mediteraneo; 3an habagat na parte nin Juda; an kapatagan, na minapoon sa Zoar dangan minasagkod sa Jerico, an syudad nin mga palma. 4Dangan nagtaram an Kagurangnan ki Moises, “Iyo iyan an daga na sakong ipinanuga ki Abraham, ki Isaac asin ki Jacob na itatao sa saindang mga kapagarakian. Ipinapahiling ko iyan saimo, alagad dai taka tutugotan na makaabot duman.”
5Kaya siring sa itinaram nin Kagurangnan, nagadan duman sa daga nin Moab si Moises, an sorogoon nin Kagurangnan. 6Ilinubong siya nin Kagurangnan duman sa sarong kapantayan sa Moab, kahampang kan banwaan nin Bet-peor, alagad mayo nin nakakaaram kan lugar na pinaglubongan saiya sagkod ngunyan. 7Syento beynteng taon an edad ni Moises kan siya nagadan; alagad makosog pa siya asin marahay pa an saiyang panghiling. 8Pinagmondoan siya kan banwaan nin Israel duman sa kapatagan nin Moab sa laog nin treyntang aldaw.
9Napano nin kadonongan si Josue na aki ni Nun, huli ta siya an pinili ni Moises na magsalihid saiya. Nagkuyog ki Josue an banwaan nin Israel, asin nagsunod kan mga pagboot nin Kagurangnan na itinao sainda huli ki Moises.
10Mayong propeta na makakaarog ki Moises sa bilog na Israel; hampangan na nagtaram saiya an Kagurangnan. 11Mayong ibang propeta na makakagibo kan mga tanda saka mga ngangalasan na ipinagibo saiya nin Kagurangnan duman sa Egipto laban sa hade, sa saiyang mga opisyal sagkod sa bilog na daga. 12Mayong ibang propeta na makakagibo kan mga dakula saka makangirhat na mga bagay na ginibo ni Moises sa atubang kan bilog na Israel.
Currently Selected:
Deuteronomio 34: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
