Job 41
41
1“Madadakop mo daw an
Leviatan#41:1 LEVIATAN: Hilingon sa 3:8. sa paagi nin banwit
o magagakodan nin pisi an saiyang dila?
2Mabubugtakan mo daw nin salongasing an saiyang dungo
o nin dakulang banwit an saiyang salang?
3Makikimaherak daw siya saimo nganing butasan mo?
Tataramon daw nin pakimaherak an madadangog mo?
4Makikipagtipan daw siya saimo
na sagkod pa man paglilingkodan ka niya?
5Makikikawat ka daw saiya arog kan pakikawat mo sa sarong gamgam,
o gagakodan mo siya para sa saimong mga babaeng sorogoon?
6Tatawadan daw kan mga parabakal an saiyang halaga?
Pepedasohon daw ninda siya tanganing ipabakal?
7Mapapano mo daw nin mga garod an saiyang kublit,
o mapapalagbasan nin mga bodyak an saiyang payo?
8Dotdota siya kan saimong kamot; isipa an pakilaban; dai mo na
giraray magigibo iyan!
9“An siisay man na nakakahiling sa Leviatan
pinanluluya asin natutumba sa daga.
10Kun siya naanggot, nagigin maringis siya;
mayo nin siisay man na nangangahas na mag-atubang saiya.
11Siisay an pwedeng magsalakay saiya asin magigin ligtas pa?
Mayo nin siisay man sa bilog na kinaban na makakagibo kaiyan.#41:11 Sa Hebreyo, an bersikulo 11 bakong malinaw.
12“Isasaysay ko saimo an dapit sa mga bitis kan Leviatan
asin ipapahayag ko saimo an kadakulaan saka kosog niya.
13Siisay an makakahuba kan panluwas niyang gubing?
Siisay an makakalabot kan sulot niyang gubing na panggera?#41:13 Sa sarong daan na traduksyon gubing na panggera; sa Hebreyo busal.
14Siisay an makakapabuka kan saiyang mga salang,
na napapalibotan nin makangingirhat na mga ngipon?
15Gibo sa dakul na kalasag an saiyang likod,
dukot-dukot na mga kalasag na matagas siring sa gapo.
16An lambang saro haraning marahay sa saro,
kaya mayong doros na nakakaagi sa pagultanan ninda.
17Pusog an pagkadurukot kan mga kalasag
kaya mayo nin makakatangkas sainda.
18Kun siya minabahon, minasilyab an liwanag,
asin an saiyang mga mata nakakaagid sa pirok nin kaagahon.
19Hale sa saiyang ngoso nagluluwas an kalayo,
asin naglulukso an mga silyab nin kalayo.
20Hale sa saiyang dungo nagluluwas an aso,
na garo aso kan nasusulong doot sa irarom nin sarong koron.
21An saiyang hinangos nakakapalaad kan mga baga,
asin minaluwas sa saiyang ngoso an kalayo.
22Makosog nin marahay an saiyang liog,
kaya gabos na nasasabat niya natatakot.
23Mayo nin malumoy na kabtang sa saiyang kublit;
garong lansang iyan sa tagas.
24An saiyang puso matagas siring sa gapo,
arog katagas kan gilingan na gapo.
25Kun siya minabangon, natataranta maski an mga maiisog;
mayo sindang nagiginibo huli sa takot.
26Mayo nin espada na pwedeng lumugad saiya;
mayong garod, bosog o bodyak na pwedeng makatadom saiya.
27Ibinibilang niya na dagami an lansang,
asin lapang kahoy an bronse.
28Dai siya napapadulag kan mga pana;
para saiya an mga gapo nin lagpitaw garo mga dagami.
29Ibinibilang niyang dagami an mga pamukpok;
minangisi siya sa ribok kan mga garod.
30An mga kiskis sa saiyang tulak garo matarom na mga pedaso nin napasang koron;
siring sa pakaras na linulugad kaiyan an malaboy na daga.
31Pinapakalakaga niya an kaladman nin dagat;
pinapasubo niya iyan arog kan lana sa koron.
32An maagihan niya nagigin makinang na dalan,
asin pinapangagi niyang maputing subo an dagat.
33Mayo nin makakaarog saiya sa ibabaw nin daga;
saro siyang linalang na mayong takot.
34Maski an mga mapaabaw-abaw na hayop ibinilang niyang hababa ki sa saiya;
siya an hade kan gabos na lalaw na hayop.”
Currently Selected:
Job 41: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
