Jeremias 9
9
1Kun sarong bubon pa sana nin tubig an sakong payo
asin sarong burabod nin luha an mga mata ko,
tanganing aldaw-bangging makapagtangis ako
para sa mga ginaradan na mga kahimanwa ko.
2Kun sa desyerto may lugar pa sana akong maeerokan
tanganing makaharayo ako sa sakong banwaan!
Gabos sinda bakong maimbod,
sarong grupo sinda nin mga parapasaluib.
3Danay sindang andam sa pagtaram nin kaputikan;
embes na katotoohan, pandadaya an nagpapalakaw kan daga.
Nagtataram an Kagurangnan,
“Sunod-sunod na karatan an ginigibo kan sakong banwaan
asin dai ninda ako minimidbid bilang saindang Dios.”
4An lambang saro dapat na mag-ingat sa saiyang katood,
saka dai siya manarig maski sa saiyang tugang;
huli ta an lambang tugang madaya arog ki Jacob,
saka an lambang saro nagbabalobagi laban sa saiyang katood.
5An gabos nandadaya sa katood niya,
mayong nagtataram nin katotoohan;
tinukdoan ninda an saindang dila na magtaram nin kaputikan
asin dai sinda maontok sa paggibo nin kasalan.
6Sunod-sunod na kadahasan an ginigibo ninda,
asin an gibo nindang pandadaya mayo nin kataposan.
An Kagurangnan nagsasabi na isinisikwal siya
kan saiyang banwaan.
7Huli kaini minasabi an Kagurangnan nin mga hukbo,
“Lilinigan ko an sakong banwaan
asin babaloon ko sinda.
Huli ta ano pa an sakong magigibo
para sa banwaan kong naggibo nin karatan?
8An saindang dila garo bosog nin pana na nakakagadan;
danay sindang nagsasabi nin kaputikan.
An lambang saro nagtataram nin magayon sa saiyang kanatad,
alagad an totoo, nagbubugtak siya nin siod para saiya.
9Dai ko daw sinda papadusahan huli kan mga bagay na ini?
Dai ko daw babaloson an siring na nasyon?
Ako, an Kagurangnan, an nagtaram.”
10Nagsabi ako, “Magmomondo ako para sa kabukidan
asin magtatangis para sa mga pasabsaban,
huli ta aralang na sinda,
asin mayo na nin nag-aagi sainda.
An inungal kan mga hayop dai na nadadangog;
an mga gamgam saka mga lalaw na hayop nagdurulag saka nagharale na.”
11Nagtataram an Kagurangnan, “An Jerusalem gigibohon kong sarong tambak nin mga raot,
sarong lugar na eerokan nin mga lalaw na ayam;
an mga syudad nin Juda magigin sarong desyerto,
lugar na mayong nag-eerok na tawo.”
12Naghapot ako, “Kagurangnan, tadaw ta raot an daga saka alang arog sa desyerto. Tadaw ta mayo na nin nag-aagi digdi? Siisay na madonong an nakakasabot kaini? Kiisay mo ipinaliwanag an nangyaring ini tanganing ikasabi niya sa iba?”
13Nagsimbag an Kagurangnan, “Nangyari ini huli ta tinalikodan kan sakong banwaan an katukdoan na itinao ko sainda. Dai sinda nagkuyog sako ni naggibo kan itinaram ko sainda. 14Embes kaiyan, nagmatagas sinda saka nagsamba kan mga ladawan ni Baal arog kan itinukdo sainda kan saindang mga ama. 15Kaya hinanyoga an gigibohon ko, ako an Kagurangnan nin mga hukbo, an Dios nin Israel: Papakakanon ko nin mapait na tinanom an sakong banwaan asin papainomon ko sinda nin tubig na may hudong. 16Iwawarak ko sinda sa mga nasyon na dai pa lamang ninda nadangog, ni kan saindang mga ginikanan. Mapadara ako nin mga hukbo na masalakay sainda sagkod na maubos ko sinda.”
Naghagad nin tabang an mga Taga Jerusalem
17Nagtaram an Kagurangnan nin mga hukbo,
“Horophoropa nindo an nangyayari!
Apoda nindo an mga paratangis,
an mga babaeng tood na manambitan.”
18Nagsabi an mga tawo,
“Pahidalion nindo sinda tanganing manambitan para sato
sagkod na magburulos an luha sa satong mga mata,
asin maghurubag ini huli kan satong pagtangis.”
19Hinanyoga an tingog nin pagtangis sa Sion:
“Raot na kita!
Hinalean na nanggad kita nin onra!
Dapat kitang maghale sa satong daga;
huli ta ginaraba na an satong mga harong.”
20Nagsabi ako,
“Kamong mga babae, paghinanyog kamo sa Kagurangnan,
asin akoon nindo an saiyang mga tataramon.
Tukdoan nindong magmondo an saindong mga aking babae
asin manambitan an saindong mga katood.
21Huli ta naglaog an kagadanan sa satong mga bintana,
asin naglaog man sa satong mga palasyo;
ginadan kaini an mga aking nasa tinampo
asin an mga hoben na lalaki sa mga plasa.
22Nagwararak maski saen an mga bangkay,
na garo mga tambak nin ati sa kaomahan,
na garo mga paroy na inasyab kan mga paraani
dangan binayaan na mayo nin minatipon.
Ini an ipinapataram sako nin Kagurangnan.”
23Nagtataram an Kagurangnan,
“Dai dapat ipag-orgulyo kan madonong an saiyang kadonongan,
ni kan makosog an saiyang kosog,
ni kan mayaman an saiyang yaman.
24Kun may boot mag-orgulyo,
ipag-orgulyo niya na namimidbidan asin nasasabotan niya ako,
huli ta nagdadanay an sakong pagkamoot,
saka ginigibo ko an tama asin matanos.
Iyan an mga bagay na nawiwilihan ko.
Ako, an Kagurangnan, an nagtaram.”
25-26Nagtataram an Kagurangnan, “Maabot an panahon na papadusahan ko an mga taga Egipto, Juda, Edom, Ammon, Moab, asin an mga taga desyerto, na nagpuputol kan saindang buhok.#9:25-26 NAGPUPUTOL KAN SAINDANG BUHOK: An mga taga desyerto nagpuputol kan saindang buhok bilang pag-omaw sa saindang dios-dios, sarong paganong kaugalean na ipinapangalad sa mga Israelita (hilingon sa Lev. 19:27). An mga tawong ini sinerkomsisyon na alagad dai ninda inotob an tipan na hinahagad sa mga sinerkomsisyon. Maski saro sa mga tawong ini, asin maski saro sa banwaan kong Israel, dai nag-otob kan sakong tipan.”
Currently Selected:
Jeremias 9: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
